قصة يتيمتى
البارت الثامن عشر18
بقلم شذى المكرم
اصبحت الصباح وصحيت سليم واتجهزت للمدرسة في الطريق سليم بعاين لي بخباثة
ملك: سليم ما تعاين لي كدا
سليم: داير اشوف الحب الامس اعترفتي بيهو دا
ملك: سليييم
سليم: ههههههه خلاص خليتك يا شافعة . وصلني المدرسة وهو مشى المكتب
هند: جاهزة للتجريبي
ملك: ما حأمتحن معاكم
هند: ما جادة طبعا
ملك: والله العظيم
هند: ليه ما ممتحنة
ملك: لاني مسافرة الاسبوع الجاي
هند: ايوااا بس كان تمتحني حتى تسافري
ملك: مسافرة عرس انا
هند: بختك
ملك: ما مبسوطة ليهو بس لازم امشي
يوم الخميس الصباح اتصلت عمتو نادية لسليم بعد خلص
سليم: امي قالت بعد المدرسة اوديك ليهم
ملك: ليه
سليم: عشان تتجهزي للسفر وقالت ارجعك السبت
ملك: تمام
سليم: حنسافر الاحد وكلمت المدير بخصوص السفر
ملك: حأستف جزء الليلة بالليل عشان السبت ما اتعب
سليم: ممكن وهسي خلينا نطلع عشان ما نتأخر
نهاية اليوم بعد اتغدينا ستفت لي غيارين وسليم وصلني بيتهم
سليم: اها يا حجة ما حتستقبلو معاكم الليلة
نادية: والله يا ولدي كان نفسي استقبلك بس ما بقدر . سليم عاين ليها بصدمة ونحنا البنات ضحكنا
سليم بصدمة: امك بتطرديني
نادية: ههههههه للاسف اي ارجع بيتك
سليم: ملك قومي خليني نرجع بيتنا
نادية: ملك حتقعد معانا
ملك: سليم الليلة حأبيعك ههههههه
سليم: بقت كدا يعني
سلمى: سلوم معليش
سليم: العلمك الكلمة دي منو
سلمى: ملك
ملك: والله كذابة . ضحكو كلهم فيني عشان قولتها بسرعة . سليم شوية كدا وطلع رجع البيت
عمتو بالليل داك اشتغلت فيني عروكات وحاجات كدا ما فاهماها والصباح بدري قعدتني دخان وانا ببكي وسلمى وسلوى بضحكو بعد الضهر سليم جا البيت بس رفضو لي اطلع اسلم عليهو سامعة صوتو من برا
سليم: امي وين ملك
نادية: عاوز بيها شنو
سليم: امي دي مرتي على فكرة
نادية: عارفة ما ناسية الحاجة دي
سليم: داير اسلم عليها بس
نادية: والله ما ممكن بدربك دا امشي الديوان حق الرجال
سليم: كويس يا حجة . ومشى
سلمى: امي دي لاعبة ضاغط مع سليم
ملك: هههههه شديد
سلوى: لو شاف ملك هسي حيخرب لامي اجتهادها
سلمى: بالفعل ههههه
تاني العصر قعدتني وعملت لي حلاوة وسلمى وسلوى شغالين فيني ماسكات وعروكات لمن ما عرفت نفسي ولوني فتح وبقى ناير هههههه حتى السبت اشتغلو فيني كدا لحدي بعد الفطور مشينا لحنانة معاهم في الحي ورسمت لي رسم عروس عجبني شديد لانو من العرس تاني ما رسمت ورجعنا البيت جا سليم العصر برضو عمتو رفضت يشوفني قالت الا بعد المغرب زمن راجعين خلاص
نادية: ملك التياب دي تحضري بيها الحنة والزفة والفطور .
ملك: تسلمي بالجد ما قصرتي معاي
نادية: العفو حبيبتي وانتي عروس جديده
ملك: ههههه عروس جديدة وقربت اتم السنة
نادية: لساكي صغيرة فتعتبري جديدة واسمعيني اوع تنسي التوصية بتاعتي اوكي
ملك: اوكي
نادية: هناك حتلقي مضايقة من بعض الناس بس . قاطعتها
ملك: حأتحملهم عمتي اصلا اتحملت كتير بس سليم واقف معاي ما بخاف منهم
نادية: ربنا يكمل بعقلك يا رب يلا البسي سليم منتظرك برا . لبست وطلعت وشيلت التياب وبعض العطور ادتني ليهو عمتو نادية لقيت سليم منتظرني ولمن طلعت برا وقف عاين لي كدا بعد شوية انتبه وطلعنا وطول الطريق بعاين فيني
ملك: سليم في حاجة
سليم: احمم ماف حاجة . وقاعد يطلع همهمات كدا وانا سكتا ساي لمن وصلنا ودخلت غيرت ملابسي وقعدت استف الملابس وسليم كل دقيقتين يدخل الغرفة ويطلع لمن حيرني لمن خلصت تستيف تاني جا داخل
ملك: سليم تعال . جاني قريب
ملك: انت مالك من قبيل حاساك ما طبيعي
سليم: ماف حاجة . وطلع والله اتحيرت فيهو فبديت استف شنطتني تبع العطور ومستلزماتي جا داخل تاني وقرب مني شديد لمن اخلعت
ملك: في شنو
سليم: ملك ما قادر . فهمت قصدو فخوفت
ملك: سليم نحنا بكرة مسافرين
سليم: نأجلو العصر بس اصلا مسافرين بالعربية حقنا . دايرة اتكلم ما خلاني وحصل الحصل واصبحت زوجة سليم قولا وفعلا
الصباح صحيت لقيتو ماف دخلت الحمام سريع وطلعت كنت تعبانة مبالغة ما قدرت اطلع اعمل الشاي فنومت تاني صحيت بسليم بلعب بشعري
سليم: ملوك
ملك: همممم
سليم: قومي عشان تفطري ورانا سفر طويل . قومت قعدت
سليم: مبروك . ما استوعبت حاجة
ملك: على شنو . قام ضحك يداب ركزت.
ملك: سلييييم اطلع برا . قام ضحك وطلع يداب اتذكرت الحصل كلو وكنت خجلانة منو طلعت برا ومشيت المطبخ عملت حاجات خفيفة جابهم سليم وفطرنا
سليم: خلينا نجهز عشان نطلع اتأخرنا
ملك: كلو بسببك انت
سليم: انتي التعبانة ما انا .
ملك: ما تتكلم معاي . وخليت ليهو الصالة دخلت الغرفة وجهزت نفسي وهو جا جهز نفسو وطلعنا حنسافر بالعربية وقف في اقرب سوبر ماركت اشتري لي بعض الحاجات للطريق لانو طويل
سليم: نومي شوية حاسي بيكي تعبانة
ملك: مبالغة
سليم: دقيقة انزل ليكي الكرسي . نزلو لي فنومت خليتو هههههه صحيت بعد ساعة وحاجة كدا
ملك: ما وصلنا
سليم: صباح الخير وصلنا شنو يداب عندنا ساعة وحاجة بس
ملك: باقي كم
سليم: على الاقل اربعة ساعات كدا
ملك: كتيرة بتقدر تحتمل السواقة .ابتسم لي
سليم: بقدر بس انتي بتقدري تحتملي القعدة بالساعات دي كلها
ملك: والله الصراحة صعبة بس معاك عادي
سليم: يلا انا ذاتي مدام انتي معاي بقدر
الطريق كلو بنتونس يعني ما حسينا بالزمن لمن وصلنا
سليم: رأيك شنو اقول ليهم يفضو لينا غرفة برانا
ملك: سليم انت ما جادي ولا شنو يقول علينا شنو
سليم: انا ما بهمني زول بس ما يضايقوكي
ملك: انا عشانك بتحمل اي حاجة
سليم: حبيبي انا . وسلم علي في خدي خجلت ونزلنا وطبعا الملابس كلهم في شنطة وحدة يعني حتكون معاي انا دخلنا جوا استقبلونا بس حسيت نفسي في محل غريب اما حبوبتهم عاملة ذي عمتو فاطمة
سليم: حبوبة كيفك والله مشتاقين
حبوبة: اتزوجت ونسيت حبوبتك
سليم: معقولة يا عسل انتي
حبوبة: يا ولد هوي
سليم: ههههه اهو جيتك
حبوبة: اكيد مرتك حمت تجينا
سليم: معقولة شوفيها كويسة دي وش زول برئ كيف . عاينت لي ابتسمت ليها ومشيت سلمت عليها بس سلمت لي عادي جدا كنت الوثت كلو بس بدعي ما يحصل لي ذي ما حصل لي هناك سلمت عليهم دخلوني غرفة كدا فاضية كدا وبعيدة شوية دخلو لي الشنطة والتانية كانت في ايدي
سليم: ملك انا حأمشي جهة الرجال بس خلي بالك من نفسك وين تلفونك
ملك: اهو في يدي
سليم: اسمعي اوع يزح من يدك فاهمة وانا بتصل عليكي
ملك: اوكي وانت ما تخاف علي
سليم: ما بقدر ما اخاف عليكي وانتي ما بتعرفي زول هنا بس ذي ما قولت ليكي تلفونك في ايدك بس
ملك: تمام . ودعني ومشا وقعدت اعاين فيهم بس ما بعرف زول منهم .......
"لا تجعل فوضى الحياة تُقلقك
فالله يتولى ترتيبها
بطريقة مبهرة !"💛