قصة يتيمتى
البارت الثامن8
بقلم شذى المكرم
بعد اليوم الشؤم داك الجمعة البعديها ما مشينا بيت ناس سليم حسيت انو ما عاوزني اتذكر الحصل يوم الاحد وصلني المدرسة بعد الفطور سامعين جوطة شديدة برا جانا الاستاذ
الاستاذ: يا طالبات حنطلعكم هسي لانو حاصلة مظاهرات برا ولو ما طلعناكم المتظاهرين حيقتحمو المدرسة وحيحصل عنف شديد تمام
الطالبات: تمام
الاستاذ: يلا بالراحة وماف تراحيل لانو الشوارع مقفلة
ملك: حنعمل شنو
هند: انتي خليكي معاي تمام
ملك: تمام بس نمش وين
هند: بيتنا ما بعيد للدرجة ديك نحاول نوصل اوكي
ملك: اوكي . مسكتني من يدي وطلعنا مع الطالبات برا المدرسة لقينا الدنيا دي جايطة مبالغة وبمبان عجيب
ملك: واااي هند عيوني وجعوني
هند: استحملي دا من البمبان خلينا نمش سريع . بقينا نحاول نطلع من الزحمة دي وبعد تعب طلعنا منهم بس كان في كم ارتكاز قاطعناهو بعد جرجرة وتعب حتى طلعنا من المظاهرات دي بس كان في شوية تجمعات نص ساعة ونحنا ماشين بأرجلنا حتى وصلنا بيت ناس هند
هند: هنداك ليهو بيتنا
ملك: اخيرااا . ومشينا ضربنا الباب فتحت لينا امها
ام هند: من قبيل هامة ليكي بعد شوفت الاخبار انو في مظاهرات
هند: طلعت الحمدلله امي دي صحبتي ملك
ام هند: كيفك بتي
ملك: كويسة الحمدلله . سلمت علي وفضلتنا جوا.....
________
وصلت ملك المدرسة ومشيت المكتب بعد الاستراحة فتحت التلفون ولقيت انو في مظاهرات حاصلة والبلد جايطة اول حاجة جات في بالي ملك لقيت انو في تجمع قريب من مدرستها طوالي اتصلت على المدير
المدير: والله الطالبات ديل طلعناهم كلهم
سليم: كيف الكلام دا وين المسئولية قولتو مدرسة خاصة
المدير: لو ما كان طلعناهم كان حيتأذو كان لازم نطلعهم . قفلت منو وشيلت مفاتيح وطلعت رجعت البيت بعد تعب لانو الكباري حتقفل بسبب المظاهرات والمواكب دي وصلت البيت لقيتها ماف " يا الله بتكون وين هسي"ركبت عربيتي مشيت على ناس امي
سليم: امي ملك ما جاتكم هنا
امي: لالا يا ولدي وين هي
سليم: ما عارف والله للان ما رجعت من المدرسة وضربت للمدير قال طلعوهم كلهم
امي: حترجع ان شاءالله او يمكن تضرب ليك
سليم: اول حاجة هي ما عندها تلفون وتاني حاجة ما حافظة رقمي
امي: دي مصيبة شنو دي . جات سلوى من الجامعة
سلوى: شوفتو البلد دي جاطت كيف
امي: اي والله وملك ما رجعت للان . عاينت لي مسافة
سلوى: سليم ملك حترجع ان شاءالله
سليم: ان شاءالله . بعد نص ساعة كدا ما قدرت اقعد بدون ما اعمل حاجة
امي: ماشي وين يا ولدي
سليم: بمشي بفتش عليها ما بقدر اقعد كدا وهي مختفية وتاني حاجة ما بتعرف البلد دي كويس لانها ما بتطلع
امي: يا ولدي الوضع جايط برا شديد ما حتلقاها كدا بالعكس حتأذي نفسك بس
سليم: يا امي واقعد كدا بس وانتظرها ترجع .
امي: ماف طريقة يا ولدي . قعدت وانا رأسي حينفجر من التفكير حتكون مشت وين والحاصل عليها شنو......
________
ملك: هند ارجع كيف انا
هند: لمن الوضع يهدا نشوف حل
ملك: انا عاوزة سليم
هند: اتصلي عليهو
ملك: ما حافظة رقمو
هند: كيف يعني راجلك وما حافظة رقمو . رفعت ليها اكتافي
ملك: ما عارفة
هند: والله انتي مجنونة هسي حنتصل عليهو كيف . قعدنا الاتنين نفكر بعد خمسة دقايق
ملك: المدير
هند: اي صح اكيد حيكون عندو رقمو دقيقة اجيب تلفون امي عشان نشوف
ملك: تمام . مشت جابت التلفون واتصلنا للمدير
المدير: قبيل اتصل علي برسل ليكم الرقم
ملك: شكرا .
هند: ما شاءالله قولتي لي طوالي اتصل على المدير . قرصتها قامت ضحكت المدير رسل لينا الرقم واتصلت عليهو في الاول ما رد
هند: تاني حاولي
ملك: تمام . تاني اتصلت.....
________
ما قدرت اقعد اكتر
سليم: امي انا طالع ادور عليها
ابوي: بطلع معاك انا
سليم: لالا يا ابوي انت خليك . تلفوني اتصل لقيتو رقم غريب طنشت
ابوي: خليني امشي معاك احسن
سليم: ابوي الوضع ما امان خليك انت . تاني تلفوني اتصل نفس الرقم رديت بزهج
سليم: الوو
....: سليم
سليم: ملك دي انتي . ناس البيت كلهم انتبهو معاي
ملك: اي دي انا
سليم: وين انتي ان شاءالله كويسة ما حصلت ليكي حاجة
ملك: سليم انا كويسة الحمدلله
سليم: وين انتي اجيكي
ملك: انا في بيت صحبتي مشيت معاها ما تجي لانو الوضع كعب بس انا كويسة الحمدلله
سليم: الحمدلله خليكي اوع تطلعي تمام لمن اجي ارجعك اوكي
ملك: اوكي
سليم: وخلي التلفون جنبك عشان اطمن عليكي كل شوية عشان اكون مطمن
ملك: اوكي باي . وقفلت منها اخيراا ارتحت لانو طلعت كويسة الحمدلله بالجد خوفت عليها اول مرة اخاف على زول للدرجة دي
امي: قالت هي وين
سليم: مشت مع صحبتها بيتهم
ابوي: الحمدلله طلعت كويسة
سليم: اي والله الحمدلله
امي: شايف كيف خوفت على الفاضي هسي اقعد ارتاح . يداب ممكن ارتاح بعد دا .....
_______
لمن اتصلت على سليم لقيتو كان ملهوف شديد كان ناوي يجيني بس منعتو وطمنتو اني كويسة وانا ذاتي ارتحت انو اتكلمت مع سليم وهو عرف مكاني عشان بعدين يرجعني قعدت مع ناس هند لحدي العصر اتصل لي سليم تاني
سليم: هسي الوضع هدأ شوية اديني اي زول يوصف لي البيت
ملك: اخو هند قاعد بديك ليهو
سليم: تمام . اديت هند التلفون ودتو لاخوها عشان يوصف ليهو البيت وانا قعدت مع ناس هند وامها وختو الغدا اتغديت معاهم بعد نص ساعة كدا وصل سليم وجا داخل قلبي رفرف من الفرح اخيرا شوفتو سلم عليهم كدا
سليم: نمش نحنا بعد دا
ام هند: ليه يا ولدي اقعد على الاقل اشرب شاي
سليم: مرة تانية ان شاءالله خالتي . لبست جزمتي وهو شال لي الشنطة ودعتهم وطلعنا في الطريق
سليم: ملوك انتي كويسة . ابتسمت ليهو
ملك: كويسة انا اها شوف بعيونك
سليم: الحمدلله ما خوفتي؟
ملك: من شنو
سليم: من المظاهرات دي
ملك: الحاجة الوحيدة الخوفت منها انو ما القاك تاني . عاين فيني ومسك ايدي ضغط عليها شديد وما اتكلم لمن وصلنا البيت استحميت و غيرت ملابسي وطلعت الصالة لقيتو قاعد
ملك: سليم انت اتغديت
سليم: لالا
ملك: وليه ما اتكلمت . عاين فيني ساي مشيت رصيت ليهو
سليم: وانتي ما حتأكلي
ملك: اكلت مع ناس هند . اكل هو ورفعت الصينية وجيبت ليهو الشاي
سليم: تعالي احكي الحصل كلو
ملك: ما عندك مشكلة. قعدت جنبو وحكيت ليهو الحصل كلو
ملك: لحدي ما حصلنا بيت ناس هند
سليم: ولقيتي رقمي كيف وانتي ما حافظاهو
ملك: من المدير
سليم: كويس انك فكرتي
ملك: اي ماشة اغسل ملابس المدرسة
سليم: ارتاحي ساي ماف مدرسة بكرة
ملك: كيف يعني
سليم: ما حأخليكي تمشي بكرة
ملك: سليم لالا يااخ
سليم: كلامي واضح والله بكرة ماف مدرسة لانو الوضع ما معروف . مديت شفايفي بس ما اشتغل بي نهائي
سليم: طرشقي ما علي بيكي بس كلامي واحد
بالفعل حرمني اليوم التاني من المدرسة بس اليوم البعدو بعد تعب حتى اقنتعتو انو امشي حتى وافق......
- وكأن السَلام إخَتار عِينيها وإسَتقر.😴❤