قصة زوجه محرمه
البارت السادس6
الجزء الثاني
بقلم حنان حسن
: ما يمكن حست بالغيرة لما انا جيت هنا ؟؟
: لا لا خالص هي الله يرحمها مش كده .
: او يمكن رفضاني انا بالتحديد ؟
: لا لا معتقدش . وانا هريحك بعد كام يوم كده هسأل شيخ في الموضوع ده .
: ياريت علشان اقدر اعيش هنا مرتاحة ، طيب يلا ننام دلوقتي .
: انام !!! معقول هيجيلي نوم والقمر ده جنبي ؟!!
: الفجر قرب يطلع !!
: انشالله العصر يطلع حتي ، تعالي بقي هقولك حاجة .
وفضلنا سهرانين مبسوطين لحد ما فطرنا الصبح ونمنا .
وقعدنا يومين مبسوطين وفي قمة السعادة ومش حصلت تاني اي حاجة غريبة .
وبدأ يزونا قرايبنا يباركولنا .
و لما جات اختي تباركلي مع اولادها اتفاجئت ان نور ابني مش معها !!!
سألتها : نور مجاش معاكم ليه ؟
قالتلي : معرفش انا قولتله احنا رايحين نبارك لأبوك يلا علشان تروح معنا قالي انه مش هييجي .
: يمكن لسه زعلان !!
: الصراحة يا امير ابنك نور ده غريب اوي .
: ليه ؟
: معرفش قاعد لوحده علطول وبيفضل قافل علي نفسه ومش بيتكلم مع حد !! حاولت اقعد معاه والعيال يتكلموا معاه لكنه مش بيرضي !! ده غير انه مش بينام الا وقت قصير اوي ساعتين تلاته ويصحي !!
: انا مش عارف ماله هو فعلا غريب !! بس احنا اتعودنا علي كده .
: هو كده من زمان ؟
: ايوه طول عمره طبعه كده حتي اخدته لدكتور وكشفت عليه طمني وقالي انه طبيعي بس هو طبعه كده .
وكملت اجازة الجواز وفي نزولي للشغل وانا بفطر نجلاء قالتلي : ما تاخد كمان اسبوع اجازة ؟
: ليه انا في اجازة من اسبوعبن ؟
: خايفة تسيبني لوحدي .
: ما انا قولتلك متخافيش ، مفيش حاجة تستاهل الخوف وزي ما شوفتي محصلش حاجة تاني من ليلتها .ولا انتي خوافة ولا ايه ؟
: الصراحة انا مش خايفة بس عاوزاك تفضل جنبي .
ضحكت وقولتلها : ولما افضل جنبك مين اللي هيشوف الشغل وهنعيش منين ؟
: معرفش بس عاوزة افضل معاك علطول .
ضحكت وقولتلها : خلاص غيري هدومك وتعالي معايا الشغل .
: بجد ؟؟ انا هقوم البس واجي .
: انا بهزر ، مينفعش طبعا .
: انت متعرفش انا حبيتك ازاي ، غيرت فيا حاجات كتير بعد موت جوزي وبناتي كنت حزينة و حاسة اني ضايعة ولما انت دخلت حياتي مليت عليا دنيتي فرح وسعادة .
: وانتي كمان متتخيليش انا كنت بعد موت سارة كنت متخيل اني عمري ما احب تاني لكن بعد ما عرفتك وحبيتك مليتي عليا دنيتي .
: طيب يلا بقي يا حبيبي علشان تروح شغلك .
: طيب ما احنا ممكن نأجل الشغل ساعة او ساعتين .
: انت مش بتزهق ؟؟
: في حد عاقل يزهق من العسل ؟
: طيب ما انت زهقت من العسل وكنت رايح الشغل !!!
: طيب ينفع اخد ساندوتش عسل يصبرني علي ما ارجع اخر النهار ؟!!
نزلت الشغل واطمنت علي اشغالي وتابعتها وانا راجع اخر اليوم عديت علي اختي علشان اطمن علي نور عندها .
لما دخلت عندها كان نور قاعد في اوضة مقفولة ، عمته نادته ولما قعدت معاه سألته : انت زعلان اني اتجوزت يا نور ؟
: لا ابدا .
: وليه مش جيت تبارك مع عمتك وولادها واخوك وحيد ؟
: انت عارف يا بابا مش بحب الزحمة وبحب اقعد لوحدي .
: انت دلوقتي في تانية ثانوي يعني مش صغير والمفروض تتعلم انك تحضر المناسبات سواء افراح او واجبات عزاء .
: حاضر .
: طيب جهز نفسك بقي علشان ترجع البيت .
: لا يا بابا انا عاوز ابقي هنا مع عمتي .
: يا حبيبي عمتك ربنا يخليها تشكر اوي انها قعدتك عندها اسبوعين المفروض ترجع بيتك علشان مش تضايقهم اكتر من كده .
: معلش يا بابا انا عاوز ابقي هنا شوية وبعدين هرجع البيت .
رد جوز اختي واختي في نفس الوقت : سيب نور برحته معانا ومتشغلش نفسك به ، دا احنا فرحانين اوي بوجوده معنا .
: طيب انا هسيبك برحتك يا نور بس يا ريت متطولش وترجع البيت .
عدا كام يوم ونور عند عمته وانا ونجلاء عايشين لوحدنا ومفيش اي مشاكل وفي يوم بعد رجوعي من الشغل لقيت نجلاء قاعدة سرحانة !!
ولما سألتها : مالك يا نوجا ؟
قالتلي : انت كلمت شيخ في الموضوع ولا لسه ؟
: الصراحة نسيت ، ومادام محصلش حاجة تاني ملوش لزوم .
: النهاردة حصلت حاجة غريبة .
: ايه اللي حصل ؟
: بعد ما نزلت وروحت شغلك شغلت التليفزيون علي قناة القران الكريم زي كل يوم ، ودخلت المطبخ علشان ابدأ اجهز الاكل وفجأة صوت التليفزيون قلب لوحدة علي قناة الاغاني و صوته علي اوي !!!!!
: يمكن يكون الريموت كان معلق مثلا وقلب لوحده ؟
: المفاجأة ان الريموت كان معايا في المطبخ .
: طيب وعملتي ايه ؟
: اتصلت عليك علشان اقولك كان تليفونك مقفول اضطريت انزل بسرعة من الخوف وروحت عند ام سلمي ولسه راجعة دلوقتي علي ميعاد رجوعك من الشغل .
: وقولتلها اللي حصل ؟؟
: لأ طبعا ، اسرار بيتنا متخرجش بره بدون علمك .
: برافو عليكي كنت هزعل اوي لو قولتلها من ورايا .
: متخافش يا امير ، المهم دلوقتي قولي هنعمل ايه ؟
: انا مش هنكر ان من حقك تقلقي لكن مفيش داعي للخوف .
: انت قلبك جامد اوي !!!
: فعلا مفيش داعي للخوف ، وانا بكره هكلم شيخ وأسأله وهشوف هنعمل ايه .
: وهنام هنا ازاي ؟
ضحكت : انتي جبانة اوي علفكرة ، متخافيش انا معاكي والصبح لما اروح الشغل هاخد معايا تروحي عند اختي ام سلمي لحد ما ارجع .
: ماشي يا حبيبي .
: انتي لما روحتي النهاردة قابلتي نور ابني ؟؟
: ايوه .
: وقابلك كويس ولا عمل حاجة ضايقتك ؟؟
: هو كان في اوضته وام سلمي نادت عليه يسلم عليا بس الغريبة كانت نظراته ليا غريبة اوي !!! وسلم عليا ودخل اوضته علطول .
: هو نور كده منطوي علي نفسه وبيحب يقعد لوحده .
: بص نظراته ليا غريبة اوي !!
: غريبة ازاي يعني ؟
: مش عارفة مش مفهومة .
: متغليش بالك به هو ممكن يكون زعلان شوية علشان امه بس بعد كده هيبقي كويس .
تاني يوم الصبح كلمت واحد من اللي شغالين معايا محترم و امين و قولتله عاوز حد بيفهم في مواضيع الجن والارواح والكلام ده قالي علي شيخ و قالي انه ثقة وقالي عنوانه اسمه الشيخ ابو السعد .
بعد الشغل روحت للشيخ ابو السعد و حكيت له كل اللي حصل ، فطلب مني انه يزور البيت علشان يشوفه بنفسه ، نزلنا مع بعض واحنا في الطريق للبيت عديت علي نجلاء عند اختي واخدتها وروحنا البيت .
دخلنا البيت وقعدنا وبدأ الشيخ يسألني : اول مرة لاحظت حاجات غريبة في البيت هنا كان امتي ؟
: انا مولود في البيت ده وعمر ما حسينا بحاجة غريبة في البيت واول مرة كانت تحصل حاجة هنا كان ليلة جوازي انا و مراتي دي .
: انت اكيد كنت متجوز قبل المدام ؟
: ايوه كنت متجوز اكتر من عشرين سنة وتوفيت ولسه متجوز المدام من ايام قليلة .
: المرحومة كانت اشتكت من اي حاجة زي كده ؟
: لا ابدا عمرها .
: انت متأكد من الصوت اللي سمعته يوم فرحك ؟؟
: ايوه يا شيخ احنا الاتنين سمعناه .
: حصل ايه بعد اليوم ده ؟
: محصلش اي حاجة ابدا لحد البارح موضوع التليفزيون اللي اتغير لوحده وصوته علي لوحده ومراتي كانت في المطبخ ومعها الريموت .
الشيخ سأل مراتي : انتي عمرك حصل معاكي حاجة غريبة او كانت بتجيلك كوابيس وانتي نايمة ؟
: انا عمري ما حصل معايا حاجة غريبة قبل كده دي اول مرة ، لكن موضوع الكوابيس حصل معايا كتير .
: كنتي بتشوفي رجل شكله مخيف بيجري وراكي او بيعمل معاكي حاجة ؟
: ايوه فعلا .
التفت الشيخ ابو السعد وقالي : كده وضحت الصورة يا استاذ امير .
: خير يا شيخ طمني .
: مش خير ابدا لكن كل شئ وله علاج .
: انت كده قلقتني يا شيخ ، فيه ايه ؟
: المدام ملبوسة وعليها جن عاشق .
( نجلاء ظهر عليها الخوف والرعب )
: بتقول ايه ؟؟ وبعدين ؟؟
: متخافوش بكره هاجي واخلصكم من الموضوع ده نهائي .
: ازاي يا شيخ ؟
: هاخد منك دلوقتي ٨٠٠ جنية مش ليا ده هشتري بيهم نوع معين من البخور و هاجي بكره انهي الموضوع ده نهائي .
: طيب ما تخلصنا من الموضوع ده دلوقتي يا شيخ .
: مينفعش النهاردة لازم بكره علشان اكون اشتريت البخور .
مشي الشيخ واخد الفلوس وقعدت مع نجلاء بحاول اطمنها بعد ما قلبها اتملا خوف من كلام الشيخ .
تاني يوم اضطريت اني مش اسيب البيت وقعدت معها لحد ما اتصل عليا الشيخ ابو السعد بعد العشا وقالي انه جاي في الطريق .
وصل وقعدنا ولاحظ الشيخ ابو السعد الخوف والرعب علي نجلاء فحاول يطمنها وقالها : متخافيش يا بنتي اطمني الليلادي هتنتهي من الموضوع ده وهتعيشي حياتك بشكل طبيعي جدا .
بعد كده قالي : الاوضة اللي سمعتوا فيها صوت الخبط فين ؟
: اوضة النوم .
: طيب دخلني اوضة النوم وانتظروني هنا شوية ولما انادي عليكم المدام تدخل وحضرتك تنتظرنا هنا لغاية لما اخرج الجن من عليها .
تابع التفاعل وحش اوي ياجماعه