قصة دياب و لمار
البارت الخامس عشر 15
بقلم زهرة البستان
الحياه رحله قصيره ...جئنا إليها زوار ولكلآ منا طريق خاص طريق طويل ملئ بالحمولات مع كل خطوه نحمل بها شئ علي ظهورنا منا من يحمل اشياء بسيطه يمكن مع الخطوات ان يستغني عنها ومنا من يحمل ويحمل ويحمل حني يتراكم الحمل علي ظهره.. وعندما نصل الي نهايه الطريق والرحله يصبح الفائز من حمل اشياء بسيطه وجعل طريقه سهل اما من ضغط علي نفسه وتحمل اكثر من طاقته واستنفز كل قواته يصل ولكن وهو جسد من غير روح... نصيحه...شيل من حمول الدنيا اللي تقدر تشيله لكن احذر إنك تيجي علي نفسك وتضغط وتضغط وتصل الي حد الانفجار ...خذ من الدنيا دروس ولا تأخذ اثقال واعباء الحياه قصيره فلا تجعلها مرهقه.
خرج انس وساب كارمن...ودخلت ورده بشنط اللبس...
وطلعت هي وكارمن ترنج بيتي مريح وشيك جدا باللون الروز ف الرمادي...
ساعدتها ورده في انها تغير وكانت حريصه علي انها متألمهاش
اما. كارمن...كان كل همها انها تخبي نفسها من ورده كانت محرجه جدا...لاكن ورده كانت بتلبسها بسرعه وبتحاول متحرجهاش...
خلصت ورده...ولبستها وظبطتها عالاخر..وسرحتلها شعرها...وقامت شالت اللبس في الدولاب. وظبطت المكان من الفوضي اللي كانت فيه....
رن...تليفون ورده...كان عبده. بيبلغها ان ابنها الصغير صحي وبيعيط جامد..
ورده...طيب يا عبده انا خلصت هنزل علي طول اهو
فالوقت ده خبط الباب...فتح انس....كان الدكتور...
رحب بيه انس... استنو ورده تخرج...وثواني وخرجت ورده...
ورده...انا خلصت يا انس باشا لو تسمح بس انزل عشان عبده بيقولي ان الواد الصغير صحي اكيد عابز يرضع هسكته وهطلع تاني لو محتاجني.
انس...تمام ياورده...انزلي بس ياريت تطلعي تاني
ورده..عنيا يا انس باشا بعد اذنكم..
دخل انس ومعاه الدكتور..
الدكتور....اذيك يا انسه كارمن.
كارمن...الحمد لله
الدكتور...ماشاء الله واضح انك احسن كتير انهرده...
كارمن...الحمد لله بخير بس في وجع جامد في جسمي.
الدكتور...وجع جامد بس انتي كويسه انك مستحمله الوجع ده اصلا..الجروح اللي فيكي دي محدش يستحملها....دي جروح مميته.. وانتي ماشاء الله واضح انك قويه وقادره تستحملي واكيد هتقدري تتخطي المرحله دي ومع العلاج والمقاومه هتخفي بسرعه ان شاء الله بس اهم حاجه الغذا..اهتمي بالاكل وبالعلاج هتتحسني بسرعه جدا...
كارمن...حاضر.
انس...بس هي يادكتور انهرده طول اليوم سخنه ورده عملتلها كمادات والحراره بترجع....تقريبا خدت برد لانها امبارح هدومها كانت غرقانه خالص
الدكتور....مبدئيا كده ممكن تكون خدت برد لان الجو صعب جدا كمان مايه علي جسمها طبيعي يعني تتعب وحرارتها ترتفع لاكن بعيدا عن انها خدت برد طبيعي جدا انها تسخن وحرارتها تكون عاليه كمان بسبب الجروح اللي في جسمها يعني كان لازم تسخن...وكان ممكن كمان يحصلها تسمم ...انا للاسف نسيت موضوع الحراراه ده ونسيت اكتبلها حاجه للحراره بس هكتبلها حاضر وكويس جدا ان ورده عملتلها كمادات واتصرفت..
انس...يعني مفيش خطوره من السخونيه دي.
الدكتور...لا اطمن بس طبعا لازم تنزل سواء بالخافض او الكمادات...
انس...تمام يا دكتور...
الدكتور...الوقت يلا بقي نغير عالجروح اللي في ضهرك..
كارمن...بصت لانس وهي مبرقه وبصت للدكتور...نغير ازاي.
الدكتور...هنغير عالجرح
كارمن...مش حضرتك غيرت عليه امبارح...
الدكتور...ده لازم يتغير عليه يوميا عشان ميحصلش تلوث ويعمل بكتريا احنا في غنا عنها...لازم يوميا يتطهر وكمان يتدهن عشان الجروح تخف بسرعه..
كارمن....طيب هي هتوجع
انس كان باصصلها وهو ملامح الحزن علي وشه...من سؤالها ونبرتها اللي كلها خوف...
الدكتور...لا خالص متخافيش انا عارف انها وجعاكي بما فيه الكفايه ومش ناقصه وجع اكتر..
كارمن...طيب...وبصت لانس باحراج عايزه تقوله يخرج ومش عارفه وفنفس الوقت هي محرجه اصلا من الدكتور... لانه كان شاب تقريبا في نفس عمر انس او اكبر حاجه بسيطه...
انس...حس بيها.وعارف اللي بيدور جواها...
كارمن...هي ورده نزلت..
انس...اه نزلت...عشان ابنها صحي وهتأكله وتيجي .
كارمن....بقله حيله بصت للدكتور...هو انا المفروض اعمل ايه..
الدكتور....اقلعي الجزء اللي فوق ونامي عالسرير علي وشك..
كارمن....برقت وبصت لانس اللي حس بالشفقه عليها وفضلت تهز دماغها شمال ويمين..وعيونها مدمعه...مكانتش متخيله ان الموضوع صعب بالنسبالها كده خصوصا انه لما غيرلها اول مره كانت نايمه او فاقده للوعي...
كارمن..انا مش عايزه خلاص انا هخف لوحدي او هخلي ورده تساعدني.
الدكتور...مش هينفع لان ورده مش هتقدر تغيرلك ولا تنضف الجرح....وبعدين انتي ايه مشكلتك...متقلقيش انا مش هاخد وقت..
انس...كارمن...طيب انا هطلع بره. عشان تكوني براحتك...ومتوتريش نفسك الموضوع بسيط..
كارمن...نزلت دمعه غصب عنها ...لا متخرجش ارجوك انا مش عايزه اغير خلاص...
انس....مش هينفع ياكارمن انتي سمعتي كلام الدكتور...لازم الجرح يتغير عليه...وزي ما قالك مش هتاخدي وقت ..
كارمن...هزت دماغها بلا ...زي الاطفال اللي خايفه من الحقنه وبيحاولو يقنعوهم...لاكن كارمن مكانتش خايفه من الوجع اد ما كانت محرجه...
الدكتور....انا ممكن ابعتلك الممرضه اللي بتجيلك تركب المحلول بس اول كام غيار عالاقل لازم انا اتابعه بنفسي...
انس....يلا ياكارمن..
فضلت كارمن...تعيط بصمت. ورافضه انها تغير عالجرح
الدكتور...طيب بص يا انس باشا انا هخرج بره شويه وحاول تهديها وتقنعها واحده واحده. او اتصل بورده تطلع تقف معاها واضح انها محرجه...
مسك انس الموبايل يكلم عبدو مردش..
انس...مش بيرد...
الدكتور...طيب انا بره شويه
انس...هزله راسه....خرج الدكتور..
واول ما خرج...فضلت كارمن تعيط زي الاطفال....انا مش هغير علي جرح ولا عايزه اخف .عادي...مش اول مره يحصلي كده...بابا عملها كتير قبل كده ولا كان بيجبلي دكتور ولا حتي علاج كانت لمار بتفضل تحطلي كريم وبخف لوحدي...انا هعمل كده.
انس...مش هينفع يا كارمن المرادي غير كل مره...المرادي...انتي مضروبه مرتين ورا بعض والجرح المرادي اكبر....اسمعي الكلام..
كارمن...لا..
انس...عشان خاطري يا كارمن...وانا هقف بره عشان تكوني براحتك.
كارمن...ازاي هكون معاه لوحدي لا مش هعمل كده.
انس...ياكارمن ده دكتور ودي شغلته..
كارمن...لا بردو..
انس...طيب افضل معاكي. ومتخافيش مش هبص عليكي والله...
كارمن...لا ازاي اكون مع اتنين رجاله ولوحدي لا مش هغير...
انس...بنفاذ صبر... وبعصبيه قليله كارمن اسمعي الكلام بقولك..
كارمن...بعياط لا..
انس...وديني ياكارمن لو ما سمعتي الكلام همشي الدكتور بس قسما بالله هطلع من هنا عالقسم وهروح شغلي عادي بس هبعت لابوكي البوكس يجيبه ومتبقيش تزعلي عاللي هعمله فيه ...عشان هو اللي وصلك للانتي فيه ده..
كارمن....ارجوك يا انس...انت ليه مش حاسس بيا...فضلت كارمن تعيط جامد.
انس...قرب منها براحه ورفع وشها...حاسس بيكي والله بس لازم تخفي ياكارمن انتي ممكن يحصلك تسمم وانا ممكن اوديكي مستشفي عادي بس مش هيستنو عليكي زي الدكتور...والممرضه مهما كانت بتعرف لاكن مش هتكون زي الدكتور...
كارمن...طيب بلاش انام عالسرير ينفع اكون واقفه...
انس...ابتسمت بقله حيله حاضر هقول للدكتور ...انا هخرج اناديه وهستني لحد ما تخلصي...
كارمن...لا ارجوك خليك معايا انا خايفه..
انس...انا مش عايز اسيبك صدقيني بس مش عايزك تكوني محروجه وتكوني براحتك..
كارمن...بس انت لو سبتني معاه لوحدي مش هقدر..
انس...حس انه مبسوط من جواه..اوي انها حاسه انه حمايه ليها ومهما كانت محرجه منه لاكن تقدر برده تستخبي فيه...
انس...مش هتتحرجي مني..
كارمن...وهي بتعيط هتحرج بس متسبنيش..
انس...ابتسم مش هسيبك يلا اقلعي..
بصتله كارمن
انس...مالك بتبرقيلي كده ليه انا مالي الدكتور اللي قال...نيتك وحشه اوي.
ابتسمت...كارمن غصب عنها.
انس...ايوه كده اضحكي.
خرج انس نادي للدكتور...
ورجعو..
انس...معلش يادكتور هنستأذن بس حضرتك في حاجه...ممكن بس كارمن تكون واقفه...
الدكتور...بس كده يعني هي دي كانت الازمه...ماشي ياستي ولا يهمك خليكي واقفه بس الافضل كان هتكوني وانتي نايمه عشان ترتاحي اكتر بس ادام انتي عايزه كده مفيش مشكله...يلا جاهزه..
هزت كارمن راسها بقله حيله...
ابتدا الدكتور...يطلع حجات من شنطته ومن شنطه العلاج بتاعتها...وفضل يجهز حجات...
فكت كارمن سوست الترنج. وقلعت السويت شيرت وكانت لابسه من تحت قطعه تانيه خاصه بالترنج تيشرت نص كم....
انس...يلا..
كارمن...يلا ايه...ما انا قلعت.
انس...التيشرت يا كارمن..
كارمن..لا لنا هرفعه لما الدكتور يجهز.
انس...مش هينفع.
كارمن..لا هينفع والا مش هغير بجد
الدكتور...غمزله من ورا...تمام كويس كده ويلا انا جاهز...
وقفت كارمن وادت ضهرها للدكتور...انس كان واقف ادامها ومقرب منها ..
الدكتور...ارفعي التيشرت.
رفعت كارمن التيشرت...وصل نص ضهرها...
الدكتور...لا ارفعيه اكتر...
كارمن...كانت بتغمض عينها اوي وحاسه انها هتموت من الاحراج.
انس...علي فكره انا ادامك يعني مش شايف حاجه ارفعي يلا...
رفعت كارمن شويه لاكن مكانتش طايله..
ساعدها الدكتور...في رفعه شويه...
وابتدا يغيرلها...عالجرح...وينضفهولها...
واول ما ابتدا الدكتور يتعمق فالتنضيف حوالين الجرح اكتر...نسيت كارمن احراجها من كتر الالم ..وابتدت تتألم بصوت...
قرب منها انس اكتر ومسك راسها بأيده...بقت في حضنه...
مسكت كارمن فيه بايدها جامد....من شده الوجع...
وبصله الدكتور....وشاورله عالتيشرت...
هز انس راسها...وفأقل من ثانيه رفع انس التيشرت...لفوق...
كارمن.....دموعها نازله من الوجع والاحراج. لا ياانس..لا ...
انس...شششششش خلاص خلي الدكتور يخلص بقي...
رجع.انس خدها في حضنه. وهي مربعه ايدها بتحاول تخبي نفسها لانها مكانتش لابسه غير اخر قطعه داخليه...
وصل الدكتور....ناحيه كتفها واللي كان متدمر بمعني الكلمه....
فضلت كارمن تصرخ من الوجع في حضن انس...والدكتور بينضف الجرح...وظاهر علي ملامح الدكتور الانزعاج من بشاعه المنظر...واعد يهز في راسه شمال ويمين...
فاللحظه دي فكت كارمن ايدها ومسكت في ضهر انس...بقوه..
انس....اهدي ياكارمن الدكتور قرب يخلص..
الدكتور...خلاص استحملي قربت والله
كارمن....خلاص بقي والنبي مش قادره..
انس...حط ايده علي راسه. وفضل حاضنها...
لحد ما اخيرا الدكتور...خلصت تنضيف وابتدا يدهنلها الكريم في جسمها كلها....وخلص اخيرا خلاص...
الدكتور....انا خلصت خلاص اهدي بقي..الوقت الكريم اللي حطتيته هيسكنلك شويه...
فضلت كارمن داخله في حضن انس وكأنها بتخبي نفسها..ومش راضيه ترفع راسها
انس...بس مش الكريم ده مضاد.
الدكتور...لا انا مزجتلها الاتنين المضاد الحيوي مع المخدر عشان بعد التنضيف هتحس بألم..فا ده هيريحها...
انس...تمام....معلش بقي ممكن تديني التيشرت بتاعها.
الدكتور...لا معلش هي خليها بس شويه كده عشان الكريم ميتمسحش.. عالاقل تفضل كده ربع ساعه..عشان يعمل مفعول بس وبعد كده تلبس...
انس...تمام يادكتور...معلش اكتبلي بس الخافض عشان متنساش...
الدكتور.. اه كويس انك فكرتني...كتب الدكتور الخافض...واداه لانس...ولم حاجته كلها...
الدكتور...هستأذن انا بقي عشان يادوب الحق شغلي فالمستشفي...وهعدي عليها بكره...ان شاء الله ..
انس...طيب معلش يادكتور...بالمره كده...ممكن تركبلها المحلول
الدكتور...اه طبعا...اعدها عالسرير..
مسك الدمتور حاجه المحلول وابتدا يجهزها..
انس...كارمن تعالي اعدي...
كارمن...ساكته ومخبيه نفسها في حضنه..
ابتسم...انس ..وقالها في ودنها ايه حضني حلو اوي كده
كارمن...اتحرجت من كلمته ...
مشي انس بيها اعدها عالسرير..وعي مربعه ايدها وباصه فالارض...
راح انس...عالسويت شيرت بتاع الترنج بتاعها...وربط الكم علي رقبتها عشان يغطيها من ادام...حست كارمن بالراحه اخيرا...بس فضلت باصه فالارض...
قرب. منها الدكتور...وركبلها الكانولا....
اتألمت كارمن.. لاكن خلص الدكتور بسرعه...
الدكتور...ايه ياستي شوفتي بقي الموضوع خلص بسرعه ازاي...ان شاء الله المره الجايه تكوني افضل...
فضلت كارمن ساكته وباصه فالارض...
خرج...انس مع الدكتور...يوصله ويحاسبه...شكره جدا ومشي الدكتور اخيرا....
رجع انس....كانت كارمن اعده وضهرها للباب...اولوما شاف منظر دهرها انس. الغضب كان عاميه وبيحاول يمسك نفسه عن ابوها...
قرب انس...واعد جمبها....
انس...احسن ولا حاسه بحاجه...
كارمن.
انس....كارمن. مبترديش عليا ليه.
كارمن.
انس...انتي زعلانه مني.
كارمن...هزت كارمن راسها بلا..
انس...امال ايه مبترديش عليا ليه...رفع انس وشها ليه...كان وشها غرقان بالدموع...
مسك انس راسها وقربها من كتفه وخدها في حضنه...طيب اهدي خلاص بلاش عياط..بقي...
كلها كام يوم وتبقي احسن فضلت كارمن سانده عليه وهو من جواه طاير بقربها منه......وفضلو ساكتين .
اما عند...بيت كارمن...
كانت مني...والدتها اعده باين عليها التعب من كتر التعذيب اللي شافته علي ايد جوزها...
سعيد...قومي ياوليه حضريلي الاكل...
مني....بتحاول تقوم لاكن مش قادره.
ريتال....خليكي انتي ياماما..هحضرله انا وچنا...
سعيد...ليه وهي اتشلت ماهي زي القدره اهي وصحتها تهد جبل.
ريتال....ماما تعبانه يابابا...وبعدين انت مش عايز تاكل وخلاص انا هحضرلك..
ريتال...اخت كارمن وتوأم چنا...كانت يمكن تكون اقواهم وليها شخصيه...برغم ان كارمن مكانتش بتسكت لاكن وجود لمار هو كان اللي مقويها...اما ريتال فكانت قويه ومكنتش محتاجه دعم من حد هي لوحدها كانت بتقدر تتكلم..ومكانتش بتخاف...
سعيد...وانتي بقي ياست ريتال هتعرفي تسخني وتحطي الاكل..
ريتال...واعرف اعمل الاكل كمان متقلقش ماما معلماني كل حاجه واقدر اعمل كل حاجه فالشقه...ومن غير مساعدت حد..
سعيد...بضحكه شيطانيه...يعني بقيتي عروسه يعني...
حست مني...من كلامه اللي بيلمح ليه...
مني...شدت ربتال من ايدها بخوف...وبرقتلها عشان تسكت اعدي هنا جمب اختك العبي...انتي ولا بتعرفي تعملي اي حاجه...انا هقوم....
سكتت ريتال وحست ان امها عايزه تقول حاجه...وبالرغم من انها كانت بتمتلك شخصيه قويه لاكن كانت طفله ومقدرتش تفهم كلام ابوها وتلميحاته الشيطانيه...واعدت جمب چنا...
سعيد....ايه صحتك رجعت الوقت ما كنتي عامله فيها ميته..
مني...انا كويسه وعموما صحتي كويسه علي ادي...انت ليك طلباتك تتعمل بس ابعد عن بناتي ياسعيد انت فاهم ابعد عن بناتي..
سعيد...بضحكه عاليه....بقيتي بتخربشي كمان اهو يامني...كنت عامله زي الفار الاول بقيتي قطه وليكي ضوافر كمان...
مني....ولو حكمت يا سعيد هبقي اسد. وساعتها مش هخربش بس لا انا هاكل بسناني اي حد يقرب من ولادي....
سعيد.....اسد ولا مراته.. وفضل يضحك بصوت عالي ...وهي بصاله بقرف...
سعيد....صحيح السنيوره بنتك مكلمتكيش وقالتلك هي فين فالشارع ولا شافتلها شوفه...
مني...ملكش دعوه بيها انساها اعتبرها ماتت زي ماحنا كلنا اعتبرناك موت...
سعيد....ماشي بس متقلقيش كلها كام يوم واجبهالك هنا راكعه بس اوعدك لما اجبها مش هخليها تنفع تاني....بحق اللي عملته فيا..
مني...هي اللي عملت فيك...ولا انت اللي عملت فيها...
سعيد....انا عملت فيها ايه كنت عايزها تبقي بني ادمه. فنفس الوقت ينوبنا من الحب جانب....هي بقي عملت ايه...خلت الراجل قلب عليا وخد كل فلوسه اللي ادهالي...واستحلفلي انه لو شاف وشي تاني هيقتلني. وانه لو عايزني ارضي عنه ويديني اضعاف اللي خدته منه اجبله البت...وهو بقي المرادي يربيها بنفسه....واعملي حسابك اني هجبها...
مني....ساعتها هقتلك بايدي يا سعيد..
سعيد...بضحكه مستفزه...مش بقولك بقيتي بتخربشي....بس عجباني..
بصتله مني...بحقد وكرهه ودخلت عالمطبخ.....وهي بتدعي ربنا انه يحمي بناتها ويحمي كارمن...اللي مرعوبه عليها ومتعرفش عنها حاجه...
اما هو فا فضل يشرب في الشيشه...وهو باصص لريتال بشرود وخبث
اما في منزل دياب...كان المل متجمعين علي سفره الطعام...
ريناد....الاكل ملوش طعم من غير ديبوو
نوال....عندك حق...وحشني اوي..
حنان.....بسخافه...يعني هي اول مره يغيب عن البيت ما دي طبيعه شغله...
نوال....هي طبيعه شغله فعلا ومش اول مره يغيب...بس كل ما هيغيب هيكون ده شعورنا...
ريهام....بفضول وحب هو مقالش راجع امته يا طنط.
نوال...لا والله يا ريهام دياب في شغله مبيحبش يعرف حد بشغله...ده مقالش انه مسافر غير قبلها بكام ساعه بس يادوب جه حضر شنطته...حتي منامش ومشي علي طول...
عاصم....طبيعه شغله يا حبيبتي بتفرض عليه السريه ديما
حنان...سريه علي اهل بيته...
عاصم...ده اهل بيته اول ناس...
ريهام....بدون وعي لكلامها....كان نفسي اشوفه واسلم عليه قبل ما يمشي...
الكل كان عارف ان ريهام معجبه بدياب...وكانو واثقين ان امها اللي خلتها تحطه في دماغها..
عادل...بسخريه....مالو كنتي فالبيت وقتها كنتي شفتيه بس للاسف انتي ومامتك بره البيت ديما...
ريهام...لو اعرف مكنتش سهرت مع صحابي. بس هو سافر فجأه..
حنان...تجاهلت كلام عادل....
وفاللحظه دي...جالها تليفون....وبمجرد...ما شافت الرقم..وشها جاب الوان وكنسلت بسرعه...
عادل....بصلها وسكت...
رجع...التليفون رن تاني عملت انها بتكنسل بس قفلته بسرعه.. الكل كان ملاحظ تغيرها بس كملو اكل عشان ميلفتوش نظر عادل اللي كان بيبصلها بغضب...
عادل...ايه ما تردي لا يكون حاجه مهمه..
حنان....بارتباك...هااا لا لا مش مهم ولا حاجه...دول الشله بيستعجلوني اكيد...
عادل...الشله....اممم طيب لا يكون في حد فيهم تعبان ولا حاجه..
حنان...لا لا متقلقش وسابت المعلقه من ايدها الحمد لله شبعت...هقوم انا عشان اجهز...تسلم ايدك يا نونه الاكل يجنن..
بصتلها نوال باستغراب اول مره تشكرها علي امل او حتي تدلعها تصرفاتها كانت متلغبطه ومرتبكه وواضح انها بتحاول تدراي الموقف.
نوال...بالف هنا...
طلعت نوال...وسط نظراتهم ليها ونظرات عادل اللي كانت بتخترقها.....
خلصو الاكل وقام عادل وعاصم اعدو عالكنبه...وراحت ريناد تكلم ياسمين...
وطلعت ريهام....اوضتها وقررت انها متخرجش لاول مره كانت مضايقه جدا وحاسه ان عدم وجود دياب مأثر فيها وفارق معاها...
اما نوال راحت تعملهم القهوه وسابت مجال ليهم يتكلمو مع بعض...
عاصم....مالك ياعادل...
عادل...مفيش ولا حاجه...
عاصم...ولا حاجه ازاي انت مش شايف شكلك ولا ايه. ولا فاكر ان اخوك مش هيعرفك ويحس بيك ..
عادل....انا قربت اتجنن يا عاصم مبقتش قادر..
عاصم...قولتلك استحمل عشان خاطر ريهام...
عادل....بحاول بس مش قادر....
عاصم....ممكن اسألك سؤال وترد عليا بس من غير ماتزعل....
عادل...انت عارف ان عمري ما ازعل منك....
عاصم.....انت شاكك في حنان....
عادل....انا مش شاكك انا متأكد...
عاصم....نعم...تقصد ايه...
عادل...اقصد اني حاطط حنان في دماغي من فتره بس مكنش في حاجه بلاحظها لاكن الكام يوم دول تليفونات كتير خروج اكتر...اوقات ارقام غريبه بتتصل بيها...ولو انا اعد بتكنسل او تقفل التليفون خالص....
عاصم...طيب ما تواجهها..
عادل...كله في وقته ياعاصم...
عاصم...طيب انا اهم حاجه عندي انك تكون بخير...عشان خاطري براحه علي نفسك..
عادل...متقلقش يمكن دي اول مره...احس اني متمسك بالحياه....وحاسس ان هي اللي نهايتها قربت معايا...
عاصم....بس حاول تتصرف بعقل.
عادل...متخافش مش هقتلها واضيع عمري اكتر ماهو ضاع دي متستاهلش اصلا بس اكيد هتتحاسب وتدفع التمن....حنان بعيدا عن شكي فيها بس طول الوقت حاسس انها مخبيه حاجه واكيد هعرفها وهفضل وراها..
عاصم...خير ان شاء اللله...
سكت...عادل وفضل شارد....
اما عاصم فكان مضايق عشانه اوي...وبيدعي ربنا انه يريح باله ويبعد العقربه دي عنه..
اما عند دياب ولمار....
كانت طول الوقت بتتلاشي النظر ليه حتي هو كان بيتعامل بجديه ملحوظه...
خلصو اكل وابتدو تمارين...واتدربو كتير علي اللغه...وابتدا دياب...لاول مره...يعرفها علي طريقه لبس مايا كلامها اسلوبها حركات جسمها...وكان بيوريها صور...وفديوهات ليها..
لمار...كانت بتحاول طول الوقت انها تركز عشان تنسي اللي حصل بينهم والكلام اللي اتقال...وقدرت شخصيه مايا انها تستفزها و تخليها تركز معاها...في كل تفصيله دياب بيشرحها..
لمار....يعني المفروض اني هقابل الشخص ده هنا في مصر..
دياب...اه هو المفروض جاي مخصوص.
لمار...حست بتوتر.
دياب...مالك..
لمار..ابدا...بس حاسه اني متوتره
دياب..ليه..اولا مفيش داعي للتوتر..احنا هنكون معاكي في كل مكان فالفندق ده اولا وبعدين انتي كده كده لما كنتي هتسافري كنتي هتحتكي بيهم شخصيا ووقتها هنكون معاكي بس من بعيد .
لمار...عارفه بس مكنتش اعرف ان الموضوع قرب اوي كده..
دياب...الوقت بيجري يالمار واحنا الوقت في تاني اسبوع...لازم تحصل المكالمه بينك وبينهم ولازم تقابلي الشخص ده...وبعدها هنكمل اكيد بس واحنا بنجهز للسفر.
لمار..خدت نفس طويل..
تمام....
رجع كمل دياب كلام عن مايا...
لاكن.فجأه لمار اتحولت ملامحها...
لمار...نعمممم تقصد ايه..
دياب...اقصد اللي سمعتيه...
لمار...اللي سمعته من اول ما ابتديت تتكلم عنها انها واحده بتعرف رجاله وولاد وبتكلمهم وبتمشي امورها...لاكن انت الوقت بتقول كلام صعب اني افهمه...
دياب......اللي فهمتيه صح يالمار..
لمار...صح ايه...بالظبط...انها واحده بتعمل علاقات مش بنت...يعني كانت ممكن تعمل اي حاجه واي علاقه عشان بس توصل لشويه معلومات...
تمام...اوك عادي...بس المفروض ان اكيد الجزء ده فالعملبه ميخصنيش صح...
بصلها...دياب وفضل ساكت....
لمار...بعصبيه....اتكلللم انت باصصلي وساكت ليه...
دياب...اولا اهدي ووطي صوتك...
لمار...اوطي صوتي...يبقي اللي فهمته صح يا سياده النقيب....مصيبه لا تكون كمان عايز تقولي ان المقابله اللي هعملها مع الراجل فالفندق مش هتكون مقابله عاديه...
دياب.. باستفزاز....كويس انك فهمتي...
وقت...لمار وهي بتضرب عالتربيزه وبتصرخ...انت اكيد مجنون..
دياب...بعصبيه..وطي صوتك ولمي لسانك ده...
لمار...اوطي صوتي...انت فاهم انت عايز مني ايه.
دياب...اولا انا مش عايز منك حاجه دي اوامر عرفتها من سياده اللواء..اني ابلغك ...وانا بنفذ...
بصتله...لمار...وهي بتضحك ومش مستوعبه اللي بتسمعه...
لمار.....وانامش هكمل المهمه يادياب
دياب...وانتي فاهمه انهم هيوافقو..
لمار...ايه هيغصبوني ولا هيهددوني...انت نسيت اني واحده ميته...يعني مش باقيه علي حاجه.
دياب...لا منستش...بس كمان اكيد منستش ان لسه عندهم اللي يهددوكي بيه.
لمار....تقصد ايه...؟؟؟
دياب...اقصد والدتك...واقصد كارمن..
لمار....نعم...انتو ازاي كده...
وانت ازاي كده....انت مش شويه قولت انك بتحبني صح....ايه هتقبلها علي رجولتك ياسياده النقيب...ولا ده كان كلام...بتحاول تثبتني بيه...يمكن تقدر تلحق تاخد مني حاجه قبل غيرك...
صوت قلم....تردد صداها اكتر من كذا مره...في الصحرا....
لمار...خطت ايدها علي وشها ودموعها نازله وبصاله....
دياب.....القلم ده عشان بس متنسيش نفسك وتعرفي انك مش بتكلمي اي حد انتي بتكلم دياب. الدالي...اللي عمره ما ضحك علي بنت ولا استغلها...وعشان تندمي علي كلامك يالمار...انا لو عايز اخد منك اي حاجه كنت خدتها مش هنا لا كان ممكن اخدها فالقسم كمان...وسط كل الناس...بس دياب الدالي...ارجل واحد ممكن تقابليه في حياتك...
وعموما انا والله كنت هحاول اخرجك من الانتي فيه....بس انتي مستسلمه...واستسلامك...خلاهم يطلبو اللي هما عايزينه...مانتي كده كده ميته....مش ده كلاااااااامك
يبقي اشربي...واتنازلي اكتر يا لمار...وشيلي شيله مش بتاعتك...وزودي في الحمل..اكتر واكتر... وخلي كل واحد معدي يشيلك ما انتي بطله هيييييرووو بتشيلي كل حاجه وبتسكتي...مانتي كده كده ميته...مش ده كلامك...
لمار...حست بكلام دياب...وحست انها بتتصارع من جوه...
لمار...بدموع.....انت عندك حق انا شيلت شيله مش بتاعتي يمكن...ويمكن كمان...انا اللي عملت كده في نفسي...بس خلاص الوقت خلص...وحتي لو اتكلمت انا اصلا موت..وطلعلي شهاده وفاه...يعني مبقاش ليا وجود...ولو عملت ايه محدش هيسمعني....خصوصا الوقت لانهم زي ماقولت محتاجني...
خلصت يادياب...
دياب....تقصدي ايه...
لمار...وهي بتمسح دموعها..
وبكل قوه وثبات....
بلغهم..موافقتي. وعرفهم اني جاهزه..
وان زي ما قتلت ابويا بكامل قواي العقليه.....
هسلم نفسي لاي حد.بردو بكامل قواي العقليه لاكن المرادي وانا مجبره ..وسابته لمار ودخلت اوضتها...وقفلت علي نفسها وهي منهاره
اما دياب فا وقف مصدوم.
لقراءة البارت السادس عشر من هنا