الفصل الثاني عشر 12
بقلم مريم احمد
راحت همس لـ هيا الجنينه و لاقيتها بالفعل بتكلم مامتهم
حست قلبها بيدق جامد كل م تسمع هيا بتقول كلمة "يا مامي"
مكنتش عارفه قلبها بيدق فرحه ولا حزن ولا ايه بالظبط
مكنتش عارفه الدموع الي ف عينيها دي دموع فرحه ولا دموع كسره و حزن
همس... هيا..؟
بس هيا شاورتلها بإيديها انها تستنى شويه
و بالفعل سكتت همس و متكلمتش بس ضرب قلبها الخوف لما حست من طريقة كلام هيا الاخيره انها هتقفل المكالمه خلاص
قالتلها بلهفه
همس... لا لا استني
بصتلها هيا بزهول و قالتلها
هيا... في ايييه!!!!
شاورت همس على التليفون و هي عينيها مدمعه و قالت بصوت باين فيه قد ايه هي عايزه تعيط
همس... عايزه اكلمها
كملت بـ استإذان لما لاقت ملامح الزهول على وش اختها
همس... ممكن..؟
اتنهدت هيا بضيق و قالت لأمها الي كانت لسه معاها على التليفون و بتسألها في اي
رانيا... في ايه يا هيا..؟
هيا... سوري يا مامي
رانيا... طيب انا هقفل دلوقتي عشان...
قاطعتها هيا لما قالت
هيا... لا لا استني دقيقه
رانيا... قولي في ايه
قالت هيا بتردد
هيا... هـ همس عايزه تكلمك
سكتت رانيا و هي مش عارفه تقول ايه ف الوقت دا همس جالها احساس انها مش عايزه تكلمها و صعبت على هيا جدا ف ادتلها التليفون من غير م تسمع ردها حتى
خدت همس التليفون بتردد و قالت بصوت مهزوز من العياط
همس... ألو...؟
مجالهاش رد ف قالت
همس... ازيك يا ماما
و قد ايه كلمة "ماما" بقالها سنين مقالتهاش، حست ان قلبها هيقف من كتر فرحتها لما قالتها
مجالهاش رد تاني ف قالت
همس... ماما..؟
استغربت هيا هي متأكده ان رانيا على الخط
خدت هيا من همس التليفون و قالت
هيا... الو..؟
جالها صوت رانيا الغاضب و هي بتقولها
رانيا... انتي بتحطيني قدام امر واقع يا هيا...؟
سكتت هيا و مكنتش عارفه ترد عشان همس
كملت رانيا و هي بتقول
رانيا... اخر مره تعملي كدا سامعه انتي مسمعتيش ردي عليكي عشان تديها التليفون
مثلت هيا ان الشبكه ف المكان هنا وحشه و بعدت عن همس شويه عشان تعرف تتكلم
هيا... ليه يا مامي تعملي كدا بس..، انتي متعرفيش هي م صدقت ازاي انها هتكلمك
سكتت رانيا و هي مش عارفه تقول ايه
هيا... لو سمحتي انا هرجع دلوقتي و هديها التليفون و كلميها عشان كدا مينفعش حتى المره دي بس
رانيا... اوكيه... بس هي المره دي بس يا هيا بعد كدا متديهاش التليفون تاني انتي فاهمه
هيا.... حاضر
و راحت لهمس و اديتها التليفون
خدت همس منها التليفون و قالت
همس... الو يا ماما..
قد ايه كلمة ماما بتخنق رانيا و بتضايقها، بس ف نفس الوقت حاولت تخلص من المكالمه دي و قالتلها
رانيا... ازيك يا همس
دمعت عيون همس و قالتلها
همس... انتي وحشتيني اوي
سكتت رانيا شويه و بعدين قالت
رانيا... و انتي كمان يا حبيبتي
همس... هو حضرتك مجيتيش مع هيا ليه... انتي مش عايزه تشوفيني..؟
رانيا... معلش يا حبيبتي مشغوله شويه ف الشغل
همس... ايوا بس هيا قالت انها هي الي مسكه الشركه بتاعتك و انك فاضيه
اتنهدت رانيا بضيق و قالتلها بحده خفيفه
رانيا... طيب ممكن اخلص بس الشوبينج الي بعمله دا و نبقى نتكلم
هزت همس راسها و كأن امها شايفاها و قالت بصوت ضعيف من كتر الحزن الي هي حسه بيه
همس... طيب.. هيا معاكي
و ادت التليفون لـ هيا و دخلت القصر و هي دموعها على خدها
قالت هيا لأمها
هيا... هو حضرتك قولتلها ايه خلتيها تعيط كدا..!!
زعقت رانيا ف وشها و هي بتقول
رانيا... هــيـــا انــا مـــش نــاقـصــه كــمـــان عـــياط و دلــع كــفــايــه اوي انــي كـــلـــمـتـهـا
هزت هيا راسها و قالتلها
هيا... تمام... سلام
حست رانيا انها اتعصبت جامد و خافت بنتها تزعل منها ف قالتلها
رانيا... هيا حبيبة مامي انا مكنتش اقصد اتعصب
هيا... حصل خير
رانيا... زعلانه..؟
قالتلها هيا برفض
هيا... لا
ابتسمت رانيا و قالتلها
رانيا... انا هقفل بقى دلوقتي
هيا.. تمام
و قفلت المكالمه و دخلت القصر
بس استغربت لما ملقتش همس و سألت عليها
هيا... اومال همس فين
قالتلها ورد بحزن
ورد.. طلعت اوضتها
اتنهدت هيا بحزن عليها و طلعتلها
..... استغفر الله العظيم و اتوب اليه
كانت همس ف اوضتها بتعيط جامد و ابوها زعلان عليها جدا
مرتضى... اهدي يا حبيبتي و قوليلي مالك طيب حصل ايه
صرخت همس بقهر و حزن
همس... مبتحبيش يا بابا مبتحبنيش انا معرفش عملتلها ايه عشان تعاملني اكده
اضايق مرتضى جدا من رانيا و قالها
مرتضى... قولي طيب حصل ايه
حكيتله همس الي حصل و هي قلبها مكسور
همس... يا ريتك م سمحتلي اني اروح اكلمها
خبط الباب و دخلت هيا الي اول م شافت مرتضى و ملامح الحزن على وشه حست انها زعلت
مسحت همس دموعها بسرعه عشان هيا و هيا الي قالتلها
هيا... معلش اني دخلت بعد م خبطت على طول
هزت همس راسها يمين و شمال و قالتلها
همس... مفيش حاجه عادي
قربت هيا منهم و قالت لهمس و هي بتحاول تخليها متزعلش
هيا.. متزعلش معلش هي بس ماما مشغوله شويه
و كان رد همس صادم جدا بالنسبالهم لما قالت
همس... مش فارقه معايا اصلا انا عملت الي عليا و كلمتها.. مكنتش متوقعه منها اي حنيه او كلمه حلوه ليا هي واحده سابت بنتها عشرين شنه من غير م تسأل فيها
بصت هيا لـ مرتضى و هي مش عارفه تقول ايه و مرتضى قال لـ همس
مرتضى... اوعي تزعلي نفسك انتي عارفه بابا بيحبك قد ايه و مبيحبش يشوف دمعه واحده من دموعك و مش هسمح لحد انه يزعلك مهما كان مين
بصتله همس بابتسامه و هي فرحانه اوي بوجود ابوها معاها
كمل مرتضى لما قال
مرتضى... اوعي تعيطي طول م انا عايش لما امـ ـوت ابقي عيطي براحتك دا لو مالك سمح لحد انه يخليكي تعيطي يعني
ابتسمت همس و اتربت ف حضن ابوها و هي بتحمد ربنا على وجوده ف حياتها
بصتلها هيا و هي كانت بتتمنى ان مرتضى كان موجود ف حياتها كدا
دمعت عينيها لما افتكرت زمان لما كان يرجع من الشركه جايبلهم حاجات حلوه كتير
لاحظ مرتضى دموع بنته مسك ايديها و قربها منهم و حضنها هي كمان زي م كان كل يوم لما يرجع من الشغل يجروا الاتنين عليها و يحضنهم
مرتضى... انتوا الاتنين احلى حاجه ف حياتي مش عايز اشوفكوا بتعيطوا ابدا
و بدل م كانت همس هي الي بتعيط بقت هيا هي الي بتعيط جامد
اتخض مرتضى لما شاف بنتوا بتعيط قالها بقلق
مرتضى... مالك يا هيا
همس... بتعيطي ليه
خدت هيا منديل و مسحت دموعها و قالت لأبوها بحزن
هيا... انا اسفه يا بابا... اسفه اوي
مرتضى... على ايه يا بنتي
هيا... اسفه اني اتكلمت مع حضرتك بأسلوب وحش لما جيت و اسفه اني من ساعتها متكلمتش معاك و لا قولتلك قد ايه انا عشت طول السنين دي مستنيه منك مكالمه واحده الاقيك بتطمن عليها فيها يا بابا
اتصدم مرتضى من كلام بنته و قالها
مرتضى... انا يا بنتي متصلتش عليكي ولا مره!!!
هزت هيا راسها بتأكيد و هي بتعيط
مرتضى... هقول ايه م كله بسبب امك
بصتله هيا بعدم فهم ف كمل مرتضى
مرتضى... كل فتره كنت بحاول اكلمك بس امك مكنتش بتوافق نهائي و ساعات كانت بتكذب عليا و تقولي انها هتقولك و انتي تبقي تكلميني
هيا... الكلام دا محصلش
مرتضى... عشان هي كذابه و هتفضل طول عمرها كذابه
همس.. انا مش فاهمه حاجه
مرتضى... خلاص يا بنات متشغلوش بالكوا
قالتله هيا بكسره و حزن
هيا... ماما قالتلي انك مبتحبنيش و بتحب همس اكتر مني عشان كدا اخدها هي و سيبتني و قالتلي انك لو كنت بتحبني مكنتش عملت كدا ابدا
اتصدمت همس من الكلام الي سمعته عن امها و قالت
همس... طب انت ليه يا بابا مفضلتش تقولي انها بتحب هيا اكتر مني عشان كدا خدتها و سابتني ليه كنت ديما تقولي انها بتحبنا احنا الاتنين ليه معملتش زيها
سكت مرتضى و هو مضايق جدا من رانيا
هيا... ياريتني كنت اقدر اقعد معاكوا اكتر من كدا
قالتلها همس بخضه
همس... انتي هتمشي..!!
هزت هيا راسها و قالتلها
هيا... كنت ناويه اقعد معاكي يومين بس للأسف في اجتماع مهم جدا للسركه و لازم احضره
دمعت عيون همس و قالتلها
همس.. لا يا هيا خليكي
هيا... انا كدا كدا همشي بكره الصبح مش دلوقتي
همس... يعني انتي جيتي تقعدي يوم واحد بس بعد غياب عشرين سنه
سكتت هيا و بعدين قالت لأبوها
هيا... ايه رأيكوا تيجوا معايا
قال مرتضى برفض
مرتضى... لا طبعا مينفعش
هيا... ليه بس يا بابا دا جدو هيفرح بهمس اوي
قالتله همس بابتسامه
همس... ممكن توافق
سكت مرتضى شويه و بعدين قالها
مرتضى... روحي استأذني مالك هو كدا كدا شركته ف القاهره خليه ياخدكوا و هو رايح الشركه
فرحت همس جدا و قالتله
همس... بجد يا بابا
كمل مرتضى بتهديد
مرتضى... بس ترجعي معاه و هو راجع من الشركه ملكيش بيات بره
هيا... ليه بس يا بابا
مرتضى... خلاص يبقى متروحش اصلا
هيا... لا لا خلاص
و بصت لهمس و قالتلها
هيا... روحي يلا قولي لمالك
هزت همس راسها و نزلت
و هيا ابتسمت لأبوها بحب و نزلوا هما كمان
..... سبحان الله و بحمده سبحان الله العظيم
كان مالك قاعد معاهم بس ماسك التليفون ميتابع اخبار الشركه
جت همس و قعدت جمب عمتها و قالتله
همس... مالك
قالها من غير م يبصلها
مالك... روحي اعمليلي قهوه
اضايقت جدا من. تجاهله ليها و قالتله بغضب
همس... هو ايه دااا
قاله موسى بزهول
موسى... يابني طب اسمعها الاول
بص لجده و قاله
مالك... لأ القهوه الاول
قال مرتضى لـ همس
مرتضى... معلش يا بنتي هي غلطتي انا اني قولتلك تسأذنيه... روحي يا حبيبتي مع اختك بس ابقي تعالي اخر اليوم
ابتسمت همس بفرحه هي و هيا عكس مالك الي اتعصب و قال
مالك... ليه و هي رايحه فين بقى
خافت همس احسن مالك يرفض بس اتصدمت هي و الكل و ضحكوا على رد ابوها لما قاله
مرتضى... روح اعملي فنحان قهوه
رفع مالك حاجبه باستنكار و قال
مالك... هي بقت كدا
مرتضى... اه
بص مالك لـ همس و قالها بحده
مالك... على فين
خافت همس بس قالتله بشجاعه مصطنعه
همس... فنجان القهوه لـ بابا الاول
ضحكوا كلهم معادا مالك الي هز راسه و قالها
مالك... ماشي هقوم اعمل القهوه لـ عمي بس برضو ملكيش مرواح ف حته
قال كلامه و دخل المطبخ و همس الي بصت لأبوها بحزن
مرتضى... خليه يقول الي يقوله
هيا... بابا خليه يوافق
قال موسى لـ هيا بعدم فهم
موسى... هو في ايه يا بنتي
هيا... انا همشي بكره عشان عندي اجتماع مهم جدا و قولت لبابا اني اخد همس معايا عشان جدو هيفرخ اوي لما يشوفها و بابا وافق بس مالك رفض
موسى... لا خديها
قالتله همس بخوف من مالك
همس... بس يا جدي
قاطعها موسى لما قالها
موسى... قولت روحي
ابتسمت همس بفرحه كبيره هي و هيا
....... استغفر الله العظيم واتوب اليه عدد خلقه و رضا نفسه و زنة عرشه و مداد كلماته
تاني يوم كانوا كلهم متجمعين على الفطار
قال مالك قبل م يقوم يروح الشغل
مالك... تسلم ايدكوا على الفطار
فرحه... تسلم يابني
بص مالك لـ همس و قالها
مالك... لو عرفت انك خرجتي من البيت بدون اذني مش عارف ردة فعلي هتبقى ايه
كلامها مرعبهاش هي بس لا دا رعبها هي و اختها و كل الموجودين معادا موسى و ابوها
وجه كلامه للكل و قال
مالك... يلا مع السلامه
قام مشي
كانت همس هتقوم تطلع اوضتها و هي الدموع ف عينيها بس منعها ايد ابوها الي مسكت ايدها على طول و خليتها متتحركش
ساب مرتضى ايدها و قالها
مرتضى... كملي اكلك
هزت راسها يمين و شمال و قالت
همس.. الحمدلله شبعت
موسى... كملي اكلك و ملكيش دعوه بكلام الواد دا
قالت فرحه بغضب
فرحه... يعني ايه يعني ملهاش دعوه بكلامه يعني تكسر كلام جوزها ولا ايه
قالها وليد بغضب
وليد... لما ابويا يتكلم تخرسي يا فرحه
سكتت فرحه بضيق و غضب و هيا قالت لـ موسى
هيا... خليها تيجي معايا يا جدو
موسى... م هي هتروح معاكي يا حبيبتي
همس... طب و مالك
موسى... يخبط دماغه ف الحيطه
.... لا اله الا الله وحده لا شريك له له الملك وله الحمد وهو على كل شيئ قدير
في فيلا عادل الشناوي
كانوا قاعدين على الفطار
قالت رانيا
رانيا... هيا هترجع انهارده
استغرب عادل و قالها
عادل.. بالسرعه دي!!!
هزت رانيا راسها و قالتله
رانيا... في اجتماع مهم جدا للشركع
كملت بضيق.
رانيا... انا اصلا مش عايزه بنتي تفضل هناك كتير
عادل... كلمتي بنتك..؟
رانيا... اه يا بابا لسه كنت مكلماها من شويه و قفلت معايا عشان الفطار
عادل... مقصدش هيا
قفلت رانيا حواجبها و قالتله
رانيا... اومال قصدك مين
عادل... قصدي بنتك الي بقالك عشرين سنه مسمعتيش صوتها حتى
اتنهدت رانيا بزهق و قالتله
رانيا... كلمتني امبارح
عادل.. و بعدين
رانيا... ايه الي وبعدين قعدت تقولؤ وحشتيني يا ماما و قد ايه هي زعلانه اني مروحتش و كلام من دا
اتعصب عادل جدا و قالها
عادل... هو انتي ايه الجحود الي ف قلبك دااا
اتصدمت رانيا من غضب ابوها و قالت
رانيا... انا عملت ايه
قام عادل بغضب و خرج للجنينه
..... سبحان الله و الحمدلله و لا اله الا الله و الله اكبر
رن على هيا و ردت عليه
عادل... انتي فين دلوقتي يا هيا
ردت عليه هيا بابتسامة و قالتله
هيا... خلاص يا جدو ف العربيه اهو
عادل... تعرفي تجيبي اختك معاكي
قالته هيا بابتسامة فرحه
هيا... هي جت كدا كدا
فرح عادل جدا و قالها
عادل.. اديها التليفون
هيا.. جدو عايز يكلمك
خدت همس منها التليفون بتردد و هي خايفه
همس.. الو
بس اطمنت لما سمعت صوت جدها و هو بيقولها بحنان
عادل... عامله ايه يا حبيبة جدو
ابتسمت همس بفرحه و قالتله
همس... الحمدلله و حضرتك عامل ايه وحشتني اوي اوي
عادل... و انتي كمان متتخيليش فرحتي لما هيا قالتلي انك جايه
همس.. بجد يا جدو يعني حضرتك مش مضايق
قالها عادل بنفي
عادل.. لا لا اوعي تقولي كدا
كمل بحزن. و هو بيقول
عادل... بس هقولك حاجه
همس.... اتفضل
عادل... لو عايزه تحسي بحنان امك تعالي و اتعاملي معانا على انك هيا
نزلت دموع همس بحزن و قالتله
همس... بس. هيا عندها اجتماع
عادل... امك مش هتاخد بالها اصلا هي اساسا كل الي يهمها الشوبينج و بس
هزت همس راسها و قالتله
همس... حاضر
....... سبحان الله و بحمده سبحان الله العظيم
عدى وقت و راحت همس على الفيلا
هيا... انزلي و ادخلي البيت عادي خالص و انا هخلص الاجتماع و هاجي على طول
هزت همس راسها بابتسامة و نزلت و هيا مشيت على الشركه
بصت همس على البيت من بره و دخلت
خبطت على باب الفيلا و فتحتلها الخدامه
سمر... اهلا بحضرتك يا هيا هانم
ابتسمتلها همس و دخلت
اول م دخلت شافت جدها نازل من على السلم
قد ايه شكله اتغير
جريت عليه و حضنته و هي بتقول
همس... جدو
حضنها جدها و قالها
عادل... حمدلله على سلامتك يا حبيبتي
خرجت همس من حضنه و قالتله
همس.... ماما فين
عادل... راحت النادي مع صحابها و شويه و جايه
همس... ايوا بس انا لازم امشي ع العصر كدا عشان المق اوصل
عادل.. متقلقيش هتلحقيها بإذن الله
ابتسمت همس و هزت راسها
لاحظت البوم الصور الي كان عادل شايله
قالتله بابتسامة
همس... دي صورنا زمان..؟
هز عادل راسه.. ف قالتله
همس... انا موجوده ف الصور
عادل... طبعا
همس... ممكن اشوفه
اداها عادل الالبوم و خرجوا قعدوا ف الجنينه
فتحت همس الالبوم و هي مع كل صوره بتفتكر اكتر و اكتر شافت صوره كانت ف نفس الجنينه الي هي و امها كانوا فيها ف الصوره الي عندها و مكان الصوره دي متشال من الالبوم
عادل.... الصوره دي ضايعه بقالها سنين و مش لاقينها
قالتله همس بحزن
همس... معايا
عادل... بجد!!!!
هز همس راسها و قالتله
همس... خدها قبل م امشي من عشرين سنه عشان كل يوم ابصلها و انا مستنيه ماما تيجي تزورني
حزن عادل جدا عليها و قالها
عادل... مش عايزك تزعلي من امك يا همس
هزت راسها يمين و شمال بحزن و قالت
همس... عادي
في نفس الوقت دا سمعت صوت امها و هي بتقول بفرحه
رانيا... هـــيـــــااااا
مهمهاش انها ندهت على اختها مش عليها كل الي همها انها شافت امها بعد عشرين سنه مشفتهاش
ملامحها اتغيرت شويه لكن لسه زي م هي جميله بنفس ملامحها الي ف الصوره
جريت عليها و حضنتها جامد و رانيا هي كمان حضنتها بحب كبير.. يمكن لو كانت عارفه ان دي همس الي بقالها عشرين سنه مشفتهاش مكنتش هتحضنها كدا مش عشان هي همس مش هيا لا.. دا عشان حبها لـ هيا الكبير الي زي م كانت بتقولهم زمان "بحبكوا قد البحر و سمكاته"
رانيا... وحشتيني اوي يا روحي
غصب عنها ردت عليها و قالتلها
همس... و انتي كمان اوي اوي يا ماما بقالي سنين كتير اوي اوي مشوفتكيش
استغربت رانيا من كلام هيا بس اتصدمت لما ادركت ان دي مش هيا بنتها
زقتها رانيا و قالتلها بحده و قرف
رانيا... انتي ايه الي جابك هنا امشي اطلعي بره ووووو
يبتععععع
عيب الشوم
بقلمي مريم احمد
استغفر الله العظيم الذي لا إله إلا هو الحي القيوم واتوب اليه عدد خلقه و رضا نفسه و زنة عرشه و مداد كلماته