قصة ألم البداية
البارت الرابع والاربعون 44
بقلم فريدة احمد
امجد فجأة وهو ماسك أيدها حس بإديها بتمسك في ايده
امجد مكانش مصدق نفسه وقبل مايقوم ينادي للدكتور
شيرين قالت بتعب وهي مغمضة عنيها.. ام.جد
امجد مد ايده علي وشها وهو بيتأكد انها فاقت فعلاً
امجد بفرحة .. حبيتي انتي سمعاني
وهو ماسك أيدها لسه
امجد .. شيرين . شيرين ردي عليا
شيرين فتحت عينيها بتعب وهي مش فايقه كويس بس حاسه
امجد ميل باسها على راسها وبعدين قالها .. شيرين انتي شيفاني وسمعاني صح
شيرين غمضت عينها تاني وهي بتحاول تركز
فتحت عينيها وقالت بتعب .. انا فين
امجد باس إيدها وقالها .. انتي في المستشفى
شيرين .. ايه اللي حصل
امجد .. تعبتي شويه
امجد .. ثواني هشوف الدكتور
وقبل ما يقوم
شيرين مسكت ايده وقالت .. خليك معايا
امجد قعد وباسها علي راسها وباس ايديها الاتنين وقالها .. انا معاكي ياحبيبتي وعمري ما هسيبك
شيرين دموعها نزلت وقالت .. ما انتا سيبتني
وبصتله وقالت .. هونت عليك وسيبتني ياأمجد . وانت عارف اني مقدرش اعيش من غيرك
امجد مسح دموعها وقالها .. ولا انا اقدر اعيش من غيرك
صدقيني .
شيرين .. الزاي . ما انت قدرت فعلا. انت طلقتني وكأنك ماصدقت
امجد هز راسه وقال .. لأ . مقدرتش انا كنت بتعذب في بعدك .. انا بس كنت زعلان منك .
وكمل بعتاب .. ليه عملتي كده ياشيرين
ليه كدبتي عليا وحرمتيني من اني يكون عندي ابن منك
شيرين دموعها نزلت وهي حاسه بالندم وقالت .. انا اسفه
مش عارفه انا عملت كدة الزاي . اسفة . بس انت كنت بتعرف عليا ستات
بصتله وقالت .. ليه . انا قصرت معاك في ايه
امجد مسح دموعها وقالها .. عمرك ماقصرتي . وانا عمري مالمست غيرك صدقيني ياشيرين
شيرين .. انك تبص لغيري وتسمح لنفسك تسهر مع ستات
دي تبقي خيانه ياامجد . ماتبررش الخيانة علي مزاجك
امجد .. انا خلاص توبت وبطلت اسهر .انا اه غلطت وبعترف بس اوعدك اني عمري ما هبص لغيرك
انا اساسا محبيتش في عمري غيرك ياشيرين . وصدقيني مشوفتش غيرك ولا كنت بشوف غيرك قدامي ولا واحدة تملي عيني زيك
مساءا
في الفيلا
يارا كانت لابسه ونازلة
شهيره قابلتها .. علي فين كدة
يارا .. خارجة مع صحابي ياماما
شهيره .. دلوقتي . انتي عارفه الساعه كام دلوقتي . الساعة ١١. ولما تخرجي دلوقتي هترجعي امتا
يارا .. مش هتأخر ياماما . انا هقابل صحابي في كافيه هنا قريب من الفيلا ومش هتأخر صدقيني . هي نص ساعة بس
شهيره برفض .. لأ ولا دقيقة حتي
يارا بسرعة قالت .. علشان خاطري ياماما صدقيني مش هتأخر والكافيه قريب . عشان خاطري
شهيرة بقلة حيلة .. مش هتتأخري
يارا هزت راسها وقالت .. مش هتأخر
شهيره هزت راسها بالموافقة ويارا باستها وخرجت بسرعة
يارا بعد ما خرجت من باب الفيلا وماشيه فجأة لاقت حازم في وشها بيوقف بالعربيه
يارا كانت لسه هتتحرك وهي بتسحب نفسها قبل مايشوفها بس حازم كان شافها فعلاً
حازم .. يارا
يارا وقفت مكانها وقالت بتوتر .. ن.نعم
حازم .. تعالي هنا
يارا قربت بتوتر
حازم .. رايحة فين
يارا بتوتر قالت .. خ. خارجة مع صحابي
حازم .. انتي عارفه الساعه دلوقتي كام ولا لأ
يارا سكتت
حازم بهدوء .. ادخلي جوه
يارا .. انا مش هتأخر والله
حازم بحده .. سمعتي انا قولت ايه ادخلي . وعلي اوضتك
يارا دخلت من غير ما تنطق بحرف وطلعت علي فوق علطول
شهيرة .. رجعتي ليه
يارا بضيق وهي طالعه .. ابنك رجعني . علشان تستريحي ياماما
يارا فتحت باب اوضتها ودخلت وهي مش طايقة نفسها
تحت
حازم كان دخل
حازم قرب من مامته اللي قاعده قدام التلفزيون وقالها .. انتي ازاي ياماما سيباها تخرج في وقت زي ده
شهيره .. مقدرتش عليها والله ياحازم
حازم .. مفيش حاجه اسمها كده . لازم تمنعيها
حازم وهو مش مصدق .. انا مش عارف الزاي توافقيلها تخرج في ساعة زي دي
شهيره بتفهم .. عندك حق . انا غلطت فعلاً اني وافقت انها تخرج
شهيرة .. بس هي قالت انها مش هتتأخر ومش هتبعد عن البيت . علشان كده سيبتها
حازم .. مينفعش اللي بتقوليه ده لازم تشدي عليها شويه
مينفعش تخرج في وقت متأخر . ومينفعش تتأخر بره . ولازم تبقي عارفه بتخرج تروح فين وبتقابل مين . وتبقي عارفة صحابها اللي بتمشي معاهم كويسين ولا لأ
حازم .. لازم تكوني عارفه كده ياماما ماينفعش تسيبيها كده
شهيره .. عندك حق . انا فعلا مدلعاها
حازم .. والتانيه ياريت تعقليها ترجع لجوزها
شهيرة .. لأ التانية دي بقا ياريت تكلمها انت هي هتسمعلك لأني غلبت معاها ومفيش فايدة . منشفة راسها ومصممة تطلق ..انا تعبت معاها . دي حتي مرات عمك جات واتكلمت معاها ولا سمعتها
شهيره اتنهدت وقالت .. المهم طمني علي شيرين عامله ايه فاقت
حازم هز راسه وقال. .. ايوا الحمد لله
شهيرة بفرحة .. بجد . الحمدلله .. انا كنت زعلانه عليها اوي . ربنا يشفيها وترجع هيا وجوزها بقا
.............................................
عند شيرين في المستشفى
كانو ندي وريم قاعدين معاها بعد مااتنقلت من العنايه لغرفة عادية بعد ما الدكتور كشف عليها وطمنهم
ريم بلوم .. انا زعلانه منك . ليه عملتي في نفسك كده
قولتلك بلاش تاخدي كتير من ادويه الاكتئاب دي خطر علي صحتك . وانتي مهمكيش ومخوفتيش علي نفسك . ليه كده . انتي بتأذي نفسك وانتي عارفه انك كده هتضري ... للدرجادي مش بتخافي علي نفسك
ندي .. لأ هي شيرين اكتر واحده سلبية ممكن تقابليها في حياتك
ندي بصت لشيرين وقالتلها .. ليه كده . طيب مفكرتيش في نفسك . فكري في اللي حواليكي . الناس اللي بتحبك
شيرين بتعب .. خلاص ياندي
ندي .. لأ مش خلاص . احنا مش مسامحينك انتي وقعتي قلبنا ياشيخة
ريم قربت وحضنتها وقالت .. كنت هموت عليكي بجد
شيرين .. بعد الشر عليكي ياحبيبتي
ندي قامت هي كمان وحضنتها مع ريم وقالت .. وانا هونت عليكي هونت عليكي انا ماليش غيرك
شيرين .. ربنا يخليكو ليا
ندي وريم بعد ما بعدو الاتنين في صوت واحد
قالو .. هتوعدينا ماترجعيش للادويه دي تاني
شيرين هزت راسها .. حاضر
ريم .. امجد كان هيموت من القلق عليكي علي فكره
شيرين ابتسمت بحزن
بعد يومين كانت شيرين اتحسنت كتير وخرجت من المستشفى
في الفيلا عند اهل حازم كانو كلهم متجمعين علي السفرة
وريم كانت معاهم
حازم .. احم بابا مش كفاية كدة ونخلي الفرح الاسبوع اللي جاي
مراد كان لسه هيتكلم
بس شهيرة بسرعة قالت قبل ما يتكلم .. اه انا كمان بقول كفاية كدة مينفعش يكونو متجوزين وكل واحد فيهم عايش في مكان . هما كده كده متجوزين لازمته ايه التأخير بقا
مراد بص علي ريم لاقها موافقة
مراد .. تمام
شهيرة .. تمام ايه
مراد بهدوء .. الفرح بعد يومين
كلهم مكانوش مصدقين
مراد .. بكرة بإذن الله تنزلو تجيبو الشبكه وبعد بكرة الفرح
ريم كانت لسه هتتكلم
شهيره فهمت هي عاوزة تقول ايه وقالتلها .. متقلقيش كل حاجه جاهزة .حتي الفستان اللي اختارتيه كلموني من بره وقالولي انو جهز
شهيره بصت لمراد وقالت .. اهم حاجة كلملنا الجواهرجي يحضرلنا حاجة كويسة علي بكرة
مراد هز راسه
ياسين .. وانا يابابا
مراد .. انت ايه
ياسين .. عاوز اعمل فرحي انا كمان
مراد .. لأ انت منك لعمك
ياسين .. ما انا عاوزك تكلمه وتقنعه يوافق
شهيره .. ماتكلمه يامراد
مراد .. شريف مش هيوافق وبعدين جواز ايه دلوقتي لسه انجي بتدرس وشريف عمره ماهيوافق يجوزها قبل ماتخلص دراسة
شهيره .. وفيها ايه تكمل بعد الجواز . كلمه مش هتخسر حاجة مش يمكن يوافق
مراد .. هيرفض انا عارف وبعدين احمدو ربنا انو وافق على الخطوبه
تاني يوم كانو مراد وشهيرة في العربية تحت بيت ريم مستنين ريم تنزل هي وسحر علشان يجيبو الشبكة
وحازم كان واقف ساند علي عربيته لحد ماريم وسحر نزلو
وقربو عليهم
حازم اول ماشاف ريم اتصدم
حازم غمض عينه بغضب وهو بيحاول ميتعصبش عليها وبعدين قرب عليها وسحبها من ايدها بهدوء لحد باب العمارة
ريم بعدم فهم قالتلو .. في ايه وساحبني ليه كده
حازم بص عليها بغضب وقالها .. ايه اللي انتي لابساه ده
ريم .. مالو اللي انا لابساه ما انا لابسه عادي اهو
حازم وهو بيشاور علي لبسها .. وده عادي
ريم كانت لابسه چيب قصيره جدا ومن فوق كانت لابسه بلوزه كات
سحر وشهيره كانو بيبصو عليهم ومش فاهمين حاجه
شهيره .. هو في ايه مالهم
سحر .. دول شكلهم بيتخانقو
حازم .. اطلعي حالا غيري والبسي حاجة غير ده
ريم برفض .. لأ طبعا مش هغيره انا شايفه إن..
حازم قاطعها بنبرة حادة .. انتي سمعتي انا قولت ايه . حالا تكوني مغيره ولابسه حاجة كويسة . يلاا
ريم نفخت بضيق وطلعت
وحازم رجع ليهم
شهيرة .. في ايه ياحازم وريم رجعت تاني ليه
حازم .. نسيت حاجه وطلعت تجيبها
سحر كانت فاهمه انو معجبوش لبسها بس متكلمتش
عند ريم طلعت تغير بضيق
دينا .. في ايه . رجعتي ليه
ريم وهي بتطلع هدوم قالت .. دينا اخفي من وشي انا مش طايقاكي ولا طايقه نفسي
دينا بضحك لما فهمت .. طب وانا مالي انا اللي قولتلك البسي كده
ريم بضيق .. دينا مش نقصاكي ياماما روحي ذاكري ولا شوفي هتعملي ايه
بعد دقايق كانت ريم غيرت لبلوزه بكم وبنطلون جينز مقطع وبعدين نزلت
ريم قربت عليهم وقبل ما تركب
قالت لحازم بضيق .. كده كويس
حازم قالها بسخرية .. مكانش في غير البنطلون المقطع ده تلبيسيه
ريم بصتله بغيظ وفتحت باب العربية وركبت
سحر وهي راكبه .. قالتلها .. قولتلك غيري اللبس ده هيضايقو مسمعتيش كلامي . تستاهلي
ريم .. انتي فرحانه فيا ياماما
سحر .. بصراحة اه
بعدين حازم فتح باب العربية وركب وبص لريم وقالها .. اقسم بالله مااشوفك بالمسخرة دي تاني لعلقك ياريم
وشغل العربية وطلع بيها
وبعد وقت كانو وصلو المكان اللي في الجواهجري ودخلو
عند ياسين كان قاعد مع عمه وبيحاول يقنعو انو يوافق يعمل الفرح
لكن شريف رفض رفض نهائي
ياسين .. وفيها ايه يعني يعمي ما..
شريف قاطعه .. مفيش جواز هيتم غير بعد سنتين واظن انا شارط عليك بكده قبل الخطوبه وانت وافقت متجيش دلوقتي تتكلم في حاجة تاني لاني مش هغير رأيي
ياسين .. بس سنتين كتير
شريف .. لأ مش كتير لسه قدامها في الجامعة سنتين ومتحاولش ياياسين . والا نفضها وكل واحد يروح لحاله احسن
ياسين .. طيب سنه كفاية
شريف .. يبقا نفضها ياياسين احسن من وجع الدماغ
ياسين بسرعة .. لأ خلاص
سكت شويه وبعدين قال .. طب ممكن طلب . ومش هتكسفني
شريف .. اخلص
ياسين .. اكتب الكتاب مع حازم
شريف لسه هيعترض
ياسين قال .. كتب كتاب بس مفيهاش مشكله دي بقا
وبعد محاولات كتير شريف وافق علي كتب الكتاب
عند ريم وحازم
ريم كانت بتختار الشبكه مع مامتها وشهيره
ريم اختارت طقم من الالماس رقيق جدا
شهيره .. اخر كلام ده
ريم قالت .. اه .ده عاجبني
شهيره اختارت ليها خاتم وقالتلها .. وده هديتي ليكي ياريم
ريم .. بس ده كتير ماانتو خلاص جيبتولي اهو .دا كفايه
شهيره .. دي شبكتك من حازم . لكن ده هديتي انا
ريم باستها بحب وقالتلها .. شكرا ربنا يخليكي .. بس مكانش ليه لزوم بجد
مراد قام وقال .. خلاص كده
كلهم قالو .. ايوا خلاص اختارنا
مراد قال لريم .. اختاري طقم تاني ياريم
ريم بدون فهم .. ليه
مراد .. اختاري بس
وصمم انها تختار طقم تاني واختارت
وبعدين قالها .. ده هديتك مني
ريم عينيها دمعت وقالت .. بس ده كتير اوي
شهيره .. مفيش حاجه كتيره عليكي يا حبيبتي دا انتي الغاليه بنت الغاليه ومرات الغالي
ريم قربت وحضنتها وقربت من مراد وباست ايده وقالتلهم .. ربنا يخليكم ليا
مراد باس راسها وقالها .. انتي تستاهلي كل خير . انتي بنتي
حازم قرب منها وقالها بصوت واطي .. وانا ماليش حضن انا كمان
ريم بصتله بغيظ وقالت .. انا مش بكلمك اصلا
حازم .. بجد
ريم .. اه .وانت كمان متتكلمش معايا
تاني يوم
في اكبر وافخم فندق في مصر
كانت ريم بتجهز ومعاها اخواتها واختها شاهندة اللي رجعت علشان تحضر معاها الفرح وداليا صحبتها وشيرين وندي وصحابها والميكب ارتست اللي كانو حواليها
البارت الخامس والاربعون من هنا
لقراءة جميع حلقات القصه من هنا