البارت العشرون 20 والاخير
بقلم سندس مالك
قعدتا اعاين لي زين وأنا خايفه و متردده ، كان مبتسم😭مبتسم و منتظرني اقول ليهو ، كان متخيل اني ح اقول ليهو حاجه حلوه او كده ، ابتسامتو و فرحتو و راجيني اتكلم و انا بعاين ليهو ، حسيت بحنيه غريييبه اتجاهو كأني امو مش مرتو ، كأنو حاجه بتخصني ولا دي مشاعر الأمومه بتعمل في الوحده كده و بتخليها عاطفيه اتجاه اي حاجه ! ما قدرت اتكلم و بكيت بس ، قام من كرسيهو اتخلع ! سندس ؟ مالك؟ كنت بعاين ليهو وببكي و كل ما يسألني مالك ببكي زياده ، قال لي اوديك الدكتور ؟ في حاجه ؟ قلت ليهو لا ، قال لي مالك طيب ! حضنتو و كانت اول مره انا ابادر بي حاجه زي دي ل زين ، حضنتو و بكيت في كتفو الشمال ، ماكان فاهم شي بس بقول لي اهدي اهدي طيب و فهميني ، قلت ليهو دايره امشي لي امي بس وديني ليها .. قال لي سندس حاااضر ح اوديك ليها قلت ليهو انا جهزتا شنطتي ، قال لي شنطتك !! قلت ليهو خليني اقعد مع امي لحدي ما اولد قال لي سندس ده كلام شنو ده هسي ! قلت ليهو زين عليك الله خليني اقعد معاهم ، قال لي سندس لا ما بخليك انتي ح تولدي و حتقعدي هناك بعد الولاده ، عايزة تمشي وانتي باقي ليك تلاته شهور ليه ! قلت ليهو زين خليني امشي عليك الله خليني و ما تعاندني ، انا ما مرتاحه هنا ، قال لي عايني لي هنا ، في زول ضايقك ! سمعك كلمه ! كنت ببكي و بهز ليهو براسي لا لا قال لي طيب زعلانه مني ! قلت ليهو لا ، قال لي في شنو طيب ! قلت ليهو انت ما بتستاهلني بس ، عاين لي بخلعه زياده منطط عيونو قال لي قولتي شنو ! قلت ليهو انت بتستاهل وحده احسن مني بس ، ضحك و قال لي سندس انتي مالك الليله ! في شنو وريني؟ قلت ليهو ماعايز توديني ، انا ماشه براي و قمتا على حيلي وقف عارض لي قال لي ما حتعتبي باب الشارع سامعه ! ، قلت ليهو زين زح من وشي خليني امشي قال لي ما حتمشي قلت ليك تمي الكلام الكنتي بتقولي فيهو انا ما بستاهلك عشان شنو ؟؟ ، خلقتو اتقلبت طوالي و ملامحو اتغيرت و عيونو حمرت ، الخوف و التوتر الكنت فيهم اللحظه ديك زادوا علي لما شفت زين اتقلب بس من كلمه واحده وطيب لو قلت ليهو الباقي ح يعمل شنو ؟ سمعتا صوت الباب التحت فتح كانوا رجعوا ناس امو من بره ، سمعوا زين بكورك لسه بقول لي ما حتطلعي من البيت ده الا بإذني انا ما غبي عشان تقولي لي كلام و تقطعيعهو و لامه شنطتك من بدري ، اختو و امو جو جاريين لينا في الشقه فوق ما كانوا فاهمين شي برضو بس امو سالتوا زين بتكورك مالك ؟ في شنو ياسندس ! اللحظه ديك حسيت بمغص جاني من المخوف و وقعتا من طولي مهبطه ، ساقوني المستشفى كلهم سريييع ، الدكتور قال ليهو زين مرتك و ولدها الاتنين ضغطهم منخفض شديد ، نتيجه عن حالة توتر كانت عايشه فيها زوجتك انا المقابله الفاتت حذرتك انو التوتر بضر المره الحامل و جنينها , كان ممكن الطفل يموت في لحظات زي دي لما ينخفض ضغط الدم ، سندس محتاجه لي راحه و جو خالي تماما من الانفعال و التوتر و التنشنه ، ما مفروض تتحرك من السرير نهائيا الشهر الجاي تمام ؟ قال ليهو ممكن اتكلم معاها ؟ امو قالت ليهو لا ما كفايه كواريكك و انفعالك فيها قبل شويه ما حرام عليك بت الناس دي تجوط فيها كده ! طبيعتك دي ما حتغيرها انت ؟ ، كنت بعاين ليهم من بره و دموعي نازله بعاين للدربات و ببكي ، ناس زي ديل ما بستاهلوني نهائيا 😭😭 ربنا اداني زين ليه طيب! ربنا بدي اي زول الروح المشابهه ليهو ، انا ليه مرت زين ، ام زين ليه نسيبتي! ، اي اهلي طيبين و ربنا عوضني بناس طيبين بس انا ما بستاهل زين ، زين طيب شدييد طيب لساني اتربط ليه ؟ لما ماقدرتا اتكلم معاهو ! حسيت انو في سبب ورا سكوتي ، ربنا ستر حاجه و انا كنت عايزة اكشفها ! ، اليوم داك نمتا في الغرفه براي زين كان حارسني بره و اهلوا مشوا ، كنت بعاين ليهو بي بره واقف و قاعد نعسان و بقاوم في النوم حارسني ، الصباح جونا ياسمينه و رياض في المستشفى دخلوا لي جوه يحمدلو لي السلامه ، كانت ياسمينه قاعده جنبي و بتنصح فيني ما ترهقي نفسك و ما تتعبي و كده و رياض قعد بعيد مع زين في الكنبه جوه في الغرفه ، قالت ليهو ح يخرجوها بتين ! قال ليها الليله ح نطلع ، قالت لي خلاص ياسندس بزورك في البيت عشان انا هسي ماشه الاستوديو عندي برنامج ، ودعتني و طلعت مع رياض الما اتكلم معاي كتير بس قال لي انتبهي لنفسك و ربنا يقومك بالسلامه ، بقينا انا وزين برانا 💜 زين بالي مشغول بيهو من امبارح ، قرب مني و قعد طرف السرير قال لي انا اسف جطتا فيك شدييد و ماكان مفروض اعمل كده ما راعيت حتى لي ظروفك ، قلت ليهو زين اقفل باب الغرفه و تعال قفلوا و جا قعد في السرير تاني ، يادوب اتمالكتا نفسي و اتشجعتا و قلت اوريهو وانا في المستشفى قبل ما نطلع ، قلت ليهو زين انا قلت ليك اول امبارح انت مابتستاهلني عشان فعلا انت ما بتستاهلني ، انت بتستاهل وحده احسن مني بكتيير في اي شي ،قال لي سندس ،قلت ليهو ما تقاطعني ، خليني اتم كلامي قال لي كويس تمي بلعتا ريقي و قلت ليهو انا كنت بحب واحد قبل كده ، كذبتا عليك لمن قلت ليك ماعرفتا غيرك ، عاين لي باستغراب قلت ليهو كان اول زول انا احبو ، قاطعني تاني وقال لي و اخر زول صح ، قلت ليهو لا ما اخر زول قال لي عرفتي غيرو ! قلت ليهو لا ، بعدها نحنا اتزوجنا قال لي و ما تكذبي تاني وتقولي لي انك حبيتيني ، سكتا شويه و قلت ليهو زين ماتقاطعني ، قال لي تمي اها ؟ قلت ليهو ما اتفقنا انا و هو و انفصلنا ، تااني قاطعني قال لي المشكله وين ! حاجه طبيعيه اي بت في سنك بتعرف و بتدخل في علاقات مش علاقه بس ، اي زول في عمر العشرين بكون جرب الحب و العلاقات يا سندس ، عاينت ليهو قلت ليهو اي عارفه حاجه عاديه بس انت ماعرفتا الزول ده كان منو ، عدل قعدتو و عاين لي في عيوني و سألني منو ؟! برضو عاينتا ليهو و المره دي خفتا من حاجه ، خفتا انهي صداقه و علاقه ليها سنين و خفتا ادمر بيتين و خفتا على زين قبل اي حاجه ، قلت ليهو كان سامر ولد دفعتي , قال لي طيب اها ! قلت ليهو اهلو رفضوني قال لي اها! قلت ليهو و انفصلنا بسبب كده ، قال لي طيب ليه ما قلتي لي من زمان الحاجه دي ! و هسي الايام دي البخليك تتوتري بسبب حاجه زي دي شنو ! قلت ليهو زين انا بس كنت عايزة اصارحك و خلاص ، قال لي طيب قومي غيري لأنو ح نطلع من المستشفى قلت ليهو ح نمشي البيت ! قال لي لا ح اخليك الشهر ده ترتاحيهو في بيت اهلك زي ما انتي عايزة ، قام على حيلو و تاني انا لمتا روحي لين ما كلمتوا و ليه خفتا ياخ ، وصلني بيت ناس امي بشنطتي و سلم عليهم اتغدا معاهم و رجع ، رقدتا في الغرفه سرحااانه في المروحه ، جات امل سلمت علي وقعدت قالت لي عصيرك بقى شاااي و انتي سرحانه قلت ليها امل لو في زول غلط و مافي زول شافو و عايز يعترف بغلطوا يعمل شنو ؟ قالت لي على حسب الغلط ! قلت ليها كيف؟ قالت لي في غلط بكون كبير و حسابو الفي الدنيا ارحم من حسابو الفي الاخره , قلت ليها اها! قالت لي الغلط الزي ده لازم زولو يعترف بيهو ، قلت ليها اها و الغلطه البسيطه ! قالت لي الغلطه البسيطه دي بتعيش الزول في ندم طول حياتو لانو شافها بسيطه ما بتستاهل العقاب ، قلت ليها امل و الزول يفرق كيف ؟ قالت لي اسمعي ياسندس طالما ربنا ما كشف الحاجه المستوره ف دي لحكمه بيعلمها الله ، ربنا لمن يستر زول ما مفروض هو يفضح نفسو , و اذا بليتم فاستتروا ، تتذكري سيدنا عمر بن الخطاب لمن جاهوا ابو بنت و قال ليهو بنتي جاها عريس و هي زنت قبل كده و انا عارفها ، اكلم العريس ولا اسكت بما اعرف ؟ سيدنا عمر طوالي نهرو قال ليهو كيف عايز تكشف الحاجه السترها ربنا ، غلطها كبييير بس ربنل سترها و هي تابت يبقى تاني تكشف غلطها للناس ليه ! قلت ليها لكن لو ما زنت ! قالت لي هي منو هي ؟ علينتا ليها و قلت ليها قصدي يعني لو غلطت بس ؟ قالت لي عموما يعني هي مش عرفت غلطها يبقى تصلحوا هي براها و اذا ااعترافها ممكن يتسبب في مشاكل كبيره معناها تسكت لأنو ربنا سترها و هو عالم بالهي جاهلاهو ... من كلامي مع امل ارتحت شويه ، عدا شهري و انا قاعده في سريري ما بتحرك لانو الارهاق ما بنفع معاي ، و الشهر التاني زين ما جا ساقني من بيتنا خلاني اقعد لحدي الولاده لأنو ما عايز يغصبني على شي تاني ، بديت افكر لو انا كنت اتطلقتا من زين ! لو قعادي هنا كان بطلاق؟ الفتره البعدتا فيها عن زين عرفتا فيها اني بحبو ، اني لقيت حاجه اسمها حب و انا مع زين ، كنت بتذكر فيهو الشهور دي كل يوم و بشتاق ليهو ، ما كان بجي
كتير يشوفني في بيت اهلي ، مره مره بس لكن انا كنت بتذكروا كتير ، بتذكر ايام شهر العسل لمن كان بصحى الصباح ويقول لي لو ماقمتي ح ارشك بالموية البارده، كنت بتساغل و بقول ليهو خليني انوم ياخ و لأنو مجنون كان بمشي يجيب الموية و يكبها في شعري و اصحى مخلوعه و اقول ليهو في عروس بصحوها كده! كان قلبو مييت بضحك ولا كانوا عمل حاجه يخليني اجري بي وراهو الشقه كلها زي الشفع نتجارى ورا بعض ، ياخي في عروس في شهر عسلها راجلها بقول ليها الا تطبخي لي خضره ! نجيب خضره من وين في ماليزيا بس يا زين😂👋 خلاني مجنونه زي و بتذكر لما نزلنا الساعه ١١ صباحا بنفتش في الخضره ، وما كنت بعرف اطبخها اساسا خليتو لمن وصلنا شقتنا و فاجئتو بي اني ما بعرف 😂😂 و هو ما كان بعرف برضو ، فتحنا اليوتيوب وحده اسمها خالتو منيره بتعمل الاكل وبتنزلوا في صفحتها ، كتبنا طريقة عمل الخضره جا هو خربها لي طريقة عمل الخضره للعرسان الجداد😂😂 قلت ليهو زح عليك الله انا جعتا ، فتشنا الطريقه وطلعناها ،دخل معاي المطبخ 😂 الاتنين بنعمل حاجه و بنجري على اليوتيوب نوقفوا تاني نرجع نفتحو😂😂😂 استمرينا كده نتجارى و نتطاقش في المطبخ عشان حلة خضرا ! و في الاخر بعد تلاته ساعات طلعت و قلنا بسم الله نضوقها ، اكتشفت انو زين حرق البصله😒 اليوم داك سكيتو الشقه كلها و حلفت ليهو كان ما طلع و عملها الليله ما بخليهو ، تاني مشى السوق براهو و جابها 😂😂 كان بحنس فيني عشان اساعدوا و انا كنت بدلع الوقت داك ضفوري و منكيري و خلاص ساعدتك في الاولى ، لحدي ما نمتا في الصاله و خليتو بعمل فيها براهو ، جاني بره صحاني بكل هدووء بقول لي ما تنومي جعانه 💜😭 الرحمه الأنا شفتها في قلب زين خلتني عميانه من قلوب الدنيا كلها ، قربتا للولاده و انا كل ما اتذكر لحظاتنا ببكي ، حسيت اني فقدت زين بعد ما اتعلقت بيهو ، جا يوم الولاده وكان مقررين لي عمليه ، الدنيا ملها بره و انا جوه مخدره ، لحدي ما ولدتا و جبتا متيم طلعوهو ليهم ، ماكنتا واعيه للحظات الاولى البشيل فيها زين ولدنا ، ما كنت واعيه لي اي شي ، بعد ساعات حتى بدا البنج يفك مني ، اليوم الاول كلو زين ما دخل حتى بارك لي , اليوم التاني من الصباح و انا في مستشفى دريم بعد ما مرادي غيرت لي لبسي و مكيجتني و سرحت لي شعري و غطتني ، متيم كان لسه في الحضانه بدفو فيهو لأنو قالوا بردان 💜 ، شفتو و رجعوهو مني ، اليوم التاني زين دقا الباب و جا داخل ، كنت زعلانه منو ليه ما وراني وشو اول يوم ؟ مرادي طلعت عشان تخلينا برانا ، قعد في الكرسي الجنب سريري و قال لي حمد لله على سلامتك ، قلت ليهو الله يسلمك بدري , قال لي مالك ؟ قلت ليهو من امبارح ما دخلت تشوفني مالك ؟ قال لي اتلخمتا مع الناس و اهلنا ، قلت ليهو تمام ، اتقلبتا على الحيطه جا قعد في السرير و هو بهبش في شعري قال لي انتي كويسه ! قلت ليهو لا ، قال لي عايني لي ، قبلتا عليهو قلتا ليهو مالك؟ قال لي مالك انتي! قلت ليهو اشتقت ليك قام ابتسم ، شلت راحة يدو و ختيت فيها وشي قلت ليهو زين انا بحبك ، قام ضحك و قال لي عارف قلت ليهو بتين عرفتا ، قال لي من ولدنا البشبهني كتييير ده ، قمتا ضحكتا و قلت ليهو انا بجد كنت فاقداك شديييد .. قال لي ح ترجعي بيتنا ؟ قلت ليهو اي 💜 زين انا بريييدك والله .. رجعتا مع زين بيتنا بي ولدنا متيم ، عشتا معاهو سنيني كلها بس ليلة باريس كانت واقفه عقبه في حياتي كلها اي صاح قررتا السر يموت معاي انا و رياض و نهيناهو في باريس ، بس انا وقفت لي الليله ديك عارض في حياتي ، ما كنت بنوم مرتاحه لأني دايما بتخيل زين عرف بيها ، في غلط ما بتغفر ابدا حتى لو كان مدسووس بس بالنسبه لصاحبو بكون عامل ليهو هاجس بكون واقف ليهو مجهجهو في سكة حياتو ، غلطه بتذكرك بيها في كل سكة من مشوارك ، اي ممكن تلقى السعاده و تتحاول تتجاوزها بس احساس الكتمان اصعب من اي احساس ، انك تكون عارف نفسك غلطان و مفروض تتحاسب و انت ما قادر تتكلم ده اسمو احساس الندم بعد الغلط و بعد ما يفوت الآوان
تمت بحمد الله
لقراءة جميع حلقات القصه من هنا
وايضا زورو قناتنا سما للروايات
من هنا علي التلجرام لتشارك معنا لك