قصة جعلتني أم
البارت الثاني والعشرون22
بقلم شذى عبدالمكرم
سديم: قولت شنو
مصطفى: قولت ليك انا بحبك . طوالي قطعت ليك فيهو كف
سديم: الكلمة دي اوع اسمعا منك تاني هو انت بتعرف الحب دا شنو اصلا قال بحبك قال
مصطفى: سديم
سديم: اياك تقول سديم تاني انت بتلعب ولا بتهظر هااا بكرة ماشي تتقدم تجي تقول لي بحبك وازيدك من الشعر بيتين وانا بكرهك . خليتو واقف ومشيت غرفتي بحاول استوعب الحصل دا ليه بالذات في الوقت دا قال لي الكلمة دي هو قايلني انا لعبة في ايدو ولا شنو دايما شايف نفسو ومغرور وداير اي حاجة على كيفو بس لا واكيد قال الكلمة دي عشان يختبرني بس لقيت دموعي بتنزل مسحتها قولت مستحيل انكسر ليهو مشيت لخالتو شيلت ناني وجيت نومتها ونومت تلقائيا حتى ما صليت العشا
الصباح صحيت وعملت الشاي خالتو ثريا طلعت وشالت ليها هي وعمو نور الدين يشربو في غرفتهم وانا قعدت كنت مع ناني في المطبخ بنشرب جا مصطفى داخل عاين فينا جا قعد تحت جنب ناني وسلم عليها في خدودها انا كنت بعاين ليهو بطرف عيني بس
مصطفى: ناني اليوم حنمشي نطلب ليكي ماما جديدة . هي بتضحك بس وانا من جوا محروقة التقول اخنقو
سديم: مصطفى انت لو فاكر بتغيظني بكلامك دا فأنت بتحلم
مصطفى: ما فهمت
سديم: فاهم بس عامل غبي
مصطفى: يمكن
سديم: يبقى دي مشكلتك . شيت ناني من كرسيها وخليتو قاعد على رجلو وطلعت رجعت الغرفة وانا بغلي من جوا جا ضرب لي الباب الاصلا كان فاتح ودخل
مصطفى: ممكن نحكي
سديم: انا عن نفسي ما عندي حاجة احكيها معاك بس لو انت عندك كلام قولو . جا قريب قعد في سرير رغد الزمان
مصطفى: سديم انتي بتحبيني ولا
سديم: شكلك ما فهمت كلامي امس
مصطفى: ما فهمت بس الحاجة الفاهمة انو انا بحبك تصرفاتي في الفترة الفاتت دي كلها ليها اسبابها
سديم: وانا ما دايرة اعرف الاسباب دي تمام . قولتها ليهو بحزم
مصطفى: اخر كلامك
سديم: ايي
مصطفى: تمام مدام بالجد بتكرهيني ذي ما بتقولي احسن اتزوج اسماء
سديم: مصطفى اطلع برا
مصطفى: حاضر من عيوني يا ست سديم . وطلع من الغرفة والله مصطفى دا غبي لو اتمسك بي اكتر كان يمكن احن بس لا طبعا ما عندي حل غير البكي قعدت لمن جا زمن الفطور طلعت جهزتو جات خالتو ثريا داخلة المطبخ
ثريا: ميمي امنعي مصطفى من الخطوة دي
سديم: خالتو امنعو كيف
ثريا: قولي ليهو ما تتقدم وهو حيسمع كلامك لانو بحبك
سديم: خالتو ما صح مصطفى ما بحبني ومدام ناوي يتزوج خلي يتزوج
ثريا: انتي جربي مرة وحدة بس وشوفي
سديم: لالا ماف داعي والله يا خالتو . جهزت الفطور وخالتو مشت نادتهم وقعدنا فطرنا ولمن جا زمن الصلاة وخلاص طالعين
نور الدين: اجهزو عشان لمن نرجع نحنا من الصلاة نطلع للجماعة ديل طوالي
سديم: عمو انا اعفوني ما بقدر امشي بس بجهز ناني تسوقوها معاكم
نور الدين: ليه يا بتي
سديم: تعبانة شوية ومصدعة
نور الدين: سلامتك
سديم: تسلم
ثريا: وانا ما ماشة حأقعد مع ميمي
نور الدين: ليه يا ثريا
ثريا: والله يا نور الدين ما ضروري اصلا ومدام في معرفة ونسب امشو انتو بس وتعالو
نور الدين: تمام خلاص نمش من الجامع طوالي مصطفى خلينا نطلع . عاين لي مسافة حتى طلع مشى كان نفسي اوقفو واقول ليهو ما تمشي بس كرامتي ابت لي وقعدنا مع خالتو ثريا مستنيين الحيحصل وانا قلبي كان بأكلني شديد من جوا.....
_______
في الجانب التاني
نور الدين ومصطفى طلعو للصلاة ومصطفى كان متوتر وما كان ناوي يقول لابوهو انو اتراجع بس ابوهو حيقول عليهو لعب شفع بس صلو وخلصو
نور الدين: نمشي للجماعة ديل
مصطفى: تمام . وكان شارد
نور الدين: مالك
مصطفى: ماف حاجة . طلعو بعربية مصطفى وطول الطريق ساكتين
نور الدين: ولمن تتزوج ناوي ترجع بيتك القديم
مصطفى: ما فكرت
نور الدين: كيف ما فكرت عندك بيت تاني
مصطفى: لالا اكيد حننزل في بيتي القديم معليش ما كنت مركز
نور الدين: انت مالك
مصطفى: كنت بفكر بخصوص الشغل عندي مشكلة صغيرة كدا
نور الدين: ايواااا . ووصلو بيت ناس اسماء ومصطفى خلاص رضى بالامر الواقع ما بقدر يصغر ابوهو قدام الناس ودا كان قرارو اهل اسماء فضلوهم و اي حاجة
سليمان: امس يا نور الدين اتصلت لي وقولت لي عندك معاي موضوع
نور الدين: اي صح
سليمان: احكي
نور الدين: مصطفى دا عندو بيتو محتاج تصليح فعاوزين مواد بناء واكيد ما حنلقى احسن من مغلقك
سليمان: جدا ما عندكم مشكلة
نور الدين: عارف ممكن كان اقولو في التلفون بس طولنا منكم وقولت نجي ونأخد خشم خشمين كدا
سليمان: خير ما عملتو والله وزيارتكم عندي ليها بالدنيا . ونادى اسماء عشان تعمل ليهم قهوة وطبعا مصطفى مستغرب من ابوهو وليه ما فتح الموضوع طوالي وجات ام مزن سلمت عليهم
ام مزن: وين حفيدتي
نور الدين: والله خليناها مع حبوبتها
ام مزن: كان تجيبوها
نور الدين: المرة الجاية ان شاءلله
ام مزن: ان شاءلله . واسماء جابت القهوة وشربونا واتونسو شوية
نور الدين: نحنا بعد دا نستأذن
سليمان: اقعدو اتغدو معانا
نور الدين: مرة تانية ان شاءلله
سليمان: في انتظاركم . وطلعو ولمن ركبو العربية
نور الدين: عارف محتار فيني ليه ما فتحت الموضوع
مصطفى: ايي
نور الدين: انا لو قال اعتمد ليك ما حأستفيد حاجة والله
مصطفى: كيف يا حاج
نور الدين: يا غبي من قبيل منتظرك تقول لي انا غيرت رأيي وما داير اسماء بس يا خبيتي
مصطفى: وانت عرفت من وين
نور الدين: امك متين بتقصر امس نوم ما خلتني انوم بسيرتك انت وسديم قربت اقوم واطردك من بيتي اخر الليل داك . مصطفى ضحك
مصطفى: والله امي دي ربنا يديها العافية
نور الدين: عملت الما قدرت انت تعملو
مصطفى: وانا اعمل شنو
نور الدين: ابقى راجل واضرب لابوها هسي واتكلم معاهو
مصطفى: انت شايف كدا
نور الدين: ايي
مصطفى: تمام . قام وقف العربية بالجنبة وطلع تلفونو واتصل على محمد ابو سديم وسلم عليهو وفتح الاسبيكر لابوهو وسلم على محمد برضو
مصطفى: عمي محمد انا طالب ايد بتك سديم على سنة الله ورسوله . محمد اخد صنة شوية
محمد: والله ما عارف اقول ليك شنو لانو متفاجئ وسديم لسع بتقرأ . عاين لابوهو هز ليهو برأسو
مصطفى: انا ما عندي مشكلة بنتظرها لمن تخلص بعداك
محمد: انا ما حألقى احسن منك لبتي بس كمان لازم اتشاور مع اعمامها وامها وهي ذاتها
مصطفى: منتظر ردك
محمد: تمام يا ولدي . وقفل منو ويداب اتنفس
نور الدين: كدا ممكن اقول عليك راجل
مصطفى: والله ما عارف يا حاج لو ما انت كنت حأعمل شنو
نور الدين: انا موجود عشان اوجهكم للطريق الصح
مصطفى: ربنا يخليك لينا يارب . ودور العربية ورجعو البيت وكان مبسوط شديد جو داخلين وكان بصفر ساي وبلعب بمفاتيحو.......
_________
كنا قاعدين مع خالتو ثريا منتظرين الرجال يرجعو لمن رجعو وجو داخلين مصطفى كان باين عليهو مبسوط ولمن بصفر وبلعب بمفاتيحو
ثريا: الحصل شنو
مصطفى: كلو خير يا امي . وكان ببتسم ساي
مصطفى: ناني تعالي لابوكي يا حلوة انتي . نزلت من جنبي وجرت ليهو وانا بعاين ساي بأنكسار وانا شايفاهو مبسوط بعد اتقدم لاسماء
نور الدين: والله اسماء بتظبط قهوة رهيبة يا بختك يا مصطفى . مصطفى فكا الضحكة
مصطفى: يا بختي ساي . وكان بعاين لي بخباثة كدا حمرت ليهو
ثريا: هشششممم . ضحكو على حركة خالتو ثريا
نور الدين: مالك يا ثريا
ثريا: ما عارفة مبسوطين على شنو
نور الدين: انو مصطفى حيتزوج من جديد
ثريا: اريتو لوحدة ذي الناس
نور الدين: ما تنسي انها اخت المرحومة
ثريا: بس هي والمرحومة كأنهم ما اخوات . والتفت علي
ثريا: ميمي كدا اعملي لينا جبنة فك بيهو الزهجة دي
سديم بحزن: حاضر
نور الدين: كدا النجربها معاكم لو ذي حق اسماء
مصطفى: صح يا حاج كدا النجربها . قومت دخلت المطبخ وبديت اعمل فيهو مصطفى جا داخل وفتح التلاجة شرب موية وانا طبعا عينك في رأسك ما قولتها ليهو قرب مني وسند في المصطبة بتاعت المطبخ جنبي
مصطفى: حاولي اظبطيها عشان تطلع ذي حق..... . ما خليتو يتم كلامو كان السكين جنبي شيلتها وختيتها ليهو في رقبتو هو ذاتو اتخلع من حركتي
سديم: مصطفى اياك تحاول تستفزني عشان ما انحرك هنا . ابتسم لي
مصطفى: بحبك وانت غيران كدا يا ود . غمضت عيوني شديد من العصبية وكورت يدي ولصقتها ليها في بطنو لكل قوتي لمن اتأوه ومسك بطنو
سديم: اطلع من المطبخ . كان ماسك بطنو وبتألم اخد دقيقتين وهو منزل رأسو وماسك بطنو ومتألم
سديم: مصطفى تمثيلك دا ما بيمشي علي . ما رد ولسع كان في نفس موقعو لمن حسيت انو الموضوع جد بالفعل قربت منو بخوف
سديم: مصطفى مالك
مصطفى بالراحة وبألم : عندي مشكلة في البطن
سديم: معليش ما كنت بعرف والله هسي بوجعك شديد . بقيت برجف من الخوف هبشت يدو الفي بطنو اتأوه تاني سحبت يدي سريع وانا دايرة ابكي خلاص
سديم: والله ما قاصدة انت استفزيتني خلينا نمشي المستشفى سريع . ما رد خلاص بكيت
سديم: مصطفى رد ما تسكت ياااخ . رفع رأسو وهو مبتسم
مصطفى: طلع في ناس بتخاف علينا . عاينت ليهو بخلعة يعني كان بمثل حيلي برد لمن قعدت في الارض وبقيت ببكي هو اتخلع نزل جنبي وهبشني
مصطفى: سديم . زحيت منو
سديم: اياك تهبشني انا بكرهك ياااخ مصطفى انا عملت ليك شنو عشان تعمل فيني دا كلو ليه ياااخ ما عندك قلب وبتحس بي
مصطفى: والله ما قاصد ما تبكي خلاص انا اسف
سديم: اطلع من هنا
مصطفى: حأطلع بس انتي ما تبكي
سديم: ما دخلك . مسك يدي حاولت اسحبها حلف كم يفكها استسلمت ليهو وخليتها لمن هديت جاب سكر اداني ليهو وبقيت قاعدة في محلي وهو قاعد جنبي لمن سمعنا القهوة فارت ودفقت قومت سريع طفيت البوتوجاز
مصطفى: انتي كويسة
سديم: حأكون كويسة لمن انت تطلع من هنا
مصطفى: تمام . وطلع من المطبخ انا ما عارفة مصطفى دا داير مني شنو موش خلاص اتقدم للزواج هو عاوز مني شنو ياااخ بحب دايما يشوفني مكسورة بس عملت القهوة وشيلتها وطلعت برا
ثريا: ميمي انتي اتناقشتي مع مصطفى
سديم: لا ليه
ثريا: طلع زعلان ما عارفة ناديتو ما رد علي قولت يمكن اتناقشتو
سديم: حاول يتكلم معاي ابيت ارد ليهو بس
ثريا: امممممم . ختيت الجبنة وخالتو ثريا مشت تنادي عمو نور الدين من غرفتو وجا وكبيت القهوة وقعدنا نشرب وفلان داك تاني ما شوفتو نهائي حتى زمن الغدا ما جا
ثريا: نور الدين ما ضربت لمصطفى دا مشى وين كدا
نور الدين: ضربت ليهو قال عندو موضوع ضروري وما ننتظرو للغدا
ثريا: تمام . اكيد ما جا عشاني بالليل مشيت المطبخ عشان اشرب موية لقيتو في المطبخ وفي ايدو صحن فاضي من شافني طوالي طلع من المطبخ شكلو كان داير يأكل حاجة شربت الموية وطلعت كدا وقفت بعيد لقيتو تاني رجع المطبخ اتأكدت انو طلع عشان ما يضايقني رجعت تاني المطبخ لقيتو واقف محتار قلبي حن عليهو عارفة قلبي غبي بعد العملو دا كلو حن عليهو
سديم: اقعد بخت ليك الاكل . ما رد ومشي قعد في واحد من الكراسي وبعاين فيني سخنت ليهو و رصيتو ليهو وختيتها ليهو قدامو وكبيت ليهو عصير من التلاجة
مصطفى: شكرا
سديم: عفوا . وكنت طالعة
مصطفى بحنية: ميمي . دي تاني مرة يقول لي اسم الدلع دا لو متذكرين اول مرة لمن كنت في بيتنا وقافلة الباب علي انا وناني عشان ما يشيلها . التفت عليهو
سديم: نعم
مصطفى بحنية : انا بحبك . عاينت ليهو ولقيتو نفسي تلقائيا ابتسمت وطلعت من المطبخ والله مصطفى دا يوم حيشلني مشيت الغرفة ونومت........
أتمنىٰ لو أننِي انسَى
لكَن إنكسَاري فِي تِلك
اللحَظة لا يُنسَى
وفِيضانات الدَموع
لا تُنسى
لا يَنسَى الإنسان
مَن نزع مِنهُ الأمان
لا يَنسَى
رجفة يدهَ وبكاءهُ
في جَوف اللَيل .💔