قصة بالحلال
البارت الثاني عشر 12
بقلم ثناء معتز
" ثناء "
بعد خلص الاجتماع وتمت كل حاجة زي ما عايزين الحمدلله .. طلعو الوكلاء وفضلت انا مع التيم حقي .. شوية ومرقنا انا ومحمد ونحن بنتناقش في كم نقطة ..
رجعت مكتبي وانا براجع في كم ملف .. قاطعني صوت تلفوني لما ضرب .. لقيتها مكالمة في الايمو .. اتسعت شفايفي في ابتسامة عريضة لما رديت وانا بقول بصوت عالي : ياااااااااا اقسسسمممم بالله مشتاقييين
جاني صوتها وهي بتضحك وبتقول لي : يا بت عيب عيب انتي في الشركة قلة الادب ليكي شنو ،، اقسم بالله بالاكتررر
قلتا ليها : والله يا سارة فاقداكي عديل وين ليكي اسبوع بحاول اصل ليكي ما لامة فيك
قالت لي : والله ي ثنوية تقولي شنو بس جري مع الشغل وبمشي بعدها على بيت ناس خالتي عرس بتها وكدا فتلفوني دا والله بعدي يومين تلاتة ما بشوفو بعيوني دي ،، اها انتي اخبارك شنو يا رمة وجاية البلد دي متين سافرتي وافتريتي
قلتا ليها : سودانكم دا تاني ما بجيبني ليهو الا الشديد القوي ،، وزاتو الشديد القوي دا حقو نحصلو بي فيديو كول الرجعة ماف داعي ليها
ضحكت فيني وهي بتقول : غايتو انتي العوارة دي تخليها لمنو
اتونسنا مسافة قبل ما اقفل الخط وارجع لشغلي .. مر الوقت وما حسّيت بيهو .. طلعت ورجعت البيت .. اول ما وصلت اخدت لي دش دافي كدا وعملت لي كباية قهوة لاني مصدعة ..
ركبت سماعتي وضغط على واحدة من الأغاني بدون ما انتبه لي اسمها ..
اشتغلت الاغنية معاي وهي بتقول (( غلطان انا ،، انا غلطان ،، غلطان انا .. من شوقي ليك جيت ازورك وأحكي ليك .. غلطان عشان حبيت عينيك .. غلطان انا .. انا غلطان .. غلطان انا .. الفراق الانكتب من عمري ما كان اتحسب .. يا الغالي وأغلى من الدهب يجازي الكان السبب .. غلطان انا .. انا غلطان .. غلطان انا .. شوقي ليك شوق الصحارى للمطر حبي ليك ما كان حصل .. يا خسارة انكشح العسل .. وانا غلطان ))
خلصت الغنية .. اما انا فضلت في قعدتي ديك وبالي مشا مكان تاني .. رجعت بذاكرتي ١٠ شهور لورا .. يوم تم طلاقنا انا وعمار .. بتذكر اني بعد بكيت وقمت صليت .. فكرت في حاجة وقررت اني لازم اعملها .. اخدت حكاية شهر وكملت مع دكتورة سارة جلساتي بعدها وريت امي اني عايزة اسافر واعمل كورسات واشتغل .. وفعلاً اصريت على قراري دا لغاية ما تم كل شيء وجيت هنا .. من وقتها وانا ما شفت السودان بعيوني وفي شيء مخوفني وما عايزة ارجع لانو كل حتة فيهو بتذكرني ب عمار ..
ال ١٠ شهور العدت علي دي حصلت فيها حاجات كتيرة .. اشتغلت في شركة حكاية ٣ شهور بعدها اتصل علي محمد وأصر علي اجي اشتغل معاهم في الشركة الهي اصلاً شركتي القديمة بس في الفرع الهنا .. وفعلاً دا الحصل .. كنت مجتهدة شديد وانضغطت عشان اثبت نفسي .. قريت كتب كتيرة .. اشتريت اجهزة تسجيل من ميكرفون لي كدا .. وبقيت بعمل تسجيلات .. بفتحو وبقول العايزاهو وبنزل ف السوشيال ميديا .. بقا عندي متابعين ومعجبين للتسجيلات دي .. مرات كتيرة بطلع بتمشى او بمشي الجيم .. وكنت بحاول بكل الطرق دي اني اشيلو من راسي ..
ممتنة شديد لي شلتي ووقفتهم معاي .. وبالأخص دكتورة سارة الهي بقت اقرب صاحبة لي هسي
الحقيقة الوحيدة الإتضحت لي من الفترة العدت دي .. اني مهما حاولت ابعد منو .. بلقا قلبي بقرب ليهو اكتر .. لسا متذكرة ملامحو بالتفصيل .. صوتو كلامو وأيامنا كلها سوى .. من اول لآخر يوم .. ايوة بعرف اني اصريت على قراري عشان نفترق .. بس الشيء الوحيد الحا اعترف بيهو .. اني حبيتو من كل قلبي .. ولهسي بحبو
مسحت دموعي قبل ما اقوم واقعد في كرسي المكتبة حقتي .. شغلت اجهزة التسجيل وركبت سماعاتي .. وبديت أسجل وانا بقول
(( عارف حاجة يا فلان !! شكراً .. شكراً ليك لانك كنت سبب أساسي في كل شيء انا فيهو هسي .. شكراً ليك لأنو في زمن انا كنت ما بستحمل تتجاب سيرتك بالغلط من وراك .. جيت رجعت لي معروفي بإنك خليتني في نص الليل وكل الناس نايمة احاول اداري على صوت بكاي عشان ما يطّلع .. شكراً لانك خليت كل الحوليني يسألوني سؤال واحد ومكرر .. وشك لي تعبان كدا !! عيونك لي مرهقة كدا !! .. هو ما وشي التعبان .. ولا عيوني المرهقة .. انا التعبانة .. تعبانة من كترة الحكاوي الاتقالت وانت ولا هنا .. تعبانة من حجم الثقة الاديتك ليها وانت رجعتها لي بالضعف خذلان .. تعبانة لانو في وقت قابلتني كمية من المشاكل كنت بتقول لي قبلها المشكلة الحتجيكي حتلقاني واقف ليها قدامك قبلك .. وأهي جات المشكلة .. وبعدها اتنين وتلاتة ومية وانت ولا هنا .. غلطانة لمن ختيت فيك مكانة الصاحب والحبيب وأقرب انسان لي .. غلطانة لمن شفت انو الدنيا بيك بتبقا وبلاك ما بتمشي .. غلطانة لمن كانت بتضيق بي وبجري عليك وبتطمن وانا بقول حيفضل معاي وحفضل تمام .. فلا انت فضلت ولا هسي انا تمام .. شكراً لانك خليتني بين نارين .. او على الهاوية .. لا قادرة ارجع عليك جارية واقول مشتاقة ليك .. ولا قادرة اكمل وانا ما معاك .. لا عايزة ارجع وأملك كل الحاجات الحلوة الجواي ليك .. ولا عايزة امشي واخليك وراي واقول انسى كل شيء .. هو انا فعلاً نسيت .. نسيت خذلانك نسيت غيبتك نسيت جفاك .. بس ما نسيتك .. ولا نسيت ضحكتك ولا نسيت كلامك .. ولا حتى نسيت وعودك الما وفيت ولا بي واحد منها .. وزي ما قالو .. من شوقي ليك جيت ازورك وأحكي ليك غلطان عشان حبيت عينيك .. شوقي ليك شوق الصحارى للمطر حبي ليك ما كان حصل خسارة انكشح العسل ))
بعدها شغلت اغنية (( غلطان انا )) .. ودخلتها في التسجيل .. ولما كملت نزلتو على صفحتي وقفلت الحاجات قبل ما اقوم على سريري وأمسك التلفون عشان اسمعو
عمار .. بالرغم من كل شيء .. ما قاعد تطلع من بالي .. وبرغم كل الحاصل ما قادرة أكرهك ولا حتى انساك .. فمحل ما انت قاعد ربنا يسعدك ويديني انا القوة اكمل بلال
" عمار "
طلعت مشيت استلمت الخواتم وجبت كم حاجة للبيت ورجعت .. لقيت سامي ومعاهو بقية الشباب قاعدين وبساعدو في الحجه
سلمت عليهم وخليتهم في شغلهم دا زغت قلتا اخد لي حبة نومة .. صحيت استحميت ومرقت لقيت الامور كلها اتظبطت .. بقيت بعاين حوليني وانا بفتش على داليا اختي .. سألت امي منها قالت في غرفتها معاها صحباتها .. مشيت عليهم .. دقيت الباب قبل ما اقول : داليا ممكن تجي دقيقة ..
شوية ومرقت لي .. قلتا ليها : تعالي عايزك
مسكتها من يدها وطلعنا النجيلة .. قعدت معاها وانا بعاين ليها مسافة قبل ما امسك يدينها وانا بقول : داليا انتي مبسوطة !!
قالت لي : معقولة ياخي بعد البورة دي حا اتحل منها ما انبسط كيف
ضحكت وانا بقول ليها : لا جادي معاك الزول دا بتحبيهو ومرتاحة ليهو
قالت لي : فوق ما تتخيل يا عمار الحمدلله
عاينت ليها مسافة قبل ما احضنها وانا بقول : ربنا يسعدك ويتم ليكي على خير يا ديدي
حسّيت بيها سكتت وصوت انفاسها بقا بتعالى زحيت عشان اعاين ليها لقيتا بتبكي ..
ضحكت بصوت عالي قبل ما اقول : هي يا مزة الليلة الخطوبة ما العقد روقي روقي
ضربتني في كتفي وهي بتقول : عمار بطل امورك دي ياخي
قلتا ليها : عارف عارف العرس قرب وما فضل ليهو شيء بس برضو دموعك دي ما عايز اشوفها بعدين وييين يعني كان عرستي قال ليك بتتحلي مني !! لا معليش ماف طريقة
روقتها كدا قبل ما اقول ليها : ارح قدامي ارجعي لي صحباتك عشان يضربوك بوماستك ولا يتصرفو فيكي الراجل دا كان جا لقا وشك كدا بجري بخلي الخطوبة
كوركت وهي بتقول لي : عمااار يا سخيف
امي جات مارقة بي كواريك داليا وهي بتقول يا اولاد في شنو
قالت ليها : امي عايني عمار دا
حمرت لي مسافة .. مشيت عليها وبست راسها قبل ما اقول : معقول يا نبع الحنان انا اعمل حاجة ياخي
قرصتني في يدي وهي بتقول : عليك الله راجل كبير بي شنبك ودقنك لسا بتعمل امور الشفع دي ،، امشي قدامي يلا
ضحكت ودخلنا كلنا جوا .. مرت حكاية ساعة وكل شيء تم .. جو ناس الخطوبة وشوية معازيم .. وانا بسلم عليهم عيني وقعت على الباب .. جو داخلين خالتو ابتسام وسحر .. عاينت ليهم مسافة .. قبل ما ارسم ابتسامة خفيفة على وشي عشان اداري على التوتر الاتملكني لحظتها .. مشيت سلمت عليهم ووقفت معاهم شوية .. بعدها رجعت لبقية المعازيم والشغل .. داليا أختنا الوحيدة وأصغرنا انا وصهيب اخوي .. يعني نحن ٣ وفي يوم زي دا اكيد نحن اللازم نكون واقفين
شوية كدا وبدو تلبيس الخواتم .. وانا كنت واقف وبعاين ليهم .. وفي الحاصل دا ما في بالي غيرها
تعرفو حاجة !! لما نحب كل الوشوش وكل اللحظات القدامنا بتكون مربوطة بالانسان البنحبو دا .. حتى أتفه التفاصيل بتبقا ليها اهميتها بس لمجرد انو الزول دا عاشها معانا في يوم من الايام
مسحت على وشي بيديني وانا بحاول اشتت تفكيري فيها بأي حاجة تانية ..
فمشيت وقفت جنبهم وبقيت بصفر وانا وأصحابي بنصفق وبنضحك وكدا ..
شوية والتفت على الشباب وانا بقول ليهو : يا اخوانا خطوبة شنو البدون ربة دي يا سامي شغل ارح
" ثناء "
وانا بتفحص في تلفوني كدا .. جاني فيديو كول من سحر .. رديت وانا سامعة صوت جووطة .. بعد سلمت عليها سألتها : وين انتي يا بت
قالت لي : دقيقة اقلب ليكي الكاميرا شوفي خطوبة داليا ماشااءالله طالعة عسل شديد
قلتا ليها : بالله ماشاااءالله اي اي اقلبي وريني
بقيت بعاين للناس القاعدين وعلى داليا وخطيبها .. وبجد انبسطت ليها شديد لانو بتستاهل ..
دققت نظري في الفيديو وانا بفتش بين وشوش الناس عليهو ..
شوية وسمعت صوت اغاني وصوتو .. ظهر في الفيديو وحولينو كمية شباب كانو بغنو وهم برقصو وبصفقو ..
وهو في نصهم بيضحك وبغني
بقيت بعاين ليهو مسافة وانا حاسة بقلبي حيقيف .. ما كنت متخيلة اني مشتاقة ليهو للدرجة دي
دموعي نزلت وانا بحضر في الفيديو .. شوية وقفلتو وقفلت النت .. ختيت التلفون وبقيت ببكي مسافة ..
خلونا متفقين انو الانفصال بيك
ون شيء ظاهري بين الاتنين .. بس الوجعة واللهفة وكل الحاجات دي هي البتكون ماشة معانا ونارها بتحرق فينا
بعد حكاية ساعتين عدو ما حسّيت بيهم وانا بفكر .. رجعت مسكت تلفوني وفتحت الواتس دخلت على الاستوريات .. وانا بشوف فيهم جاني استوري سحر اختي كانت خاتة فيديو الخطوبة لحظة ناس داليا وعمار برقصو سوى ك اصحابو قعدو في الارض حولينو وهم بصفقو وعمار كان ماسك يدين داليا وبغني ليها : انا اهدي لييييكي الحب ،، حب من فؤاد مجرووح ،، حب الشحيح للمال ،، حب الجمال للروح
كان بغني وهو بيغمز ليها وبيعمل حركات ب وشو ..
بدون ما احس لقيت نفسي بضحك وبعيد ف الفيديو كم مرة وانا بقول : والله الزول دا ما نَصِيْح
عاينت للشاشة فوق لقيت في كم مكالمة فايتة من هند وشريفة .. رجعت ليهم .. كانو عاملين فيديو كول ..
اتونسنا مسافة بعدها شريفة سألتني : يا سجم راجعة متين انتي ياخي بتبالغي والله
قلتا ليها : والله ي شوشو بس الشغل لكن بحاول اجي قريب
هند قالت لي : اي بالله حاولي في الاسبوع دا عشان صحبتك عرسها قرب
عاينت ليها وانا بقول : دقيقة دقيقة ياتو صحبة فيكم
هند قالت لي : حبيبااااا هو في منو غيري
شريف قالت ليها : قصدك شنو يا الأخت انا ما بعرسوني ولا كيف
ضحكت وانا بقول : دقيقة دقيقة يا هند كدي فهميني !!
قالت لي : يا هبلة محمد ما كلمك !!
قلتا ليها : شوووفي المعفن وقبيل كان عندنا اجتماع وبنتكلم سوى ولاا جاب لي سيرة
شريفة قالت : بكون خجلان الود يا حليلو
قلتا لي هند : والكلام دا متين ان شاء الله !!
هند قالت لي : ان شاء الله نهاية الاسبوع دا الخطوبة وبعد شهر العرس
قلتا ليها : هنننند !! حار حار كدا !!
قالت لي : حار حار في عينك يا بت انا لي كم سنة منتظرة الحاجة دي حمارة انتي ولا شنو
قلتا ليها : ياخي مبروووك ياخي والله فرحت ليكي شديد وربنا يتم ليكي على خير يا عروسة
قالت لي : دي ما مقبولة منك هسي لمن تجي السودان بنتفاهم وفي ظرف ٥ ايام بالكتير ألقاك في خلقتي يا استاذة سامعة ولا ما سامعة !!
قلتا ليها : لا طرشة معليش
وفضلنا بنتونس مع بعض مدة بعدها قفلت منهم عشان انوم
عدت حكاية ايام بالشكل دا وماف جديد غير جري ناس عمار مع عرس داليا ..
اما ثناء من الشركة للبيت للتسجيلات ..
في جهة تانية
" ابتسام "
كنت براجع في ورق كم قضية .. شوية ومشيت المطبخ عشان اعمل الغداء .. اتصلت على سحر اشوفها اتأخرت وين .. ردت لي : الوو اي ي ماما
قلتا ليها : سحر كيفك !!
قالت لي : تمام
قلتا ليها : وين انتي لسا في الجامعة !!
قالت لي : لا مرقت لي مشوار كدا هسي جاية على البيت لكن
قلتا ليها : تمام ما تتأخري منتظراكي انا بالغداء
قالت لي : تمام مسافة السكة بس
وقفلت على كدا .. بعد حكاية ١٠ دقايق الجرس دق .. استغربت معقولة تكون جات سريع كدا !!
مشيت على الباب فتحتو وانا بقول : سريع ك..
سكت لما عاينت للبت الواقفة قدامي .. ياها ملامحها بس يمكن احلوت اكتر !! لابسة بنطلون جينز وقميص بناتي ابيض .. معاهم طرحة مورة مرمية على اكتافها .. شعرها مقصوص لبعد كتفها ومموج بالكركداوي ..
فضلت في حالتي دي مسافة وانا بستوعب انها جات وواقفة قدامي بعد ال١٠ شهور العدت دي
سمعت صوتها وهي بتقول : مامااااا
حضتنتي وانا حضنتها علي وانا ببكي وبقول ليها : ثناء !! هو انتي جيتي يعني جد !!
قالت لي : لا يا امي دي شبيهتي ال ٢٢
ضحكت وانا بقول ليها : بس الله يطولك يا رووح حا تكبري متين انتي حا تكبري متييين
دخلنا جوا ونحن بتتكلم وبسأل فيها لي ما ورتنا انها جاية
قالت لي : مفاجأة وكدا
عاينت ليها مسافة وانا تقول : متأكدة دي مفاجأة ولا صدمة
حمرت لي وهي بتقول : ماما هسي بحجز اول طيارة وبرجع مالك ياخي االله
ونحن في وقفتنا وكلامنا دا الجرس دق .. ثناء قامت جارية وفتحتو ونطت في سحر وهي بتبوس فيها وشغالة ليها : مشتاقين مشتاقين مشتاقين
وسحر دي بتزح فيها عشان تستوعب هو دا منو البسلم عليها دا
ياخي ضحكوني ضحك .. خليتهم في عوارتهم دي ورجعت المطبخ .
" ثناء "
بعد كملنا عوارتنا دي انا وسحر .. طلعت عشان ادخل شنطي في الاوضة .. كانت زي ما خليتها
بجد اشتقت ليها شديد واشتقت لكل حاجة هنا .. رتبت حاجاتي ودخلت اخد لي حمام .. رفعت شعري وركبت شريحتي بتاعت السودان
بعد سافرت غيرت اي شيء حساباتي بتاعت الفيس والانستا .. حتى رقمي بتاع الواتس نقلتو للرقم الماليزي .. وكلو عشان ما اخلي عمار يصل لي بأي شكل ..
اول ما ركبت الشريحة .. ما بعرف الخلاني اعمل كدا شنو بس غيرت رقم الواتس ورجعتو لرقمي السوداني جاني فضول اشوف الرسايل الجاتني في الفترة العدت دي ..
ختيت تلفوني في الشاحن وطلعت من الاوضة
مشيت على غرفة سحر لقيت الباب مفتوح .. دخلت لقيتها قاعدة في السرير كانت مدياني ضهرها .. بتتكلم بالتلفون وهي بتضحك وبتقول : لا انت بتهظر !! بجد !! وااي والله بحبك بحبك
بحبك
قلتا ليها : احمم وانا اقسم بالله بموت فيك
التفتت علي وهي بتقول : انتي الجابك شنو كمان ..
لما جيت ماشة عليها قفلت الخط وهي بتعاين لي ..
قعدت جمبها وغمزت ليها وانا بقول : شنو ي بطة ما نفسك تحكي لي الجديد ،، امم شكلو شديد يا الاخت
قالت لي : احمم ،، والله يا ثناء كل شيء في وقتو حلو خليها دي هسي
قلتا ليها : ويين بالكلام الكبير دا هيي يا بت احكي ارح سامعاك ..
ضحكت مسافة قبل ما تقول لي : طيب شوفي ،، تتذكري زمااان لما كان جيتك في بيتك وكنتو عاملين لمة لي صاحبكم الاسمو محمد دا وهو كان مسافر
قلتا ليها : ااي اها
قالت لي : ومش يومتها رجعني صحبك هاني
قلتا ليها : اااااي كدي اصدميني قولي لي الفي بالي بالك
هزت راسها وهي بتقول لي : بالظبط ،، واي صحبك دا قرضة وظريف واخلاق ورومانسية وحب ويعني ووب علي
بقيت بعاين ليها وانا رافعة حاجبي اليمين .. قلتا ليها : يااا شيخة ومن متين وما وريتيني يا وسخة
قالت لي : اهو هسي عرفتي ،، ولما كان بتكلم معاي هسي دا قال لي انو بعد دا عايز يجي يتقدم وكدا
قلتا ليها : انا يحليلي بقيت ملطشة ساي هند ومحمد دايرين يعرسو وعرفت يادوب وهَسي انتي وهاني ،، اين انا من هذا ماف زول يكلمني بدري بدري يا حيوانات يا رمم حسابي مع هاني بعدين
ونحن بنتونس كدا امي نادتنا للغداء .. قعدنا اكلنا بعدها سحر عملت ليها شاي ظريف كدا شربناهو ..
في قعدتنا دي امي قالت لي : يا ثناء انتي باركتي لي داليا دي خطوبتها !!
قلتا ليها : لا ولا رقمها ما عندي زاتو
قالت لي : اضربي ليها بي تلفوني وباركي لي امل والطيب برضو
قلتا ليها : امي ،، عارفة الكلام دا وعشان كدا ماشة ليهم عديل
الاتنين بقو بعاينو لي مسافة .. عملت رايحة وكملت الشاي حقي ..
طلعت غرفتي ومت التلفون .. اول حاجة نزلت في الاستوري ( السودان نور بي يا شباب )
بعد داك بقيت بشوف في الرسايل وبرد عليها .. ايييك كانت كتيرة شديد وانا اصلاً تعبانة فختيت التلفون جمبي اتغطيت ونمت طوالي .
" عمار "
دخلت المطبخ اشرب لي موية .. يادوب جيت راجع من برا الايام دي انا والشلة مقضنها جبنات بس .. وانا داخل غرفتي سمعت صوت حاجة ضربت في الارض .. عاينت وراي كدا ماف زول والصوت كان جاي من واحدة من الغرف .. شوية وسمعت امي بتقول : الطيب ،، الطيب بِسْم الله مالك قوووم يا الطيب فتح عيونك
جريت على الغرفة فتحت الباب لقيت ابوي واقع في الارض وامي جمبو .. داليا جات داخلة وكلنا حولينو وبنحاول نصحيهو .. قومناهو وركبناهو العربية اتحركنا على المستشفى واول ما دخلنا رقدوهو وطلعونا برا الغرفة ..
وانا من الخوف بقيت ما قادر اقيف بس ماشي وجاي .. شوية والدكتور طلع جريت عليهو وسألتو : يا دكتور لو سمحت ابوي مالو عليك الله وريني
قال لي : يا استاذ والله بحسب الاتضح معانا دي جلطة في القلب ،، وحالتو تعبانة ربنا يكذب الشينة ونقدر نلحقو بس
قال كلامو دا ومشا جاب كم حاجة ورجع الغرفة تاني .. اما انا مشيت قعدت بعيد من الغرفة .. وانا مثبت نظري على بابها وما فاهم شيء غير اني بحاول اكذب الحاصل دا
لما لاحظت لي امي قاعدة وهي بتبكي .. قمت وأخدت لي نفس .. مشيت عليها وانا بحاول اهدي فيها وفي داليا .. وشوية صهيب اخوي جا داخل وبقينا منتظرين كلنا ..
دخلوهو في غرفة تانية ومنعونا نخش ليهو الا بعد ساعتين ..
وانا بس منتظر متين يعدو عشان اخش واشوفو .. يا رب قومو لينا بالسلامة يا رب
" تاني يوم "
ابتسام : لا ياخي لا حول ولا قوة الا بالله لا بجي عليكم هسي دي ان شاء الله ربنا يكتب عافيتو ويقومو بالسلامة يا امل هسي انا بجي عليكم مسافة السكة بس ..
دا كلام امي السمعتو وانا نازلة على الصالون مشيت عليها وانا بقول : خير يا امي في شنو
قالت لي : الطيب راجل امل والله جاتو جلطة مرقدنو في المستشفى انا بشرب شاييني دا ومارقة عليهم هسي
قلتا ليها : لا حول ولا قوة الا بالله ياخي ربنا يشفيهو خلاص انا مارقة معاكي زاتي اجهز سريع بس
عاينت لي مسافة قبل ما تقول : متأكدة !!
قلتا ليها : امي ،، الحصل دا حصل وخلاص ،، اخر النهاية الناس ديل معرفتنا بيهم من ما قمنا صغار فكرك حتكون ظريفة اني قاعدة وما امشي ليهم !! خاصة انو في يوم حصلت قرابة اهل بينا وبينهم ،، المشكلة الحصلت هم ما ليهم دخل فيها ،، فهمتيني !! فما تخافي ان شاء الله كل شيء حيكون تمام
بعد قلتا كلامي دا طلعت على الغرفة جهزت بسرعة ومرقت لقيتها منتظراني اما سحر اصلاً مرقت الجامعة بدري ..
ونحن في العربية انا كنت متوترة شديد وكل ما نقرب من المستشفى بحس بصوت قلبي دا مسموع في الدنيا كلها والشيء الخايفة منو حا يحصل وحا اشوفو بعد الفترة دي كلها
لما وصلنا ونزلنا .. كنّا طالعين على الطابق الرابع وانا حاسة رجولي ما شايلاني ..
دخلنا في كم ممر لغاية ما وصلنا محل الغرفة عيني وقعت على خالتو امل ومعاها داليا .. لما نقلت نظري للجهة التانية .. شفتو وهو مدنقر راسو وبعاين للارض .. ما عارفة حسّيت بشنو لحظتها بس كان نفسي اصرخ بصوت عالي وابكي واحضنو .. احضنو شديييييد لاني مشتاقة ليهو .. يادوب حسّيت الفترة الفاتت دي كانت باهتة قدر شنو بدونو وبدون وجودو .. عمار اشتقت ليك انا
" عمار "
- السلام عليكم
رفعت راسي لما سمعت صوت خالتو ابتسام .. بس .. الما كنت متوقعو اني اشوفها .. وقفت على حيلي وانا بعاين ليها جوا عيونا .. ما بين بكذب عيوني وبصدقها ..
هي حقيقي واقفة قدامي !! بعد المدة دي كلها .. بعد ال١٠ شهور الما شفتها فيهم الا في الصور وما سمعت صوتها نهائي .. ثناء
اتحركت عليها بخطوات بطيئة لغاية ما وقفت قدامها والدموع اتجمعت في عيوني .. ما بعرف شنو الكان مضايقني .. ابوي الما بين الحياة والموت ولا ثناء الواقفة قدامي هسي دي ..
لقيت نفسي بقول بصوت هزيل وانا بعاين ليها ثناء .