الفصل الخامس عشر 15
بقلم رباب حسين
يوسف / انا بحبك
نظرت له نور وقالت / وانا بحبك أوي
ظل ينظر في عينيها واقترب منها.... اخفضت نور رأسها..... وضع يوسف يده على ذقنها ورفع وجهها إليه ونظر في عينيها بعشق وقبلها
ابتعدت نور عنه وقالت / جون قولنا مش هنعمل كدة تاني
نظر لها يوسف وعقد حاجبيه وقال في نفسه / هل قبلها من قبل؟
ثم نهض من السرير ويبدو عليه الضيق
نور / فيه إيه؟!!! زعلت ليه؟!!!
يوسف / لا مش زعلان.... تصبحي على خير
ذهب يوسف من الغرفة وعاد إلى غرفته وهو يشعر بالضيق والحزن.... لا يستطيع التنفس ويحدث نفسه بصوت مسموع
يوسف في توتر / إزاى يعمل كدة؟!!.... إزاى يلمسها.... إزاى يعمل ذكرى معاه زي ديه.... نور ديه حبيبتي انا
وضع يده على رأسه يشعر بصداع شديد رأسه يكاد ان ينفجر وهو يردد
يوسف / إزاى تاخد حاجة مش بتاعتك.... فاكر نفسك إيه؟!! انت عامل زي الطفيلي اللي بيتطفل علي حياتي بدون إذن.... انت مرض.... ولازم تختفي.... لازم اخف منك
فجأة استمع يوسف إلى صوت داخل رأسه
الصوت / نور ديه حبيبتي انا.... انت حتى مش قادر تعترفلها بحبك..... حتى لما قربتلها.... قربتلها علي إني انا
يوسف وهو يضرب يده برأسه كالمجنون / اسكت..... اسكت..... انت اللي مستخبي في شخصيتي وبتصرف من فلوسي.... انا الأصل.... انت ولا حاجة
الصوت / الولا حاجة ده هو اللي قادر يجيب طار أبوك..... هو اللي محافظ على وجود نور هنا..... هو اللي انت بتستخبي وراه زي العيل الصغير عشان أظهر وأواجه المواقف اللي انت أضعف من إنك تواجهها
يوسف في غضب / أنا مش ضعيف..... مش ضعيف.... وهتشوف أنا هعمل إيه..... هتشوف هعمل فيك إيه
الصوت / مش هتقدر تعمل حاجة.... عشان جبان
هنا وخرج يوسف إلى غرفة نور ودخلها فجأة... فزعت نور وقامت من السرير
نور / فيه إيه يا جون؟!!! حصل إيه؟!!!
يوسف في غضب / انا مش جون.....ومش عايز يبقي فيه جون..... اديني أدوية تخليني أخلص منه.... انتي الدكتورة بتاعتي ولازم تعالجيني..... لكن انتي أصلاََ مش عايزة تعالجيني مش عايزة جون حبيب القلب يختفي صح؟!!!.... لو منفذتيش اللي انا عايزه همشيكي من هنا.... واجيب ١٠ دكاترا غيرك يعالجوني
نظرت له نور ولا تستوعب ماذا يحدث امسكت ذراعه وجذبته ليجلس وقالت / أهدى بس يا يوسف وتعالي قولي إيه اللي حصل لده كله؟!!!
أبعد يوسف يدها عنه وقال في غضب / أبعدي عني..... مش هسيبك تخدعيني تاني..... لو منفذتيش اللي انا عايزه مش هتقعدي في البيت ده ثانية واحدة انتي فاهمة
دخلت فريدة وقالت / فيه إيه بتزعقو كده ليه في نص الليل؟!!!
يوسف / ماما خرجي نفسك من الموضوع ده خالص
نور / طيب لو سمحت أهدى واتكلم معايا
يوسف / انا قلت اللي عندي ومش هقول كلام تاني.... هتنفذي اللي انا عايزه ولا لا؟؟!!
نور / يوسف اللي انت بتطلبه ده مستحيل.... علاجك مش برشام ولا مهدئات.... احنا بنتقدم شوية شوية..... والموضوع محتاج صبر ووقت
الصوت داخل رأسه / قولتلك نور ديه حبيبتي انا ومش هتقدر تستغني عني.... عشان بتحبني انا مش انت
أمسك يوسف رأسه وأخذ يصرخ / أسكت..... أسكت
وأمسك الكرسي وضربه بالمرآة بالغرفة صدمت نور وصرخت فريدة من الزعر.... ذهبت نور مسرعة إلى حقيبتها و أخرجت حقنة لتهدأة الأعصاب ووضعتها في رقبة يوسف من الخلف.... نظر إليها ثم بدأ أن يهدأ أمسكت به وساعدتها فريدة ووضعته بالفراش.... وأغمض عينيه في تعب وهو يردد.... أسكت.... أسكت
نظرت له نور وأمسكت يده وبكت.... نزلت فريدة بجانبه وأخذت ترتب علي رأسه ومسكت بيد نور وبكت هي الأخرى... بعد قليل هدأو وقالت فريدة / حصل إيه يا نور!؟!!؟ فهميني
نور في بكاء / انا مش فاهمة حاجة.... جون كان هنا وقعد معايا كتير وكنا بنتكلم عادي جداََ.... ومشى مفيش ١٠ دقايق دخل يوسف زي المجنون.... مشي أمتي جون..... وهو جيه أمتي وإيه اللي حصل وصله للحالة ديه؟!!!... مش عارفة
فريدة / مش من عادة يوسف إنه يرجع فجأة وجون موجود بيحصل العكس دايماََ
نور / ده عشان شخصية جون كانت أقوى من يوسف..... لكن يوسف بدأ يبقي قوي... وبدأ يتصرف لوحده من غير مساعدة جون.... وهنفضل كده لحد ما يوسف يقدر يتحكم في كل مشاعر جون وبالتالي يتحكم فيه..... لو فرضنا إن ده اللي حصل ويوسف قدر يرجع بسرعة برده إيه اللي وصله للحالة ديه؟!!!
فريدة / لاحظتي لما مسك دماغه وقعد يقول أسكت..... كان بيكلم مين!؟!!!
نور بعد تفكير / معقولة جون بدأ يتواصل معاه جوا دماغه..... ده كدة يبقي الدمج بدأ يتم..... بس المفروض ميبقاش بالشكل ده.... على الأقل يبقي بهدوء عشان يعرفو يرجعو شخص واحد مش منفصمين..... انا فعلاََ مش فاهمة..... فيه حلقة مفقودة..... على العموم هضطر استني أما يوسف يفوق وبعدين أحاول افهم منه
فريدة / هو هيفوق أمتي؟!!!
نور / ممكن بعد الضهر..... روحي ارتاحي يا مدام فريدة..... انا هفضل جنبه
فريدة / لا خليني جنبه شوية..... أول مرة في حياتي أشوفه كدة
نور / معلش..... مرضه مش سهل..... واحنا كنا عارفين إن الطريق هيبقي صعب بس دلوقتي أقدر اقولك إن قريب جداََ هترتاحي
فريدة / اتمنى.... نفسي إبني يرجع زي الأول وابطل أخاف عليه
نور / صدقيني هيرجع أحسن من الأول
نهضت نور وقامت بجمع الزجاج من الأرض وأعادت ترتيب الغرفة
فريدة / تفتكرى يا دكتورة كان بيقوله إيه؟!؟؟
نور / أعتقد إن الحوار مكنش حلو..... شخصية جون عدوانية شوية.... ورأيه في يوسف إنه جبان.... وأكيد استفذه... وده اللي خلي يوسف بالعصبية ديه
فريدة / انا عارفة إنك تعبتبي مع يوسف أوي واستحملتي كتير.... بس بصراحة عندي أحساس إن محدش غيرك كان هيقدر يعالجه..... مش بس عشان دكتورة ممتازة وكمان عشان حبك ليه
نظرت نور إلى الأرض في خجل وقالت / انا بحبه بس هو بيبعد نفسه عني.... ليه بيعمل معايا كدة؟
فريدة / انا متأكدة إنكم هتبقو لبعض في الأخر
نظرت لها نور وابتسمت في أمل ثم قالت / روحي نامي حضرتك ومتقلقيش عليه
نهضت فريدة وقبلت يوسف وقالت / تصبحي على خير.... وذهبت إلى غرفتها
ظلت نور بجانب يوسف تطلع إليه في عشق وتفكر ماذا حدث؟ ولكن لم تتوصل إلي إجابة ثم غفت بجانبه
في الصباح كانت سارة تستعد للذهاب إلي العمل كعادتها مؤخراََ.... خرجت من غرفتها ثم نظرت إلى غرفة إياد في حزن فهو لا يخرج من غرفته أبداََ ويرفض التحدث معها... قررت أن تحاول مرة أخرى عسي أن يستجيب إليها هذه المرة وتذكرت ما كانت تفعله نور معها وقررت أن تفعل مثلها..... دخلت الغرفة وجدته جالس على الأريكة وينظر إلى العدم..... ابتسمت وقالت ببهجة
سارة / صباح الفل علي أحلى إياد في الدنيا
نظر إليها ولم يجيب
سارة وهي تتمسك بمعطفها / إيه رأيك في أختك الصغيرة وهي سيدة أعمال..... لا مقولكش بقي انا عاملة شغل جامد في الشركة.... شفت عشان تعرف إن وراك رجالة
جلست بجواره ووضعت يدها على كتفه وقالت
سارة / إياد.... انا عارفة إني جرحتك بس انا كنت فاهمة غلط... وكمان صدمة موت وائل كانت مقصرة عليا... ولما نزلت الشغل ولقيت كمية المشاكل اللي في الشركة عذرتك.... والصراحة اتضايقت من نفسي.... مش عارفة إزاى حكمت عليك وانت فعلاََ ضيعت عمرك كله في الشركة.... عشان بس تخليني أعيش مرتاحة انا ووائل.... وأد إيه تعبت عشان توصل للمكانة ديه..... بس كل اللي أقدر أقوله دلوقتي إني فخورة بيك إنك أخويا الكبير..... اللي متأكدة إنه مش هيزعل مني أكتر من كدة.... وهيرجع يقف على رجله تاني ونشتغل سوا.....عشان انت مش بس أخويا الكبير لا.... انت أبويا كمان
نظر إليها وظهرت إبتسامة بسيطة علي وجهه
سارة / انا لازم امشي بس اتمنى ارجع ألاقيك مش في الأوضة.... عايزة نتعشى مع بعض زي زمان
قبلته سارة وذهبت
أما كرم فذهب إلي الشركة وذهب إلى مكتب نصر ودخله
كرم / المناقصة راحت ليوسف الألفي مش شركة الحديدي
نصر / عرفت.... أصلاََ انا هتجنن كنت متخيل إنه هيقدم علي المناقصة التانية وبعد ما دفعت رشوة عشان أطيره منها مقدمش.... يعني خسرت فلوس على الفاضي
كرم / قولتلك يا نصر بلاش نبيع الأرض هنخسر كتير مسمعتش كلامي..... إنتقامك عميك
نصر / الموضوع مبقاش إنتقام وبس يا كرم.... انا رقبتي تحت إيديهم
كرم / لسه الدكتورة ديه مخرجتش؟!!!
نصر / لا.... أظن عشان يوسف أصلاََ عامل حادثة وقاعد في البيت هي مش هتسيبه.... وبطلت تروح لبيت إياد كمان
كرم / ما خلاص سارة خفت وماسكة الشغل مكان أخوها..... وباين عليها شاطرة..... طيب إيه رأيك نخلي أي حد تبعنا يكلمها علي أساس إنه محتاج دكتورة نفسية ويديها ميعاد نخليها تخرج من البيت ونخطفها
نصر / فكرة.... شوفلي نمرتها.....أو خلي الرجالة يعرفو عنوانها يروحو يطلبو نمرتها من هناك....اتصرف يا كرم
كرم / حاضر هبلغ الرجالة
أما عند نور فاستيقظت ووجدت يوسف لا يزال نائم..... نهضت ودخلت إلى الحمام وأخذت حمام دافئ وبدلت ثيابها وخرجت وظلت بجوار يوسف..... دخلت فريدة وقالت في هدوء : لسه نايم؟!!!
أماءت نور بنعم وجلست فريدة بجواره علي السرير.... بعد قليل من الوقت استيقظ يوسف.... نظر حوله وجد بجواره نور وفريدة امسك رأسه في تعب وقال / انا نمت هنا؟!!
فريدة / اه يا حبيبي.... حاسس بإيه دلوقتي ؟!!!
يوسف / مصدع صداع رهيب
نور / يوسف.... هو انت اتكلمت مع جون
يوسف / أيوة.... كان بيتكلم في دماغي.... انا اتجننت يا دكتورة صح؟!!
نور / لا متجننتش لا حاجة.... بس انا عايزة اعرف إيه اللي قاله وصلك للحالة ديه؟!!!
يوسف / مش مهم..... المهم تديني أدوية تخفيه وخلاص
نور / حتى لو خدت الأدوية يا يوسف مش هتعرف تعيش حياتك زي ما انت متخيل ولا هتبقي طبيعي..... ولا هتعرف تشتغل ولا تمارس حياتك بشكل مريح.... وفي الأخر مش هتخف وهتفضل عايش على المهدئات وخلاص.... وانا لا يمكن أعمل فيك كدة
يوسف في إستهزاء / خايفة عليا يعني مثلاََ؟!!!.... قوليلي يا دكتورة هو حضرتك جاية تعالجي مين بالظبط.... ولا شايفة إن ليكي الحق تتحكمي في حياتي وتخلي مين اللي بقي موجود ومين لا؟!!!...انا ولا جون.... منين عايزاني اتحكم في حياتي ومحدش يتدخل فيها ومنين عايزة تفرضي رأيك عليا؟
نور / انا الدكتورة بتاعتك وعارفة انا بعمل إيه..... عارفة إن التواصل مع جون كان صعب ومرهق.... بس شوف حالتك كانت ازاى قبل انا ما اجي هنا وحالتك دلوقتي.... يوسف انت بدأت تكتشف نفسك من أول وجديد.... بقي عندك أستقلالية وتفكيرك وقراراتك....حتى أسلوبك مع الناس اختلف.... لو انت شايف إن حالتك مش بتتقدم يبقي أسمحلي أقولك إنك ما بتشوفش
يوسف في حزم / ألتزمي حدودك معايا يا دكتورة
نور / لما تلتزم حدودك معايا انت وتبطل تدخل في شغلي.... ولو حضرتك مش واثق فيا ممكن تشوف دكتور تاني
فريدة / أهدو يا ولاد.... ما كنا بقينا كويسين وبطلنا نتخانق
يوسف / هي بتعمل كل ده عشان تحميه
نور / احنا ليه بنتكلم علي جون علي إنه حد تاني.... انت وجون واحد.... لو أذيته هبقي بأذيك انت كمان.... انت اللي كونت جون جواك عشان تعرف تخرج كل مشاعرك ديه.... وقولتلك ١٠٠ مرة بطل تخبي مشاعرك جواك عشان ده بيغذيه وانت مش مساعدني
يوسف / عايزاني أعمل إيه يعني يا دكتورة..... ااااه فهمت.... عايزة نوع مشاعر خاص مني صح؟
نظرت له في غضب وقالت / تلميحاتك في منتهى القذارة
يوسف / القذارة ديه كمان كنت بخبيها جوايا عشان لا يمكن أعمل التصرفات اللي هو بيعملها..... ولا اعرف ستات ولا اشرب ولا اعيش حياته ديه.... بس واضح إن ده اللي بيجيب مع الستات دلوقتي.... للأسف المحترم مبقاش ليه نصيب في الدنيا ديه
نور / لا ده بقي غرور ملوش أي لازمة
اقتربت منه نور ونظرت إليه وقالت / فوق يا بشمهندس.... كل اللي بيعمله جون انت عايز تعمله ونفسك تعمله.... ولولا كانت قيود مدام فريدة مش عليك كنت عملته
نظر يوسف إلى عينيها وقال / مش قيود مدام فريدة بس..... انا اتربيت علي كدة.... وعمري ما كنت هسمح لنفسي إني ألمس واحدة ست غير وهي مراتي.... ماشي معاكي الأحترام ده ولا لا
نور / الناس اللي مش محترمة بس هي اللي ميعجبهاش كلامك
يوسف / يبقي تلتزمي حدودك مع جون
عقدت حاجبيها ثم استوعبت ما حدث..... هل من الممكن أنه شعر بما يفعله جون.... وهذا ما آثار غضبه؟!!! هل هي الغيرة؟!!!
يوسف / أظن فهمتيني يا دكتورة
ابتعدت نور عنه وذهبت من الغرفة
يوسف / ماما سيبيني لوحدي
خرجت فريدة ولحقت بنور أما يوسف فأغمض عينيه في تعب ثم تذكر ما حدث بينهم بالأمس وشعر بدقات قلبه تتصاعد.... فتح عينيه ونظر إلى جانبه بالسرير ووضع أنامله علي شفتيه ثم نهض مسرعاََ من الغرفة وعاد إلى غرفته بدل ثيابه وخرج من المنزل
في المساء جاء عزت إلى منزل يوسف وجد فريدة ونور يجلسون بالأسفل ويبدو علي نور الضيق
عزت / مساء الخير.... مالكم فيه إيه؟!!!
فريدة / يوسف خرج من الصبح ومش معاه تليفونه.... قلقانة عليه أوي
عزت / قلقانة عليه ليه هو عيل صغير؟!!...يمكن خرج يشم هوا بقاله كتير قاعد في البيت
فريدة / أيوة بس هو كانت حالته صعبة أوي امبارح.... شفنا ليلة مش هنساها في حياتي
عزت في زعر / حصل إيه؟!!!
قصت له فريدة ما حدث
عزت / طيب ده طبيعي يا نور؟!!!
نور / طبيعي.... متقلقش
عزت / أنا أصلاََ كنت جي أبلغه إن لازم نعمل الحفلة السنوية بتاعت الشركة ونوزع الأرباح علي الموظفين كالعادة
فريدة / اه صح... ده ميعاد الحفلة
دخل يوسف إلي المنزل ويبدو عليه الأرهاق
يوسف / مساء الخير
نهضت فريدة وأمسكت ذراعه / مساء النور يا حبيبي.... كدة يا يوسف تقلقني عليك
رتب يوسف علي يدها وقال / متقلقيش يا ماما كنت مخنوق وعايز اشم هوا
عزت / أنا قلت كدة بردة... تعالي اقعد عشان عايزك
يوسف / خير يا عمي
عزت / هنعمل الحفلة فين السنة ديه؟!!
يوسف / ااه الحفلة.... مش عارف شوف مكان مناسب واحجزه
عزت / طيب خلينا نعملها بعد بكرة الخميس.... إيه رأيك؟!!!
يوسف / لو هتلحق تظبط مكان تمام
فريدة في إبتسامة / يومين بس أدور على فستان مناسب ده صعب بالنسبالى انا
ابتسم عزت وقال / انتي أي حاجة هتلبسيها يا فريدة هتبقي حلوة.... وانتي كمان يا دكتورة أكيد لازم تحضري
نور / لا انا أخر واحدة ممكن تحضر.... معلش عندي ذكريات مع حفلات الشركات سيئة جداََ محبش أعيدها تاني
ثم نظر يوسف ونور إلى بعضهم ثم ابعد يوسف نظره عنها وقال
يوسف / الحفلة للموظفين وأصحاب الشركة يا عمي.... الدكتورة هتيجي بصفة إيه؟!!
فريدة / يعني كلنا نخرج ونسيبها في البيت؟!!!
نور / لا متقلقيش مش هبقي في البيت
يوسف / انا قلت مفيش خروج....ولا نسيتي
نور / وانا مش مطلوب مني أنفذ كلامك ولا ملزمة انفذه
يوسف في غضب / دكتورة مش عايز مناقشة
نور / ليه هو انا هنا محبوسة مثلاََ.....وبعدين مالك متضايق كدة.... انا مش واحدة من عيلتك زي ما انت لسة قايل عشان تخاف عليا ولا تحكم عليا
ثم نهضت وذهبت إلي غرفتها... ظل يوسف ينظر إلي أثرها وأغمض عينيه في حزن وتنهد
فريدة / كنا بطلنا عصبية.... رجعنا نتخانق تاني
يوسف / انا أعصابي تعبانة بجد... كلميها يا ماما انا خايف عليها
فريدة / وانا أكلمها ليه؟!!! اطلع قولها انت بنفسك إنك خايف عليها
يوسف / ماما انتي عارفة إني مش هعمل كدة
فريدة / هي مش قالتلك الصبح خرج مشاعرك.... ولا هتستني لما جون يطلع ويصالحها هو كالعادة.... ولا المرة ديه عايز انا أقوم بدورك.... يوسف بتحبها اطلع قولها.... خايف عليها قول.... عايزها معاك قول.... ساعد نفسك عشان تخف بقي
يوسف / لو الطريقة الوحيدة اللي أخف بيها هي إني اعترفلها بحبي واخليها تعيش حياتها مع واحد قاتل وافضل في نظر مراتي شخص قذر بالشكل ده يبقي أفضل أبقى مجنون طول حياتي ولا إني أئذيها بالشكل ده
نهض يوسف وصعد إلي غرفته
فريدة / أعمل إيه يا عزت؟!!!
عزت / للأسف يا فريدة.... مفيش حاجة نقدر نعملها بس كل اللي أقدر أقولهولك إن الحب هو اللي هيغلب يوسف في الأخر ومش هيقدر يبعد عنها
أما نور أمسكت هاتفها وفتحته ثم قامت بالإتصال بسارة
سارة في سعادة/ يااااه أخيراََ عبرتيني
نور / طيب بجد وحشتيني جداََ
سارة / يا سلام.... لو كنت وحشتك كنتي كلمتيني
نور / معلش كان غصب عني.... سامحيني
سارة / مالك يا نور صوتك متضايق
بكت نور لم تستطع أن تكبح دموعها أكثر من ذلك ثم قالت / تعبت يا سارة أوي.... نفسي أرسي علي بر بقي..... نفسي أعرف انا في علاقة حب ولا لا..... نفسي يريحني يقولي بيعمل معايا كدة ليه؟!!!.... انا عارفة إنه بيحبني بس بجد مش قادرة أستحمل
سارة / بس يا نور أهدى.... انتي فين أجيلك طيب؟!!!
نور / لا مش عايزة أخرج دلوقتي
هدأت نور قليلاََ وقالت / انا عايزة أشوفك يوم الخميس بليل.... فاضية
سارة / ولو مش فاضية هجيلك طبعاََ.... تحبي نتقابل فين؟!!!
نور / أي حتة.... انا في فيلا يوسف الألفي هبعتلك لوكيشن.... تعالي خديني ونخرج سوا
سارة / حاضر.... بس أهدى عشان خاطري.... هعدي عليكي بالعربية يوم الخميس علي الساعة ٧ كدة ماشي
نور / ماشي أتفقنا...