احتوانى كأبنته
البارت الرابع عشر 14
بقلم شذى عبد المكرم
بعد يوم النتيجة عشت ايام حلوة شديد بالاخص مع ابوي محمد بقيت مقربة منو شديد ودايما كان معاي بحاول يعوضني عن الحصل في يوم كنا قاعدين كعائلة
محمد: داير اخبركم بحاجة
مها: احكي
محمد: لازم ارجع السعودية
تالين: ابوي انا ما صدقت رجعت داير تمشي تخليني تاني
محمد: تيلو حبيبتي خليني احكي
مها: محمد ليه ماشي
محمد: مها انا شغلي كلو هناك ومدارس الاولاد كمان
تامر: بابا نحنا عاوزين نقعد هنا
تالا: اي يا بابا
مها: محمد ما تكسر بخاطر الاولاد
محمد: مها مجبور اسافر
تالين: يعني ماشي
محمد: اي حاجة ولا زعلكم
تالين: حتعمل شنو
محمد: حأسافر كم شهر لازم اظبط شغلي هناك وانقلو هنا واشيل نقليات الاولاد عشان يتسجلو هنا
مها: هل ضروري يسافرو معاك؟
محمد: حتى لو قولت ليهم يسافرو ما حيرضو الاحسن اسافر انا واصور ليكي النقليات بالواتس وانتي تسجليهم
مها: فكرة حلوة. كنا مبسوطين بس زعلانين لانو حيسافر كم شهر وبالفعل سافر
مرت الايام والتقديم بدأ مشيت مع امجد قدمت والنتيجة طلعت شالوني طب في السودان للعلوم والتنكولوجيا واتجهزت للجامعة ابوي رجع السودان وسجلو الاولاد في المدارس وبكرة اول يوم في الجامعة كالعادة قبل اي يوم من حدث مهم بقعد مع امجد في الحديقة الخلفية
امجد: اها يا طالبة الجامعة
تالين: برلوم لا تتكلم معي هههههههه
امجد: سبحان الله امس كنتي صغيرة وبتجري تلعب هنا وهناك
تالين: وهسي خلاص دخلت الجامعة
امجد: كبرتي ما شاءالله
تالين: دخلت 18 سنة قبل شهرين
امجد: بس لسع شافعة في عيوني.
تالين: اصلا ما نفسي اكبر في عيونك ابدا. ميلت رأسي في كتفو وسرحت حياتي حتكون كيف لو هو ماف مستحيل اقعد
امجد: سرحتي وين
تالين: معاك
امجد: بكرة اول يوم
تالين: جاهزة للوصايا
امجد: مصاحبة الاولاد لا التعامل كزمالة بس حتى البنات الا تكون موضع ثقة
تالين: اها وتاني
امجد: عالم الجامعة دا كعب بس لازم تكوني مفتحة وما تخافي
تالين: اوكي اصلا عارفني ما بخاف
امجد: الا مني ومن الكلاب هههههههه
تالين: امجد ياااخ ههههههه
امجد: لازم اعرف اي حاجة بتحصل معاكي
تالين: دي ما توصيني فيها اصلا ما بقصر. اتونسنا حبة
امجد: يلا تصبح على خير
تالين: وانت من اهل الخير
امجد: تصحي بدري عشان اوصلك الجامعة
تالين: تمام . ودعتو ومشيت نومت الصباح اصبحت رايقة ومبسوطة معروف البرلوم اول يوم بكون مبسوط كيف اكيد كلكم جربتو الاحساس دا "والما جربو ان شاءالله يجربو " اتجهزت بمزاج وحجبت الطرحة نزلت لامي تحت
امي: حبيبتي ما شاءالله كبرتي ودخلتي الجامعة ربنا يحفظك. طبعا دمعت
تالين: امي ما تبكي عشان ما تبكيني.
امي: هههههه اوكي اقعدي اشربي الشاي. شربت الشاي وتالا وتامر الترحيل وصل ودعوني ومشو المدرسة امجد جا وطلعنا والطريق كلو بوصي فيني لمن وصلنا
امجد: اوع تتبرلمي تمام وانتبهي على نفسك وموقفة
تالين: ان شاءالله يا رب تسلم يلا باي ودعتو ونزلت واليوم كان حلو خلصت ورجعت البيت كالعادة حكيت لامجد يومي ما بكمل الا بيهو
مرت سنة وخلصت السنة الاولى ودخلت التانية حدثت اشياء كتيرة في السنة دي وانا عقلت شوية مع حياة الجامعة دي وقراية الطب الكتيرة دي
في يوم وابدا ما حأنسى اليوم دا كان بعد المغرب مجتمعين كلنا في بيت خالتو عفاف عملت لينا شاي المغرب بنتونس كدا وانا بهظر مع تالا
امجد: عاوز اقول ليكم خبر. كلنا انتبهنا ليهو
عمو عمر: خير يا امجد
امجد: انا داير اخطب. حصلت لحظة صمت دقيقة كاملة
عمو عمر: دي منو دي
امجد: زميلة معاي في الشركة. انا من لحظة قال داير يخطب حسيت الدم دا وقف في شراييني ورجلي خدرت للان ما مستوعبة القالو امجد عاينت ليهو في عيونو قوي وهو لسع بعاين لي كأنو مستني ردة فعلي
عمو عمر: لازم نتعرف عليها بالاول ونعرف عنها
امجد: ممكن نمش تعارف ولو ربنا وفق نخطب
عمو: خير والفيهو خير بحصل. قام حضنو وبارك ليهو بعدو ابوي بارك ليهو انا قومت ما قدرت اتحمل رجلي اخدتني لغرفتي قعدت في السرير بعاين للفراغ وبحاول استوعب الحصل ما اديت ردة فعل ابدا قعدت اسأل نفسي ليه امجد ما جاب لي سيرة انا دايما اول وحدة بتعرف عن حياتو يعني خلاص امجد حيخليني ويمشي لوحدة تانية يعني في وحدة حتشاركني فيهو وفي حنانو لالا ما حيحصل ابدا لكن حصل انا ليه حاسة بقلبي بوجعني شديد كدا وليه حاسة انو امجد دا ملكية خاصة بالنسبة لي الجواب الوحيد لانو ابوي وهو المربيني دا الكنت بحاول اقنع بيهو نفسي للان ما نزلت من دمعة لمن امي جات داخلة الغرفة وقعدت جنبي
امي: تيلو
تالين: امي انا سمعت خطأ لانو مستحيل امجد يعمل كدا صح
امي: بس عملا تيلو امجد حيتزوج
تالين: لالا ما حيخليني هو وعدني
امي: ما حيخليكي بس هو لازم يتزوج عشان يكون عائلتو الخاصة
تالين: بس كان بقول انا عائلتو كلها ليه قرر يسيبني ويتزوج
امي: تالين ابكي
تالين: ماف حاجة بتخليني ابكي لانو الكلام ما صح اكيد امجد بهظر بس
امي: ابكي فرغي الجواكي. حضنتني عليها يداب انفتحت في البكي بكيت شديد
تالين: امي امجد داير يتزوج
امي: اي داير يتزوج
تالين: يعني حتشاركني فيهو بت تانية
امي: تيلو انتي المفروض تكوني عارفة انو دا الحيحصل
تالين: لالا ما عارفة ولا دايرة اعرف.
امي: تالين انتي بتحبي امجد؟. رفعت راسي من حضنها
تالين: انا كيف ما بحبو هو ابوي
امي: انا ما قاصدة كأب
تالين: امي كيف يعني
امي: انتي بتحبي امجد بس انتي نفسك ما عارفة الشي دا وحبك دا فطري من قومتي صغيرة بيهو بس ما فهمتيهو بس لازم تستوعبي الحاجة دي
تالين: امي انتي بتقولي في شنو
امي: اقعدي مع نفسك وفكري لازم تحددي موفقك عشان تقدري تتجاوزيهو لانو ماف زول حيتعب غيرك في الحكاية دي
تالين: امييييييي. تاني بكيت في حضنها
امي: انا بتكلم معاكي كدا عشان انا صحبتك قبل اكون امك هسي انا بطلع انتي فكري مع نفسي وبعدين تعالي قولي لي هسي ارتاحي. قامت طلعت مني
امي جهجهت افكاري كلها انا يوم ما سألت نفسي السؤال وهل انا بحب امجد كأب ولا في حاجة تانية اتذكرت موقف الجامعة لمن عرفت انو رشا حبيبتو زعلت شديد لمن بكيت بس هداني ونفى الموضوع واتذكرت لمن سها قالت لي انتي بتحبي امجد انا شاكلتها وانو الكلام دا عيب هسي لقيت العيب فيني انو حبيت امجد ابوي الرباني لو عرف الحاجة دي حيزعل كيف ثم انا الكلام الجواي بظهر في عيوني وهو بفهمني من نظرة قومت صليت العشا والليل كلو قضيتو بكي بس لمن الصباح ما قدرت امشي الجامعة من الصداع والتعب.....
_________
من جانب امجد
قاعد في غرفتي وسرحان وبفكر باب الغرفة ضرب دخلت امي وقعدت جنبي
عفاف: امجد
امجد: نعم يا حجة
عفاف: ليه عملت كدا
امجد: عملت شنو
عفاف: قررت تتزوج
امجد: امي يعني ما اتزوج ولا شنو انا نفسي استقر في حياتي
عفاف: ما بمنعك تتزوج وانا نفسي اشوفك عريس و أب بس ليه اخترت البت دي
امجد: لانها كويسة وحتحبيها
عفاف: انت بتحبها؟
امجد: وكيف قررت اتزوجها
عفاف: انا ما قاصدة البت دي
امجد: قاصدة منو
عفاف: تالين
امجد: امي انتي كيف بتقولي كدا تالين بتي
عفاف: بس ما انت الولدتها
امجد: بس انا المربيها
عفاف: والمشكله وين انك تحبها
امجد: امي الكلام دا ما صح
عفاف: امجد انا الولدتك ما تنسى وبعرفك اكتر من نفسك ذاتها وشايفة بعيوني اي حاجة بس ساكتة
امجد: امي ما تصعبيها معاي
عفاف: على فكرة قبيل لمن قولت الخبر دا نظراتك نهائي ما كانت فيها ولا نقطة فرح وعيونك كانت على تالين مستني ردة فعلها . نزلت رأسي بين يدي
عفاف: ليه عملت كدا
امجد: امي انا اكبر منها بكتير وانا في نظرها ابوها بس ما نفسي اخسر المكانة دي
عفاف: بس ممكن تخت ليها مكانة تانية ثم ثانيا الحب ما بالعمر انا وابوك الفرق بينا 12 سنة
امجد: امي ما حيحصل ابدا واوع الموضوع دا يتفتح تاني انا حأتزوج خلاص
عفاف: انت ليه حابب تخسر حب انت بنيتو ب13 سنة
امجد: امي خلاص. رأسي سخن خلاص
عفاف: كدا بتدمر نفسك وبتدمرها معاك انا حأمشي بس فكر كويس عشان ما تندم بعدين. امي طلعت بعد جاطت الامور كلها
انا بالفعل بحب تالين ما بحبها بس دي روحي ونفسي ما قادر بس اتخذت القرار دا لانو لازم انساها انا في نظرها ابوها حتكرهني لو عرفت انو انا خاتي ليها مكانة الحب انا المربيها بعرف جميع تفاصيلها بحب لمن تميل على كتفي كأني ملكت العالم بس خلاص دا كلو حيتنهي قبيل كنت منتظر ردة فعلها بس لقيتها عاينت لي وطلعت طوالي للان ما لقيتها تاني اكيد بتبكي بس لانو انا خأخليها بس انا ابدا ما نفسي اخليها بس الظروف.....