قصة زوجه محرمه
البارت التاسع9
بقلم حنان حسن
وبعد حوالي ساعة سارة سألتني : تحب اعملك سندوتشات وكوباية شاي ؟
قولتلها : ياريت .
قامت سارة دخلت المطبخ تجهز السندوتشات والشاي وبعد دقايق النور انقطع وسمعت سارة بتصرخ .
خرجت جري علي المطبخ قابلتها وهي بتجري واترمت في حضني !!
: طيب اهدي اهدي مالك خايفة اوي كده ليه ؟؟!!
: بخاف اوي من الضلمة .
: طيب اهدي متخافيش انا معاكي اهو !! مش عارف بتخافي من ايه !! ما انا معاكي اهو ومفيش حاجة .
: انا اترعبت لما النور قطع وانا واقفة لوحدي في الضلمة .
ورغم اني حاولت اطمنها وهي في حضني لكن كنت حاسس بقلبي بيدق بقوة اوي وبسرعة !! لدرجة ان سارة لاحظت وسألتني بتعجب : ايه ده !! ماله قلبك بيدق بسرعة كده ليه ؟
: لا ابدا مفيش .
سارة ضحكت : ايه ده ، معقول انت كمان خايف ؟؟!!
ضحكت : لا طبعا مش خايف .
: اومال قلبك بيدق جامد كده ليه ؟
ضحكت وقولتلها : مفيش مفيش متاخديش في بالك .
سارة حطت ايدها علي قلبي وهي في حضني وفجأة افتكرت نور اخويا !! بعدت عنها بسرعة و مسكت ايدها وقولتلها : هنفضل واقفين كده !! يلا ندخل .
دخلنا الاوضة و نمت في مكاني و من احساسي بسارة لما ارتمت في حضني ان احساسها من ناحيتي اختلف وفكرتها عن جوازنا اختلفت .
لكن لما افتكرت نور وقت لما مات معرفتش انام وبقي جوايا صراع كبير بين حبي وحزني علي نور وبين سارة ارملته اللي بدأ احساسها من ناحيتي يتغير وانا كمان احساسي من ناحيتها بدأ يتغير ونظرتي لها تختلف !!
وفضلت سهران طول الليل ماسك الموبايل وحاسس بها صاحية و النور مرجعش لحد لما عينيا غفلت ونمت .
حلمت بسارة كأننا متجوزين عن حب ولسه في شهر العسل زي اي عروسين .
صحيت من النوم كان النهار طلع و كانت سارة مش موجودة في الاوضة !! خرجت دورت عليها كانت بتجهز الفطار لكن لاحظت عليها لما كلمتها ان شكلها متغير وواضح عليها الحزن بدون سبب !!!
سألتها كتير وحاولت اعرف منها سبب حزنها لكن اتهربت من سؤالي .
وبعد الفطار سارة قالتلي : انا عاوزة اروح عند ماما .
: وماله روحي لو عاوزاني اوصلك اجي اوصلك .
: لأ شكرا ، بس انا هقعد عندها كام يوم !!
: تقعدي عندها ليه ؟!! دي بيتها هنا قريب ولو عاوزة تزوريها كل يوم هتزوريها براحتك !!!
: معلش انا محتاجة اقعد معاها ومع بابا واخواتي كام يوم .
: في حد ضايقك في حاجة ؟؟
: لأ ابدا مفيش ، مختاجة اغير جو بس .
امي قالتلها : ده جوزك لسه راجع من السفر استني الكام يوم اجازته وبعدين ابقي روحي عند والدتك .
: لأ معلش انا عاوزة اروحلها النهاردة .
: لأ . كده بقي يبقي في حاجة اكيد مزعلاكي !!
: ياماما مفيش ارجوكي متضغطيش عليا .
: يا سارة انا بعتبرك زي بنت من بناتي بلاش تخبي عليا حاجة .
لقيت سارة دموعها نزلت غصب عنها وجريت بسرعة دخلت اوضتها !!
امي سألتني : انت زعلتها في حاجة يا أمير ؟
: لأ ابدا يامه .
: اومال مالها فيه ايه ؟؟!!
: مش عارف .
: انتوا حصل بينكم حاجة ؟
: حاجة زي ايه ؟
: حاجة زي اي عروسين يا اهبل .
: لا ابدا احنا زي ما احنا .
: اومال مالها في ايه مزعلها !!!!!
امي دخلت الاوضة ورا سارة وحاولت تفهم منها سبب زعلها لكن سارة فضلت مخبية .
وفعلا سارة اخدت وحيد ومشيت راحت لمامتها ، وامي قالتلي : علفكرة يا امير البنت دي شكلها زي ما تكون صعبان عليها نفسها او مكسورة !!
: ليه يامه بتقولي كده ؟
: احساسي كده دموعها وكتمانها سبب زعلها بيقول كده .
: وهتصعب عليها نفسها ليه ؟
: مش عارفه ، بس اكيد انت تعرف .
: وانا هعرف منين !! انا اتفاجئت بها كده !!
: طيب يابني احنا نسيبها النهارده وبكرة نروحلها نشوف مالها .
: ماشي يامه اللي تشوفيه .
في اليوم ده حسيت بزهق وفراغ كبير وحسيت اني بدأت اتعود علي وحودها في البيت معانا .
تاني يوم بعد الفطار علطول اخدت امي وروحنا بيت اهل سارة وحاولنا نعرف منها سبب زعلها لكنها بردو خبت علينا لكن مع اصرارنا انها ترجع رجعت معانا لكن كان واضح عليها الحزن !!
وقعدنا من بعض طول اليوم لحد العشا ، دخلت سارة مع امي تجهز العشا وبعدين سارة خرجت من المطبخ وامي اتاخرت .
وزي كل يوم بعد العشا نفس الرغبة الغريبة اللي بحس بها في البيت بس !! شكيت في حاجة وقولت لازم اتأكد منها بكره .
سارة دخلت تنام بدري وبعدها بشوية امي قالتلي : ادخل نام يا بني وقبل ما تنام شوف مراتك مالها ، اقعد واتكلم معها وخدها بالراحة يمكن تتكلم وتطلع اللي في قلبها .
دخلت بعد نص ساعة ولقيت سارة نابمة ولأول مرة اشوفها بقميص نوم وشبه عريانه !!!!
كان عندي مجموعة احاسيس متلخبطة ما بين حب ورغبة ووفاء لأخويا وخوف وقلق !!!
شغلت التليفزيون قولت يمكن تصحي علي صوته وتعدل نفسها !!
وقعدت علي المرتبة في الارض وانا صاحي وبفكر وبعدها حسيت بسارة صحيت .
قولتلها :كويس انك صحيتي يا سارة .
: خير في حاجة ؟
: عايز اعرف مالك ايه اللي مزعلك ؟
: مفيش .
: لأ في وباين اوي عليكي .
: قولتلك مفيش .
لقيت نفسي طلعت قعدت جنبها علي السرير وبقولها : مش هينفع اسيبك كده وحياة اغلي حاجة عندك اتكلمي .
: عاوز تعرف مالي ؟
: ايوه .
: اصل انت صعبان عليا اوي .
: انا !!!!! صعبان عليكي ليه ؟
: عارف يا امير رغم انك رجل وشهم وجدع بس جبلة .
: نعم !!! جبلة !!! قصدك ايه ؟
: قصدي انك بارد ومعندكش احساس .
: انتي ليه بتقولي كده ؟
: أسال نفسك .
: لأ انا بسألك انتي .
: جبلة وبارد ومعندكش احساس كمان . عارف ليه ؟
: ليه ؟
: علشان .......