قصة جعلتني أم
البارت الثاني عشر12
بقلم شذى عبدالمكرم
اصبحت الصباح وشربنا الشاي
مصطفى: طلعي شطنتك بمشي بتم ليكم الاجراءات وانتو تمشو قبل زمن الاقلاع بنص ساعة
سديم: تمام دقيقة اطلعها ليك . مشيت الغرفة طلعتو ليهو ما كنت شايلة حاجات كتيرة لانو برجع بعد تلاتة اسابيع بس هو شالها وطلع وخالتو عملت لينا انا وناني فطور سريع وبدري عشان احتمال نطلع قبل زمن الفطور بعد اكلنا مصطفى اتصل لي وقال نجهز وهو حيجي علينا قومت لبست ناني واديت رغد تمسكها عشان انا البس بعد خلصنا
رغد: يعني خلاص حتفارقونا
سديم: كلها تلاتة اسابيع بس وحأرجع
رغد: كتيرة كنت ناوية اقضي اجازتي معاكي
سديم: ماف مشكله الاجازة الجاية بقضيها معاكي
رغد: نسيتي انو الاجازة الجاية عروس انا
سديم: حياا نسيت والله بس حأكون شبينة واعزك
رغد: وزيرة ما شبينة
سديم: طوالي . شوية ومصطفى وصل
مصطفى: جاهزين
سديم: ايي
مصطفى: خلينا نطلع عشان ما نتأخر
سديم: تمام خلاص امسك ناني اشيل شنطتي
مصطفى: جيبيها . شالها فوق وانا شيلت شنطة اليد حقي وودعت رغد لمن خلتني ابكي معاها كأني ما راجعة كدا ومشيت لخالتو ثريا
سديم: خالتو ثريا يلا مع السلامة
ثريا: خلاص يعني
سديم: اي والله
ثريا: ربنا يستركم وتوصلو بالسلامة
سديم: ان شاءلله يارب
ثريا: طمنونا لمن توصلو وسلمي لناس امك
سديم: ان شاءلله . ودعتها وطلعنا مع مصطفى على المطار
مصطفى: ما يكونو نسيتو حاجة
سديم: ما ظنيت نسيت حاجة
مصطفى: تمام . وصلنا المطار لقينا الناس داخلين لصالة المغادرة خلاص
مصطفى: تعالو . مشينا تم لينا باقي الاجراءات خلاص
سديم: نتدخل بعد دا
مصطفى: دقيقة خليكم هنا . مشا لواحد كدا ما عارفة منو بعد شوية جا معاهو
مصطفى: خلونا ندخل
سديم: حتدخل معانا
مصطفى: ايي شوية وبطلع
سديم: تمام بكون احسن . مشينا والراجل الجا مع مصطفى اتكلم مع بتاع البوابة ودخل معانا مصطفى مشينا قعدنا في المقاعد المخصوصة
مصطفى: حتمشو وتخلوني براي
سديم: اتخيل بس على الاقل تشتاق لينا
مصطفى: من هسي مشتاق ليكم . ابتسمت ليهو شوية وصحبو داك اشر ليهو
مصطفى: انا بعد حأطلع . وقفنا فوق واداني ناني
مصطفى: خلو بالك على انفسكم واتصلي لي اول ما توصلو
سديم: اوكي . طلع لي ربطة قروش من جيبو
مصطفى: امسكي دا
سديم: مصطفى لا
مصطفى: دي مصاريف ناني
سديم: هي مدام معاي بعرف بصرف عليها كيف
مصطفى: سديم ما تعاندي خليها معاكي خلاص احتمال تحتاجي لحاجة
سديم: مصطفى لا . جرا شنطتي ودخلها لي ورجعها لي
مصطفى: انا حأمشي بعد دا يلا في امان الله . وضماني انا وناني مع بعض اصلا اتوقعت يعمل كدا وخجلت من الناس بس اكيد بفتكرو بودع مرتو وبتو ومشى حيا حاشتاق لغلاظتو دي تبعتو بنظري لمن طلع ورجعت قعدت مع ناني
سديم: بابا مشى
ناني: بابا . قومت ضحكت لانو ما فاهمة حاجة
سديم: قولي ماما
ناني: ماما . ضميتها علي شويه ومشينا على الطيارة اتصلت على ابوي عشان يكون عندو علم وسافرنا ووصلنا المطار اتصلت على ابوي لقيتو في صالة الوصول منتظرنا طوالي اتصلت على مصطفى طمنتو انو وصلنا بالسلامة ومشينا مع ابوي البيت وصلنا استقبلتنا امي وقعدنا نتونس وطبعا ابوي وصلنا ورجع الشغل
امي: ما شاء الله بت مصطفى حلاتها
سديم: متأكدة انك حتحبيها لمن تتعود عليكم
امي: ابوها لشنو ما اتزوج عشان يجيب ليها ام ترعاها
سديم: اقترحو ليهو اخت المرحومة عشان تربي بت اختها بس رفض
امي: ليه ماف زول حيكون احن من خالتها عليها
سديم: انتي ما شوفتي خالتها كريهة وما عندها قلب عديل احسن ليها تقعد بدون ام ولا تربيها خالتها
امي: لشنو بتقولي كدا
سديم: دقيقة احكي ليكي . حكيت ليها الموقف العملتو وقت ناني اتوسخت
امي: والله حرام عليها
سديم: الحمدلله بس
امي: وانتي دايما بتمسكيها كدا
سديم: رادتني وانا ردتها وطبعا ما مزعجة نهائي بتكون مطمنة لمن اكون جنبها وبتكون ساكتة بس امشي بتبكي لمن ارجع
امي: وكدا بتوفقي مع الجامعة كيف
سديم: عادي جدا بختها في مشايتها وانا بقعد بقرأ اطول فترة قولت ليكي لمن اكون قاعدة ما بتبكي وحتى حاسة المرة دي معدلي حيكون كبير لانو ما ذي في الداخلية بطلع مع البنات كتير وبجي زولة نوم وكدا بس من لقيت ناني بقيت الجامعة للبيت بس والقراية
امي: الحمدلله . اتونسنا شويه كدا نسيم جات من المدرسة
سديم: الناس الممتحنة
نسيم: دا منو العسل دا يا ناس . جات لناني تشيلها فوق طوالي ناني مسكت في جلبابي
ناني: مااام . وكشرت ضحكنا انا وامي
نسيم: شينة دي
ناني: مااام . ورفعت كتفها حركة الشفع لمن يزعلو تاني ضحكنا
سديم: حي شينة انتي دي
نسيم: بتك حقارة لكن
سديم: هههههههه طالعة لي
نسيم: واضح والله حمدالله على السلامة
سديم: الله يقبل حمدك . وحضنتني وحمدت لي السلامة حلو شديد وطبعا اكتر وحدة اشتقت ليها
نسيم: فقدتك في الرياضيات
سديم: استغليني الفترة دي قبل ارجع
نسيم: مع بتك دي ما ظنيت
سديم: بتي هدية ورضية
نسيم: واضح اهو من ماام حقها دي هههههه بس نشوف . ومشت
دخلت الغرفة غيرت وطلعت قعدت معانا لمن ابوي رجع من الشغل وقعد معانا
ابوي: سديم الجامعة كيف
سديم: لمن تطلع النتيجة تعال اسألني وتشوف بعينك
ابوي: بتعجبني ثقتك دي
سديم: شيلتها منك . طبعا بقولو لي بت ابوها لاني بشبهو في الشكل وطريقة المشي والثقة اتكلم معاي شوية وقومنا للغدا بعد المغرب قاعدة في الغرفة مع ناني اتصل لي مصطفى
مصطفى: كيفك
سديم: كويسة الحمدلله وانت
مصطفى: انا تمام الحمدلله
سديم: الحمدلله
مصطفى: شردتي ببتي
سديم: هههههه تاني تشوفها في الصور بس
مصطفى: اسبوعين ما رجعتيها لي بجي بنفسي وبرجعها
سديم: وانا ما حترجعني معاها
مصطفى: لالا انتي خليكي مع ابوكي
سديم: ههههه يعني بقت كدا
مصطفى: ههههههه ايي . بقينا نتونس وانا بضحك على كلام مصطفى جات نسيم الغرفة ولقتني بضحك وانا بتكلم سألتني بصوت عالي
نسيم: دا هشام؟ . متذكرين هشام الاكس هزيت ليها رأسي بمعني لالا وما كنت عارفة انو مصطفى سمعها
مصطفى: هشام دا منو؟ . اتخلعت ما عرفت ارد ليهو
سديم: ااااا
مصطفى: سألتك هشام دا منو . طوالي فصلت الخط من غباوتي ووقعت خبط في نسيم وهي قلبها الميت بتضحك بس
نسيم: والله كنت قايلة بتتكلمي مع هشام لانو بتضحكي كأنو قاعدة تخلطي
سديم: هشام منو يا سجمانة ياااخ قفلت صفحتو زمان دا مصطفى ابو ناني
نسيم: ايواااا وربطتي معاهو متين
سديم: ربطت شنو يا بتي انت اتصل يسأل من بتو وقال لي شردتي ببتي عشان كدا ضحكت
نسيم: وهسي مالك زعلانة لو ما حبيبك
سديم: سمعك وسألني هشام دا منو فقفلت فيهو الخط
نسيم: والبحصل شنو كلميهو
سديم: يمكن هو ما عندو لي حاجة بس انا معجبة بيهو
نسيم: هاااا لو كدا معليش
سديم: وانتي خربتي اي حاجة
نسيم: كدا اشوف ابو ناني دا
سديم: ما عندي صورو
نسيم: وبرو الواتس ما خاتي صورتو
سديم: هااا صح خاتيهو دقيقه اشوفك . مشيت على التلفون لقيتو منو مكالمتين فتحت الواتس وفتحت البرو حقو واديت التلفون لنسيم
نسيم: ما شاءلله حلاتو
سديم: وانا اعجب بيهو ساي كدا
نسيم: خطيرة يا بتي امي وما شاءلله ناني بتشبه ابوها
سديم: شديد . بنتكلم كدا تاني اتصل لي
نسيم: ردي انا طالعة برا
سديم: تمام . رديت ليهو
مصطفى: مالك قفلتي الخط
سديم: ااااا بالغلط
مصطفى: سديم انا ما غبي سألتك سؤال طوالي فصلتي الخط
سديم: ما كدا
مصطفى: لو كدا ردي علي هشام دا منو
سديم: ........