الفصل الثالث عشر 13
بقلم رباب حسين
ظلت نور تفكر بما قاله إياد ثم نهضت وقالت / انا متشكرة أوي علي العصير.... لازم اروح لسارة
وقف إياد وقال / ماشي.... بس طمنيني عليها هي بقت أحسن صح؟
نور / اه أحسن كتير..... بس ليه مش بتتكلم معاها؟
إياد / الفترة ديه عندي مشاكل كتير أوي.... بس معاكي حق انا مقصر معاها جداََ
نور / هي محتاجالك خليك جنبها.... عن إذنك
تركته نور وهو ينظر إليها في عشق وحزن علي حالتها وكم أراد أن يغمرها ويعوضها عما تشعر به
صعدت نور إلي غرفة سارة ووقفت عند الباب ثم أخذت نفس عميق تحاول أن ترسم الأبتسامة علي وجهها ثم طرقت الباب ودخلت
نور / مساء الخير
نظرت لها سارة نظرة عتاب وقالت / مجتيش ليه إمبارح؟
نور / حقك عليا.... كان فيه حد عزيز عليا في المستشفي
سارة / لا ألف سلامة....
بس انتي قولتي إنك ملكيش قرايب.... ثم ابتسمت وقالت / يا ترى مين بقي العزيز ده؟
ابتسمت نور في حزن ونظرت للأسفل ولم تجيب
سارة / لا واضح إنه عزيز أوي.... إيه حبيبك؟
أماءت نور بنعم.... ثم قالت
سارة / طيب هو كويس يعني ولا لسه تعبان؟
نور / لا بقي كويس الحمد لله
سارة / طيب ليه شكلك زعلان كدة؟.... تبقو اتخانقتو
نور / لا عادي احنا على طول بنتخانق
سارة / يبقو بتحبو بعض أوي
عقدت نور حاجبيها وقالت / ده ازاى يعني؟
سارة / اللي بيحب بيهتم بكل التفاصيل..... والأهتمام الزايد بيعمل مشاكل..... غيرة ممكن خوف زيادة..... انا كنت كدة مع عمار بس لما قعدت مع نفسي لقيت ان عمار مكنش معايا كدة.... مكنش بيغير مثلاََ كان يقولي انا واثق فيكي عشان كدة مش بغير..... لا هو مهما كانت الثقة اللي بيحب مش بيستحمل حد يقرب من اللي بيحبه
نور / معاكي حق.... بس كويس إنك بدأتي تفكري كدة.... ده معناه إن بدأنا نخلص من العلاقة ديه..... طيب ليه بقي لسه محبوسين في الأوضة
سارة / لا سيبك مني النهاردة واحكيلي مالك
نور / لا متشغليش بالك بيا
سارة / مش انتي قولتي إن احنا بقينا أصحاب.... ولا هو كلام دكاترة وكدة؟
نور / لا أبداََ انا مبسوطة إنك معتبراني صديقة ليكي
سارة / خلاص يبقي أحكيلي
نور / هو مفيش حاجة معينة بس يمكن الظروف اللي عنده أو تعبه مزود عصبيته شوية
سارة / يبقي محتاجلك.... ويمكن انتي مش مهتمة بيه في الفترة ديه أو بعيد عنه بسبب شغلك مثلاََ
ظلت نور تفكر هل هذا سبب عصبيته الزائدة؟...يحتاج لها ولا يستطيع أن يعبر عن ذلك
سارة / روحتي فين؟
نور / معاكي.... بس مجاوبتيش علي سؤالي.... ليه لسة قاعدة كدة؟
سارة في حزن / مش عايزة اشوف إياد
نور / ليه يا سارة.... ده أخوكي
سارة في حزن / عشان هو السبب في موت وائل..... هو اللي خلاه يشتغل كدة وتبقي ديه نهايته....هو اللي حرمني منه.... استغل غضبه من حبيبته اللي سابته عشان واحد أغنى منه ولعب في دماغه عشان يجري ورا الفلوس..... وديه نهايته
نور / وهو هيستغل أخوه ليه؟
سارة / عشان طماع..... يعمل أي حاجة عشان الفلوس.... حتى لو هيقتل عشان يبقي رقم واحدفي السوق يعملها عادي
حاولت نور استدراجها / مش ملاحظة إنك بتبالغي
سارة / لا مش ببالغ.... انا متأكدة من اللي بقوله
نور / اللي بتقوليه ده خطير جداََ ولو أي حد سمعه أخوكي هيتأذي
سارة / يستاهل الأذية..... لازم يتعاقب علي اللي عمله
ثم زفرت سارة وقالت / خلاص يا نور مش عايزة افتكر.... خلينا نتكلم في أي حاجة تانية.....ثم ابتسمت وقالت / قوليلي بقي اسمه إيه؟
ابتسمت نور وقالت / شكلك عايزة ترغي وخلاص صح؟
سارة في رجاء / قولي بقي يلا..... وحشني النم ده..... قولي قولي
ابتسمت نور وقالت / اسمه يوسف يا ستي..... يوسف الألفي
تبدلت ملامح سارة إلى الصدمة وقالت / مين؟!!!
هنا والشك بدأ يزيد في قلب نور فقالت / يوسف الألفي..... إيه تعرفيه؟!!!
سارة / اه طبعاََ..... ده أكبر منافس لإياد.... أوعي تقولي لزياد إنك على علاقة بيه
نور / بس هو عارف
سارة في صدمة / عارف وسايبك هنا تعالجيني؟
نور / وإيه علاقة يوسف بإني اعالجك؟
سارة / نور امشي من هنا..... انا خايفة عليكي..... متجيش هنا تاني..... بصي لو عايزة إننا نتقابل بلاش نتقابل هنا تاني
نور / أهدى يا سارة..... هو عارف إن علاقتنا انتهت..... عشان كنا مخطوبين..... يعني مفيش صلة بينا دلوقتي
هدأت سارة ونظرت لها في حزن وقالت / يبقي هو ده اللي مزعلك..... متزعليش يا نور ربنا يعوضك بواحد أحسن منه
نور / بس ليه خفتي كدة من إياد؟
سارة / عشان لسة بقولك ممكن يقتل عشان يبقي رقم واحد في السوق
أرادت نور أن تستدرجها أكتر / حاسة إنك بتبالغي..... انا اتكلمت معاه أكتر من مرة ومش حاسة بإنه كدة أبداََ
سارة / متتخدعيش بالمظاهر يا دكتورة
ابتسمت نور وقالت / أنا شايفاه وسيم وهادي وبصراحة لما شافني متضايقة فضل جنبي لحد ما هديت..... عشان كدة بقولك قربي منه
سارة / خلي بالك إياد بتاع ستات ومش بيدخل في علاقة جدية وانتي قولتي إنه شكله معجب بيكي.... ممكن يعمل أي حاجة عشان يوقعك..... اوعي تصدقيه.... انا عارفة هو ازاي بيستغل كل اللي حواليه.....أبعدي عنه يا نور
نور / انا لا بقرب ولا ببعد بس كل اللي بقوله أتكلمي معاه حاولي تقربي منه وأسمعيه..... يمكن ظلماه..... طيب انا لازم امشي عشان عندي مشوار مهم.... هجيلك بكرة تاني
سارة / خلي بالك من نفسك ومتتأخريش عليا
ابتسمت نور وقالت / حاضر.... يلا أشوفك بكرة
ذهبت نور إلي منزل يوسف الذي كان قلق عليها جداََ ولا يعرف أين هي وحاول الإتصال بها كثيراََ وهاتفها مغلق
دخل عزت الغرفة عند يوسف / إيه يا حبيبي عامل إيه دلوقتي؟
يوسف / كويس يا عمي..... قولي هي نور رجعت؟
عزت / لا.... فريدة قاعدة تحت وقلقانة عليها عشان تليفونها مقفول
يوسف / انا مش عارف اعمل إيه؟
عزت / انت بتحبها يا يوسف..... ليه بتعملها كده؟
يوسف / عشان منفعهاش يا عمي.... بس انا غلطت في حقها جداََ النهاردة وامبارح كمان
دخلت نور المنزل ووجدت فريدة تنتظرها وذهبت إليها فور دخولها
فريدة / كدة يا دكتورة طول اليوم برا..... طمنيني انتي كويسة
نور / الحمد لله
نظرت إليها فريدة تبدو حزينة ومتعبة جداََ
فريدة / اطلعي ارتاحي في أوضتك
نور / انا كنت عايزة أطلب منك طلب
فريدة / قولي
نور / ممكن أخد أجازة يومين..... انا عارفة شروط العقد بس بجد انا تعبانة أوى ومش هقدر اتابع يوسف وانا في الحالة ديه
فريدة / انسي العقد يا نور.... انا عارفة انتي حاسة بإيه وعذراكي..... ومقدرش امنعك إنك تاخدي أجازة أبداََ.... بس خليكي هنا متمشيش
نور / لا انا عايزة اقعد مع نفسي شوية..... عايزة اروح
رتبت فريدة علي كتفها وقالت / اللي يريحك يا دكتورة روحي
ذهبت نور إلي غرفتها وأخذت بعض الثياب ثم ذهبت إلى منزلها
صعدت فريدة إلي غرفة يوسف
فريدة / عامل إيه دلوقتي يا يوسف؟
يوسف / انا كويس.... فيه أخبار عن نور؟
فريدة / اه رجعت بس طلبت أجازة يومين وانا وافقت
يوسف / أجازة ليه؟
فريدة / مش عارف ليه؟ ده كويس انها طلبت أجازة بس ومطلبتش تسيب الشغل خالص
عزت / الصراحة اه انا لو منها امشي فعلاََ
يوسف في غضب / إزاى يا ماما توافقي على كده من غير ما تقوليلي هي الدكتورة بتاعتي ولا بتاعتك
فريدة / أكيد مش هنخليها تعالجك بالعافية..... وبعدين شكلها تعبان جداََ ومفتكرش إنها هتستحمل طريقتك معاها أبداََ.... ممكن تبطل عصبية عشان بجد بقيت لا تطاق
تركته فريدة وخرجت من الغرفة
زفر يوسف ومسح علي وجهه في محاولة لتهدأت نفسه
عزت / انا متأكد إن كل اللي انت فيه ده عشان بتمنع نفسك عنها.... سيب نفسك يا يوسف
يوسف / عمي انا تعبان وعايز ارتاح سيبني لو سمحت
أما نصر فاتصل بالحرس الشخصي له
نصر / تعالي يا خلدون انا عايزك
دخل خلدون الفيلا وقال
خلدون / أمرك يا باشا
نصر / عايزك تجيبلي كل المعلومات اللي تخص دكتورة نور عزيز وكمان عايز اعرف علاقتها إيه بالظبط مع يوسف الألفي
خلدون / أمرك يا باشا
خرج خلدون وظل نصر يفكر هل هي خطيبته وينكر الأمر ليحميها أم كانت تكذب من الأساس؟ وهذا ما آثار شكوكه نحو علاقتهم وخصوصاََ علاجها لسارة الحديدي
عادت نور إلي منزلها كانت تشعر بالأرهاق والتعب الشديد فذهبت إلى النوم فوراََ
جاء الليل أستيقظ جون..... كان يعلم إن نور ذهبت وهذا ما دفعه للذهاب إليها ولكن يعجز عن الحركة..... أخذ يتحامل علي نفسه واتكأ علي عكازه وسار ببطء حتى وصل إلى الدرج ونزل من عليه كان يتألم ولكن يرفض فراق نور عنه.... ظل يحاول حتى خرج من المنزل وأخذ سيارته وذهب إلى منزلها.... كان يقود السيارة بصعوبة شديدة حتى وصل أخيراََ إلي منزلها وصعد بالمصعد وبدأ يطرق علي الباب..... استيقظت نور ونظرت إلى الساعه وجدتها الثانية والنصف بعد منتصف الليل... فتحت عينها في صدمة وقالت
نور / لا لا يمكن يكون هو
ذهبت مسرعة إلى الباب ونظرت من العين وجدت جون يقف ويتألم كثيراََ.... فتحت الباب في فزع وقالت
نور / انت اتجننت ازاي تيجي هنا؟
جون / طيب دخليني الأول وبعدين نتخانق
أدخلته نور وأجلسته علي أقرب كرسي وقالت
نور / انت مجنون رسمي..... انت زي تتحرك وانت تعبان كدة ولا انت مش عايز تخف؟
جون / هونت عليكي تسيبيني وانا تعبان؟... انتي عارفة كويس إني مش هقدر اسيبك بعيد عني
نور / جون أنا خدت أجازة يومين بس مش أكتر ولا انا لازم ابقي قدامك علي طول
جون / أيوة طبعاََ انتي مراتي بس مكنتش اعرف إنك زوجة نص كم كدة..... فيه ست تسيب جوزها وهو حتى مش قادر يتحرك وتمشي؟
نور / تعبت يا جون.... تعبت أوي
نظر لها جون وقال / عارف يا نور إنك مستحملة الحيوان اللي اسمه يوسف بغباءه ده.... انا مش عارف بقي يتعصب أكتر مني
نور / يا سلام.... بقي عصبي أكتر منك؟!!! لا هو الحقيقة بقي عصبي زيك
جون / يعني انا جي اصالحك تقوليله انت زيه؟!!!
نور / انا مش زعلانة عشان تصالحني انا بس محتاجة هدنة عشان الوضع متوتر بيني وبينه جداََ ولو فضلنا في وش بعض كدة هنفضل نتخانق وده مش كويس عليه
جون / مفيش حاجة اسمها هدنة.... انتي هتروحي معايا دلوقتي
امسكها يوسف من يدها وجذبها إليه حتى نزلت على ركبتيها أمامه وقال
جون / أنا مقدرش يعدي يوم مشفتكيش فيه.... وإلا هقعد معاكي هنا
وجد نور تنظر بعيداََ ترفض العودة فقال / طيب تصدقيني لو قولتلك ان يوسف هو اللي طلب مني أصالحك؟
صمتت نور تفكر قليلاََ وقالت في نفسها / لسة بيستخبي وراه ثم نشرت إليه وقالت
نور / طيب ممكن لو طلب منك حاجة تاني متعملهاش
جون / بس انا ببقي عايز اعمل نفس الحاجة.... انا مقدرش أشوفك زعلانة واسكت.... أرجوكي يا نور ارجعي معايا
تنهدت نور وقالت / بجد يا جون مش قادرة
جون / طيب انا عندي فكرة ارجعي ومتشوفيهوش....خليكي بعيد عن أوضته وهو كدة كدة مش هيتحرك ويجيلك.... وانا لما اجي هتصل بيكي تيجيلي..... عشان خاطري
نور / طيب ماشي عشان خاطرك
جون / طيب روحي هاتي هدومك و تعالي بقي ساعديني عشان ننزل سوا
عادو معاََ إلى المنزل وكان رجال نصر يراقبون منزل يوسف ورأو نور تعود معه بالسيارة بوقت متأخر... وأبلغو خلدون بذلك..... اوصلت نور جون إلي غرفته وطلبت منه أن يرتاح ولا يتحرك مرة أخرى وذهبت هي إلي النوم
في الصباح كان إياد يشعر بالحزن كل ما تذكر بكاء نور ويشعر أنه لن يكسب حب نور أبداََ... ظل ينظر من نافذة غرفته يفكر ثم امسك هاتفه واتصل بحازم
إياد / حازم أنا مش جي الشركة النهاردة.... لو فيه أي ورق عايز أمضيتي هاته علي البيت
ثم أغلق هاتفه.... بعد قليل وجد مكالمة واردة من نصر زفر ولم يجيب
أما نصر فجاء خلدون وأبلغه بما حدث بالأمس
نصر / يعني إيه ؟ عايشة معاه في البيت
خلدون / واضح كدة يا باشا
نصر / أمال ليه قالو إن مفيش علاقة بينهم؟ كدة يبقي شكي في محله البت ديه جاسوسة يوسف.... لازم ابلغ إياد
ظل نصر يحاول الإتصال به ولكن لا يجيب
أما يوسف فقد أستيقظ وهو يشعر بكثير من الحزن بسبب ذهاب نور..... يريد أن يراها ولكن لا يعلم كيف ولا يعلم كيف يعتذر لها علي ما قاله.... أما فريدة فكانت تشرف على إعداد الفطار إلى يوسف وحملته الخادمة وصعدت معها إلى غرفته وقبل أن تدخل فريدة وجدت نور تخرج من غرفتها.... نظرت لها في تعجب ثم ذهبت إليها
فريدة / دكتورة نور حضرتك رجعتي أمتي؟!!!
نور / جون رجعني بليل
فريدة / هو خرج بليل وهو في الحالة ديه؟
أماءت لها نور بنعم
فريدة/ مكنتش اعرف إن إبني بيحبك أوى كدة يا دكتورة
نور / ما هو واضح..... لو سمحتي يا مدام فريدة انا مش عايزة أشوف يوسف دلوقتي.... اعتبريني لسه في أجازة
تفهمت فريدة ما تمر به نور ودخلت إلى يوسف ولم تخبره بوجود نور بالمنزل
في الظهيرة جاء عزت ومعه بعض الأوراق وأثناء دخوله وجد نور تجلس بالبهو وتعمل علي الحاسوب الخاص بها.... نظر إليها ثم صعد إلى غرفة يوسف
عزت / عامل إيه يا يوسف؟
يوسف / الحمد لله يا عمي
عزت / دول شوية أوراق محتاجين أمضتك
أخذ يوسف الأوراق قرأها ثم وقعها في صمت
نظر عزت إليه وجد وجه حزين فقال / واضح إن نور لسه زعلانة.... شكلك بيقول كدة
يوسف / وإيه اللي حصل جديد يعني عشان تسامحني؟
عزت / أمال رجعت إزاى؟
نظر له يوسف وعقد حاليه وقال / رجعت؟!!! هي نور هنا؟
عزت / إيه ده انت متعرفش؟!!! أنا لسه شايفها تحت
يوسف / طيب لو سمحت يا عمي خليها تيجي
أماء له عزت وأخذ الأوراق ونزل إلي أسفل وقال يوسف لنفسه / أكيد جون رجعها..... إيه الجديد
نزل عزت وأخبر نور بأن يوسف ينتظرها بالغرفة نظرت له نور وعلمت أنه أخبره بوجودها.... أغمضت عينيها وحاولت أن تهدأ من نفسها ثم صعدت إليه ودخلت الغرفة
يوسف / هو إزاى محدش بلغني إنك رجعتي؟
جلست نور بجانب السرير وقالت بهدوء / عشان انا طلبت كدة
يوسف / رجعتي أمتي؟
نور / امبارح بليل
يوسف / زي ما قلت أكيد جون رجعك..... وطبعاََ مش لازم انا اعرف عشان هو الحلو اللي بيطبطب وانا الشرير الوحش اللي بيتخانق.... أحب ابلغك يا دكتورة إن انا المريض بتاعك وانا اللي بتعالجيني مش جون
نور / يوسف فيه مشاعر كتير مكبوته جواك ممكن تخرجها عادي غير العصبية
يوسف / يعني إيه؟!!!
نور بهدوء / يعني انا ساعدتك عشان تخرج عصبيتك بس المفروض تحاول تجرب بقيت المشاعر اللي جواك..... الأعتراض.... اللوم.... الزعل.... الحب..... بطل تهرب وتطلب من جون يعمل اللي انت عايزه ومش عارف..... كدة انت مش بتساعد نفسك.... و بتخبي نفسك جوا الأوضة ديه زيادة.... وسايب حد غيرك يخرج للدنيا ويتعايش مع الناس وعمرك ما هتخف بالوضع ده..... وبالنسبة لموضوع ليه مبلغتكش إني موجودة ببساطة عشان مش عايزة أتخانق معاك تاني.... حاول تهدي واشوفك بكرة...... انا لازم امشي عشان أروح لسارة.... عن إذنك
تركته نور وذهبت وظل يوسف يفكر بما قالته وخرجت نور لتذهب إلي موعدها مع سارة
وما أن وصلت رأها إياد من غرفة مكتبه ولكن رفض الخروج لرؤيتها.... فأصبح الوضع محسوم له..... نور تحب يوسف
بعد ساعة جاء نصر إلي منزل إياد وأدخله حمد إلى غرفة المكتب
نصر / ممكن اعرف مش بترد عليا ليه؟
إياد / معلش يا نصر أنا تعبان شوية
نصر / أنا عرفت حاجة ولازم تعرفها
إياد / خير
نصر / الدكتورة نور عايشة مع يوسف في نفس البيت
إياد في صدمة / ازاي يعني!؟ هي قالتلي إنهم فسخو الخطوبة
نصر / بيكدبو.... وده معناه حاجه من الأتنين.... يا أما العلاقة ما بينهم أكبر من كدة.... أو البت ديه بتتجسس علينا
إياد / لا.... مش ممكن لو بتتجسس عليا كانت استغلت وجودها هنا واتقربت مني عشان تعرف عني أي حاجة..... لكن ديه رافضة اقرب لها أصلاََ ولا اتكلم معاها
نصر / وانت بتقرب منها ليه؟!!! انت لسه فيك الداء ده..... ده انا قلت توبت و مبقتش أشوفك في الكلوب.... ولا استنى تكونش بطلت بسببها
إياد / دماغك متروحش بعيد ده مجرد إعجاب مش أكتر
نصر / انا مش عارف انت وأخوك حظكو في الستات عامل كده ليه.... وديه كمان باعتك عشان يوسف
إياد / نصر بطل كلامك ده بقي.... وبعدين بقولك إعجاب وخلاص يعني هيروح
نظر له نصر في شك فيبدو عليه العشق / علي العموم ميخصنيش..... انا عايز رد منك على اللي اتكلمنا فيه هتساعدني ولا لا؟
إياد في غضب وصوت مرتفع حتي وصل إلي مسامع نور التي تنزل الدرج مغادرةََ للمنزل/ نصر هو انا كلامي مش مفهوم بالنسبالك.... انا مش هقتل حد
نصر / وانا قولتلك اقتله؟ بقولك ساعدني زي ما عملنا مع عمران
إياد / انا مش فاهم بصراحة.... إذا كنت انت عارف إني مليش علاقة بقتل عمران ولا اتفقت معاك على قتله.... بقولك إيه يا نصر انا مليش في السكك بتاعتك ديه... وكفاية أصلاََ إني بتعامل معاك بعد ما اسغلتني عشان تقتل عمران وجريت رجل وائل لتجارة السلاح
نصر / أخوك اللي طمع في الفلوس بعد ما البت ديه سابته عشان واحد أغنى منه.... انا بس أديته السكة
إياد في غضب / انا غلطان إني مبعدتوش عنك ولا وقفته علي اللي كان بيعمله.... ولما وعدني إن ديه أخر مرة أهوه راح فيها وبسببك.... وجي دلوقتي تقولي تعالي نقتل..... انت إيه شيطان؟!!!
نصر / تمام.... انا شيطان ولو مساعدتنيش هقدم الشيك اللي معايا للنيابة
إياد / قدمه.... وانا كمان هقدم الفيديوهات بتاعت قتل عمران
نظر له نصر في صدمة... ثم اقترب منه إياد وقال / لما شفت اللي انت عملته في تسجيلات الكاميرات عرفت انك ملكش أمان.... وعرفت إنك ممكن تغدر بيا في أي وقت.... عشان كده خليت معايا نسخة..... لو فكرت تأذيني هأذيك.... أبعد عني يا نصر.....وفلوسك هتجيبلك أول ما أخلص من المشكلة اللي انا فيها
خرجت نور مسرعة من المنزل قبل أن يراها أحد وكان يراقبها رجال نصر وبعد قليل خرج نصر في قمة غضبه وركب سيارته وذهب...