روايه حافة المنتصف
الفصل السادس والثلاثون 36
بقلم آيه
كان نبراس فالمركز ، دوبه كيف مسك ملف في يده
خش خالد >> يا صباح الخير
نبراس>> انتو مركبين كاميرا فوق راسي اول مانخش تجو
خالد>> قصدك انا والصالحين
تنحنح الثالث وهوا خاش للمكتب>> تقرمو فيا عالصبح
نبراس>> لا حول ولا قوه ماعندكمش اشغال
خالد>> لا عندنا صبايا وانت معندكش
ضحك صالحين >> في هذي صدق
نبراس>> ربي يصبر عمتي عليك طيحه طاحتها
صالحين قعمز >> واخذه وحيد امه صلوحه عليك طيحه طيحتها الله يبارك
نبراس >> هو فعلا الله يبارك
خالد اتكى عالباب>> عمرك ما عزمتنا نشربو قهوة في مكتبك اطلبلنا
نبراس>> انتو هضا كله تبو عزومه
خالد>> لا "ونادى عالغفير لي برا" عمي حسنيييين
حسنين >> ايوا يا باشا
خالد>> انزل قوللهم ثلاثه قهوة ساده اشر من فرق مراتك صابرين
حسنين>> دا فراقها امر من المر
خالد >> وهضا المطلوب قوللهم هك بزبط
حسنين>> عنيا
ضحك نبراس >> كنك عالصبح
خالد>> ما قتلك عندي وليه وانت لا
نبراس>> خرفي
صالحين >> شن صار معاك ؟
نبراس>> كلمت خوها قبل مانجي للمركز
خالد >> باهي؟
نبراس>> حسيته هكي مش مستوعب الموضوع لانه انا هديت عليه بدون مقدمات ، بس قالي تم نشوف بااتي ونتواصلو
صالحين >> عطيهم يومين بالكثير ويعاودولك
خالد >> حتى انا هكي نقول
مسح على وجه >> هيا انت وياه هي "وصبالهم" عندي شغل متلتل
صالحين >> تي القهوه
نبراس>> تو يجيبها لكم حسنين في مكاتبكم
دفهم لعند الباب وصكره وهوا يضحك عليهم
//
//
قي القايله من نفس اليوم
حكى محمد الباته على مكالمة نبراس … والصادق على قد ما فرح بنبراس و كيف محمد شكره له و شكرله شخصيته بس ريّب من موضوع انه شاب مش متجوز من قبل وحط فكرة انه اكيد هله ح يكونو رافضين الموضوع بما انه عارف المجتمع وعارف عاداته و البيئه لي هوا فيها ، وخاف على مرام من انه يتعاود معاها سيناريو تطليقتها مره ثانيه … المره اللي فاتت جت بدون عيال المره هذي مش ضامن شن ح يسير
محمد >> ها ياباتي شن قولك ؟ الراجل قالي خوذ وقتك و لو وافقتو بيجيب رجاله
الصادق >> كذا كلملي مرام
طلع محمد ينادي في مرام وخشت حليمه بجنب الصادق لي حكالها الموضوع عالسريع ، وحليمه ما بين صدمه وفرحه في نفس الوقت شعور اي ام تبي اتريح على بنتها … وفرحت اكثر لما عرفت انه ولد عم خطيب ليلى بنتها وقالت انه الصبايا جن في حوشنا و عرب كويسين
خشت مرام ومعاها ليلى وهيه مستغربه بس حاسه في نفس الوقت ، قاللها نبراس انه ح يحكي المحمد بس ما كانتش تعرف الوقت امتى ولا تعرف انها بالسرعه هذي
الصادق >> اقربي جاي
مرام >> تبي نديرلك شاهي ولا شنو؟
الصادق >> لا تو ليلى ادير
ليلى بحتت فيهم >> عيني عينك اطلعي برا 🙂 اوففف " وبرمت طلعت"
بحتت مرام في باتها ، اللي بحت فيها وحكى
الصادق >> شوفي يا باتي انتي صغيره و تبهدلتي ما بين اقسام ومحاكم وصدمه في جرة الاخره و انا حاس وعارف … بس مش هذي حد الدنيا ولا هضا حد نصيبك … حميدا خوك كلمه راجل وطلبك منه وقاله لو موافق بيجيب رجاله والراجل ماهوش غريب ، اكيده متذكره الرائد لي كان واقف معانا في بداية القضية ويقعد ولد عم خطيب ليلى اختك
قلبها دق بسرعه وما عرفتش شن ردت الفعل اللي اديرها بزبط ، قعدت ساكته و تبحت في باتها بدون ردة فعل
الصادق كمل كلامه >> بس شوفي انا على قد ما بنفرح بيك وعلى قد ما محمد شكرلي الراجل كويس .. بس هو مش متجوز من قبل وانا مانعرفش بس اكيده هله مش ح يكونوا راضيين
حليمه >> مافيش حاجه تجي كامله مع بعضها ، لاازم شي يوريك انه الدنيا مش دار راحه … بس ماتلطيش على روحك … العرب شفناهم وقعدنا معاهم و امه جت في حوشنا وهدرزت معايا باقي باتك يشوف الراجل
مرام اللي كانت ساكته من اول القعده >> انت شوفه يا بابا واحكي معاه … و محمد اكيده عارفه وانا نعرف انه محمد مش ح يجي يحكي في حاجه الا وهوا متريحلها كان هضا صكر الموضوع دغري
هز محمد براسه
والصادق رد حكى>> يبقى عطوني يومين انا بمعرفتي نسأل عليه و بعدها نشوفو شن يسير
بحتت حليمه في مرام وابتسمت ، اما مرام على قد ما انها هيه ونبراس كانو حاكين فالموضوع بس توترتتتتتتت لما قرب وقعد جد وانها خلاص بتتسمى عليه وتخش عيلته لي حاسه انهم مش متقبلينها
طلعت من المربوعه خشت لقت ليلى واقفه تصنت 😂 اول ما حقت مرام صفقت بيديها بشويه وقعدت اتنط من بعيد
مرام >> ليلى خفت
ليلى >> يخوف سيادة الرائد فعلا قاللهم كلمه وحده مشت كيف السيف
مرام >> مش وقت سماطتك
عيطلهم الصادق من جوا >> الشاهي يا بنت
شيرت ليلى بيدها >> هيااااا هيااا
//
//
ركب محمد الحوشه بعد ما كمل موضوعه مع باته ومرام ، لقى اسيل تبرم فالحوش
محمد >> تو شن قلنا عالحركه نحن
اسيل >> والله مليت بكلللل من القعده
محمد >> شن قالت لك الدكتوره عاد ، قالت لك اول ثلاث شهور حاولي ما اتحركيش واجد
اسيل >> وانا والله ماتحركش شهر كامل وانا فوق البنات يركبنلي مانزلتش الا مره ولا مرتين بس
محمد بيغيرلها جوها >> تبي نشيلك حوش امك
اسيل بفرحه >> قول والله
محمد >> بس يوم واحد
اسيل >> حمادي النبي يومين بس يومين
محمد >> اسيل تعرفي بيات مانحبش بس عارفك مكسده
اسيل>> محمد يومين ، افتح عيونك وغمضهن مرتين ح نروح
ضحك محمد >> وافقت
ابتسمت وحطت المخده عالصالون وقعمزت
محمد >> لين راقده
اسيل>> توا كيف رقدت ، وقيس ساكن الليلى من الصبح نازل عندها
محمد >> اه لقيته لوطا ما بش يركب معايا "ومسح على عيونه"
اسيل بحتت فيه وهوا جا. اتكي جنبها
اسيل >> في حاجه ؟؟
محمد >> لا والله صاير هكي موضوع حكيت فيه مع باتي توا وشغلني
اسيل>> شنو شغلك فيه حاجه؟
محمد >> لا والله ، فالصبح كلمني واحد
" وقعد يحكيلها فالقصة من لما كلمه نبراس لحد ما قال الباته توا ورد مرام "
ابتسمت اسيل لي تعرف القصه
بحت محمد فيها >> شن فيه
اسيل >> لا شي بس فرحتلها لانها تستاهل وانت مدامك حكيت عليه ووصلت الكلام الباتك اكيده حتى انت عارفه راجل كويس
محمد >> تبي الحق ، انقنه راجل وبشخصيته واخلاقه حكيت معاه كم مره الراجل يبان والعيل يبان وهضا للامانه ما شفتش عليه الا انه انسان متربي و قدع بكل … طبعا يحسابوني طايح على راسي انا عارف انه اكيده هوا عارف القضية وعرفها اطلقت و شافها معايا ايام مصر شكله توا كيف حكى الهله
مسكت اسيل ضحكتها على ذكاء محمد اللي يحساب روحه فاهم عاد القصه كلها
محمد بحت فيها >> كنك مغير توزعي في ابتسامات
اسيل>> ما قتلك فرحانه المرام 😂
هز محمد براسه >> بنصلي العصر ونغفى شويه تجي معايا
اسيل >> اها قبل ما يركب قيس وتنوض لين تبدا
//
//
في نفس اليوم بس الوقت غير ، فالليل … في حوش الجد
معتز كان اول مره يجي بعد ما قاللهم عالفالطه يلي بيديرها … كانت مجد قاعده عندهم وتهدرز مع البنات فالجنان برا
خش معتز طلق السلام عليهم ومشى شور دار جدته
سديم >> كارهته رايحه بكل
هديل >> والله ماتستاهل خلود
مجد >> كلمتها امس صوتها مسكينه واضح خانقتها العبره
سديم >> عارفه نقوللكم على حاجه؟
مجد>> قولي يا ستي سديم
سديم>> خلود مش ح ترد المعتز
هديل>> قولي خير النبي مش متخيله معتز يقعد مع غير خلود
مجد>> سيسي ماتنسيش انه خلود تحب معتز
سديم>> وانا نقول هكي لاني عارفه انها تحب معتز ، مرات لما تقعدي تحبي حد حب كبير .. ما تقدريش تسامحيه يقولو الزعل على قد الغلاوه وزعلت خلود من معتز كبيره بكل ! خانها وجرحها
هديل هزت براسها >> مش عارفه والله ان شاء الله خير
مجد >> يارب
خشو مع بعضهم بدر ولقمان و سهم
بدر >> الله الله الله مجودي هنا
مجد اضبطاته>> قتلكم حنقعد كل يوم عندكم
سهم >> يامينتي علي الباشا صالحين
مجد >> ياسامط عنده شغل و عميمه عند هلها ما بش يخليني بروحي حطني هنا واهو شويه ومروح هوا ونبراس
بدر بحت في سهم ولقمان>> هذي كنها لسانها انعوج قعدت تقول عميمه ما عميمه 😒
ضحكت مجد >> مقهور ولا غاير
بدر >> تو نلطك يرد لسانك ينطلق
مجد >> عمتك يا حيوان مافيش احترام
ضحك لقمان >> من في جوا
هديل >> خوك سبع البرومبا جاي يوري في وجه الامي سالمين شكله
لقمان >> اكيده مهزبته على وجه
مجد >> طبعا
بيبت سيارة نبراس
بدر>> اهو رائدكم جا
مجد >> اكيده حتى صالحين خليني نخش نلبس
بدر >> مش قتلك تبيلك لطه 🙂 "وطلع يفتح فالباب"
خشت مجد تضحك ووراها البنات، نزل نبراس والصالحين برا طلعو الشباب يهدرزو معاه على ما طلعت مجد
وهما يهدرزو رن تلفون سهم برقم غريب ، رفع التلفون ورد عليه ووجه تغير شويه وتباعد من عليهم فطن له بدر الدين
//
//
عند معتز اللي خش جوا وسمع كم كلمه من جدته على موضوع زواجه الثاني وما حكش ولا حرف سمع هزيبته و طلع
لقى نبراس دوبه كيف خاش مع الباب
معتز >> عدا الصالحين
نبراس>> اه كيف طلع بمجد
معتز>> قبل بنسلم عليه
بحت فيه نبراس>> شن صار معاك انت ؟
معتز >> بكرا بنمشي الخلود
نبراس >> وشن ح تمشي ادير عندها
معتز >> نبي نردها !
نبراس >> وانت في رايك ح ترضى ترد
معتز >> انا قلتها لها من يوم طلعت قتلها مش مطلق
نبراس >> بس مش بمزاجك يا معتز
معتز >> نعرف هلها ونعرف انهم صعبين ومش ح تقدر تطلق يعني ح نقعدو هكي وخلاص ف حنعدي نردها
نبراس >> ولو ما ردتش ؟
معتز >> ح ترد ح ترد
هز نبراس براسه >> والست لخرا امتى بتاخذها
معتز بحت فيه >> اليومين الجايات
نبراس >> معتز را الموضوع مافيش لعب اه! اي غلطه حتلقاني ضدك مش معاك
معتز >> عارف والله عارف
نبراس >> بتجيبها هنا؟
معتز>> صعب ، ح نحكي الباتي اني بنقرا فاتحه اليومين الجايات و الاكيد انه مش ح يمشي معايا و اجرت شقه مبدئيا برا لحد ما نعرف شن ندير نجيبها مؤقت في شقة سهم
بحت فيه نبراس وما ردش عليه ، هز براسه وخش للحوش
//
//
اما عند سهم لما رن تلفونه وتباعد من جنبهم
سهم >> شن تبي ؟
زهرة>> يعني عرفت صوتي !
سهم >> اختصري انا قلت شن تبي
زهرة >> سهم
سهم >> اللهم طولك ياروح
صكر الخط في وجها و نفخ ب اعصاب ، ثواني وردت رنت اخرى
رد سهم باعصاب >> شن تبي انا قلت ولا قعدتي ما تفهميش ليبي ولا شنو
زهرة >> سمعت انك خطبت
سهم >> وشن رايحلك عندي نخطب ولا نقعد
زهرة >> سهم ليش تعامل فيا هكي شن ذنبي انا الرفض ماكانش مني كان من هلي
سهم >> يا بنت الناس انا ناسيك اساسا و ناسي حتى شكلك
زهرة >> اها بدليل انك عرفت صوتي
سهم >> لا ما عرفتش صوتك بس مش من كثر البنات لي عرفتهن ف حياتي عشان نتوه بيناتهن
زهرة >> باهي صح خطبت
سهم >> حنصكر في وجك للمره الثانيه ، وياريت معش تكلميني ولا تحاولي توصلي فيا ب اي طريقه
وفعلا صكر في وجها ، وحط رقمها فالحظر على طول
//
//
عند الرائد اللي ركب الداره وغير دبشه وهوا عينه على تلفونه ، حاير و ملخبط في افكاره
رن تلفونه و قبل ما يشوف الاسم عرفها هيه ، رد بقلبه مش بصوته
نبراس >> الو
مرام >> روحت
نبراس >> اها كيف خشيت توا
مرام بتوتر>> نبراسس
نبراس >> حكالك محمد ؟
مرام >> اها حكى مبدري البابا و ماما
نبراس >> وشنصار
مرام >> كلمني بابا وحكى معايا ، محمد شكرك البابا و هما مطمنين عشان يعني مناسبين سهم قبلك وهكي … بس برضو بابا خايف انه هلك يكونو رافضين وقالي انه راه اكيد هله رافضين وانه عارف انه حيكون فيه عقابات
نبراس >> وشن قلتي انتي
مرام >> ما حكيتش حاجه انا قعدت ساكته لساني انزمط، ماعرفتش نقول شي بس بابا قالي انه ح يسأل بمعرفته وبعدها محمد يرد عليك
ابتسم نبراس >> على بركة الله
مرام >> نبراس خايفه
نبراس >> عليش خايفه ، مش قلنا بدون خوف … ما درنش حاجه غلط جاي وطالبك بالحلال
مرام >> عارفه بس حاسه انه معقوله يعني الموضوع يتم هكي وخلاص ح نتريحو
نبراس >> حنتريحو وح يصكر علينا باب انتي تعبتي وانا تعبت توا وقت انه نتريحو ونحن مع بعضنا
مرام >> هلك معش حكو شي
نبراس >> لالا خلاص اخر كلامي كان مع باتي وقتله انه نراجي فالرد بيش يجي ويتفقو على كل حاجه
مرام >> عادي نطلب طلب ؟
نبراس >> اطلبي عيوني
ابتسمت >> لو صار نصيب مانبيش ندير عرس كبير انت دير عرسك وهلك من حقهم يفرحو بيك امك تراجي فاليوم هضا وبتفرح بيك وانا عارفه انه الافنديه كلهم يراجو في عرسك ، بس انا مانبيش واساسا هلنا مش واجدين صبايا عمامي وخالاتي و هل اسيل مرات محمد وماما وليلى وجارتنا صاحبة ماما واجد يعني كلهم على بعضهم 15
نبراس >> وعليش انتي ماتبيش اديري عرس؟ عشان درتي من قبل ولا عشان الناس تو يحكو
مرام >> صدقني مش هامني الناس بس ماعنديش حد يهمني بكل اهم شي عندي انه كل شي يتيسر ويمشي براحه ، بس ماعنديش معازيم اساسا
نبراس >> خلينا بس يتفقو باتي وباتك وبعدها ساهل كله
مرام >> ان شالله
نبراس>> ما نعستيش
مرام>> نعست بكل
نبراس>> هيا معناها ارقدي ، وانا بكرا عندي وعيه بدري بكل وشغل وحوسه
مرام >> الساعه كم
نبراس>> بنوض 8 اكيده
مرام >> حرام عليك لكي ساعه تحكي ماقتليش بتنوض بدري
ابتسم >> عارفتيني مانركزش فالوقت معاك
مرام >> نبرااااس تصبح على خير
ابتسم >> وانتِ من اهلي
صكرت الخط وهيه مابين انها مبسوطه ومابين انها خايفه ومتوتره من كل شي
من اعتاد القلق ، ظن انّ الطمأنينه كمين ✨✨
//
//
يومها سهم حكى مع ليلى شويه وتحجج بانه نعسان وبيرقد عشان ما تعودش يدس عليها شي و متردد انه يحكيلها عشان يقعد واضح معاها ولا يسكت عشان ما يضايقهش و مرات تفهمه غلط
//
//
ثاني يوم
ماكانش في جديد عند حد كلهم كانو في اشغالهم وقرايتهم وروتين حياتهم اليومي
ماعدا مُعتز ، الي اليوم كيف قرر انه يمشي الخلود
خش معتز والحمدلله انه سراج ما كانش فالحوش ، كان سعد قاعد يومها وهوا اللي استقبله ، خلاه يخش بدون ما يكثر معاه كلام ، خششله فرج و خلود حتى هيه طلعت وحاولت تمسك روحها
اول ما خشت شافت معتز ماسك فرج ويضحك معاه ، شافها خشت رفع عيونه
معتز >> كيف حالك
خلود>> بخير الحمدلله "وسكتت"
معتز >> خلود
بحتت فيه بحده ونظرتها كانت تقول انه شن مازال جاي بتحكي
معتز>> مطوله هنا
خلود>> ومن قالك اني حنرد اصلا
معتز>> خلود انا سيبتك تروقي وتهدي وبراحتك بس طلاق مش مطلق في بيناتنا عيل ومش مسيبه
خلود>> العيل لي لكي اسبوع مارفعتش حتى سماعة التلفون سألت عليه ؟ مريض ولا طايح جيعان ولا مرايف عليك ؟
مسح معتز على وجه>> كنت بنخليك تهدي
خلود>> يعني مازلت مصر علي رايك ؟
معتز سكت
خلود>> عارف كنت متمنيه تجيني وتقولي انها نزوه وتعدي في حالها وكنت كيف الهبله زي كل مره ح نسامحك ، بس المره هذي يا معتز كل شي في حياتي والي صارلي معاك في كفه و زواجك في كفه ثانيه مستحيل نقدر نسامحك عليه حتى لو بعد فتره طلقتها ورديتلي مش ح نردلك
صبت خلود من قدامه وخشت ومعتز مازال حاط في باله انها ح ترد وبس مازالت زعلانه ومحروقه من الموضوع حاليا وبعد فتره حتهدا ، كان متلخبط وفاتحته بعد يومين ومايبيش شي يخرب عليه
//
//
عند سديم يلي كانت مروحه من الجامعه على حوش جدتها ، خشت لقت سالمين فالدار اتفرج عالتلفزون
سديم >> اش شششش عليك خبر من امتى اتفرجي على مسلسلات يا اسلومه
سالمين >> تحسابن غير انتن اتبعن فيهم
سديم >> لا ما نحضر فيهن انا التركيات ، مكسره راسي بيهن هديل
سالمين >> وانتي جايه بتكسري راسي
سديم >> لا حول ولا قوة 🥲
خش بدر الدين عليهم
سديم حطت لحجاب على راسها بسرعه>> مليون مره نقولك دير صوت قبل ما تخشششش شنو هضا
بدر>> وانا مليونين مره نقولك ديما خليك لابستيه عشان كلنا نخشو ونطلعو
سديم >> روحت من الجامعه مخنوقه من الصبح بيه فكيته شويه وبعدين محد غيرك خاش طالع فاضي اشغال
بدر>> عارفه يا سديم كان ما لسانك هضا نقصته لكي وربيتك من اول وجديد مانقعدش بدر الدين
صفقت سالمين بيديها >> عارف انت وياها يا قليلين التربيه تزيدو حرف واحد حنكسر العكوز على روسكم
بدر بسماطه>> والنبي يا امي كسريه وريحينا
على خشت الهادي >> اطلع برا انتلف من قدامي امشي الشغلك
طلع بدر الدين يجري خاف تنطلق فيه حاجه من باته
سالمين>> الحقيه انتي يالغضيبه بسرعه
طلعت سديم وراه لقاته قدامها
سديم>> مبردك
بدر >> خشي ديري قهوة
سديم >> شغالة سيادة الوالد ؟ لا وتقول فيها بعشم اخرى جو را حديري بالغصب
بدر >> ترضي تخليني نطلع بلا قهوة
سديم>> عليك استعطاف ، بدر ما نعرفش نديرها
بدر >> عادي لو تقعد تراب نشربها منك
بحتت فيه >> بدر الدين ؟
بدر >> قتلك من يوم وغادي انا معش ح نستعبط
رن تلفون سديم ، تلقائيا بحتت في بدر>> هذي خلوود
ابتسم >> خلاص ردي عليها وديرلي قهوة اثنين فواحد
هزت براسها و مشت ترد عليها
.
.
.
حطت البكرج عالنار و ردت على خلود
سديم >> اهليين كيف حالك
خلود >> معتز كان عندي
سديم تحرك فالقهوة>> شن جاي يقول ؟
خلود >> كنت متمنيته يقولي اني غلطت في حقك يا خلود وهيا ردي معايا ، تمنيت يجيني وعارف غلطه تمنيت والله
سديم >> خلوووود بالله عليك ماتزعلي روحك على سباه ، معتز ما يستاهلكش ابدا والله وفرط فيك و خسرك وحيندم ندم عمره … تصدقي عشان عارفنا كلنا ضده ماجش الحوش امي بكل الا امس جا سلم على جديده و هزباته طبعا و طلع وهوا ساكت
خلود >> معش يهمني انا حاليا يهمني فرج وبس …. وعارفه حتى لو معتز بينسى فرج والله معش يفرقلي شي نبي نربيه بروحي معش نبي شي يربطني بمعتز
سديم >> خلود استهدي بالله بس وما تفكريش وانتي زعلانه … حكيتي مع هلك
خلود >> سراج ما كانش قاعد لما جا معتز . نراجي فيه يجي نبي نحكيله … و نبيه يقول الانيس خويا انا اكثر حد خايفه منه انيس مش ح يفرق معاه انه معتز بيجوز بس ح يفرق معاه اني بنطلق
سديم بصدمة>> خلود قررتي ! بالله عليك لا ورحمة باتك تفكري كويس … خلود انا عارفه انك تحبي معتز و انا متأكده انها نزوه والله وحتمشي ويندم
خلود >> اللي تبدد ما تجي مليانه ، فكرة انه كلم وحده اساس غيري وحكى معاها وحبها وحباته ويبي يجوزها و يعيش معاها ونفس اللي عشته معاه بتعيشه هيه … قاعده نتخيل فكل شي عشته معاه وكيف ح تعيشه هيه معاه … الفكره مش قادره نتقبلها هضا وهيه مازال ما صارت ف مابالك لما بجد تصير ويقعد الموضوع حقيقي كيف بنتحمل … حتى لو ندم وردلي معش ح يقعد عندي فيه ثقه
فاجت القهوه وسديم مصبيه متنحه في كلام خلود ، برمت بعد سمعت صوت كبت القهوه عالنار و طفت عليها
سديم بزعل >> مش عارفه شن نقولك صح انا مش مجربه الشعور بس انا متاكده لو مكانك ح ندير نفس الشي
خلود تنهدت >> نصيب
سديم>> خلاص اي حاجه تسير قوليلي وبعدين بنكلم فروجه فيديو
خلود >> حاضر تمام
صكرت سديم وهيه زعلانه على خلود ، صبت فنجان البدر الدين ومسحت الغاز وشالاته له فالجنان
سديم >> خدمات اخرى؟
بدر >> نذوق قبل مرات نقولك مش سمحه
سديم>> تو مش من شويه قتلي تقعد تراب نشربها 🙂
بدر ضحك>> صح نسيت "شرب منها وبحت فيها" شن تبي خلود؟
سديم >> وجعتني يا بدر الدين والله صوتها مسكينه زعلان بكل ، قالت لي انه معتز جاها ومازال مش متراجع في قراره ويبي يجوز وهيه بتطلب الطلاق
بدر >> لا حول ولا قوة الا بالله عليك موال داره سي معتز هضا
سديم >> ماعرفتش شن نقوللها ولا كيف نهديها والله لاني مانقدرش نلوم عليها ، لو انا يسير معايا هكي حندير كيفها واكثر … كويس انه خلود مسكت روحها ومشت لهلها بهدوء
بدر >> وانتي شن ح اديري يعني " ورد شرب من القهوة"
سديم >> ح نمشي نسبه قدام هله ونعدي للبنت ونسبها قدام هلها بيش نطلق وانا متريحه
بدر >> ومن قالك ح تجوزي هذي
سديم >> كيف امالا بنقعد قدام وجك ديما
بدر >> اها ح تقعدي قدام وجي ديما طبعا امالا وين بتمشي
سديم >> بدر الدين
بدر هز بكتوفه >> قتلك استعباط نو وانتي حره
ما بتش ترد عليه خشت جوا وهيه المره هذي قعدت تفهم في تلميحاته بشكل واضح
كلّ المحاولاتِ عبثاً في البُعد، إنّك منّي كما الرّوح مِن الجَسد ✨
//
//
عند سهم اللي من امس متلخبط وستي زهرة من لما دارلها حظر معش عاودت وكلمت ابدا … مسح على راسه و رن على ليلى
ليلى >> الو ، سهم نعسانه مالش ساعه روحت من الجامعه
سهم >> نعرف بس بنحكي معاك
ليلى >> في حاجه ؟
سهم >> ليلى ما تعودتش ندس عليكي شي وانتي عارفه
ليلى صحصحت >> سهم احكي
سهم >> تذكري من قبل حكيتلك على وحده كانت في حياتي
ليلى >> زهرة ؟ 🤡😒
سهم >> ايوه
ليلى >> اكيد مش حننساها يعني 😒 كنها ؟ رنت عليك
سهم باستغراب>> اها رنت عليا امس، كيف عرفتي
ليلى >> حسيت بس يعني لما تخطر عليا زهره هكي بدون مقدمات ف اكيده رنت ، وكنت متوقعه انها حترن
سهم مازال مستغرب >> وعليش ؟
ليلى>> عشان ندمت ، فيه حد يكون سهم في حياته و ما يندمش بعد يطلع منها بس هيه شكله توا كيف فطنت
سهم >> ليلى كنك ؟ عندك حراره
ابتسمت وردت خشت لسريرها >> سهم انت جيتني في اسوء ظروف حياتي وثقت فيا وصبيت معايا من قبل حتى ماتحبني و حتى بعد حبيتني ماحطيتش اللوم عليا ولا حاسبتني على اي شي مع انه اللي صار معايا مش ساهل ابدا ولو حد ثاني كان ح يستغل ضعفي ، بس انت خليتني نرد ليلى اللي قبل واحسن ، ف بنجي انا توا نحاسبك على شي فالماضي وصار قبل حتى ماتعرفني بسنين ؟
ابتسم سهم على كلام ليلى >> بس ما عرفتيش شن حكيت معاها
ليلى >> عشان عارفه انك صكرت فوجها ودرتلها حظر
سهم ضحك >> مركبتيلي هكر في تلفوني ولا شنو
ليلى >> لا بس واثقه فيك وعارفه انك مش ح ادير شي يأذيني
سهم >> عارفه اني نحبك صح؟
ليلى ابتسمت>> بتخليني نرقد توا ؟ ولا شنو
سهم >> ارقدي خلاص راك تعلقي لعند العشاء بس
ضحكت >> لالا شويه وح تصبي على راسي مرام
سهم >> خلاص تمام
ليلى >> على فكرة حتى انا راه
ضحك سهم >> تم تم
//
//
مرن يومين والوضع مستقر عند الجميع ، كلهم واصلين لحافة المنتصف وحاصلين فيها لاحد قدّم ولا حد وخر
.
.
.
اليوم كان موعد مجد والصالحين مع الدكتوره بعد ما طلعن التحاليل وخذو موعد
كانو فالانتظار ماسك في يد الصالحين ويراجو في دورهم
صالحين >> يدك مصقعه
مجد >> ويدك دافيه بكل
ابتسم >> من التوتر يدك جمدت
مجد بحتت فيه >> مش عارفه كل ما نجي
للمتسشفى نحس بيك مضايق ، انا عارفه انه الشعور عليك ك راجل صعب تخطي خطوه زي هذي وعارفه انك قتلي ماتفكريش بس مش قادره
صالحين>> مجد را انا موقف مركز كامل على كراع وحده لما نقول اها يعني تمام ولما نقول لا يعني لا ، ف لو مش لازمتني الجيه را والله ما خطيت ربع خطوه من شارع المستشفى حتى مش نجي وندير تحاليل وناخذ موعد
مجد >> وعليش باهي ادير هكي
صالحين >> عشان انا مسؤول على قراراتي واختياراتي ، اخترتك من وسط الناس كلها وانا عارف ظروفك وعارف نيتك من اول يوم وخاطرك في انك تكوني ام … ف عليش نجيبك عندي وبعدها نحرمك من حاجه انا كنت عارفها من اول يوم ؟
ابتسمت مجد وهيه متريحه من كلامه >> وانا عشان عارفتك وعارفه انك ادير في كل شي عشاني ف مانبيش حاجه تضايقك و للمره الثانيه نقولك ، لو الموضوع مش عاجبك وماتبيش اتخش ف براحتك
طلعت الممرضه ونادت عليهم
ضغط صالحين علي يد مجد وصبا وصباها معاه >> خشي بس ووقفيلي دماغك هضا من التفكير خلينا نشوفو حالنا واحوالنا
مشى وسحبها معاه لغرفة الدكتورة
لقراءة جميع فصول الرواية من هنا