قصة يتيمتى
البارت الواحد والثلاثون31
بقلم شذى المكرم
حياتي مع سليم ماشة بطريقة حلوة ماف اي مشاكل متفاهمين وطبعا عمتي معاي ما مقصرة خالص لحدي ما جا اليوم الحتفارقنا فيهو
عمتي نادية :ملوكة انا بعد دا حأرجع بيتي
ملك : عمتو يااخ اتعودنا عليكي
نادية :حتى انا اتعودت عليكم بس لازم ارجع حتقدري تعتني بحالك وبالبيت
ملك : بقدر بس حنشتاق ليكي حتمشي بتين
نادية : سليم يرجعني المغرب
ملك : بيتي الليلة وبكرة ممكن تمشي
نادية :احسن الليلة . حاولت اتحايل عليها بس كانت عند قرارها بعد سليم جا كلمناهو حاول معاها بس قالت ماشة وبالفعل بعد المغرب
سليم: نطلع
نادية :اوكي يلا يا ملك خلي بالك من نفسك وانا بجيكي كل فترة
ملك :تمام عمتي . ودعتني وطلعت
سليم :ما بتأخر
ملك : اوكي . وطلع عشان يوصل امو وذي كلامو ما اتأخر شكلو وصلها وطوالي رجع ما داير يخلينا برانا بالاخص انا بخاف لمن اكون براي في البيت
سليم: اها بتقدري على البيت براكي
ملك: بقدر عليها
سليم: اهم حاجة حأرجع غرفتي
ملك: خليك ذي اسبوع كدا هناك حتى ارجع
سليم: والله ولا ثانية وهسي ماشي اشيل ملابسي . ضحكت فيهو وكان جادي نقل ملابسو طوالي الغرفة ونام معانا فيها كنت قربت اتم الاربعين عشان اطلع كان باقي لي عشرة ايام بعد خلصتها طلعت واول محل مشيتو كان بيت عمو احمد عاملين كرامة صغيرة بمناسبة طلوعي بس لمة العائلة وكدا سليم ضبح بس وزعو على الجيران ما عاوزين جوطة وكدا
نادية: حمدالله على السلامة
ملك: الله يقبل حمدك
فاطمة: حمدالله على السلامة
ملك: الله يقبل حمدك
فاطمة: اديني احمد دا . اديتو ليها قعدت تلعبو طبعا بتريد احمد شديد بس ما بتطيقني انا وقعدنا نتونس
يقين: سليم ممكن تشوف لي الواتس حقي ما عارفة مالو. . طبعا قالتو قدام الناس كلها عشان ما يقدر يرفض اول حاجة سليم عملها عاين لي حمرت ليهو نظام الليلة ساعدها بس
يقين: سليم بتكلم معاك
سليم: نعم
يقين: دقيقة اجيك بالمرة عشان تشوفو لي. . شوفو القليلة ادب مشت قعدت جنبو وانا تقول دخلت النار وطلعت عاينت لي بنظرة استفزاز كدا نظام قاعده جنب راجلك طبعا ما قدرت استحمل طوالي مشيت المطبخ كانت سلوى قاعدة
سلوى: محتاجة حاجة يا ملك
ملك: لالا جيت اشوف لو عاوزة حاجة
سلوى: انتي ارتاحي اصلا انا قربت اخلص . قعدت اتونس معاها جا داخل سليم حمرت ليهو
سليم: عاوز موية
سلوى: ملك اديهو من التلاجة
ملك: حندا ليهو التلاجة قدامو خلي يشيلو بنفسو . رفع لي حاجبو
سلوى: حي بسم الله مالكم
ملك: قولت ليهو يجيب لي شوكولاتة ونساها فيلا ما حأديهو موية. . سلوى قامت تضحك
سلوى: عشان شوكولاتة يا ملك
سليم: شوفتيها شافعة كيف
ملك: موش شافعة الليلة ما بديك موية واطلع من هنا.. طوالي طلع سلوى فكت الضحكة بصوت عالي
سلوى: طردتي جادة كدا.
ملك: ليه ما اطردو
سلوى: سليم الماف زول بمشي كلمتو عليهو انتي تطرديهو والله قادرة. . وقامت تضحك تاني لمن ضحكت معاها شوية كدا ورصينا الغدا مع بعض وسليم جا شال الصينية برضو ما اديتو عين اتغدينا وبعد المغرب كنا راجعين خلاص
سليم: ملك اطلعي.
ملك: اوكي . شيلت حاجاتي وسليم شال احمد وطلعنا في الطريق
سليم: ملك
ملك: ........
سليم: بتكلم معاكي يا بت
ملك: المفروض تفهم انو ما عاوزة اتكلم معاك. . طوالي سكت ما فتح خشمو لمن دخلنا البيت
سليم: تعالي خلينا نحكي. . دخلت احمد الغرفة وختيتو في سريرو كان نايم وطلعت برا
سليم: انتي مالك
ملك: بتسأل مالك
سليم: ياااخ الزفتة دي نادتني قدام الناس اقول ليها شنو مثلا وكدا ناس البيت حيفهمو انو في حاجة حاصلة
ملك: م كان تقول طالع ولا اي حاجة انت ما عارف نظرتها لي كانت كيف كانت كلها استفزاز نظام شوفي راجلك جنبي ولا انت عاجبك الوضع كدا انو بنتشاكل فيك كدا . صرخ فيني لمن خوفت
سليم: مللللك حكمي في كلامك . قلبي عمل شوووو طوالي بالراحة انسحبت للغرفة وخليتو لو فتحت خشمي تاني يمكن يضربني غيرت ملابسي واتوضيت وصليت وهو للان ما دخل الغرفة طلعت الصالة نظام ماشة المطبخ لقيتو ماف يا ربي مشى وين لقيت نور الغرفة الزمان كان قاعد فيها فاتح عرفتو انو قاعد هناك اطمنت انو ما طلع من البيت رجعت الغرفة انا كمان زودتها معاهو شوية بس الحيوانة ديك استفزتني شديد انتظرتو كدا ما رجع الغرفة مشيت ليهو وطوالي دخلت لقيتو صاحي
ملك: ما تمينا حديثنا قبيل
سليم: اها تميهو
ملك: سليم انا موش قولت ليك تبعد منها
سليم: وما بعدت منها اها البحصل شنو. . صدمني بردو دا حرقني طبعا طوالي دموعي نزلو
ملك: اتزوجتها خلاص
سليم: قاعد افكر في الموضوع اصلا . طبعا بقول في الكلام ببرود وهو بعاين لي جوا عيوني. . طوالي بكيت
ملك: ربنا يهنيكم. . وطلعت برا الغرفة ورجعت غرفتنا وتميت البكي هناك كلو شوية وجا هو لقاني لسع ببكي
سليم: ياااخ ما تبكي خلاص
ملك: ليه ما ابكي بس وريني
سليم: انتي براكي بتجيبي الكلام لنفسك
ملك: اوكي انا غلطانة وشكرا وربنا يهنيك مع السنيورة بتاعتك
سليم: شايفة
ملك: موش دا كلامك قبل شوية
سليم: انتي براكي جيبتي سيرة الزواج وانا تميتها ليكي
ملك: سليم اطلع برا
سليم: ما كل مرة انا البنطرد اطلعي برا انتي . رفعت ليهو حاجبي نظام مستغربة
سليم: ما ترفعي حاجبك دا لانو بكسرني وانا حاليا زعلان . خلاني اضحك في عز بكائي
سليم: ايي اضحكي كدا ما تنكدي على روحك وعلي انا
ملك: انا نكدية يعني
سليم: والله يا ملك اول مرة القى هرمونات بعد الولادة . طوالي فكيت الضحكة لمن خلصت ضحك
سليم: عندك ضحكة كدا استغفر الله . قالها بطريقة درامية كدا تاني ضحكت والله سليم عسل خلاص بعرف يراضيني بطريقة كدا عجيبة من دون تكلف ولا اعتذار. اتصالحنا اخيرا
الايام بتمر واحمد قرب يتم سنة خلاص بقى يمشي شوية وشوية لكن بمساعدة حاجة
سليم: ملك
ملك: نعم
سليم: بما انو احمد قرب يتم سنة خلاص
ملك: اها
سليم: خليني افك ليكي التجميد لانو السنة الجديدة بدت والبرالمة حينزلو
ملك: عليك الله يعني حأنزل الجامعة خلاص
سليم: ما حابة تنزلي
ملك: حابة وبشدة كمان
سليم: تمام البدايات دي ممكن اخليهم ينزلوها ليكي تقريها من البيت والمهمات تمشي ليها اوكي
ملك: اوكي.. كنت مبسوطة شديد بالخبر دا بس فجأة اتذكرت حاجة
ملك: بس يا سليم واحمد اخليهو لمنو
سليم: اتكلمت مع امي بالخصوص دا قالت هي حتمسكو ليكي لمن تكوني في الجامعة
ملك: ايوااااا الحمدلله كدا حأكون مطمنة
سليم: اي وانا حأعمل ليكي ترحيل الصباح تمشو توصلو احمد لامي اصلا في شارعكم وبعداك يوصلك الجامعة . سليم كان مرتب اي حاجة بالخصوص دا
ملك: انت عارف انو انا بحبك
سليم: اول مره اعرف
ملك: خلاص خليك عارف من اليوم دا
طبعا نزلت السوق عشان اجهز للجامعة بس سليم خلاني اشتريهم عبايات وفساتين بس قال ماف اسكريتات كان دا شرطتو وانا وافقت عليهو ما كان عندي مشكلة ابدا المهم اقرأ الجامعة بس بعد خلصت اي حاجة
سليم: الاحد اول دوام ليكي ونسيت اقول ليك بكرة حنمشي بيتنا حتناقش في عرس سلوى. . طبعا سلوى اتقدم ليها سنيرها في الجامعة هو اتخرج قبل سنتين وهي في سنتها الاخيرة كان حكت لي عنو طبعا هو حبيبها
ملك: اوكي
بالفعل اليوم التاني مشينا بيتهم وحددو العرس بعد شهرين لانو تخريجها بعد شهر كدا الكل كان مبسوط بالحاجة دي.......
"أحبّك بالشكلِ الذي يمنحك الطمأنينة في الذهاب، والجرأة في العودة، والأمان فيما بينهما"❤😴