قصة زوجه محرمه
البارت الثاني2
بقلم حنان حسن
: يا خال اصل انت متعرفش نور كان بيحبها ازاي ده كان بيعشقها ، ازاي عاوزني اخد مكانه وانيمه في قبره بيتعذب ؟!!!
: انت عارف يا امير انت لو مش سمعت الكلام واتجوزتها هتجوزها انا .
: بتقول ايه يا خال ؟!!
: بهزر معاك يا ابن اختي ، شوفتك اعصابك تعبانه قولت اضحكك شوية ، فكها بقي كفاية حزن يا امير .
: ومين له نفس يضحك يا خال !!!
: اضحك يا امير وعيش واتجوز هي دي سنة الحياة .
: انا خلاص حياتي بقيت مش لها لازمة ولا طعم بعد نور اخويا .
: نور الله يرحمه مات وكان طيب هو في الجنة دلوقتي وفرحان ولو يقدر يكلمك كان قالك اتجوز ارملة اخوك وكمل معها مشوار حياتكم .
: تاني يا خال ؟!!
: طيب يا امير احنا هنسيبك تفكر شوية ، قوم يلا روح راضي امك بكلمتين وادخل نام علشان تروح شغلك الصبح .
قومت ومشيت مع خالي لما روحت ودخلت راضيت امي ودخلت نمت .
سارة كانت عايشة جنبنا في القرية ونور حبها من وهما صغيرين وهي كمان حبته واول لما اخدت الدبلوم جري نور وراح يخطبها.
وابو سارة رفض في البداية علشان نور كان مش كمل تعليمه لكن بعد اصرار نور وسارة اضطر ابوها انه يوافق لكن اشترط عليه شروط صعبة في الشبكة و المهر .
اضطر نور انه يسافر سنتين علشان يوفي طلبات ابو سارة ، وتعب واتغرب علشان يتجوزها و بمجرد لما رجع اتجوزها علطول .
نور وقتها كان سعيد جدا لدرجة ان الناس كلها كانت بتحسده علي سعادته .
مش ممكن انيم نور اخويا في قبره زعلان ابدا لو مراته اتجوزت غيره .
كمان سارة من وقت الحادث لما عرفت بخبر وفاة نور وهي حزينة جدا لدرجة انها فضلت ايام كتير من غير اكل لدرجة انها اتحجزت في المستشفي .
و لمدة يومين امي كانت مش بتكلمي زعل علي كلامي معها .
روحت لأمي وقعدت جنبها ومسكت ايدها بوستها وقولتلها : ارجوكي يا ست الحبايب مش عاوزك تزعلي مني .
: لو سمعت كلامي قلبي وربي هيرضوا عليك انما لو عصيت كلامي ونشفت دماغك قلبي وربي يكونوا غضبانين عليك .
: يامه ويهون عليكي نور ابنك يكون متعذب في قبره ؟!!
: اخوك روحه عند اللي خلقها ولو عرف انك صونت عرضه واتجوزت ارملته وراعيت ابنه هيكون سعيد ومرتاح .
: يامه ده كان بيعشقها هيكون فرحان ازاي وهي في حضن رجل تاني ؟!!
: علشان هي لازم تتجوز رجل تاني بعد اخوك ، يا ابني دي سنة الحياة .
: تعيش وتربي ابنها ومصاريفها ومصاريف ابنها انا متكفل بيهم واي حد يتعرض لها انا كفيل به .
: يا بني انت مش عاوز تفهم ليه !! دي شابه ومش كل اللي هتحتاجه الفلوس والحماية بس لازم يكون معها زوج رجل تعيش معاه زي باقي خلق الله .
: اذا كانت عاوزة تتجوز تروح تتجوز وتجيب ابننا احنا نربيه ، هربيه وارعاه لحد ما يببقي دكتور ولا مهندس قد الدنيا .
: يعني عاوز ابن اخوك يتربي يتيم اب وام وامه لسه عايشة !!!
: مش انا اللي اخترت كده ولا بأيدي ، انما لو امه هتختار تتجوز يبقي مفيش الا الحل ده وتروح تتجوز برحتها .
: لا يابني كده حرام عليك لو هتحرم ام من ابنها ووحيد كمان حرام لما تحرمه من امه وهو يتيم الاب .
: يامه احنا هنقدر البلاء قبل وقوعه ، ما يمكن هي متفكرش في الجواز من اساسه وتبقي ريحت نفسها وريحتنا .
: مالك يابني راسك ناشفة كده ليه وعنيد ده ابوك واخوك الله يرحمهم عمرهم ما كانوا كده !!!
: وانا كمان يا امي عمري ما نشفت راسي ولا عاندت الا في الموضوع ده ، مش عاوز قلب اخويا يتوجع وهو في قبره ، مش كفاية يامه مقدرتش الحقه قبل ما يقع !!! ( ودموعي نزلت ومقدرتش احبسها )
: يا ابني متحملش نفسك فوق طاقتها ، لو كان بايدك تنقذه كنت لحقته ونقذته انما ده قدر ربنا .
ومرت ايام وفي يوم راجع من الشغل كانت امي قاعده مع سارة في ركن في الدار وصوتهم مش واضح ومش شافوني لما دخلت .
حسيت انهم بتكلموا في حاجة مهمة ، اتسحبت بدون ما يشعروا بيا ووقفت اسمعهم بيتكلموا في ايه !!
سمعت امي بتقولها : يا بنتي عايزاكي تقلعي الاسود ده وتلبسي هدومك الملونة .
سارة : انتي يا مه اللي بتقولي كده !! انا عمري ما هقلعه ابدا من بعد نور .
: يا بنتي الحزن في القلب مش في اللبس .
(سارة ودموعها علي خدودها) : يامه ده اللي مات ده الغالي اللي عمره ما هيتنسي ولا عمري حسيت معاه بلحظة حزن ابدا ولا في يوم زعلني ، عمري ما هفرح و لا ادوق طعم الفرح بعده .
: تسمعي كلامي يا بنتي ؟؟
: اتفضلي يا امي انتي عارفه طول عمري بسمع كلامك .
: اللي مات ده ابني ونور عيني ومفيش مخلوق علي الارض ابدا هيحزن عليه اكتر مني ، لكن انا عيشت وشوفت في الدنيا كتير الحزن عليه هيبقي في القلب لكن الحياة لازم تمشي وتعدي ، وعلشان الحياة تمشي لازم مش هنقف عند اللي حصل انما لازم نبص لبكره ونشوف حياتنا هنعمل فيها ايه لحد ما نقوم برسالتنا اللي جينا الدنيا علشانها .
: كلامك حلو يامه لكن قلبي اللي انكسر والحزن اللي سكن فيه مش بايدي .
: معلش يا سارة معلش يا بنتي دي سنة الحياة ، نور مات وانا بكره اموت وانتي هتموتي بعد عمر طويل و تعيشي وتتهني .
: اتهنا !!! اتهنا ازاي يامه واللي شوفت الهنا معاه كله تحت التراب .
: تتهني لما تتجوزي وتجيبي اخ واخت لابنك وحيد .
: يالهوي يامه !!! انا اتجوز بعد نور ؟!! اهو ده اللي مش ممكن يحصل ابدا .
: اومال عايزة تعيشي عذبه ويطمع فيكي اللي يسوا واللي ميسواش ؟!!
: انا هعيش لابني ومش ممكن ادخل عليا رجل غريب ابدا .
: وتفتكري هو ده اللي هيبسط نور ويريحه في قبره ؟!!
: اومال يامه هيرتاح في قبره لما ادخل عليا رجل غريب يتجوزني ويربي ابنه ؟!!!
: يا سارة يا بنتي اللي يريحه ان يحس انك عايشه مرتاحه مع رجل يصونك ومفيش اي حد يطمع فيكي .
: وادخل رجل غريب عليا وعلي ابنه ؟؟!!
: لما يكون مش غريب نور هيرتاح .
: مش غريب !!! مش غريب ازاي يامه ؟؟
: ايوه يا سارة لما يكون اخوه امير يبقي مش غريب و نور هيرتاح في قبره ويطمن عليكي انتي وابنه .
: امير !!! ازاي تقولي كده !! ازاي ؟ ده امير ده اخويا .
: لأ امير مش اخوكي ، امير كان زي اخوكي لما كنتي مرات اخوه انما دلوقتي اخوه مات و هيبقي هو رجلك وابواولادك .
: لأ يامه متزعليش مني انا مش ناوية اتجوز .
: يعني انتي رافضة امير ولا رافضة الجواز عموما .
: يامه امير شاب مفيش بنت عاقله ترفضه لكن زي ما قولتلك انا مش هتجوز تاني بعد نور وهعيش لابني وبس .
: ولما تعدي عليكي السنين وتحتاجي لسند وتحبي تتجوزي وتلاقي سنك كبر هتعملي ايه وقتها تتجوزي رجل له بيت وست وعيال ولا تتجوزي رجل كبير تبقي ممرضه له بدل زوجة ؟؟!!!
: عمري ما هتجوز يامه وربنا يديلك طول العمر وافكرك لما تيجي تجوزي وحيد .
: طيب علي العموم خدي وقتك يا بنتي وفكري برحتك وصدقيني انا بدلك علي الصح ، ولو مش عاوزة امير قولي ومتخافيش انا برضو زي امك بالظبط واهم حاجة عندي مصلحتك .
بعد ما سمعت كلامهم سارة علييت في نظري اوي وعرفت ان اخويا عرف يختار وانها صاينة اخويا حتي بعد موته .
لكن اللي ضايقني ان حسيت ان امي مصممة علي اللي في دماغها .
عدا شهر واتنين وامي بدأت تتكلم مع كبار العيلتين ، اتكلمت مع اعمامي واخوالي و كل ما كنت اقابل حد منهم كان يفتح معايا نفس الموضوع ويحاول يقنعني .
وكمان امي كلمت ام سارة وابوها واعمامها واخوالها واقتنعوا كلهم بكلامها ورأيها وبدأوا يتكلموا مع سارة ويحاولوا يقنعوها ، وبعد ما كانت سارة بتيجي مع ابنها وتقعد مع امي كل يوم وتشوف طلباتها امتنعت خالص وبقيت تجيب ابنها يقعد مع جدته ومعايا وترجع تاخده اخر اليوم .
وبعد فترة وانا راجع من الشغل لقيت كل اهلي واهل سارة عندنا في البيت !!