قصة يتيمتى
البارت الرابع عشر14
بقلم شذى المكرم
اخيرا ارتحت نفسيا بعد رجعت بيتي ووجود سليم جنبي نفسيتي قاعدة تتصلح شوية شوية وسليم بحاول بقدر الامكان ينسيني الشهر المضى دا واصلا هو جا يوم التلاتاء وقال حينزل المكتب الاحد اهو قضينا الاربعاء مع بعض يوم الخميس بعد الفطور
سليم: خلينا ننزل السوق عشان نملا التلاجة
ملك: حاضر
سليم: يحضر ليكي الخير بس بلاش توب
ملك: ليه
سليم: ياااخ عشان حيبهدلك
ملك: انا عاوزة البس توب وحألبس توب
سليم: مللللك . بنهرة كدا
ملك: سلييييم . بنفس النهرة عايننا لبعض وفكينا الضحكة
سليم: يا امشي البسي
ملك: تمام . ومشيت غرفتي للان ملابسي فيها ولبست عباية وحجبت الطرحة جات في بالي فكرة طلعت لي توب ولبستو عاوزة اهظر معاهو بس طلعت برا لقيت جاهز
سليم: موش قولت ليكي بلاش توب
ملك: هسي التوب دا عيبو شنو . ولفيت بيهو قدامو
سليم: اااخ منك اطلعي قدامي
ملك: خليتو ذاتو ما عاوزة . قولتها بنبرة زعل كدا وطلعتها قدامو اتفأجا لمن لقاني مسبقا لابسة عباية
سليم: عملتيها فيني يا سجمانة . ضحكت
ملك: تعيش وتأكل غيرها سلوم . رفع لي حاجبو
سليم: سلوم!!!!!
ملك: هههههه جات عفوا خلينا نطلع . ضحك وطلعنا مشينا السوق وعزبتو عذاب بكون ندم انو طلع معاي واتأخرنا فأتغدينا برا البيت وبعداك رجعنا
ملك: سليم
سليم: نعم . وكان شغال بتلفونو
ملك: حتغسل معاي الحاجات وتدخلها معاي التلاجة صح . عاين فيني ورفع حاجبو كالعادة
سليم: نعم نعم قولتي شنو
ملك: قولت حتونسني وانا برتب الحاجات
سليم: ايوااا ممكن
________
يوم الجمعة ضربت لي امي وسلمت علي وسألت من ملك قولت ليها نايمة مع انها صاحية وقاعدة جنبي بس ما عارف ليه قولت كدا
نادية: تعالو لينا الليلة عشان اولاد اعمامك دايرين يحمدو ليك السلامة
سليم: وليه ما يجوني في بيتي
نادية: عشان ابوك ضابح الليلة
سليم: امي ما بقدر اجي
نادية: عليك الله تعالو
سليم: حأجي انا بس ملك ما حتجي
نادية: ليه بس يا ولدي
سليم: امي كفاية الشافتو ملك في البيت داك وما دايرها تمشي عشان عمتي وبناتها يضربوها بالكلام هي تعبانة نفسيا
نادية: انت عارف عمتك بس قلبها طيب
سليم: ههههه شديد يا امي وانا والله كلامي واحد حأجيكم بعد الصلاة بس ما حأجيب معاي ملك
نادية: خلاص ذي ما بتدور . وقفلت منها لقيت ملك بتعاين فيني وفي ابتسامة في وجهها حلوة ذيها كدا فجأة براها زحت يدي وختت رأسها في كتفي ولفت ايدها حولي طوالي ضميتها علي وحسيت بأحساس حلو شديد فصلنا على الحالة دي اكتر من عشرة دقايق بعدها براها زحت مني
ملك: خليني اجهز ليك جلابيتك حق الصلاة
سليم: تمام . ومشت وانا قعدت افكر الفترة الاخيرة دي ملك بقت محور حياتي وبسعى انو اسعدها واخليها مبسوطة
اتجهزت للصلاة وجيت طالع خلاص ناديتها
سليم: انا طالع خلاص
ملك: ما تتأخر المغرب ممكن يلقاك هنا؟
سليم: المغرب بعيد حأرجع بعد الغدا بس
ملك: الحمدلله
سليم: خلي تلفونك جنبك حأتصل عليكي تمام
ملك : تمام . ودعتها ومشيت الجامع بعد الصلاة مشيت بيت ابوي وصلت لمن دخلت مشيت جهة النسوان ارفع ليهم السلام
سليم: السلام عليكم
كلهم: وعليكم السلام . وجزء حمد لي السلامة
سلمي: سليم وينا ملك
سليم: في البيت
سلمى: ليه ما جيبتها
سليم بالراحة: تقريبا عارفة السبب انتي . سكتت طوالي
نادية: يعني نفذت الفي بالك يا ولدي
سليم: انا كلامي دايما واحد يا امي يلا عن اذنكم ماشي على الرجال
نادية: سمح . ومشيت جهة الرجال ولقيت اعمامي واولادهم حمدو لي السلامة كلهم وقعدت معاهم وبنتكلم في مواضيع مختلفة شوية مسكت تلفوني رسلت لملك رسالة في الواتس
سليم: بتعملي في شنو . دقيقتين حتى ردت لي
ملك: بشاهد تلفيزيون وانت
سليم: قاعد مع اولاد اعمامي
ملك: حلو وليه ما بتتونس معاهم
سليم: بتكلمو في موضوع كدا ما حابي اتناقش فيهو
ملك: ايوااا
سليم: نتلاقى بعدين
ملك: اوكي . وطلعت من الواتس ورجعت اتكلمت معاهم بعد العصر كدا اتصلت على ملك اشوفها كيف ما ردت استغربت تاني اتصلت برضو نفس الشي وتالت ورابع ماف رد قلبي اكلني قومت فوق كدا جابو الغدا والناس قامت تغسل جيت قعدت كدا ما قدرت اكلت لقمتين بالعدد وطلعت ايدي
عمي: مالك يا سليم ما اكلت
سليم: الحمدلله
ابوي: هسي دا اكل ليك
سليم: ما جوعان بس واتذكرت حاجة مهمة لازم امشي
ابوي: كدا قول بسم الله حاجة شنو
سليم: بسم الله حاجة بخصوص الشغل نسيت اعملها بستأذن انا
عمي: اذنك معاك . ودعتهم ورجعت البيت سريع دخلت كان ماف زول في الصالة ناديتها ما ردت لقيت تلفونا في الصالة عشان كدا ما كانت بترد مشيت غرفتها فتحتها لقيتها ماف يا رب تكون وين اخر حتة كانت غرفتي فتحتها لقيتها نايمة فيها استغفرت ربي ومشيت عليها هبشتها
سليم: ملك . فتحت عيونها بالراحة لمن عاينت كويس قامت وقعدت
ملك: سليم متين جيت
سليم: هسي دا لكن بتبالغي
ملك: في شنو
سليم: موش حذرتك تخلي التلفون جنبك
ملك: نسيت والله
سليم: بسببك غدا ما اتغديت وجيت ذي المجنون
ملك: اسفة والله
سليم: عادي وانتي حتتغدي بشنو
ملك: ماعملت حساب للغدا كنت حأكل طحنية او شوكولاته او جبنة
سليم: هسي دا اكل بالله . رفعت اكتافها نظام ما عارفة
سليم: هسي انا مخلي اللحوم والكمونية عشان اجي اكل طحنية والله مبالغة . وقومت من السرير وبستغفر مشيت شيلت بجامة من الدولاب ودخلت الحمام غيرت وطلعت لقيتها واقفة
ملك: عاوز تأكل شنو وانا اسفة . وشايف الزعل في عيونها هسي لو حكيتها معاها حتبكي ههههههه
سليم: نفسي في طحنية وجبنة
ملك: سليم ياااخ اتكلم
سليم: والله الكنتي حتأكلي حأكلو معاكي . وقرصتها في خدودها وطلعت الصالة فتحت التلفزيون وهي دخلت المطبخ واتأخرت شديد مشيت عليها
سليم: بتعملي شنو
ملك: فراخ بالفرن نص ساعة وحيكون جاهز
سليم: يا الله يااخ انتي احلى زوجة . ابتسمت لي
ملك: لانك اجمل زوج وما داير تتعبني . وطلعنا برا لمن الفرن يصفر وبالفعل جهز واتغدينا
يوم السبت بالليل
سليم: بعد دا اخدتي راحة بما فيهو الكفاية على ما افترض . عاينت لي باستغراب
ملك: في شنو
سليم: قومي جهزي ملابس المدرسة وجهزي شنطتك
ملك: سليم حأواصل مدرسة احلف . وجهها نور من الفرحة
سليم: اعتبري الفات دا اجازة وحنرجع بهمة تمام
ملك بفرحة: تمام . وقامت جرت الغرفة وانا بعاين فيها ......
_________
تعالو شوفو بفرحتي لمن سليم قال انو حأواصل مدرسة ابدا ما صدقت كان نفسي اصرخ من الفرح بس حيقول البت دي جنت طلعت ملابس المدرسة من الدولاب وكويتهم من جديد اخر مرة لبستها كدا عمتو فاطمة قالت ما امشي المدرسة فطلعتها وجهزت شنطتي وجزمتي و اي حاجة كانت جاهزة بعد خلصت مشيت غرفة سليم للنوم دخلت لقيتو قاعد في السرير وشغال بتلفونو
سليم: خلصتي تجهيز
ملك: ايي
سليم: تعالي . ومشيت قعدت في السرير جنبو
سليم: خلينا ننوم عشان نصحى بدري
ملك: تصبح على خير
سليم: وانتي من اهل الخير يا كل الخير . ابتسمت على كلامو دا ونومنا الصباح صحيتو وجهزت ليهو ملابسو ومشيت لبست انا وجهزت الشاي شربنا وطلعنا على المدرسة ودخلنا على المدير وسليم اتكلم معاهو بس بعد تعب اقنعو وحكى ليهو القصة بس بطريقة تانية والمدير اتفهم وقال اقدر اواصل كنت مبسوطة وطلعنا من مكتب المدير
سليم: يلا دي مصاريفك ودا المفتاح
ملك: شكرا
سليم: عفوا يلا امشي الفصل نتلاقى في البيت اوكي
ملك : اوكي خلي بالك من نفسك
سليم: وانتي خلي بالك من نفسي . ابتسمت ليهو وهزيت رأسي ومشيت الفصل
هند: ملك انتي عايشة
ملك: اتخيلي بس ههههه
هند: حمدلله على السلامة
ملك: الله يقبل حمدك
هند: لازم غبتي فترة طويلة
ملك: اخدتو حاجات كتيرة
هند: مبالغة بس بتتعوض وفي مراجعات وحصص نهارية ممكن تحضريها
ملك: ما بقدر
هند: ليه
ملك: انا متزوجة ولازم ارجع بدري عندي واجبات تانية نسيتي ولا شنو
هند: بالفعل والله بس تعملي شنو عشان تعوضي الفات
ملك: بحاول اعوض ان شاءالله
هند: ان شاءالله
خلصت اليوم ما انو ما فهمت حاجة لانو مشو كتير بس الحمدلله ورجعت البيت وسليم سألني من يومي وكدا وانتهى اليوم على كدا......
أحبك بقدر ما كنت سببًا وراء الإبتسامة اللاشعورية في وجهي.😊