رواية قطار الأقدار
الفصل الثاني عشر 12 والثالث عشر 13
بقلم عادل عبدالله
ريم : كل يوم بتنزل من سبعة الصبح وترجع تفضل في الدروس وتطلع علي النوم !! دي مش عيشة يا علاء !!!
علاء : يا قلبي علشان نأمن مستقبلنا ، ده غير مصاريف امي واخواتي .
ريم : يعني علشان نأمن مستقبلنا نضيع حاضرنا اللي عايشينه دلوقتي ؟!!!
علاء : لا يا حبيبتي ، عندنا يوم الاجازة نقضيه كله مع بعض .
ريم : وباقي الايام اعمل ايه ؟؟ افضل بين اربع جدران اكلم نفسي ؟!!!
علاء : ايه رأيك تنزلي عند ماما واخواتي ؟؟
ريم : تااااني يا علاء ؟!! ما انت عارف ان اخواتك مش بيطقوني .
علاء " بعصبية " : وانا المطلوب مني اعمل ايه ؟؟ اقعد جنبك !!!
ريم : خلاص يا علاء .
انتهت المناقشة بينما كانت ريم تشعر بسخط جم .
في المدرسة
يفاجئ علاء بأمرأة ترتدي ملابس الحداد السوداء تطلب لقاؤه !!!
علاء : ايوه يا فندم انا مستر علاء ، اؤمريني .
المرأة : معلش انا جاية لحضرتك في طلب لكن محرجة اوي .
علاء : اتفضلي تحت امرك .
المرأة : انا ابني في الدرس عند حضرتك من اول السنة ، والحقيقة والده لسه متوفي من اسبوعين ومش هنقدر ندفع لحضرتك اجرة الدرس الفترة الجاية .
علاء : يعني عايزاني اعفيه من اجرة الدرس ؟!
المرأة : ياريت ، لو مفيش عند حضرتك مانع .
علاء : للاسف انا مش هقدر اعفيه من مصاريف الدرس لأن عدد اللي بساعدهم مجانا كامل دلوقتي .
المرأة : لو اخدت ابني معاهم ربنا هييباركلك ، مش هيفرق معاك ولد واحد .
علاء : كل اللي بيجيلي بيقولي مش هتفرق من واحد !!! انا يا ست الكل بصرف علي امي وثلاث اخوات بنات ايتام وعيالهم ده غير مراتي ، وغير اللي بساعدهم .
المرأة : يعني هتكسر بخاطري ؟؟ ده انا زي والدتك او اختك الكبيرة !!
علاء : اسف مش هقدر اساعدك ، معلش انا عندي حصة دلوقتي .
سارت المرأة ودموعها تنساب علي وجهها ، بينما جري خلفها زميله عمر ثم وقف معها ووعدها بمساعدة ابنها مجانا .
عاد عمر قائلا : حرام عليك يا علاء كسرت بخاطر الست !!
علاء : كفاية انت روحت جبرت بخاطرها .
عمر : ايوه ، الست كانت ماشية ودموعها في عينيها .
علاء : والنبي يا عمر جو الصعبنيات ده انا مليش فيه ، انا لو هعمل زيك كده مش هلاقي اكل .
عمر : انت حر يا علاء ، خلي بالك انا سمعت الست كانت بتدعي عليك !!!!
علاء " يضحك " : مش بقولك بطل جو الصعبانيات ده !! خلي دعواتها تنفعها .
ثم يأتيه اتصال علي هاتفهه ...
علاء : ايوه يا ماما ، صباح الخير .
ام علاء : صباح الفل يا حبيبي .
علاء : خير يا ماما ؟ فيه حاجة ؟
الام : كنت عايزة افكرك بالجمعية اللي عملنها لجهاز اخواتك ، ميعادها النهاردة .
علاء : انا هبعتلك الفين جنية النهاردة وانتي حطي ال الالف الباقيين من الفلوس اللي معاكي .
ام علاء : انا يا حبيبي مش معايا فلوس .
علاء : طيب انا مش معايا الا الفين دلوقتي !!!
ام علاء : وفين فلوسك يا علاء ؟!!
علاء : انتي ناسية يا ماما اني فاتح بيت ومراتي لها طلبات ومصاريف ؟!!!
في المنزل
تقوم ريم بالاعمال المنزلية ولكنها مازال الملل يقت.لها !!
تنزل ريم لشراء بعض طلبات المنزل فتقابل سهير علي درج المنزل ...
سهير : رايحة فين يا ريم ؟
ريم : صباح الخير يا سهير ، رايحة اشتري طلبات للبيت .
سهير : مالك شكلك متضايقة ليه ؟؟
ريم : انا زهقت كل يوم اقعد لوحدي بين اربع حيطان لحد نص الليل لما يرجع اخوكي ياكل وينام !!
سهير : معلش اعذريه ، هو شغله كده ، واغلب شغله بيكون تحت في الدور الاول بعني مش بعيد .
ريم : ايوه مش بعيد لكن انا بردو قاعدة لوحدي !! زهقت .
سهير : ما انا قولتلك تعالي اقعدي معانا وانتي اللي مش بتوافقي .
ريم : اخواتك مش بيحبوني وبيقولوا كلام معلش يعني زي السم .
سهير : علشان مش واخدين عليكي ، عارفة لما تاخدوا علي بعض هتلاقيهم لطاف جدا .
ريم : نتجمع في شقة حماتي احسن ، علشان في شقتك بخاف منهم .
سهير : زي ما تحبي يا حبيبتي .
تجتمع ريم مع اخوات علاء عند حماتها ...
الام : ايوه كده يا بنتي ، انا نفسي تنزلي تقعدي معايا .
ربم : وليه مش قولتيلي ؟
الام : خوفت لتفتكريني عايزاكي تعمليلي حاجة في البيت ، انا الحمد لله بصحتي و جنبي بدل البنت تلاتة بيعملولي كل طلبات البيت .
ريم : وماله يا ماما لما اعملك طلباتك !! طيب ايه رأيك النهاردة هتأكلي من ايدي .
الام : بجد ؟؟
ريم : ايوه .
وبدأت ريم تعد لهم الطعام و بعد ان انتهت جلسوا يتناولون الطعام .
و لعدة ايام بدأت ريم تنخرط معهم وبدأ الملل يغادر حياتها ولو مؤقتا .
علاء : عاملة ايه مع ماما واخواتي ؟
ريم : الحمد لله كويسين احسن من الاول .
علاء : ما انا قولت علي ما تاخدوا علي بعض وبعد كده هتلاقي الدنيا تمام .
ريم : ولو عايزني اساعدك في الدروس كمان .
علاء : لا بلاش ، خليكي احسن مع ماما واخواتي .
في شقة والدته
علاء : ازيك يا ماما ؟ ريم عاملة معاكوا ايه ؟
الام : انا مش عارفة انت بتاكل من ايدها ازاي !!! دي مبتعرفش تطبخ !!!
علاء : بالعكس يا ماما دي ريم اكلها لذيذ وجميل اوي .
الام : مادام عاجبك انت حر .
علياء : ايوه يا علاء فعلا اكلها مش حلو زي اكل ماما .
امينة : وكمان لما نزلت معها السوق نشتري خضار وطلبات البيت كانت بتصرف وكأنها مش هممها الفلوس !! ما هيه مش تعبانة فيها !! حاول تخليها تمسك ايديها شوية في المصاريف .
في المساء
في شقة علاء
علاء : باقي معاكي فلوس قد الايه من مصروف البيت ؟؟
ريم : كويس انك فكرتني ، الفلوس قربت تخلص .
علاء : ليه ؟؟ انتي بتصرفي من غير حساب ؟!! هو انتي مش عارفة انا بتعب ازاي في الفلوس دي !!!
ريم : عارفة يا حبببي لكن الحاجة غالية .
علاء : غالية ايه !! انتي لازم تمسكي ايدك شوية في المصاريف .
ريم : انت هتخوفني منك ليه ؟!! انت باين عليك بخيل ولا ايه ؟!!
علاء : لا يا حبيبتي مش بخيل ، لكن انا بتعب في الفلوس دي ، ياريت علشان خاطري احس انك محافظة علي فلوسي .
ريم : المفروض ان فلوسي وفلوسك حاجة واحدة ، صح ؟
علاء : ايوه اكيد .
ريم : يبقي الكلام اللي بتقوله ده ملوش لزوم .
بعد ايام ...
في شقة ام علاء
ام علاء : هتعملي الاكل يا ريم ؟
ريم : ايوه با ماما ، تحبي تاكلي ايه النهاردة ؟
ام علاء : طلعي فرخة من التلاجة واطبخي اي حاجة .
ريم : حاضر يا ماما .
وبعد انشغال ريم في المطبخ تماما ...
ام علاء : انا نازلة رايحة عند اختي علشان تعبانة واتصلت بيا .
ريم : تحبي اروح معاكي ؟
ام علاء : لا يا حبيبتي انا رايحة انا والبنات وخليكي انتي كملي الطبيخ .
ريم : طيب انا هاخد الحاجة واطبخها فوق .
ام علاء : ليه يا حبيبتي ؟؟
ريم : هتنزلوا كلكوا وتسبوني لوحدي !! ميصحش اقعد هنا وانتوا مش موجودين .
ام علاء : عيب لما تقولي كده يا ريم ، انتي خلاص بقيتي واحدة مننا و زي بنتي بالظبط ، احنا هننزل ومش هنتأخر وخليكي هنا البيت بيتك .
ريم : حاضر يا ماما زي ما تحبي .
بعد ساعتين عاد علاء فوجد زوجته في شقة والدته !!!
علاء : بتعملي ايه يا حبيبتي هنا ؟ وماما واخواتي فين ؟
ريم : بطبخ زي ما انت شايف و مامتك واخواتك نزلوا من بدري راحوا لخالتك علشان تعبانه .
علاء " يبتسم " : تعرفي انك وحشتيني اوي .
ريم " تضحك " : طيب ما انا معاك كل يوم فوق !!
علاء : ايوه بس انتي واحشاني اوي دلوقتي .
ريم : طيب انا قربت اخلص ونطلع شقتنا .
علاء : لأ تعالي ندخل نريح شوية في اوضة ماما .
ريم : لا لا مش هينفع .
علاء : علشان خاطري .
ريم : يا حبيبي مينفعش ولو جم وشافونا هيبقي شكلنا وحش اوي !!
علاء : يا حبيبتي احنا متجوزين ، يلا .
ريم : يا علاء !!!
علاء : علشان خاطري .
يتبع
#رواية_قطار_الأقدار
الحلقة ١٣
ريم : يا حبيبي مينفعش ولو جم وشافونا هيبقي شكلنا وحش اوي !!
علاء : يا حبيبتي احنا متجوزين ، يلا .
ريم : يا علاء !!!
علاء : علشان خاطري .
بعد بعض الوقت صعد علاء وربم الي شقتهم .
عادت ام علاء واخوته ونادت علي ريم ، فنزلت اليها ...
ريم : حمدلله ع السلامة .
ام علاء : الله يسلمك ، اتأخرنا عليكي يا حبيبتي ؟
ريم : اتأخرتوا اوي .
علياء : خلصتي الاكل ؟؟
ريم : ايوه خلصت ، وطلعت علشان علاء رجع من المدرسة .
سهير : كويس انك خلصتي الاكل ، انا همو.ت من الجوع .
ريم : الف هنا يا سوسو ، انا طالعه لعلاء .
في شقة علاء
علاء يستحم ويسمع صوت باب الشقة !!
علاء : كنتي فين يا حبيبتي ؟؟
ريم : مامتك واخواتك رجعوا وكنت بكلمهم ، انت لسه بتستحمي ؟؟
علاء : ايوه ، ما تيجي ؟؟
ريم : لأ ، خلص واخرج ، انا هجهز الاكل علي ما تخرج علشان جعانه اوي .
خرج علاء وجلس يتناول الطعام مع ريم التي تضحك وتقول : انت مجنون يا علاء !! كان لزمته ايه اللي عملته تحت ده ؟؟
علاء " يضحك " : كنتي وحشاني اوي .
ريم : كان هيجري ايه لو استنيت لما نطلع شقتنا ؟!!
علاء : مقدرتش استني .
ثم يسمعا صوت طرقات قوية وسريعة علي باب الشقة !!!!!!
ريم : يا ساتر يارب ، فيه ايه ؟؟
نهض علاء سريعا وفتح الباب ليجد والدته وخلفها اخوته !!!
علاء : خير يا ماما فيه ايه ؟؟
الام : هي فين الحرامية اللي عندك ؟؟
علاء : حرامية !!!!!!
ابعدته امه عن طريقها ودخلت ومعها اخوته ...
ام علاء : تعالي هنا يا حراميه .
ريم " بدهشة " : انتي بتكلمي مين يا حماتي ؟؟
ام علاء : بكلمك انتي ، هو فيه حرامية في البيت هنا غيرك !!!
ريم : حرامية !!! ايه اللي بتقوليه ده ؟!!! انتي عارفة بتقولي ايه ؟؟
علياء : بطلي يا بت الحركات دي .
ريم : حركات ايه ؟؟ انتوا بتقولوا ايه ؟ انا مش فاهمة حاجة !!!
ام علاء : طلعي السلسلة الذهب يا حرامية .
ريم : انتي بتكلميني انا ؟!!! انتي ايه اللي بتقوليه ده !!!
ام علاء : بقولك طلعي السلسلة اللي سرقتيها يا حرامية .
علاء : ايه اللي بتقوليه ده يا ماما ؟؟
علياء : ماما كانت سايبة سلسلة دهب في الدولاب ولما رجعنا كانت اوضة نومها مفتوحة والدولاب مفتوح والسلسلة مش موجودة !!! ومراتك كانت لوحدها في الشقة !! يكون مين اللي اخدها غيرها ؟! اكيد مراتك اللي سرقتها .
ريم : اخرسي قطع لسانك .
ام علاء : يعني حرامية وقليلة الادب !!!
علاء : بسسسسس خلاص اسكتوا كلكوا ، انزلي يا ماما بعد اذنك وخديهم معاكي دلوقتي .
ام علاء : والسلسلة ....
علاء " بغضب " : انزلوا يا ماما بعد اذنك .
نزلت ام علاء واخوته بينما جلست ريم تبكي بشدة .
علاء : خلاص بطلي عياط علشان نتكلم
ريم : شوفت امك واخواتك بيقولولي يا حرامية !!! انا حرامية يا علاء ؟!!
علاء : انتي فعلا مشوفتيش السلسلة اللي ماما بتقول عليها ؟؟
ريم : انت كمان ؟!!! انا لازم امشي مش هقعد في البيت ده تاني .
علاء : انا مش قصدي ، انا بسألك مش اكتر .
ريم : انت لما جيت كانت اوضة امك مقفولة ، صح ؟؟
علاء : ايوه فعلا .
ريم : مش انت يا علاء اللي دخلت الاوضة قبلي وناديت عليا ؟؟
علاء : ايوه حصل .
ريم : لما طلعت كان الدولاب مفتوح ؟؟
علاء : لأ .
ريم : امك واخواتك قصدوا يمشوا ويلبسوني التهمة دي علشان يفرقوا بينا و تطلقني يا علاء .
علاء : طيب خلاص متزعليش ، انا هتصرف .
ريم : هتعمل ايه ؟
علاء : انا هتصرف يا ريم .
نزل علاء عند والدته واخوته ...
ام علاء : ينفع اللي مراتك عملته ده يا علاء ؟؟
نظر علاء لها ولأخوته نظرة حادة ثم قال لها : انا اللي اخدت السلسلة .
ام علاء " بدهشة " : ايييييه ؟؟!!!
علاء : بقولك انا اللي اخدت السلسلة .
شعرت ام علاء بالحرج والحيرة ثم قالت " بارتباك " : ااانت بتقوول كده علشان تبرأ مراتك .
علاء : لأ ، انا اللي اخدتها .
امينة : اخدتها ؟؟؟؟؟
علاء : ايوه .
امينة " بتحدي " : طيب هي فين السلسلة ؟؟
علاء : اتصرفت فيها ، كنت محتاجها ، وعلي العموم هجيبلك غيرها يا ماما لما يكون معايا فلوس .
انصرف علاء من شقة والدته شارد الذهن يفكر في تلك المكيدة التي صنعتها والدته واخوته لزوجته !!! و شكل العلاقة بينهم فيما بعد !!!
عاد علاء الي زوجته التي بمجرد دخوله الشقة سألته : عملت ايه يا علاء ؟
علاء : خلاص انا خلصت الموضوع .
ريم : ازاي ؟؟
علاء : قولتلهم ان انا اللي اخدت السلسلة .
ريم : وليه تقولهم كده ؟؟!! وانت عارف انهم بيكدبوا !!!
علاء : انا عارف ، لكن قولت كده علشان اخلص الموضوع .
ريم : وبعدين يا علاء ؟؟ اهلك مش هيسبوني في حالي !!! احنا لازم نسيب البيت ده ونشوف شقة لنا بعيد عنهم .
علاء : مش هينفع اسيبهم من غير راجل !! ومادام هما عملوا كده انتي تبعدني عنهم خالص بعد كده ، خليكي في حالك وهما في حالهم .
مرت اسابيع عدة و علاء مازال مشغولا تماما في عمله ، بينما ريم اصبح روتين يومها اكثر مللا كل يوم عن سابقه .
يغادر علاء المنزل صباحا كل يوم بينما لا تنشغل باعمال المنزل اكثر من ساعتين ثم تبدأ رحلتها مع الملل ما بين هاتفها و التلفاز !!!
ذات يوم ذهبت ريم الي السوق لشراء بعض متطلبات المنزل وظلت تسير بين الشوارع والطرقات تشاهد فتارين العرض للمحلات حتي شعرت بارهاق قدميها فجلست للأستراحة في احد الكافيهات و تناولت عصير ليمون .
حين شعرت بالراحة قامت و عادت الي المنزل .
شعرت في ذلك اليوم بكسر لحالة الملل المسيطرة عليها وان الحياة بدأت تدب في اوصالها من جديد .
احبت تلك النزهة الصباحية و اصبحت عادتها كل يوم استهلاك وقت كبير ما بين مشاهدة فتارين المحلات وبين الجلوس في الكافية وحدها !!!
في الكافية
جلست ريم علي احدي الطاولات وامامها عصير الليمون المنعش و بدأت تقرأ روايات علي هاتفها كعادتها !!
علي الجانب الاخر كان يجلس رجل اربعيني يرمقها بنظراته ويحاول جذب انتباهها !!
لم تنتبه له ريم فنادي علي عامل الكافيه وسأله عنها ، فاجابه انه لا يعرف عنها الا انها منذ عدة ايام تأتي كل يوم صباحا في نفس التوقيت وتجلس وحيدة لساعة او اثنتين ثم ترحل .
فوجئت ريم بعامل الكافيه يقدم لها احدي المشروبات المثلجة مرة اخري !!!
ريم : ايه ده ؟ انا مطلبتش حاجة تاني !!
العامل : الاستاذ تامر اللي طلبه لحضرتك .
ريم : مين تامر ده ؟؟ وليه يطلبلي حاجة ؟!!
العامل : استاذ تامر اللي قاعد هناك ده .
ريم : رجعله المشروب ده انا مش باخد حاجة من حد معرفوش .
انصرف العامل ونظرت ريم تجاه الرجل فوجدت رجل اربعيني انيق ووسيم يبتسم لها في ثقة !!!
نفخت في غضب و استدارت ريم حتي لا يكون ذلك الرجل في مواجهة نظرها ، ففوجئت به يأتي ليجلس علي طاولتها !!!
ريم : انت مين وايه اللي بتعمله ده ؟!!
الرجل " بابتسامة " : انا اسمي تامر وشوفتك قاعدة لوحدك وانا لوحدي قولت نقعد مع بعض احسن !!
ريم " بصوت عال وغضب " : انت مجنون اكيد !! انت ازاي تيجي تقعد وتفرض نفسك عليا بالشكل ده ؟!!!
ارتفع صوت ريم عاليا فحاول الرجل تهدئة الموقف الا انها انصرفت سريعا !!
تامر : حلوة اوي اوي ..
العامل : حضرتك خسرتنا زبونة يا استاذ تامر !!!
تامر : هتيجي تاني .
العامل : بيتهيألي مش هتيجي هنا تاني .
تامر : لو قدرت تقنعها تقعد معايا و تفهمها اني مكنش قصدي اضايقها هيكون لك عندي مكافأة حلوة اوي .
العامل : لو جات تاني احاول اقنعها .
تامر : اكيد هتيجي تاني .
خرجت ريم غاضبة من ذلك الموقف و عزمت علي الا تعود مرة اخري الي هذا المكان .
عادت ريم الي المنزل وكلما تذكرت ذلك الموقف اصابها الغضب !!
في المساء
عاد علاء الي المنزل ولاحظ بعض علامات الغضب عليها !!!
علاء : مالك يا حبيبتي ؟
ريم : مفيش .
علاء : شكلك زعلانة ومتضايقة !! فيه حد زعلك او ضايقك ؟؟
ريم " بتعجب " : حد زي مين ؟؟
علاء : ماما او علياء او اي واحدة من اخواتي .
ريم : لا لا مفيش حاجة .
علاء : لكن شكلك زعلانة !!!
ريم : اصل كنت بقرأ رواية واندمجت معها شوية ممكن ده اللي أثر فيا .
علاء : بلاش تندمجي اوي كده مع الروايات ، دي كلها قصص خيالية .
ريم : لكن بتكون فيها من الواقع ، وبعدين دي الحاجة الوحيدة اللي بتسليني في غيابك طول اليوم .
علاء : اقرأي برحتك يا حبيبتي لكن بلاش تندمجي معها اوي بالشكل ده .
في اليوم التالي
خرجت ريم كعادتها وحينما وصلت الي الكافيه تذكرت موقف الامس السخيف الذي حدث من هذا الرجل ، فتراجعت وعادت الي المنزل .
مر عليها اليوم بشعور كبير بالملل فقررت ان تذهب للكافيه في اليوم التالي .
في اليوم التالي ذهبت ريم الي الكافيه و كانا تخشي ان يتعرض لها هذا الرجل ( تامر ) مرة اخري !! و بمجرد دخولها كانت عيناها تترقبان وجوده في المكان ولكنها لم تراه فأطمأنت و نادت عامل الكافيه و طلبت مشروبها .
بعد قليل دخل تامر من الباب وبمجرد ان رأته بدأت تتوتر ، ولكنه ابتسم واقترب من طاولتها وسألها : تسمحيلي اقعد ؟؟
ريم : أنت تاني ؟؟ علفكرة كده قلة ذوق اوي .
تامر سحب الكرسي وجلس قائلا : علفكرة حضرتك مكبره الموضوع زيادة عن اللزوم ، انا ....
ريم : انا مش عايزة اسمع منك حاجة ، وياريت تقوم قبل ما اعمل حاجة تخلي شكلنا وحش اوي قدام الناس .
تامر " بابتسامة " : حاضر انا هقوم ومش هسببلك ازعاج تاني ، لكن عايزك تفهمي كويس انك فاهماني غلط ولو فهمتيني صح هتعرفي انك غلطانه .
ريم : طيب اتفضل وانا مش عايزة افهم حاجة .
انتقل تامر الي طاولة اخري بعبدا عنها واخرج هاتفهه وظل يتحدث فيه ويبتسم !!!
ظلت ريم جالسة لبعض الوقت حتي جائها اتصال من زوجها .....
ريم : الو ... ايوه يا علاء .
علاء : انتي فين ؟؟
ريم : انا في السوق بشتري طلبات للبيت .
علاء : متأكدة ؟؟
ريم : ايوه وبتمشي شوية ، فيه ايه ؟ اول مرة تسألني انتي فين !!!
علاء : طيب روحي علشان انا راجع البيت دلوقتي .
ريم : فيه ايه يا علاء ؟!!
علاء : لما ارجع البيت نتكلم ...