قصة يتيمتى
البارت الثاني2
بقلم شذى المكرم
العصر جا سليم راجع من المكتب ولا عبرني حتى دخل غرفتو ولا حتى سألني من حالي اصلا ما متوقعة منو لانو ما حصل سأل مني لمن زمن الغدا جا ناديتو وقعد أكل ولا حتى سألني من ايدي الفيها معجون دي لمن خلصنا رفعت الصينية واديتو الشاي شرب وكالعادة اخد مفاتيحو وطلع وانا قعدت منتظراهو كحال كل يوم
اليوم التاني كان الجمعة قومت بدري ونظفت البيت وبخرتو وغسلت الملابس وهو يداب صحى اصلا ما بصحيهو يوم الجمعة بصحى على كيفو شرب الشاي وقعد يشتغل بتلفونو لمن زمن الفطور جا اثناء ما بنفطر
سليم: جهزي نفسك بعد الفطور حنمشي بيتنا
ملك: تمام . خلصنا وقومت دخلت غرفتي وطلعت فستان ولبستو وقعدت اعاين لنفسي بالمراية حالتي كحالة زولة عمرها فوق الخمسينات قعدت اتحسر على حالتي وعلى الوصلت ليهو دموعي جات نازلة قعد تفكيري صوت سليم وهو بنادي وكان معصب مسحت دموعي وطلعت ليهو برا
سليم: ياااخ خمسية ساعة عشان تلبسي دا شنو دا يااخ طيري قدامي . مشيت معاهو وركبنا العربية وطول السكة خشمي وعندي وصلنا ودخلنا بيتهم دي المرة التانية اجيها سليم ما بخليني اطلع من البيت ولا هو بطلعني وقتي كلو في بيتي . نزلنا ودخلنا هو طوالي مشى محل الرجال وانا مشيت محل النسوان طبعا ما بعرف زول غير عمتو نادية ام سليم وسلمى وسلوى اخوات سليم ومرت اخوهو رندا بس مشيت عليهم
ملك: عمتي كيفك
نادية: كويسة الحمدلله كيفك بتي انا
ملك: كويسة الحمدلله . وقعدت جات سلمى سلمت علي حلو كدا بس سلوى ما بتريدني عشان كدا سلمت علي بطرف نخرتها وانا اتحسست بس سكتا وجابو الجبنة وطبعا معاهم عمتهم وبناتها وكلهم بعاينو لي بطريقة غريبة كدا اثناء ما بنشرب القهوة
عمتهم اسمها فاطمة: هسي دا شكل وحدة متزوجة ليها شهرين . عرفتها قاصداني
بتها: يا امي من البيت الطالعة منو حتعرفي
عمتهم: بالفعل . كلامهم ذي السم
سلمى: مالا ماشاء الله ملك حلات الدنيا عليها
عمتهم: وينو الحلا عليك الله غبشة ذي الشنو وتاني حاجة ما عارفة اخوي دا الخلاهو يرمي ولدو الرمية دي
نادية: فاطمة خلاص
فاطمة: ما خلاص ما عارف جابها لينا من وين المخلوقة دي ما معروف اصلها ولا فصلها من وين هسي
سلوى: عمتي صح كلامها لا حسب ولا نسب ذي الناس ابوي دا اصلا ما استخار . انا خلاص دموعي جات نازلة بس خشمي ما قدرت افتحو وهم بطعنو فيني بالكلام كدا
نادية: سلوى قفلي
سلوى: اقفل لشنو يااخ العقد حق سليم كلنا سكتنا وابوي ما خلانا نتكلم ونعارض بس بزمتك امي هسي دي مناسبة لينا
نادية: سلوى قولت ليكي قفلي
فاطمة: ليه تسكتيها كلامها صح هسي وين اهلها جدعوها هنا ولا حتى سألو منها
سلمى: وملك ذنبها شنو
فاطمة: ونحنا ذنبنا شنو نبتلي بيها هسي لو كان اختار يقين بتي مالا ما شاءالله عليها جمال واخلاقو ومتربية معاهو
سلمى: بس يا عمتي ملك طلعت قسمتو وخلاص . وقامت مسكتني من يدي
سلمى: ورح معاي . قومت معاها ودخلنا غرفتها يداب انفتحت في البكي الله وقدرتي
سلمى: ملوك ما تبكي
ملك: انا ذنبي شنو اذا كنت يتيمة
سلمى: ما تشتغلي بكلامهم
ملك: والله انا ما اخترت انو اكون يتيمة . جات حضنتني وطبطبت علي لمن هديت
سلمى: انسي كلامهم ما تشتغلي بيهم
ملك: اوكي يلا خلينا نمشي المطبخ
سلمى: متأكدة
ملك: اي . وطلعنا المطبخ قعدت اساعدهم بس وجودي ما كان مرغوب ابدا كنت بتعامل مع سلمى بس وسلوى كنت دقيقتين تجي ترمي كلمتين وتمشي ويقين برضو ما قصرت وعمتهم برضو اتمنيت اليوم يعدي بسرعة عشان ارجع بيتي على الاقل هناك زول واحد بس بهيني بعد الغدا جهزنا الشاي ووزعناهو وخلاص صلينا المغرب
سليم: نمش
ملك: تمام . ومشيت اشيل مطبقتي من غرفة سلمى
________
فاطمة: هسي يا ولدي دا زواج ليك
سليم: عمتي الموضوع انتهى واتزوجتها
فاطمة: اتزوج تاني اذا ما مبسوط هسي بناتي ديل عيبهم شنو . ما ردا عليها جات ملك طالعة
_______
جيت طالعة سامعة عمتو فاطمة بتحرش في سليم انو يتزوج علي الكلام كان على قلبي ذي الخنجر شافني ما رد عليها
سليم: يلا في العافية . وطلعنا رجعنا البيت رجعت لروتيني اليومي طبعا
دخلت غرفتي وقعدت افكر هسي لو كان امي وابوي عايشين كانت حياتي حتكون كيف كنت حأكون مبسوطة وكنت واصلت قرايتي وكان حيكون عندي شخصية بس الحمدلله ما معترضة على قضاء الله
مثل عصفور ضربته العاصفة ُ ، فلم يعد يُحسن الإمساكَ حتى بجناحيه ..💔