قصة زوجه محرمه
البارت الرابع4
الجزء الثاني
بقلم حنان حسن
كلمت اختي في ملاحظاتي عليها وهي اتكلمت بعد كده مع نجلاء ، وقعدت مع اخواتها واتفقنا علي الجواز بعد جواز وحيد و سلمي .
وحيد لما عرف رحب جدا بالموضوع لكن نور اللي كان موقفه غريب جدا .
نور اول لما عرف رفض بشدة وبكي وكنت اول مرة اشوف نور ابني يبكي لكن بعدها بدقايق قالي انه موافق ومش عنده اي اعتراض ومرحب جدا بالفكرة !!!!!
كنت هتجنن ازاي حول رأيه وموقفه ١٨٠ درجة للنقيض في دقايق ؟؟!!!
بعد نهاية امتحانات نور في المدرسة حددنا ميعاد فرح وحيد .
يوم فرح وحيد وسلمي كنت فرحان جدا واول لما صحيت الصبح روحت قبر سارة وقولتلها ان النهارده فرح ابنها وحيد علشان افرحها .
حتي في فرح وحيد اخوه نور كان مش واضح عليه اي نوع من الفرح .
خلص الفرح ووحيد سافر مع عروسته يقضوا شهر العسل ، ورجعت انا و نور للبيت .
نور كان بيدخل اوضته ويقعد لوحده بالساعات و طلبت منه كتير انه يقعد معايا نتكلم زي اي اب وابنه لكن كان بيقولي انه بيحب يقعد لوحده .
كنت لما بدخل البيت بعد جواز وحيد كنت بحس بملل شديد .
روحت لنجلاء واخواتها وطلبت منهم اني اقعد معها علشان نعرف بعض اكتر قبل تحديد ميعاد الجواز .
وبدأت اقعد مع نجلاء يوم في الاسبوع ولما قربت منها لقيتها شخصية محترمة و عندها اخلاق لكن كان عيبها الوحيد طريقة لبسها !!
ولما كلمتها قالت : دي طريقة لبسي طول عمري لكن هحاول اغيرها مادام بتضايقك .
: متزعليش مني يا نجلاء انتي كل حاجة فيكي حلوة وانا استريحتلك من اول ما شوفتك لكن الموضوع ده بس اللي لازم تخاولي تغيريه .
: حاضر خلاص هغيره في لبس الخروج انما لبس البيت يا ريت تسيبني علي حريتي .
: خلاص مفيش مشكلة ، انا كنت عاوزك تكلميني عن جوزك وبناتك الله يرحمهم .
وبمجرد ما جيبت سيرتهم اتغيرت ملامحها ونزلت دموعها !!
فضلت اهديها لحد ما هديت وبدأت تتكلم وقالتلي : يحيي وريماس وريتاج كانوا كل حياتي يا ريتني كنت موتت معاهم وارتحت .
: بعيد الشر عنك ، ربنا كاتبلك انك تعيشي علشان نتقابل انا وانتي ، في سؤال محرج بس عاوزك تكلميني بصراحة كنتي بتحبي جوزك الله يرحمه ؟؟
: طبعا كنت بحبه ، ده كان نور عيني الله يرحمه ولو قولت غير كده ابقي كدابه احنا اصلا اتجوزنا عن حب .
: الجواز عن حب جميل فعلا بس يا تري الحب استمر بينكم بعد الجواز ولا مشاكل الحياة اثرت عليكم ؟
: اكيد كان في مشاكل بس فضلنا نحب بعض لحد لما مات .
: انا طبعا بحترم صراحتك لكن بيتهيألي بالشكل ده ان صعب حد تاني يدخل حياتك ؟؟
: انا كنت مش عاوزة اتجوز بعده وبعد بناتي بس انت عارف اخواتي خافوا عليا من كلام الناس علشان كده قالولي لازم تتجوزي .
: بالشكل ده بالنسبالك مش هيفرق مين الشخص اللي هتتجوزيه ، المهم انك هتتجوزي وخلاص اي حد !!!
: لأ طبعا مش اي حد وخلاص ، من يوم موت المرحوم وانا اتقدملي ناس كتير .
: واكيد طبعا كان فيهم ناس احسن مني ؟؟
: الصراحة من غير زعل معرفش احسن ولا لأ ، لكن انت اكتر واحد ارتحتلك .
: اشمعني انا اكتر حد ارتحتيله ؟
: معرفش بس الاحساس ده مش بأيدينا .
: رغم اني اكبر منك بحوالي ١٧ سنة ؟؟!!
: بالنسبالي ده مش فرق سن كبير المهم عندي الارتياح النفسي ، ممكن انت بقي تقولي مراتك كنت بتحبها ولا لأ ؟
: لو قولتلك الحقيقة هتستغربي جدا .
: لأ ابدا قول .
:انا اتجوزت مراتي غصب عني لأنها كانت أرملة اخويا الله يرحمه وكانت مخلفه منه وحيد اللي انا بعتبره ابني الكبير دلوقتي .
: يبقي اكيد حياتك معاها كانت صعبة اوي .
: بالعكس لما اتجوزتها حبيتها جدا وهي كمان حبتني جدا .
: ممكن تقولي اكتر حاجة كنت بتحبها فيها ايه ؟
: كل حاجة فيها كنت بحبها لكن اكتر حاجة كانت مش بتزعلني ابدا وكانت بتريحني في كل حاجة عمرها ما زعلتني ابدا .
: ممكن تقولي بصراحة انا احلي و لا هي ؟
ضحكت وقولتلها : لأ في الجمال والحلاوة انا عمري ما شوفت احلي ولا اجمل منك ابدا .
: لأ انت كده بتجاملني .
: لأ انا بتكلم جد حقبقي انتي تحفة تجنني ، يعني لو مش اعرفك وشوفتك في الشارع لازم اعاكسك .
: ايه ده ؟؟ انت بتعاكس البنات والستات ؟؟
ضحكت وقولتلها : لأ ، بس انتي بالذات كنتي هتخليني اعاكسك غصب عني .
: اشمعني انا بالذات يعني .
: اصل انتي حلوة اوي .
نجلاء اتكسفت ووشها احمر ، فعلا انا بعد القاعدة دي معها حسيت اني قربت منها كتير خصوصا بعد كلامها عن جوزها اللي مات واتعاطفت كتير مع حزنها عليه وعلي بناتها وقررت اني لازم ارتبط بها .
حددنا ميعاد الجواز بعد شهرين وفي خلال الشهرين حاولت انسيها احزانها وبقينا نتكلم كل يوم بالساعات زي المراهقين !!
علي ميعاد الفرح كنا بدأنا نحب بعض معرفش ازاي الحب اتولد بينا بالسرعة دي !!!
يوم الجواز روحت كتبت الكتاب في بيت اخواتها واخدتها بعربيتي وسألتها : تحبي نقضي شهر العسل فين ؟؟
ضحكت وقالتلي : هو احنا هنعمل زي العيال الصغيرين ولا ايه ؟؟
: ايوه طبعا واكتر كمان هو انتي فاكرانا كبرنا ولا ايه !!
: لأ احنا نروح بيتنا احسن بدل المصاريف اللي ملهاش لزوم ، واللي هنصرفه هناك نصرفه في بيتنا .
نور كان راح عند عمته قبل الجواز بيوم علي اساس يقعد عندها اسبوعين في اول الجواز .
اخدت نجلاء وعزمتها علي العشا بره و احنا راجعين من العشا ومروحين البيت كانت نجلاء ساكته مش بتتكلم ، سألتها : انتي مكسوفة ولا ايه يا نوجا ؟
ضحكت نص ضحكة وقالتلي بكسوف : لا ابدا .
نزلنا من العربية وانا ببصلها والصراحة مش مصدق ان القمر دي بقيت مراتي !!
دخلنا البيت و هي دخلت اوضة النوم تغير وقفلت الباب وكأنها عروسة مكسوفة لسه اول مرة تتجوز !!
اتأخرت نجلاء وانا قعدت ولعت سيجارة بره ومستنيها تفتح الباب لكن اتأخرت اوي ، خبطت علي باب اوضة النوم مردتش عليا فتحت الباب ولقيتها قدامي