قصة يتيمتى
البارت الثالث3
بقلم شذى المكرم
تميت اسبوع من الكلام دا ويومي اهانة من سليم على الطالعة والنازلة وانا حيلي انتهى خلاص وقلبي شال بما فيهو الكفاية
في يوم كان السبت قاعدة بطبخ كدا وفي نفس الوقت قاعدة اكوي الملابس اثناء ما بكوي في الصالة سرحت بس شميت ريحة الحلة فكيت المكوة سريع ما انتبهت انها وقعت في اللبسة جريت المطبخ لقيت الحلة مسكت بس ما اتحرق الحمدلله قعدت اكمل فيها ونسيت امر المكوة نهائي سليم جا طالع من الغرفة ولقى اللبسة اتحرقت وقربت تعمل حريق
سليم: ملللللك . طوالي المعلقة الفي يدي وقعت من الخوف وقلبي طار من محلو جريت الصالة وقفت بعيد منو وشوفت الحريق
سليم: تعالي هنا . من محلي ما اتحركت وبرجف لانو حيقتلني الليلة
سليم: بتكلم معاكي يا زفتة تعالي هنا . مشيت ليهو وانا ببكي وبرجف
ملك: والله م م م . قطع كلامي بكف منو ما استوعبتها عدلها لي بالتاني طوالي وقعت من طولي في الارض وفتحت بيت بكى ببكي بأعلى حسي لانو الفيني انتهى
ملك: ياااخ انا عملت ليكم شنو تعذبوني كدا ليه ما ارتاح في حيااتي امي ليه ما سوقتيني معاكي ليه خليتني اتعذب في الدنيا دي براي
سليم: قفلي
ملك: والله حرام عليك اذا انت مجبور علي انا ذاتي مجبورة عليك بس ساكتة ليه بتعمل فيني كدا والله انا بشر وبحس ياااخ انا تعبت والله ان شاءالله اموت ليكم عشان كلكم ترتاحو مني وانا ذاتي ارتاح من العذاب دا قولت حأتزوج ارتاح من عذاب بيت عمي بس جيت هنا لقيت جهنم من هناك . وبقيت اصرخ جاني انهيار عصبي بقيت اصرخ بس خمسة دقايق وانا بصرخ وبعيط لمن هديت لقيتو واقف بعيد وبعاين فيني فجأة قام جاي علي بقيت ازحف لورا خوفت يضربني
ملك: عليك الله ما تضربني والله جسمي واجعني من الضرب . ولسع برجع وهو جاي علي لمن وصلني مد لي ايدو استغربت فيهو
سليم: جيبي ايدك . انا بعاين فيهو تاني ردد لي الكلام خوفت لو ما سمعت كلامو يضربني مسكت ايدو قومني على حيلي وقام دخل غرفتو استغربت فيهو حتى ما جاط فيني بالراحة قومت ولميت حاجات المكوة ودخلت غرفتي وانا خايفة من الهدوء حقو دا اكيد هدوء ما قبل العاصفة ارتحت شوية وطلعت جهزت الغدا وضربت باب غرفتو ومشينا اتغدينا وكنت خايفة من سكاتو دا وشرب الشاي والغربية الليلة ما طلع من البيت ذي كل يوم بعد المغرب ضرب لي باب غرفتي فتحتو
سليم: تعالي نحكي برا . استغربت اول مرة تحصل مشيت معاهو قعدنا في الصالة.....
________
جيت طالع من الغرفة لقيت حريق في الصالة ناديت ملك وضربتها كفين ووقعت وجاها انهيار عصبي اتخلعت طبعا زحيت منها قعدت تعيط وتصرخ وطلعت الفي قلبها كلو للحظة حنيت عليها بالفعل انا مجبور عليها وطلعت هي ذاتها مجبورة علي وراجعت نفسي لقيت انو اذيتها اكتر من اهلها ما قربت منها لمن هدت شوية قومتها ودخلت غرفتي جاني تأنيب ضمير شوية لانو تلاتة شهور دا ما لقت مني غير الزلة والاهانة قومت مشيت ضربت غرفتها بعد الغدا عشان احكي معاها
_________
قعدنا في الصالة
سليم: انتي ليه وافقتي تتزوجيني
ملك: انا ما استشاروني اصلا عمي جا داخل قال لي حأعقد ليكي وبس ما زعلت لانو قولت حأطلع من الجحيم الكنت عايشاهو هناك . وغطيت وشي بايدي وبكيت تاني
سليم: عارفة انو انجبرت عليكي صح
ملك: عارفة
سليم: وانتي نهائي ما نوعي المفضل عشان كدا ما متقبلك . وجعني كلامو بس سكتا
سليم: بس كمان ما بقدر اطلقك هسي عشان ابوي
ملك: انا بتكلم مع عمو
سليم: لا ماف داعي انتي بتقري اي مستوى . طبعا جاني في الجرح دموعي نزلو
ملك: م م م قاعدة اقرأ
سليم: كيف يعني
ملك: وقفت قراية تالتة ثانوي عمي ما خلاني اواصل مع انو كنت متفوقة
سليم: السبب .
ملك: لانو مرت عمي ما كانت عاوزاني اتفوق على بتها كنا في نفس المستوى
سليم: ايوااا وعمرك كم انتي
ملك: 20
سليم: تمام . وطوالي قام دخل غرفتو وانا رجعت غرفتي حسيت بشوية راحة لانو دي اول مرة نتكلم بهدوء كنت عاوزة اسألو عن تفاصيلو بس ما قدرت
مر اسبوع على الكلام دا والوضع كان هادي بينا ما كنا بنحتك ببعض كتير ونقاشاتنا قلت او اقول ما عيط فيني من اخر مرة يعني اول مرة في حياتي يمر علي اسبوع ذي دا ما اتعرض فيهو لضرب او اهانة......