قصة زوجه محرمه
البارت الحادي عشر11والاخير
الجزء الثاني
بقلم حنان حسن
: اصل انت بتكلمني كأنك ناسي ولا فاقد الذاكرة !!! ده غير بقي اللي انت عملته !!!
: عملت ايه اتكلمي بسرعة .
: اول ما دخلنا الاوضة زقتني علي السرير وحتي مكانش عندك صبر وقطعت هدومي و كنت هتموتني .
: كملي حصل ايه ؟
: اكمل ايه يا راجل انت !!
: حصل علاقة بينا ؟؟
: انت بتستهبل يا امير ؟!! انت عاوز ايه بالظبط ؟
: عاوز اعرف حصل علاقة ولا لأ ؟
: يعني انت ناسي !!! ايوه .
: يا نهار اسود .
: مالك يا امير فيك ايه النهاردة ؟
: مفيش مفيش حاجة .
خرجت بسرعه واتصلت بالشيخ وحكيتله اللي حصل ، قالي ان الجن ممكن يتجسد في صورة انسان فكلامهم حقيقي ممكن يكون كان متجسد في شخصيتي ، لكن مستحيل تحصل علاقة بينه وبين انسانة ، هو بس ممكن يصورلها كده مش اكتر .
: يعني محصلش حاجة يا شيخ ؟؟
: اطمن يا استاذ امير محصلش حاجة .
: انا نفسي اخلص من الكابوس ده ارجوك .
: المرة اللي فاتت احنا روحنا بالليل ، بكره الصبح اخرج كأنك رايح شغلك طبيعي وتعالي عدي عليا ونرجع تاني البيت بالنهار المرة دي علشان نفاجئه وبأذن الله خير .
: حاضر يا شيخ .
كلامه طمن قلبي شوية ودخلت حاولت انام لكن معرفتش انام وفضلت صاحي لحد ما سمعت اذان الفجر ، قومت اصلي وروحت اصحي نور علشان يصلي معايا لكنه لما حس بيا عمل نفسه نايم !!!
روحت صحيته وقولتله : يلا يا نور قوم صلي الفجر معايا .
: معلش يا بابا مش قادر اقوم ، روح صلي انت .
: بطل كسل يلا وقوم ، ده احسن حاجة في الدنيا ركعتين الفجر .
: معلش يابابا انا تعبان مش قادر .
سبته وخرجت وروحت صليت الفجر ودعيت ربنا يكشف الغمة دي .
صحيت من النوم وفطرت وخرجت زي كل يوم ورروحت للشيخ وقبل الضهر كنت رجعت البيت ومعايا الشيخ .
كان نور لسه نايم ، دخل الشيخ وبدأ يقرا قران عليه وهو نايم وفجأة صحي نور واتكلم بصوت غريب واستمر الشيخ في القراءة عليه اكتر من نص ساعة لغاية ما رجع نور لطبيعته ونام .
والشيخ قال ان الجن اللي عليه خرج وان المشكلة انتهت وان نور هيرجع لطبيعته .
مشي الشيخ و دخلت اطمن علي نور لقيته صحي من النوم وماسك راسه !!! سألته : مالك يا نور حاسس بأيه ؟
: حاسس بصداع جامد جدا في راسي .
: انت نمت كام ساعة ؟
: مش عارف ، بس انا مش عارف انا مالي !! حاسس اني مش طبيعي .
: طيب يلا قوم بقي وبطل كسل ويلا علشان تيجي تصلي الضهر معايا .
: لا انا مش قادر دلوقتي روح انت صلي .
استغربت لأني كنت فاكر ان الجن كان السبب اللي منعه من الصلاة والصيام !!!
سبته وخرجت وبدأت اتابعه من بعيد وبعد مرور ٤ او ٥ ساعات وقبل المغرب بقليل خرج نور من اوضته بيجري وبيسألني : ايه اللي حصل النهاردة وانا نايم ؟
عملت نفسي مش فاهم السؤال : حصل ايه يا حبيبي ؟
: عملتوا فيا ايه وانا نايم ؟
: تقصد ايه وضح كلامك ؟
: انت جيبت الشيخ هنا تاني ؟
: ايوه والحمد لله ربنا شفاك علي ايده .
: شفاني من ايه ؟ مين قالكم اني مريض ولا تعبان !!! بتتصرفوا من دماغكم ليه ؟
: يا نور يا حبيبي انت كنت تعبان وكان عندك مس من الجن والحمد لله الشيخ خرج الجن من عليك علشان تعيش حياة طبيعية .
صرخ نور وهاج وقال : مفيش حد له دعوة بيا ، محدش يتدخل في حياتي ، انا حر في حياتي ، انتوا ضيعتوني حرام عليكم .
كلام نور كان غريب جدا مش قادر افهم منه حاجة ومن شدة الذهول مقدرتش اتكلم واقول حاجة وسبته لحد ما بدأ يهدا ودخل اوضته .
اتصلت بالشيخ وحكيت له علي اللي حصل وكل الكلام الغريب اللي قاله نور ومفهمتش منه حاجة .
الشيخ قالي : انا مضطر اقولك الحقيقة ، نور هو اللي كان بيسخر الجن !!!
: انت بتقول ايه يا شيخ ؟؟!!!!!
: انا بقولك الحقيقة ابنك تقريبا قرا في كتب السحر وقدر يسخر جن ويستخدمهم في خدمته وكل الحاجات الغريبة اللي كانت بتحصللكم كانت بتحصل بسبب الجن اللي كان بيسلطه عليكم يضايقكم .
: انت بتتكلم عن نور ابني انا ؟
: ايوه يا استاذ امير .
: ده لسه عيل صغير ده يفكر في كل ده ازاي ويقدر يعمل كل ده ازاي ؟!!
:ابنك مش صغير يا استاذ امير ابنك عنده ١٩ سنة وهو فعلا اللي عمل كل اللي قولتلك عليه وواضح انه بيتعامل مع الجن من فترة طويلة .
: انا مش مصدق وداني !!! انا صاحي ولا نايم !!!!!!
: معلش يا استاذ امير المهم دلوقتي اننا نحاول نصلح كل ده .
: يا شيخ انا عمري ما سمعت عن حد بيستخدم الجن والسحر والكلام ده ويكون عمره صغير كده .
: معلش انا عارف الصدمة شديدة عليك ومش قادر تستوعبها لكن هي دي الحقيقة . المؤمن دايما مبتلي .
: والابتلاء مش ييجي غير في ابني اللي انتظرته سنين كتيرة !!!!
: قول الحمد لله .
: الحمد لله علي كل شئ . دلوقتي انا مش عارف هعمل ايه معاه يا شيخ ؟
: انا هحاول اساعدك ونقعد معاه احنا الاتنين وبأذن الله ربنا هيكرمك فيه وتشوفه زي ما تحب .
من الصدمة كنت مش قادر امشي لوحدي او اسوق العربية .
اتصلت بوحيد وطلبت منه انه ييجي ياخدني وفعلا بعد دقايق وصل وحيد علشان ياخدني من عند الشيخ .
الشيخ اول ما شاف وحيد قال بسم الله ما شاء الله . اخوك الصغير ده يا استاذ امير ؟
: ده اخويا وابني واقرب حد ليا في الدنيا .
: اخوك ولا ابنك .
: وحيد يبقي ابن اخويا الله يرحمه وانا اللي مربيه وهو ابني البكري .
: ما شاء الله ربنا يبارك . اومال كتت بتقولي انتظرت نور سنين طويله !!! بقي يبقي عندك ابن زي الاستاذ وحيد و تنتظر اي حاجة تانيه من الدنيا !!
وحيد قاله : ربنا يبارك فيك يا عم الشيخ .
الشيخ : خليك جنب ابوك امير يا استاذ وحيد ومتبعدش عنه .
وحيد : مقدرش ابعد عنه والله يا عم الشيخ .
قولت للشيخ : تصدق يا شيخ انا فعلا وحيد اقرب ليا من نور رغم اني انتظرت نور ابني سنين كتير اوي وامي كمان كان نفسها تشوف ليا ابن قبل ما تموت ، متتخيلش فرحتنا كانت ازاي لما عرفنا ان مراتي حامل وقتها .والاغرب بقي كمان اني انا اتجوزت الست والدته الله يرحمها بمعجزه وكنت رافض نهائيا لكن سبحان الله كانت ونعم الزوجة لغاية لما ماتت . صحيح لو علمتم الغيب لأخترتم الواقع .
الشبخ : ربنا يزيدك رضا و يقوي ايمانك كلامك صح يا استاذ امير .
: ياريت يا شيخ تحكي لوحيد موضوع نور اخوه بصراحة علشان يساعدني لأني بصراحة مش هقدر لوحدني .
وقعد الشيخ مع وحيد وقاله كل الكلام اللي قالهولي .
واتفقنا اننا نتعاون كلنا في ابعاد نور عن طريق السحر والجن والكلام ده .
لكن كانت المفاجأة لما روحنا البيت انا ووحيد اتفاجئنا ان نجلاء وسلمي بيقولوا ان نور اخد كل هدومه وكتبه ومشي !!
وبدأنا ندور علي نور في كل مكان انا ووحيد .
مفيش مكان ممكن يروح فيه سبناه !!! دورنا عند كل قرايبنا مفيش فايدة كأنه فص ملح وداب .
بعد يومين تقريبا بدأنا نيأس اننا نلاقيه ، وبدأت افكار انه يكون عمل حاجة في نفسه تسيطر علينا .
روحنا قسم الشرطة وعملنا بلاغ عن غيابه .
وعدت فترة وبعد حوالي شهر عرفنا من واحد من اقاربنا انه عرف مكانه وانه شافه في القاهرة واخد العنوان اللي شافه فيه !!
سافرت انا ووحيد وبعد ساعات من البحث قابلنا نور اللي اتفاجئ لما شافنا قدامه !!!
حاولنا نقنعه انه يرجع معانا لكن نور كان عنده مفاجئة اقوي بكتير لما قالنا انه هيهاجر تايلاند !!!!!
اتعجبت جدا!!! اشمعني تايلاند يا نور ؟؟ وهتجيب تكاليف السفر منين ؟
: انا خلاص دبرت كل حاجة وايام بسيطة وهكون هناك .
حسيت بالغضب اتملكني وانا شايف الانسان اللي كان فرحة عمري واكتر حاجة اتمنتها في حياتي بتضيع مني للابد بالشكل ده !!!! ثورت عليه ووحيد حاول يهديني .
وحيد اخد نور واتكلم معاه علشان يفهم ، نور قاله انه حب بنت تايلاندية وهيهاجر عندها هجرة دايمه ومش هيرجع تاني وهيكمل دراسته هناك ولما وحيد سأله اشمعني تايلاند كان ممكن يهاجر مع حبيبته اللي حبها اي بلد اوروبية او امريكية اكثر تقدم رد نور وقال ان تايلاند فيها رياضات روحية ونفسية عميقة مثل اليوجا وهو محتاج انه يمارس الرياضات دي في حياته .
وحيد حاول معاه كتير واتصلنا بمجموعة كبيرة من قرايبنا اللي ممكن يأثروا عليه ويقنعوه يغير رأيه .لكن نور كان مصمم انه يهاجر !!!
وقبل ما يهاجر اعطيته عقد شقة كبيرة بمبلغ كبير في القاهرة وقولتله ان ده نصيبه في ميراثه مني لو مت في اي وقت و حب يرجع تاني هيلاقي شقته موجودة وفي مبلغ من المال بشهادة استثمار تصرف بعد عشر سنين هتكون موجودة لو احتاجها في اي وقت .
نجلاء لما عرفت باللي كتبته بأسم نور لاحظت عليها التغيير ففهمت وقولتلها اني كتبت البيت اللي عايشين فيه بأسم هدي وباسمها اما مكتب المقاولات فكتبته باسمها هي وهدي ومعهم وحيد .
سافر نور وانا مش عارف اذا كنت هشوفه تاني او لأ .
وعيشنا انا ونجلاء وهدي ووحيد ومراته وابنه كانوا دايما بيزرونا وبيقعدوا معانا كتير .
و مع الوقت مكتب المقاولات اتحول لشركة مقاولات وبقت من اكبر شركات المقاولات في المحافظة .
وقررت اني انقل شغل المقاولات للقاهرة و عملت مكتب الشركة مؤقتا في شقة نور !!!!!
وبعد حوالي تسع سنين اتفاجئنا كلنا برجوع نور .
طبعا فرحنا كلنا لكن نور قالنا انه عاوز يعيش في شقته في القاهرة !!!
قولت لنور اني عملت الشقة مكتب للشركة وقولتله اني هشتري شقة له بدل منها . لكن العجيب انه رفض واصر علي انه ياخد شقته .
ومهما احاول اقنعه مفيش فايدة وفي النهاية قولتله اني هشتري منه الشقة اللي انا كتبتها له من املاكي !!!
و اللي مكنتش ابدا اتخيله انه يتعامل معي كأن الشقة ملكه بأمواله وتعامل معي كانسان غريب واشترط علي اني لازم اشتري الشقة باسعار الفترة الحالية !!!!!!!
انا مش متخيل ان نور ابني يكون بالبشاعة والجشع ده لدرجة اني تمنيت لو استمريت عقيم بدلا من هذا الابن العاق .
وبالفعل اشتريت منه الشقة بمبلغ كبير تسبب في ازمة مالية بالنسبة لي .
وبعد ايام فوجئنا جميعا بالقبض علي نور وعندما حاولنا معرفة السبب كانت الصدمة انه متهم بقتل زوجته اللي اتجوزها في بلد هجرته !!! ومحكوم عليه بالاعدام !!!!
تمت بحمد الله