قصة يتيمتى
البارت الثاني والعشرون22
بقلم شذى المكرم
الصباح كنا راجعين خلاص صحيت بدري وقفلت الشنط خلاص شربنا الشاي وودعنا ناس البيت وقالو نفطر ونتحرك بس سليم رفض
ملك: حبوبة حأشتاق ليكي شديد
حبوبة: انا ذاتي شكلي حأشتاق ليكي يا بت . ضحكنا انا وسليم
ملك: يبقى لازم تزورينا هناك
حبوبة: بحاول مع انو كبرنا على الحركة
ملك: لساكي شابة يا حبوبة
حبوبة: شايف يا سليم مرتك دي عشان لسانها الحلو دا حبيتها . ضحكنا والله بالجد حأشتاق لحبوبة سليم دي ودعناها وطوالي اتحركنا المسافة عشان نصل خمسة ساعات وقف اقرب محل شال لينا حاجات نتصبر بيها لحدي ما نوصل
ملك: سليم عاداتكم حلوة لكن ضرب السلاح مخيف
سليم: دي كمان اكتر عادة بنتفاخر بيها
ملك: اي حبوبة قالت لي
واصلنا طريقنا لمن حصلنا البيت ماف زول اتفاهم مع التاني طوالي نومنا من تعب امس والسفر مع بعض صحيت انا العصر ميتة من الجوع دخلت المطبخ عملت مكرومة دي اسهل حاجه ممكن تتعمل هسي عشان تتأكل خلصتها كدا بقطع في الجبنة سامعة سليم بنادي مشيت ليهو
ملك: نعم
سليم: انا جوعان شوفي اي حاجة
ملك: عملت مكرومة اقعد حأجيبها هسي
سليم: عليك الله صحيتي متين لمن عمليتها
ملك: صحيت قبل شويه بس اقعد حأجيبها هسي
سليم: تمام . دخلت المطبخ وخصلتها وجيبتها وقعدنا نأكل خلصنا وعملت الشاي
سليم: انا عن نفسي لسع كسلان ماشي انوم
ملك: الصراحة انا ذاتي نعسانة
سليم: خلينا نرجع ننوم. بالفعل رجعنا نومنا صحينا بعد المغرب وطبعا الجسم مكسر لانو نوم العصر كعب جهزت حاجاتي تبع المدرسة وملابس سليم تبع الشغل وسليم اتصل على ناس البيت وقال ليهم اننا وصلنا بخير
نعمل تسريع للاحداث مر الاسبوع وما فيهو انا حاجة لحدي الجمعة ومشينا على بيت ناس سليم وقضينا اليوم هناك لمن خلاص راجعين
فاطمة: طبعا يا سليم مرتك للان ما عزمتنا على بيتك من اتزوجتو وقربتو تتمو سنة
سليم:معقولة يا عمتي بيتي بيتكم تنورونا في اي زمن
فاطمة: خلاص يوم الاتنين انا ونادية بنجيكم بعد الفطور
سليم: بس الاتنين ملك شغالة مدرسة
فاطمة: انت قول ما تجونا بس
سليم:عمتي معقولة بس الايام الرئيسية ملك شغالة مدرسة وكلها باقي ليها اقل من شهرين وتمتحن وفيكم تزوروها اي وقت وفيكم تبيتو حتى . لوت خشمها ساي المرا دي انا ما عارفة اعمل ليها شنو
نادية: فاطمة سليم كلامو صح خليها تخلص مدرستها ونمشي ليها
فاطمة: كويس
وطلعنا رجعنا البيت
سليم: بعد دا حأعمل ليكي معسكر مقفل ماف طريقة امتحاناتك قربت
ملك: بالجد حتساعدني
سليم بخباثة: بس اي شي وليهو مقابل
ملك: عاوز شنو . غمز لي طوالي فهمتو
ملك بخجل : سليم بقيت منحرف على فكرة
سليم: ههههههه والله العظيم انتي مرتي اها قولتي شنو
ملك: هل انت جادي
سليم: كل الجد . وقعد يتحايل علي واغراني بطريقة مميزة للمراجعة لمن واقفت على عرضتو وبالفعل بدأ معاي معسكر مقفل وكان براجع معاي بمشي المدرسة وبرجع بترتاح شوية وبنبدأ المراجعة لمن خلاص الامتحانات النهائية جات
سليم: بكرة حتبدي الامتحانات النهائية
ملك: اي والله
سليم: اخيرااا لانو سنتك دي واجهتك كمية مشاكل
ملك: اااخ بس مر على خير تصدق خايفة
سليم: حتعدي ان شاءالله ما تخافي
ملك: اتخيل عمتك فاطمة تطلع لينا من ورا الكرسي وتقول ملك ماف امتحانات لو مسكتي راجلك وبيتك احسن . وقعدت احاكي فيها وسليم ميت ضحك
سليم: يلا عالنوم عشان تصحي بدري
ملك: اوكي . ودخلنا ننوم والصباح كان اول امتحان سليم وصلني ووصاني بعض التوصيات
الحمدلله عدت جميع الامتحانات بخير اخر يوم نومت نوم اهل الكهف بعد المغرب
سليم: لازم نحتفل بالمناسبة دي
ملك: ييييس
سليم: قومي اجهزي . جريت الغرفة اتجهزت وطلعنا لفينا بالعربية واتعشينا برا واشترى لي كعكة بالمناسبة دي وكنت مبسوطة شديد بالحاجة دي وبإهتمام سليم وانا شوفت بعد دا حأهتم بيهو اكتر يوم الجمعة طبعا مشينا بيت ناس سليم كالعادة
فاطمة: انتي يا بت اهو امتحان وامتحنتي بعد دا جيبي ليكي ولد ينفعك
ملك: عمتو نحنا ما مستأجلين للخلفة والقاسمو الله بنلقى
فاطمة: يمكن كلام تهاني اختي صحي
نادية: تهاني مالا
فاطمة: يمكن مرت ولدك ما بتلد
ملك: عمتي كونو بلد ولالا دا حاجة بتخصني انا وسليم
فاطمة: بتردي علي كمان
ملك: ما برد بس دي حاجة ما بتناقشو فيها
فاطمة: حي يا بت احترمي نفسك
نادية: فاطمة عليك الله خلاص خلو اليوم دا يعدي بدون مشاكل
فاطمة: يعني انا بتاعت مشاكل
ملك: عمتو نادية ما قصدها كدا
فاطمة: انتي ما بتوريني اقول شنو فاهمة . جات يقين وسلوى من جوا
سلوى: مالكم اصواتكم عالية
يقين: اكيد البت دي السبب
سلوى: يقين ما كل حاجة تعملوها في ملك
فاطمة: ما هي سبب المشاكل كلها
ملك: هسي عمتو انا عملت شنو
فاطمة: حي يا بت
سلوى: مشكلتكم شنو
نادية: اقفلو السيرة دي بالله
فاطمة: كيف ما تستري على مرت ولدك انو ما بتلد
سلوى: دا كلام شنو يا عمتي
فاطمة: كلامي صح عندهم سنة وللان ما حملت اكيد عندها مشكلة
ملك: عمتي دي حاجة بتخصني انا وسليم تمام
فاطمة: انتي منو ذاتو هسي بزوج سليم لوحدة بتجيب ليهو اولاد . وقامت تنادي بصوت عالي في سليم لمن جا ومعاهو ابوهو وزوج عمتو فاطمة وولدها مصطفى شوفو المرة دي بالله ما بتخجل تتكلم كدا قدام الرجال
سليم: في شنو يا عمتي
فاطمة: مرتك فوق انها ما بتلد قاعدة تطول لسانها
سليم: عمتي دا كلام شنو
فاطمة: دا الحقيقة واهو بقولا ليك قدام ابوك انت لازم تتزوج ليك وحدة عشان تجيب اولاد يشيلوك في المستقبل ودي خليها لقرايتها الما منها فايدة دي
سليم: والوحدة دي يقين بتك صح
فاطمة: صح يقين بتي حتمسكك وحتمسك بيتك وحتجيب ليك اولاد يرفعوك . طبعا يقين بتتفصل ساي والباقيين بعاين لفاطمة بصدمة
عمو احمد: فاطمة دا كلام شنو
فاطمة: قولت شنو غلط هسي
سليم: عمتي مع احترامي ليكي بس يقين بتك انا ما عاوزها
فاطمة: انت لاقي بتي وين
سليم: بتك حتلقى الاحسن مني ان شاءالله بس انا مكتفي بمرتي لو بتلد ولو لالا وعلى ما افترض دي حاجة بتخصني انا و ملك بس ماف داعي زول تاني يتناقش فيهو
فاطمة: جاري ورا مرتك ذي الكاتباك كتابة
سليم: شكرا يا عمتي كتر خيرك بعد دا نحنا بنستأذن منكم ملك فينا نمش
ملك: تمام . شيلت شنطتي وطلعنا رجعنا البيت بقيت بتشأم من بيت ناس سليم مع انو التشائم حرام بس اعمل شنو كل ما اروح هناك بشتبك مع فاطمة دي بس المرة دي ما سكتا ليها وابدا ما بكيت لازم تقيف عند حدها طبعا سليم كان زهجان شديد ما سألتو من حاجة نهائي عشان ما ينفصم فيني لمن وصلنا البيت دخل غير ملابسو من غير كلام حتى انا وطوالي دخلت المطبخ عشان اكل غدا بدل الباظ هناك دا اقرب حاجة جات في بالي عملتها وناديتو
ملك: سليم الغدا
سليم: ما عاوز اكل
ملك: ليه ما عاوز تأكل
سليم: ملك على ما افترض قولت ليكي ما عاوز يعني ما عاوز . قالها بعصبية كدا طوالي زعلت منو وطلعت انا ذنبي شنو يعصب فيني كدا خليت الاكل في محلو ودخلت غرفتي القديمة وقعدت فيها زعلانة لمن نومت صحيت بسليم بصحيني
سليم: ملك قومي اكلي . زحيت ايدو
ملك: ما عاوزة
سليم: قومي خلي الدلع
ملك: على ما افترض قولت ليك ما عاوزة يعني ما عاوزة . قام يضحك شديد
سليم: بتحاكيني يعني
ملك: ما عارفة
سليم: معليش قبيل عصبت فيكي ما بقصدي كنت زهجان شوية
ملك: وتفضيهو فيني
سليم: معليش قومي هسي اكلي وانا بصالحك بعدين بطريقتي
ملك: وعد
سليم: وعد . وقومت معاهو ومشينا اتغدينا بعد الغدا
سليم: انا ما عارف الناس دي بتتدخل في حياتنا الشخصية ليه
ملك: يمكن حبا فينا . وضحكنا الاتنين
سليم: واضح انو حبا فينا . وقعدنا نتونس عشان ننسى الحصل.....
مِن بينَ نِساءُ الأرض جَميعُها , إختِرتُك أنتِ كي تكَونين , أميرتيْ جَميلتيْ , صغيرتيْ , حلالي❤