قصة زوجه محرمه
البارت الخامس5
الجزء الثاني
بقلم حنان حسن
دخلنا البيت و هي دخلت اوضة النوم تغير لبسها وقفلت الباب وكأنها عروسة مكسوفة لسه اول مرة تتجوز !!
اتأخرت نجلاء وانا قعدت ولعت سيجارة بره ومستنيها تفتح الباب لكن اتأخرت اوي ، خبطت علي باب اوضة النوم مردتش عليا فتحت الباب ولقيتها قدامي قاعدة علي السرير سرحانه !!!
استغربت جدا من شكلها وقولتلها : مالك مش غيرتي هدومك ليه ؟
قالتلي : لا ابدا مفيش حاجة .
: لأ اكيد في حاجة !! انتي كمان قاعدة سرحانة لدرجة انك مش سمعتيني لما ناديت عليكي كتير !!
: بصراحة افتكرت بناتي .
: لأ انتي كده افتكرتي جوزك بقي مش بناتك .
: افتكرتهم كلهم .
: الله يرحمهم ، انا مقدر شعورك طبعا بس عاوزك انتي كمان تقدري شعوري .
: عندك حق انا اسفة .
: لا مفيش اسف ولا حاجة انا مقدر شعورك كويس .
: ربنا يخليك ليا .
: يا ريت لما تغيري هدومك تناديني انا قاعد بره شوية علي ما تخلصي ، ولاتحبي اساعدك ( وضحكت ) .
ضحكت هي كمان وقالتلي : لا انا مش محتاجة مساعدة .
انتظرتها حوالي نص ساعة وبعدها لقيتها بتفتح الباب وخرجت لابسه احلي طقم نوم شوفته في حياتي وبتقولي : ايه رأيك حلو كده ؟؟
قومت جري ومسكتها من ايدها وقولتلها : رأيي في ايه !! تعالي اقولك رأيي جوه بسرعة .
دخلنا اوضتتا وقفلت الباب ولسه بقرب منها قالتلي : هي الاوضة دي اوضة نومك انت وسارة ؟
قولتلها : علفكرة انتي بتفتكري حاجات غريبة في اوقات اغرب ، لأ يا ستي دي كانت اوضة وحيد قبل ما يتجوز .
: معلشي اسفة بس هو السؤال جه في بالي ، ويا تري ليه غيرت مكان اوضة النوم يا امير ؟
: علشان بحترم ذكراها طبعا .
: انت انسان محترم بجد .
: طيب ممكن نسيبنا من الاحترام بقي شوية علشان عاوزك في موضوع قليل الادب اوي .
نجلاء ضحكت اوي وانكسفت ووطت وشها في الارض .
شيلتها ونيمتها علي السرير ولسه بقرب منها لقيتها بتقولي : هقولك حاجة من غير زعل .
قولتلها : قولي .
: ينفع نأجل لبكره .
: ليه بقي ان شاء الله ؟
: اصل بصراحة نفسيتي النهاردة تعبانة .
: نفسيتك ؟؟!!!! سلامة نفسيتك يا نوجا ، طيب اقعدي انتي بقي مع نفسيتك وانا هطلع انام بره مع نفسيتي .
: انت زعلت ؟
: لا ابدا ، ده انا فرحت اوي !!
قومت وقولت لنفسي بصوت عالي (يعني انت يا واد كل ليلة دخلة تقضيها نايم لوحدك كده ؟) .
قالتلي : انت بتقول حاجة يا امير ؟
: لا يا حبيبتي ، ده انا كنت بكلم (نفسيتي) شوية ، وابتسمت وخرجت وقفلت باب الاوضة ورايا وانا كلي غضب .
بعد شوية نجلاء خرجت وقالتلي : انا اسفة بجد يا امير غصب عني .
: ولا يهمك انا عارف انك افتكرتي المرحوم ، بقولك ما تيجي هنا جنبي نفتكر مع بعض ذكرياتنا مع المرحوم والمرحومة ؟
: انت بتتريق عليا ؟صح؟
: طيب اعملك ايه يا نوجا دا انتي هتجننيني !!
:طيب قولي عاوز ايه وانا مش هزعلك .
: بجد ؟
: اه بجد .
: تعالي نقرالهم الفاتحة و ندخل جوه .
نجلاء ضحكت اوي وقالتلي : نفسي اعرف انت بتجيب الكلام ده منين ؟
: كلام ايه ؟
: كلامك ، اسلوبك في الكلام بيموتني من الضحك .
: طيب يلا يا نوجا نقرا الفاتحة وتعالي علشان اضحكك شوية .
قرينا الفاتحة للاموات ودخلنا اوضتنا وقفلت الباب وانا بقول في سري (ربنا يستر بقي ومتفتكرش ابوها ولا امها وتنكد علينا ) .
وقعدت جنبها وقربت منها وبدأت اقولها كلام رومانسي وهي كمان بدأت تتجاوب معايا والدنيا مشيت تمام وبدأنا زي اي عروسين نعيش ليلة زفافنا .
وعدت ساعة والتانية وفجأة ........
سمعت صوت خبط علي باب الاوضة !!!!!!!!!!!
اتفزعت وقومت مرعوب وانا مش مصدق اللي سمعته !!!!
انا متأكد اني سمعت صوت خبط علي الباب !! وكمان انا متأكد ان مفيش حد في البيت كله الا انا ونجلاء ؟؟!!!
بصيت لنجلاء قولت يمكن بيتهيألي ، لقيتها هي كمان مستغربة و بتسألني انت سمعت حد بيخبط علي الباب ؟؟
عرفت أنها مش تهيؤات وقولتلها : ايوه .
: هو في حد معنا هنا في البيت ؟؟؟
: لأ ، مفيش الا انا وانتي بس .
: اومال مين اللي خبط علي الباب ؟؟؟
وبدأت تظهر عليها علامات الخوف والرعب .
حاولت اطمنها : متخافيش ، اكيد حاجة مش تستحق الخوف لكن الخضة اللي اتخضناها هي اللي وحشة .
: حاجة مش تستحق الخوف ازاي ؟؟ ده اول يوم ليا هنا وتحصل حاجة غريبة بالشكل ده !!! اكيد في حاجة في البيت ده مش طبيعية .
: علفكرة احنا طول عمرنا عايشين هنا وعمرنا ما حصل هنا اي حاجة مش طبيعية من اللي في دماغك .
: تقصد ايه يعني ؟
: مقصدش حاجة انا هخرج اشوف في ايه ؟
: وهتسيبني هنا لوحدي ؟
: براحتك لو عايزة تيجي معايا تعالي .
: انا خايفة اوي .
: خايفة من ايه يا نوجا !! هو انتي عيلة صغيرة ؟!! تعالي معايا نشوف فيه ايه بره ومتخافيش ؟
خرجت انا ونجلاء وبدأنا نشوف وندور في كل مكان في البيت حتي فوق سطح البيت مفيش اي حد !!!!!!!!
زادت حيرتي وفي نفس الوقت بدأت اخاف !!
نجلاء كمان قالتلي : انا خايفة اوي .
: متخافيش صدقيني مفيش حاجة تستاهل الخوف اكيد سبب الخبطة دي حاجة تافهة ولما نعرفه هنقعد نضحك .
: انت شايف كده ؟
: ايوه .
: اعذرني اصل ده لسه اول يوم ليا ويحصل كده !! من حقي اخاف .
: متخافيش يلا تعالي نامي في حضني جوه و انتي مش هتحسي بأي خوف .
دخلنا ونامت نجلاء في حضني وبدأت تتكلم وفي نص كلامها قالتلي : انا حاسة ان روح مراتك زعلانة من دخولي البيت ده .
ضحكت وقولتلها : بالعكس ده هي اللي وصتني اتجوز بعدها .
: ما يمكن حست بالغيرة لما انا جيت هنا ؟؟
: لا لا خالص هي الله يرحمها مش كده .
: او يمكن رفضاني انا بالتحديد ؟
: لا لا معتقدش . وانا هريحك بعد كام يوم كده هسأل شيخ في الموضوع ده