قصة زوجه محرمه
البارت الثالث3
الجزء الثاني
بقلم حنان حسن
ودفعت فلوس العملية وجهزنا نفسنا وفي يوم سفرنا للقاهرة علشان العملية لبسنا كلنا وجهزنا شنط السفر لكن اتفاجئت ان نور بيقول انه مش هيسافر معانا !!!!!!!
سألته : انت لسه مش لبست علشان نسافر ليه يا نور ؟!!
نور : خليني انا هنا يا بابا مش عاوز اسافر .
: هو انت مش خايف علي ماما وعاوز تطمن عليها ؟؟
: انا تعبان يا بابا ومش عاوز اسافر ، ابقوا طمنوني بالتليفون .
اتصدمت من جمود مشاعر نور وتركته في البيت وقولت لأختي تبقي تخلي بالها منه الكام يوم اللي هنسافر فيهم .
سافرت انا وسارة ووحيد ودخلت سارة المستشفي وكنا كلنا خايفين .
وقبل دخول سارة العملية قالتلي : تعالي يا امير عاوزة اقولك حاجة .
: قولي يا حبيبتي خير .
: خلي بالك يا امير من العيال من وحيد ومن نور .
: يا حبيبتي انتي اللي هتخلي بللك منهم وتجوزيهم وتفرحي بيهم ، انتي خايفة ولا ايه !! دي العملية بسيطة جدا وهتقومي بالسلامة ان شاء الله .
: انت بتطمني يا امير !! العملية مش بسيطة وانا عارفة دي اخر مرة اشوفك فيها يا حبيبي .
: بعيد الشر عليكي يا حبيبتي ، متقوليش كده ابوس ايدك .
ومسكت ايدها بوستها ودموعي نزلت من عينيا غصب عني وقولتلها : متخافيش يا سارة هتخرجي من العملية وتعيشي معايا لأخر يوم في عمري .
: انت فاكرني خايفة من الموت !! ابدا ، انا بس صعبان عليا فراقكم .
: ابوس ايدك يا سارة بلاش الكلام ده ، انا مقدرش اعيش من غيرك .
: كنت عاوزة اطلب منك طلب تاني يا امير ، لما اموت بلاش تقعد من غير جواز ، عاوزاك تتجوز علطول .
: انتي بتقولي ايه !!! ربنا يقومك بالسلامة يا حبيبتي انا مقدرش اعيش من غيرك .
: بلاش تزعلني منك يا امير علشان اكون مرتاحة لازم اعرف ان انت ونور ووحيد مرتاحين وعلشان ترتاحوا لازم يكون معاكم ست تقضي طلباتكم ، بس ارجوك يا امير تخلي بالك من نور وتخلي مرات ابوه تعامله كويس .
: يا حبيبتي انتي اللي هتربيه وتجوزيه هو واخوه بلاش الكلام ده .
: وتخلي وحيد مش يأجل خطوبته وجوازه علشاني ، علشان اكون مرتاحة .
: لو يومك كان قبل يومي عمري ما هتجوز غيرك .
: انت مصمم تتعبني وتضايقني !! لازم توعدني دلوقتي انك تنفذ وصيتي .
: حاضر يا حبيبتي بس متتعبيش نفسك واطمني .
سارة دخلت غرفة العمليات وقعدت انا ووحيد وكان معانا اتنين من اخواتي البنات منتظرين نتيجة العملية بكل خوف وقلق .
وبعد اكتر من سبع ساعات انتظار وخوف وقلق خرج الدكاترة وقالولنا البقاء لله .
كان موت سارة صدمة كبيرة لنا كلنا خصوصا انا ووحيد .
ومر قدامي شريط حياتها من اول لما اتجوزت نور اخويا الله يرحمه حتي لما مات وقد ايه حزنت عليه وبعدها امي الله يرحمها لما غصبت عليا اتجوزها و ازاي انا كنت رافض وبعد ما اتجوزتها ازاي قدرت تخليني احبها بسرعة .
سارة كانت انسانة رائعة بمعني الكلمة ، عاشت معايا حوالي ٢٥ سنة كانت اسعد ايام حياتي وعمرها في يوم ما زعلتني ولا نيمتني غضبان عليها ، كنت احيانا وانا نايم احس بها تمسك ايدي وتبوسها ، عمري ما هقدر اعوضها ابدا حتي لو نفذت وصيتها واتجوزت مش ممكن الاقي انسانة زيها ابدا .
ولما رجعنا علشان ندفنها كان اغرب حاجة ان اكتر واحد كان متماسك فينا كان نور رغم صغر عمره وفقدانه لأمه في العمر ده !!!
حتي في العزاء نور مش وقف معنا الا وقت قصير جدا !!
بعد العزاء بيومين ظهرت نتيجة الاعدادية ونور تفوق وكان الاول علي المحافظة ومن العشرة الاوائل علي الجمهورية .
فرحت جدا بتفوق نور واخدت شهادته وروحت لقبر والدته علشان اعرفها واطمنها علي نتيجته .
لكن الغريب ان نور لم تظهر عليه اي مظهر من مظاهر الفرح !!!
ظنيت ان نور متأثر بموت امه او يمكن هو انسان متبلد الاحاسيس والمشاعر بدرجة عمري ما شوفتها !!!
بعد شهور دخل نور المدرسة الثانوية ، وقولت لوحيد : امك الله يرحمها طلبت مني يوم وفاتها اننا مش نأجل خطوبتك من سلمي بنت عمتك .
وحيد : مش دلوقتي يا بابا نصبر شوية حتي لما تعدي سنة .
: لا يا حبيبي لازم ننفذ وصية والدتك علشان تكون مرتاحة ، خطوبتك وجوازك هيفرحوها ويريحوها .
: طيب ما حضرتك كمان لازم تتجوز علشان تنفذ وصيتها .
: وانت عرفت منين انها وصتني اتجوز ؟؟!!
: هي الله يرحمها قالتلي كده وقالتلي انك لو مش نفذت وصيتها هتزعل وطلبت مني اني احاول اقنعك بأي طريقة .
: طيب ماشي انا هنفذ وصيتها وهتجوز لكن بعد ما اجوزك انت الاول .
: طيب حتي نأجل كام شهر .
: لأ مفيش تأجيل جهز نفسك علشان يوم الجمعة هاخدك ونروح لعمتك اخطبلك سلمي .
يوم الجمعة اخدت وحيد وروحنا لأختي ام سلمي طلبنا ايدها لوحيد وقولنالها ان دي كانت وصية سارة قبل ما تموت .
وقرينا الفاتحة مع ابو سلمي واتفقنا ان الشبكة وكتب الكتاب والدخلة بعد سنوية سارة مباشرة .
بعد خطوبة وحيد بدأ يلح عليا اني اتجوز تنفيذ لوصية امه وقالي : انا نفذ وصية ماما و خطبت الدور عليك انت بقي يا بابا علشان تنفذ وصيتها وتتجوز .
: انا هتنفذ وصيتها فعلا واتجوز مش حبا في الجواز لكن علشان ترتاح في قبرها لكن بعد ما تتجوز انت وتدخل بيتك انت وعروستك .
: ماشي يابابا لكن علي الاقل دلوقتي دور علي العروسة ولا انت في حد في دماغك ؟
ضحكت وقولت لوحيد : لا يا حبيبي مفيش حد في بالك ، وعمر واحده ما تملي عيني بعد سارة الله يرحمها . بس تعالي قولي هنا صحيح انت مش هتزعل لما اتجوز بعد المرحومة ؟؟
: لا لا يا بابا بالعكس دا انا هفرح جدا .
: ازاي يا وحيد !! ده انا حتي عمك مش ابوك !!
: عمري ما حسيت انك عمي ولا عمري حسيت باليتم ولا قبل كده ولا حتي دلوقتي ، طول عمري حاسس انك ابويا وسندي وكتير كنت بنسي انك عمي وان ابويا مات وانا صغير .
: وانا طول عمري حاسس انك ابني قبل ما اخلف نور وبعد ما خلفته ، بمناسبة نور اخوك عاوزك تخلي بالك منه ، الواد ده مش مريحني .
: ليه يا بابا بتقول كده ؟؟ ده ماشاء الله متفوق ومتميز جدا في دراسته وانا متوقعله مستقبل مذهل .
: في دراسته كويس لكن كانسان اخوك غريب اوي .
: غريب ازاي ؟
: ولا بيفرح ولا بيحزن ولا بيخاف ولا بيقلق حاسس انه عديم الاحساس ، ولا بيتكلم مع حد ولا له اصحاب !!
: عندك حق يابابا هو غريب فعلا في الحاجات دي بس يمكن طبيعته كده .
وبعد فترة اخدت نور. وروحت اشتريت له شقة هدية جوازه . وحيد فرح اوي بالشقة وبعدها مباشرة لقيت اختي بتقولي : تعالي يا امير انا عاوزاك في حاجة مهمة .
قولتلها : في حاجة قولي ، قلقتيني !!
: لا مفيش حاجة بس عاوزاك دلوقتي ضروري .
روحتلها بسرعة ولما دخلت كانت فيه واحدة غريبة قاعدة !! واول ما دخلت عرفتني عليها وعرفتها عليا وقالتلها اني اخوها .
وبعد دقايق قامت الضيفة ومشيت ، سألت اختي : في ايه ؟؟ ايه اللي حصل جايباني علي ملا وشي ؟؟
: ايه رأيك في اللي كانت قاعدة دي ؟؟
: وانا اعرفها منين علشان اقول رأيي فيها !!
:دي يا امير صاحبتي .
: صاحبتك ازاي !! دي صغيرة عنك كتير ، وبعدين صاحبتك انتي وبتسأليني انا عن رأيي فيها !!! هاتي من الاخر وقوليلي فيه ايه ؟؟
: انا بسألك عن رأيك فيها عروسة ليك ؟؟
: عروسة !! يعني جايباني علي ملا وشي علشان عروسة ؟؟!! عارفة لولا انك اختي الكبيرة كان هيبقي ليا معاكي كلام تاني .
: قولي بقي يا امير رأيك فيها ايه ؟
: انا مش اخدت بالي منها !! لو كنتي عرفتيني كونت اخدت بالي منها كويس . وبعدين انتي عارفاني مش بحب ابحلق في الحريم .
: طيب اقعد هتصل بيها تيجي تاني .
: لا طبعا مينفعش انتي كده هتحرجيها .
: طيب انا هقولك علي ظروفها ولو مناسبالك هخليك تشوفها تاني .
: انا عايز اعرف مين اللي قالك اني هتجوز دلوقتي !!!
: لازم تتجوز يا امير علشان انت محتاج تشوف طلباتك . اومال هتعيش انت ونور ابنك ازاي ؟!!
: مش بفكر في الجواز ولو فكرت في الجواز مش هتجوز دلوقتي .
: انت مش هتنفذ وصية المرحومة ولا ايه ؟؟
: انتي كمان عرفتي الوصية !! كده تبقي عرفتي من وحيد .
: ايوه عرفت من وحيد ، المهم دلوقتي لازم تتجوز قولت ايه ؟؟
: انا هتجوز فعلا لكن بعد جواز وحيد وسلمي .
: كلها شهرين والعيال يتجوزوا، طيب علي الاقل يا اخويا تختار العروسة دلوقتي وتبقي تتجوز بعدهم .
: حاضر هشوف ان شاء الله .
: العروسة اللي كانت هنا دي اسمها نجلاء زي القمر وفرسه انا مش عارفة مش اخدت بالك منها ازاي !!
: لو كنتي عرفتيني كنت اخدت بالي منها .
: نجلاء عندها ٣٢ سنة وكانت متجوزة وعندها بنتين زي القمر زيها كده وفي العيد اللي فات ابوهم اخد البنتين يشتريلهم لبس العيد من القاهرة عملوا حادثة في الطريق وماتوا الثلاثة ، ومن وقتها والعرسان بيجولها كل يوم عريس .
: يعني ياختي عاوزاني اتجوز المرتين ارامل !!!
: زي ما تحب يا امير الجواز في الاول وفي الاخر نصيب .
: ولما هي كل يوم بيتقدملها عريس متجوزتش ليه لدلوقتي ؟
: الحادثة دي من خمس شهور بس وهي كانت رافضة الجواز حزن علي جوزها وعيالها بس اخواتها قالولها لازم تتجوز علشان انها حلوة اوي وفيها الطمع . والاسبوع اللي فات اتقدملها ٣ عرسان وكانت جاية تاخد رأيي قولت لازم اخدها لك .
: وهي كانت عارفة ؟
: ايوه ، استني انا هتصل عليها تيجي تشوفها .
وفعلا اتصلت عليها ورجعت تاني ، اول لما دخلت وبصيت في وشها شوفت قدامي جمال عمري ما شوفته قبل كده ، كل حاجة فيها كانت حلوة اوي لدرجة اني كنت مش مصدق انها مصرية و تخيلت انها اوروبية !! لكن اللي مش عجبني فيها طريقة لبسها ، كانت هدومها ضيقة اوي وملزقة عليها .
كلمت اختي في ملاحظاتي عليها وهي اتكلمت بعد كده مع نجلاء ، وقعدت مع اخواتها واتفقنا علي الجواز بعد جواز وحيد و سلمي .
وحيد لما عرف رحب جدا بالموضوع لكن نور اللي كان موقفه غريب جدا .