الفصل الثاني والعشرون 22
بقلم منى محمود بركات
في بيت مؤمن
بعد العشاء استأذن صبري ونجاة ومشيو بعد ما خلو علا توعدهم انها تروح تقضي يوم معاهم هي ونيجار عشان ملحقوش يشبعو منها ميادة كمان انسحبت بهدوء ودخلت تنام واخيرا دخل مؤمن وعلا اوضتهم
مؤمن كان ساكت دخل خد دوش وخرج ومسك تلفونه وقاعد ساكت تماما وعلا متبعاه ولما سكوته طالع خدت نفس طويل وبدأت هي الكلام
ــ مؤمن ممكن اتكلم معاك شويه ولا مشغول في حاجة ؟؟
ساب الموبايل من ايديه وبصلها باهتمام
ــ لا يا حبيبتي مش مشغول ولا حاجة في اي ؟
عيونها لمعت بالدموع
ــ مؤمن أنا فاهمه بابا جم هنا انهاردة ليه وعارفه أن دا مش عشان هما غلطانين في حقي هما اصلا مش معترفين أنهم غلطو أنا فاهمه دا كويس اوي
مؤمن باندهاش
ــ فاهمه !! اومال الفرحة اللي كنتي فيها دي كانت اي مش فاهم ؟
ردت عليه بنبرة كلها وجع ودموعها نزلت
ــ عشان بحبهم يا مؤمن عشان دول اهلي عشان مش هبطل ابرهم ولا هقدر اكرهم ولا أنا بالقوة اللي تخليني حتي اقاطعهم ... عرفت ليه ..
قرب منها وضمها لحضنه واتكلم بحزن
ــ ليه تكتمي في نفسك كل دا ليه تضغطي بالشكل دا علي نفسك حرام عليكي روحك يا علا احنا محتاجينك منقدرش نشوفك بتتوجعي ونكون عايشين مبسوطين أنا وبنتنا انتي كل حياتنا يا علا
ــ معنديش حلول يا مؤمن والله العظيم غصب عني ومعنديش حلول هما مش هتيغيرو بابا هيفضل ملوش شخصيه قدام ماما ورغباتها حتي لو من جواه مقتنع أنهم غلطانين في حقي بس اللي عايزاه ماما هو اللي هيكون وماما للاسف دي طريقتها في الحب والاهتمام هي بتحبني اه بتحبني بطريقه مؤذيه بس دي امي مش هاجي بعد العمر دا كله اخسر رضاها عليا مش هقدر اتعايش مع الاحساس دا لو لا قدر الله جرالها حاجة وهي غضبانة عليا أنا هموت يا مؤمن هموت والله
ــ بعد الشر عليكي يا حبيبي خلاص خلاص اهدي طيب واللي انتي عايزاه أنا هعمله ... خلاص يا قلبي كفايه ل تتعبي تاني بقا ولا انتي استحليتي التعب بقا اي موحشكيش مؤمن ومنكافته فيكي عجبك ولنا بسايس واداي كدة وبس لا أنا بقا وحشتني لولو المناكفه اللي لازم ترد الكلمة ب عشرة رجعهالي لو سمحتي الست التعبانه النكديه دي مش ماشيه معايا لا
ــ بقا كدة أنا نكديه يا ترعة الفرفشه يا دكتور الجثث المتحلله انت
ــ ايه دكتور الجثث المتحلله دي !! اول مرة اسمعها
ــ ايه معظم الشغل بتاعك قبل ما تعرف صحبك دا كان جثث متحلله اصلا ويقعدو بقا يقولولك ها عندها كام سنه والكلام دا أنا فاكره كل حاجة اومال اي عبيطة أنا يعني
ــ هههههههههههه لا يا روحي أنا اللي عبيط دا انتي زينه زينات البنات كلهم
ــ بتتريق !!
ــ وحياة الجثث المحلله ابدا
ــ المحلله اي اسمها المتحلله
ــ هههههههههههه فرقت يعني كلها عظم يا ستي
فضلو يضحكو ويهزرو لحد ما نامو هو كان حاسس بوجعها وعجزها عن اتخاذ أي قرار وقرر من غير اى تفكير أنه يكون داعم ليها في حاجة المهم يشوف ضحكتها من تاني
أما هي حست انها تعبت من الكلام هي مش متعودة تتكلم وتعبر اصلا عن مشاعرها بس دا جوزها من حقه يفهم عشان لما هيفهم هيستحمل وهيقدر وزي ما توقعت هيدعمها كمان
ـــــــــــــــــــــــــــــــــــــــــــــــــــــــــــــــــــــــــــــــــــ
بهاء وصل قدام بيت بكر ورن عليه بس تلفونه كان في متاح حاول اكتر من مرة مفيش فايدة افتكر أنه قاله الدور التالت طلع ووقف ادام شقتين خبط علي واحدة محدش فتح خبط علي التانيه فتحت بدور
ــ أيوة .. نعم ؟
ــ دي شقه بكر ؟
ــ أيوة مين حضرتك ؟
ــ قوليلو بهاء لو سمحتي
ــ حضرتك الظابط اللي شغال معاه صح؟
ــ أيوة أنا
ــ طيب لو سمحت قبل ما اندهله عايزة اقولك؟ مينفعش كدة انت مخليه ديما مشغول أنا عايزة الحق اشوفو واشبع منه ينفع تسيبهولي قيمة يومين تلاته كدة نفسي نسافر جمصة ولا راس البر وهو بيقولي مش فاضي الظابط اللي شغال معاه يا بدور معتمد عليا أنا مش هعرف اغيب المدة دي كلها يعني حضرتك ينفع كدة يرضيك يعني أنا وبنتي منصيفش بسببك هتبقي مبسوط وضميرك مرتاح يعني ولا اي؟ انت مش بترد ليه عليا ؟
بكر من وراها
ـ انتي مش مديااااه فرصه يتكلم يا بنتي في اي قطر داخل ادخلي جوة يا بدور ادخلي جوة وحسابنا علي اللي حصل دا بعدين يلا
بدور وهي داخله
ــ اسكت واكتئب مش عاجبه انفتح علي الحياة واتكلم مش عاجبه اعمله اي دا بس يا ربي
بكر بصوت عالي
ــ أنا سمعك علي فكرة هه سمعك اتكي ع الصبر يا بدور جايلك
بص ل بهاء اللي متنح من اللي بيحصل قدامه
ــ باشا مصر كلها اتفضل لؤاخذه علي اللي حصل دا اتفضل ا باشا ... اي يا باشا مالك متخشب كدة ليه ؟ اتفضل
ــ اتفضل اي بس دا بينها جيره ما يعلم بيها الا ربنا انا ماشي يا عم مش ناقص جنان أنا
مسكة من دراعه قبل ما ينزل
ــ استني بس يا باشا رايح فين ... معلش هي بس بدور يا تسكت خالص وتفضل بتعيط وتندب لوحدها يصوت واطي يا تمشي تضحك وتهزر مع الناس كلها معندهاش وسط بعيد عنك تعالي بقا مينفعش كدة نتكلم من علي الباب
بدور من وراهم
ــ اي يا بكر هجبلكم الشاي علي الباب ولا اي ؟
بكر وهو بيجز علي سنانه
ــ ادخلي جوة يا آخره صبري
بدور وهي بتشوح بايديها
ــ والله لاكتئب تاني بس هه
بهاء ابتسم غصب عنه
ــ يلا ننزل للراجل اليوم طويل ومتعب وبكرة ورايا يوم اطول بكتير أنجز عايز انام مش قادر
ــ انا مقدر صدمتك طبعا يلا طيب وبعدين الجايات اكتر اتفضل هو مستنينا تحت
نزلوا للراجل اللي كان طالب ايجار عالي بس بعد كلام مع بكر وبهاء نزله وبقا ايجار معقول مضو العقد علي ست شهور بس قابله للتجديد وبعدها خد بهاء المفتاح وخرج هو وبكر
ــ هو حضرتك هتبات فيها من انهاردة. ولا اي ؟
ــ لا طبعا مش عامل حسابي هروح انام واعمل حسابك بكرة الصبح هجيب شنطتي هنا وتيجي تفهمني عملت اي في حوار الواد اللي قولتلك عليه
ــ تمام يا باشا من النجمة هبقي مستنيك
ــ وشوف تلفونك أنا فضلت ارنلك وانا قدام البيت كتير كان غير متاح
ــ ما هو للاسف مش بيلقط شبكة غير في اوضه واحدة اللي فيها البلكونه وأنا وقتها كنت في الصاله مخدتش بالي حقك عليا يا باشا
ــ يا عم مفيش بينا حقوق عموما انا لو لاقيته غير متاح هطلع اخبط عليك بس يارب اختك ما تفتحليش بموشح جديد المرة دي
ــ صحيح قبل ما تمشي متزعلش من اللي حصل هي بدور بس رجوع بنتها ليها مخليها مهيبرة شويه
ــ انت اللي فكرتني أنا سيبك ب مزاجي يا بكر بس زي ما دخلتك حياتي وحياة اللي يخصوني من حقي عليك اعرف في اي انت لا عرفتني موضوع قتل والدك ولا موت جوز اختك ولا تفاصيل كتير مش فاهمها وانا ساكت عشان المدعكة اللي احنا محطوطين فيها بس طالما العلاقه بينا مبقتش شغل وبس وبقا في صحوبيه ف صحوبيتي متبادله يا بكر يا كدة يا نفضها ونرجع للشغل وبس من هنا ل بكرة هسيبك تفكر وتختار يلا تصبح علي خير سلام
ــ وانت من أهله ... سلام يا باشا
بهاء نزل وبكر دخل وافتكر اللي بدور عملته دور عليها في اوضتها ملقهاش اتكلم بصوت عالي وهو رايح اوضته
ــ مستخبيه كمان !! ماشي الصبح هعرفك شغلك لاني تعبان ومفرهد دلوقتي مش قادر ادور عليكي
دخل اوضته وفي خلال دقائق كان نام وعدت الليله بكل اللي فيها عليهم وطلع نهار يوم جديد
ــــــــــــــــــــــــــــــــــــــــــــــــــــــــــــــــــــــــ
بهاء حضر شنطة صغيره وفهم أبوة وعمته أن عندة قضيه ماسكها مع اتنين صحابه وفيها سفر كتير وأنه هيقعد عند حد منهم بس قبل ما يمشي عز سأله ( ولو مش اسمه عز مشوها عز هه )
ــ عملت اي في موضوع نيرة يا بهاء ؟
بهاء
ــ قدمت التسجيلات كلها للنيابه والتحقيق مفتوح وحاليا هي مطلوب القبض عليها بسبب حاله مهاب بس انا معرفش هي فين للاسف قالت كل حاجة لكن مكان ما هتروح مقالتش خالص
سوزي
ــ مش سهله بردو بنت الايه يمكن كانت عامله حساب انك تكون بتسجلها يا بهاء
بهاء
ــ ممكن فعلا
عز
ــ واحنا هنفضل قاعدين حطين أيدينا علي خدنا كدة خلاص كل حاجة راحت
سوزي
ــ اهدي شويه يا عز الضغط مش مظبوط عندك بقاله مدة اصلا هنعمل اي يعني
عز
ــ طب مهاب عامل اي وليه مش مسموح نشوفه ؟
بهاء
ــ والله كويس والعلاج ماشي تمام ووقت ما الدكاترة تسمح بالزيارة هنكون كلنا عنده اكيد
سوزي
ــ عموما يا بهاء أنا هحط الفلوس اللي في حسابي الشخصي ع مجوهراتي وأشوف هيعملو كام وهنجب فيلا صغيره كدة نسكن فيها مش هتفضل مقيدين حريتك كدة كتير متقلقش
بهاء
ــ أنا لا متقيدة حريتي ولا قلقان يا عمتي دا بيتكم وانتم مش مضايقني في حاجة
عز
ــ شكرا يا بني اصيل
بهاء
ــ مفيش شكر بينا اكيد ... اومال بسمة فين ؟
سوزي
ــ قالت هتنزل تقابل صحابها في النادي شويه وترجع ع الغدا
بهاء
ــ تمام .. عن ازنكم أنا بقا سلام
سوزي وعز
ــ سلام
بهاء ركب عربيته ورن علي بسمة مرة واتنين بس مردتش نفخ بعصبيه وطلع ع بيت بكر هو سكت علي موضوع شريف كتير ودلوقتي وقت الحساب قضيه عمر وعصام خدت كل وقته ودا وقت عيلته عيلته وبس
وصل ورن علي بكر بس بردو اداله غير متاح اتنهد وطلع خبط وفتحلتله بردو بدور
ـــ ايوة مين ؟
بصلها باستغراب
ــ أيوة مين ! انتي عندك زهايمر مبكر ؟ فين بكر ؟
بدور كانت ناسيه شكله وافتكرته لما اتكلم بس كشرت بسبب كلامه
ــ اي زهايمر مبكر دي لا طبعا انا زي الفل
ــ ياستي وانا مالي زي الفل ولا زي الخل أنا عايز بكر هو فين
ــ خل !! أنا زي الخل ؟!!!! انت ازاي تقولي كدة لا خلي بالك احنا هنكون جيران وكدة دا مؤشر مش كويس
ــ بجد ؟ هي شكلها هتبقي جيرة مهببه ( نادي بعلو صوته ) بكرررر يا بكر انت يا بكررر
ــ مش هسمعك لان اوضته اخر اوضه في الشقه منفصله عن العالم كله حويط بكر تعرف أن اتخنقنا عليها كتير الاوضه بس هو عشان مفتري خدها غصب واقتدار
ــ لا أنا مش هتشل دلوقتي عشان ورايا شغل مهم ... يا ستي لو سمحتي اندهلي بكر ممكن ؟؟ وبعدين هو انتي تعرفيني عشان تتكلمي معايا بعشم كدة ولا هو اي حد بتتكلمي معاه وتبعبعي بالاسلوب دا
عيونها دمعت واتكلمت بسرعه وصوتها مخنوق
ــ لا طبعا انا مسمحلكش تقولي كدة علي فكرة أنا بس لما بتوتر بتكلم كتير و وبكر كان بيحكيلي كتير عنك مش مع اي حد أنا بعمل كدة أنا أنا اسفه عموما عن ازنك هندهلك بكر
دخلت بسرعه وهو اتلجم مكانه عيونها اللي بتلمع بالدموع لخبطتها وهي بتتكلم خدودها اللي احمرو من الاحراج صورتها كلها علي بعضها اطبعت جوة عيونه مش بتروح ندم أنه اتسرع واتكلم بالحده دي معاها مهما كان دي اخت بكر بس هو ندم عشان هي بس اخت بكر ؟!
بكر خرج بسرعه ل بهاء واعتذر منه ع أنه راحت عليه نومة وبهاء فتح. الشقه ودخل وقاله أنه هيستناه وبعد ربع ساعه بكر جاله
ــ ها قولي عرفتلي اي عن شريف ؟
ــ بصراحة يا باشا يعني
ــ من غير اي مقدمات يا بكر قول كل اللي تعرفه خلينا نلحق اللي ينفع يتلحق ( كمل بصوت مهزوز ) هو هو عمل حاجة في اختي لو علاقتهم يعني
قاطعه بكر بسرعه
ــ لا لا علاقتهم كلها خروجات وفسح وتلفونات وبس متقلقش المشكله مش في الانسه بسمة المشكله في عمت حضرتك تقريبا كدة يعني احم بصراحة يا باشا متجوزين عرفي والشركة اللي هو فاتحها دي من فلوس عمتك اصلا
ــ يا ابن الك لب .... ميييين دا مين ومين زقه علينا يا بكر
ــ دا أبن صديقه عمتك المقربه محدش زقه أنا متأكد هو بيسحب فلوس من عمتك وعمل الشركة وفي نفس الوقت مقضيها حب وغراميات مع اختك احم لا مؤاخدة مع اخت حضرتك يعني
ــ لا عدلت الكلام انت كدة. اتعدل يا بكر مش ناقصه
ــ اتعدلنا ... حضرتك تحب نشدة و
ـــ لا لا لا دا اتفه من كدة بكتير أنا عايز اكشفه قدام الاتنين يا بكر اختي تتخطاه علي مهلها أنا هبقي معاها مش هسيبها وعمتي هي حرة تتخطي متتخطاش محدش قالها تستعيل نفسها للدرجة دي
ـــ ودي هنعملها ازاي ؟
ــ سوزي هانم تقفشه مع بسمه ف تقول علي اللي بينهم والجواز العرفي والفلوس وكدة ابقي خلصت منه نهائي
ــ بس كدة الواد مخسرش يا بهاء باشا
ــ قصدك اي
ــ قصدي أن اهلك خسرو كل فلوسهم وانت بنفسك قلتلي طول ما انتم مش عارفين مكان نيرة البلاغ ملوش اي لازمة ... تقوم انت تكشف الواد وتسيبه يخلع بالشركة اللي فتحها من فلوس وعلاقات عمتك ؟ دا كلام دا
ــ انت بتجيب الأفكار دي منين دا انت داهيه
ــ حبيبي تسلم اي خدمة
ــ هههههههههههه طب اي هنعملها ازاي دي
ــ لا أنا قلت الفكرة تتنفذ ازاي بتاعتك بقا
ــ كدة الواد لازم يتشد فعلا يا بكر ويمضي ع تنازل عن الشركة باسم عمتي
ــ وليه باسم عمتك بس ؟
ــ لانها فلوسها وبعدين عمتي وبابا واحد دي لسه قايلالي قبل ما انزل أنها بفلوسها اللي في حسابها الشخصي ومجوهراتها هتجيب فيلا صغيرة عشان يرجعو يعيشو فيها عمتي وبابا ومهاب مركب واحدة واكيد بسمة معاهم مش هتخلع منهم سوزي متقلقش
ــ تحب نشدة أمتي
ــ انهاردة يا بكر أنا عايز الحوار دا كله يخلص انهاردة
ــ يا سلام حالا يا باشا
ــ لا اقعد مش هتقوم من هنا ولا تعملي الخدمة دي غير لما اعرف احنا صحاب يا بكر ولا دي علاقه شغل وبس ؟ أنا قلتلك امبارح اني هسيبك ل بكرة تفكر ف عايز اعرف قرارك دلوقتي ؟
ــ هو انا اطول يا باشا نبقي أصحاب أنا ليا الشرف والله
ــ سيبك من كلام الإنشا دا ها يا بكر
ــ الكلام صعب يتقال ... ابويا مكنش شخص كويس اتقتل اه مزعلتش عليه لا مزعلتش لانه ميتزعلش عليه بيشرب والمنطقة كلها عارفه وكان مخلي عيشتنا مرار ... جوز اختي اختي بالبنت تلت سنين ولما حس أنه تعبان رجع وساب البنت ل بدور وتوفي جتله سكته قلبيه ومات بدور كانت مش مصدقه أن بعد تلت سنين تاخد بنتها في حضنها من تاني ومن وقتها وهي فرحانه والضحكة مش بتفارق وشها اه زعلت شويه ع امجد جوزها بس بعد تلت سنين وحرمان من الضنا مخلوش له رصيد كبير في قلبها زعلت شويه وفرحتها ببنتها نستها الدنيا كلها ... بس كدة يا باشا
بهاء كان لسه هيرد عليه بس اتفاجا بتلفونه بيرن بصوت رساله من رقم مجهول مكتوب فيها
ــ رغم أن رسالتي ليك مش هتأثر عليا ولا هتفدني باي حاجة بس مقدرتش مردش القلم يا باشا ... البقاء لله في مهاب اخوك اكيد خمس دقائق والخبر يوصلك بس حبيت اكون اول واحد ... البقيه ستأتي متستعجلش...