قصة جعلتني أم
البارت الاول1
بقلم شذى عبدالمكرم
__يا ميمي لشنو ما دايرة تنزلي مع ثريا
_ يا امي انا ما بعرف غير اسمها حتى شكلها ما متذكراهو
__ والله زعلت مني لمن عرفت انتي انو نازلة في الداخلية وهي قاعدة
_ يا امي الداخلية احسن لي اهو سنتين قاعدة فيهو وحأرجع اقعد فيها وكلها سنتين واخلص وارجع استقر هنا
__ لو نزلتي معاها حترتاحي وعندها بت قدرك كدا
_ عرض مغري بس نوووو . جريت كلمة نو دي وطلعت من المطبخ ومشيت غرفتنا انا واخواتي " نحنا تلاتة بنات انا تاني الكبر والترتيب كالاتي "نديم سديم نسيم "
نسيم: ميمي حلي لي المسألة دي
سديم: والله دا ما زمنك نهائي يا سيمي" دلعها"
نسيم: مالك
سديم: امي بتقول الا انزل مع خالتو ثريا
نسيم: مالك ما دايرة تنزلي معاها
سديم: قعاد البيت بقيدني وانتي عارفاني بحب الطلوع وكدا
نسيم: صح حاولي معاها تاني
سديم: كويس كدا جيبي اشوف ليكي المسألة . ادتني الكراسة شوفتو ليها وحليناهو مع بعض ومسكت تلفوني وقعدت اتصفح بيهو في الاثناء دا بحكي ليكم شوية عني
اكيد عرفتو انا اسمي سديم محمد تاني البيت الكبر اسمها نديم متزوجة بعدها انا بقرأ في الجامعة خلصت السنة التانية وحاليا في اجازة وبعد الاجازة بنزل السنة التالتة بقرأ اقتصاد علوم مصرفية واخر العنقود نسيم اولى ثانوي
امي جات نادتنا انا ونسيم للغدا طلعنا مشينا
ابوي: ميمي
سديم: نعم يا ابوي
ابوي: امك قالت ما دايرة تنزلي مع خالتك ثريا
سديم: ايي لانو ما حأرتاح فيهو
ابوي: بالعكس قريب من جامعتك واحتمال تتأقلمي معاهم وانا بكون مطمن عليكي اكتر من تكوني في الداخلية
سديم: ابوي يعني انت مع امي في كلامها دا
ابوي: ايي
سديم: تمام بنزل معاها بس لو ما ارتحت معاهم بكلمك وبنقل الداخلية
امي: موافقين
سديم: تمام
كان فاضل لي اسبوع وارجع الخرطوم للجامعة مشيت لبت جيرنا عزمتني جبنة اسمها نور
نور: راجعة خلاص
سديم: اجازتي خلصت
نور: وعملتي شنو مع هشام
سديم: يا بت علاقتنا انتهت زمان " دا الاكس طبعا وساكنين نفس الحي"
نور: بس هو متأمل للان
سديم: لنفسو والله ما عندي ليهو حاجة
نور: احسن ليكي
سديم: عامل لي وشو المربعة دا . قومنا نضحك
نور: عفيت عنك ههههههه . قعدنا نتونس شوية وطلعت منها ورجعت البيت اليوم التاني نزلت السوق مع امي واشتريت لي الحاجات البحتاجها وجاتني نديم مع شياطينها قيلو معانا وبكرة خلاص مسافرة
امي: كلمت ثريا انك بكرة حتمشي ليهم
سديم: والله يا سمسم " سامية"ما عارفة ليه مصرة كدا
امي: لانها صحبتي شديد وقرينا الجامعة مع بعض
سديم: كدا نشوف الصحبة دي
امي: وهناك خلي النوم الكتير
سديم: شوفي يا امي اي حاجة ولا زول يدخل بيني وبين النوم بختلف معاهو طوالي
امي: حيرتيني معاكي
سديم: هم ذاتو حيحتارو لمن يطردوني براهم وما تقولي ما كلمتك
امي: ما حأستغرب والله . ضحكنا معاها وقعدت توصيني كأني حأعمل بيهو كدا ههههههه
اليوم التاني ابوي وصلني المطار وركبت الطيارة وسافرت ولمن وصلت اخدت لي ترحال واتصلت لخالتو ثريا واديتها بتاع الترحال وصفت ليهو البيت ووصلت البيت ووضربت الباب فتحت لي بت تقريبا بتها سلمت علي
البت: حمدالله على السلامة
سديم: الله يقبل حمدك
البت: اتفضلي . ونزلت معاي الشنط ودخلنا البيت جاتني خالتو ثريا
ثريا: حيا بتي حمد لله على السلامة
سديم: الله يقبل حمدك
ثريا: نورتينا
سديم: منور بيكم . فضلوني وقعدنا وجابو لي موية وعصير
ثريا: رغد اعملي ليها حاجة تأكلها
سديم: ما جعيانة تسلمي خالتو
ثريا: ليه يا بتي انتي جاية من سفر
سديم: والله ما جيعانة لو جوعت بكلمك
ثريا: تمام حبيبتي ادخلي ارتاحي رغد دخليها الغرفة . دخلنا الغرفة وفتحت الشنطة وغيرت ملابسي ونومت طوالي كلمت امي من البيت اي حاجة ولا النوم بتاعي هههههه ما نومت كتير لانو ما بيتنا طلعت برا لقيت خالتو ثريا ماسكة بنوتة صغيرة بس كانت بتبكي بطريقة فظيعة
سديم: مالا بتبكي كدا
ثريا: ما عارفة والله ابت تأكل نهائي وبتبكي بس . مشيت عليها
سديم: كدا اديني ليها
ثريا: تمام . ادتني ليها كنت واقفة فوق بقيت ماشة بيها
سديم: الحلو مالو ببكي كدا في زول عسل كدا ببكي . بقيت اهز فيها واتكلم معاها ومشيت قعدت بيها وبقيت اعمل ليها حركات بوشي فجأة سكتت وبقت تعاين فيني بقيت اكلكلها خفيف كدا ولسع بعمل حاجات بوشي قامت تضحك والله ضحكتها حلوة خلاص
ثريا: سبحان الله ما سكتت مع زول شكلك بتحبي الاطفال
سديم: اي بحبهم شديد دي بت منو
ثريا: بس ولدي مصطفى
سديم: ايوااا حلاتها ما شاءلله وين امها
ثريا: متوفية . قلعت عيوني بخلعة وعاينت ليها
سديم: شنو معليش قصدي ربنا يرحمها
ثريا: امين يارب
سديم: ماتت متين
ثريا: عندها ست شهور و ناني " دا اسم الدلع تبع الطفلة" كان عمرها ست شهور " يعني هسي الطفلة عمرها سنة "
سديم: خلتها صغيرة شديد
ثريا: اي والله
سديم: وهي قاعده معاكي كدا
ثريا: ابوها شغال فتقعد معاي بس بتبكي كتير ومرات بسوقها معاهو بيتو القديم بقعدو الجمعة والسبت بعدها بجيبها تاني وانتي عارفة اني كبرت بس قاعده امسكها
سديم: دي مسؤلية والله لانها صغيرة
ثريا: ايي والله الاسرة اقترحت ليهو يتزوج اخت المرحومة عشان تربي بت اختها بس رفض
سديم: صغنونة ما تستاهل والله شوفو الحلو دا . قعدت العب معاها وهي بتضحك بس
سديم: وين اكلها
ثريا: رغد جيبي اكل ناني . جابتو لي
رغد : ان شاءلله تأكل بس
سديم: اصلا ناني حلوة وحتأكل صح يا ناني . بتضحك بس قومت اكلتها وشربتها موية
سديم: خالتو ثريا ناني عندها العاب
ثريا: كمية في غرفة ابوها
سديم: ممكن زول يجيبهم
ثريا: شيليها ارح الغرفة بالمرة
سديم: تمام . شيلتها ومشينا غرفة مصطفى غرفة حلوة وتحسها بتاعت زول هادئ كدا في ركن كدا مليان العاب ختيت ناني في السرير ومشيت شيلت جزء من الالعاب كبيتهم في السرير
ثريا: بجيب ليكم عصير
سديم: تمام . طلعت وانا وناني قعدنا نلعب بالالعاب وكانت مبسوطة شديد خالتو ثريا جابت لينا العصير وطلعت خلتنا ما عارفة مر كم من الوقت وانا معاها وبنلعب حبيتها شديد فجأة في زول جا داخل الغرفة انا اتخلعت طبعا ورفعت توبي في رأسي سريع وبقيت اعاين ليهو وهو ذاتو مستغرب دي منو وبتعمل في غرفتي شنو
مصطفى: انتي منو
سديم: ااا انا اا سديم
مصطفى: يعني كدا عرفتك خلاص بتعملي في غرفتي شنو . دايرة ارد كدا جات خالتو ثريا داخلة الغرفة
ثريا: دي سديم بت سامية امس كلمتك عنها
مصطفى: بتعمل في غرفتي شنو . انا انحرجت طبعا
ثريا: ناني من قبيل بتبكي ماف زول سكتها غير سديم وقولت ليهم يجو يلعبو بالالعاب هنا ما رد على امو ومشى رفع ناني قامت تضحك عرفت ابوها وانا وخالتو ثريا طلعنا من الغرفة
ثريا: مصطفى دا طبعو شوية صعب ما تزعلي منو
سديم: لالا عادي خالتو حصل خير . مشيت الغرفة كدا رغد طوالي نزلت التلفون من اضانا شكلو كانت بتخلط وخافت مني
سديم: اخلطي ساي عادي حبيبتي . قامت تضحك ورجعت تتكلم بالتلفون وانا بتصفح في تلفوني شوية كدا سرحت واتذكرت ناني وضحكتها واتذكرت ابوها البخوف دا