قصة يتيمتى
البارت التاسع9
بقلم شذى المكرم
واصلت في المدرسة عادي لحدي ما جا الامتحان الشهري التاني الاول ما حضرتو لانو ما كنت مسجلة الزمن داك نزلو لينا الجدول انو الاسبوع الجاي هميت شديد لانو شهرين ما درستو معاهم رجعت البيت مهمومة و سرحانة طول الوقت لمن سليم لاحظ لي
سليم: ملك مالك حاسي بيكي ما طبيعية
ملك: جدول الامتحانات طلع
سليم: والمشكلة وين
ملك: سليم عندي شهرين فاتني
سليم: بتعوضي بس واصلا دا امتحان شهري صح
ملك: اي
سليم: ماف مشكلة اعتبريهو تحدي لنفسك بس وقدر الاشتغلتي داك بس كفاية وتعوضي مع الايام الجايات
ملك: ان شاءالله
سليم: يلا افرديها وانا بحاول اساعدك
ملك: عليك الله
سليم: اي مشكلتك اي مادة
ملك: فيزياء
سليم: دا معلبي انا
ملك: احلف
سليم: يا بت
ملك: ههههه اسفة . بعد الغدا كنت بغسل في العدة جاني سليم
سليم: امشي جيبي كراسة الفيزياء اراجع ليكي وانتي بتغسلي كدا . طلعت يدي من الصابون وجيبت ليهو الكراس قعد يراجع لي شوية في حتة كدا ما عرف ليها قاعد يمشيني فيها ههههه
ملك: سليم ما كدا يا زول
سليم: انتي حتعلميني شوفو البت دي بالله
ملك: دقيقة اوريك . طلعت ايدي من الموية وجيت جنبو اصلا هو قاعد فوق المصطبة جنبي
ملك: عاين . وقعدت اوضح ليهو ويدي بمويتها وصابونها
سليم: شوفي وسختيني كيف بصابونك دا دقيقة اغسل محل الصابون دا . ومشى على المغسلة والكراس في ايديو وانا جيت وراهو داير يلتف كدا وما عارف انا وراهو اتخلع والكراسة ادخلي جوا المغسلة
ملك: سليييييم الكراس
سليم: وقع جوا الموية . بكل برود
ملك: وااي يا سليم الاستاذ حيقتلني وامتحن بشنو انا . طلعت الكراس لقيتو انتهى عديل عيوني دمعو طوالي
سليم: بتبكي مالك
ملك: مزاج بس . وطلعت من المطبخ مشيت الغرفة ببكي وبتحسر على كراستي تاني ابدأ من جديد كتابة دا غير الفات ما تميتو جاني سليم
سليم: ما كنت قاصد وانتي خلعتيني خلاص ما تبكي بكرة جيبي كراس صحبتك وانا بكتب ليكي . رفعت وشي بدموعي ديك
ملك: بالجد حتكتب لي
سليم: اي بس وقفي بكى . مسحت دموعي
ملك: تمام . وقومت مشيت تميت العدة حقتي
اليوم التاني مشيت المدرسة وزمن حصة الفيزياء الاستاذ عاين لي انو ما قاعدة اكتب جاني
الاستاذ: يا طالبة كراستك وين
ملك: وقع جوا المغسلة امس وباظ
الاستاذ: انتي بتهظري معاي ولا شنو
ملك: لا والله دا الحصل
الاستاذ: اطلعي لي برا . طلعت معاهو برا الفصل
الاستاذ: افتحي يدك . فتحت يدي اداني عشرة سوط لمن يدي عملو علامات وجروح صغيرة لمن بكيت
الاستاذ: قدامي للمدير انتي قايلة المدرسة دي فوضى . مسحت دموعي ومشيت معاهو وكلم لي المدير والمدير جاط كدا انو دا استهتار شديد واتصل على سليم انو يجي المدرسة بالفعل جا المدرسة
سليم: الحاصل شنو
الاستاذ : ما عندها كراسة فيزياء وبتستهر بي
سليم: كيف يعني عملتي شنو يا ملك
ملك: ما عملت حاجة سألني من كراسة الفيزياء قولت ليهو الكراسة وقعت جوا المغسلة وباظت
سليم: ما هو فعلا دا الحصل
الاستاذ: دا اهمال منها وعدم اعطاء اهمية للمادة
سليم: بعتذر بالنيابة عنها بس ما حيتكرر تاني تحت مسؤوليتي . اتكلم مع المدير والاستاذ والموضوع انتهى
سليم: جيبي شنطتك خلينا نرجع . احسن ذاتو مع انو ما خلصت اليوم للنهاية مشيت الفصل شيلت شنطتي وطلعت البنات بعاينو فيني كأنو فصلوني كدا مشيت ركبت العربية واتحركنا
سليم: انتي ما بتعرفي تكذبي اي كذبة
ملك: ما بعرف يااخ . وبعاين في ايدي البوجعوني دي سليم لمن ركز معاي وعاين ليدي يركن العربية بالجنبة ومسك يدي
سليم: دا شنو مالا ايدك كدا
ملك: الاستاذ ضربني
سليم: للدرجة دي دا عنف عديل . وبهبش في الجروح
ملك: سليم يااخ بوجعوني . وجريت ايدي منو شغل العربية وعكس الاتجاه
ملك: ماشي وين . ما رد لي لقيت نفسي قدام المدرسة تاني وهو نزل
سليم: انزلي . نزلنا ودخلنا للمدير تاني
سليم: يا استاذ ممكن افهم دا شنو العنف الحاصل دا هل بسبب كراس يحصل في ايديها كدا . مسك ايدي وشوفها للمدير
المدير: شكلو الاستاذ ضربها شديد
سليم: اخدتي كم سوط يا ملك
ملك: عشرة
سليم: ليه عشرة قاتلة زول هي
المدير: اهدا يا باشمهندس
سليم: ما بقبل بحاجة ذي دي تاني حذر الاساتذة كلهم هنا ماف زول يرفع ايدو عليها لو لقيت اي غلط اتصلو علي لو في فصل من المدرسة ما مشكلة بس ما تنضرب من اي معلم هنا . وجاط فيهم انا لمن خوفت ذاتي وطلعنا وطول الطريق كان معصب وانا خشمي وعندي خايفة افتحو القى نصيبي ههههههه لمن وصلنا البيت ودخلنا زحيت بعيد منو
ملك بهمس: سليم . عاين فيني لقاني بعيدة
سليم: مالك
ملك: ماف حاجة . ودايرة اجري غرفتي
سليم: تعالي هنا . وقفت بعيد
ملك بخوف : من غير ضرب لكن
سليم: يا بت تعالي قولت ليكي . مشيت بالراحة عليهو مسك ايدي
سليم: لسع بوجعوكي
ملك: ايييك نسيت الالم من زمن كنا عند المدير وانت بتجوط فيهم من الخوف لمن نسيت الالم
سليم: هههههه خوافة خلاص
ملك: انت ما شوفت حالتك كانت كيف بركان بس
سليم: تاني ماف استاذ حيرفع ايدو عليكي ولو حصل كلميني
ملك: بعد كلامك مع المدير ما ظنيت واحد فيهم حيقرب علي ويسألني حتى ههههههه
سليم: دا المطلوب
انبسطت شديد بتصرف سليم بدل انو خايف علي وبهمو امري مر الاسبوع وجات الامتحانات وكنت خايفة بس سليم ما خلاني اخاف وساعدني في المواد الما بعرفها لمن خلصت وكنت مبسوطة بس صدمني بموضوع
بعد الغدا
سليم: ملك
ملك: نعم
سليم: انا حأسافر
ملك: وين ومتين وحتخليني براي
سليم: اهدي كدا
ملك: سليم . وعاينت ليهو بزعل كدا
سليم: شهر بس وحأرجع
ملك: شهر كتيرة وانا اقعد مع منو
سليم: حأوديكي بيت ناس امي حتقعدي معاهم لمن ارجع تمام
ملك: تمام . قولتها بزعل
سليم: ما تزعلي حاشتري ليكي تلفون عشان نتواصل مع بعض اوكي
ملك: اوكي .
قرار سليم بالسفر دا كان اسوأ قرار حنعرف البحصل شنو في البارت الجاي ......