قصة لم يخلف بوعده
البارت السابع7
بقلم اسماء محمد
قلت لعثمان و انا ببكي ما تزوجوني محمد سالني السبب شنو؟ ما قدرتا اجاوبو،، نادا لي امي و قاليها فهمي بتك دي نحنا ادينا الرجال كلمة و ما بنرجع منها، اخير ارصصك من اتراجع من كلمتي، امي قاطعتو... عثمان قول استغفر الله ياسمين اختك لو انت ما حنيت عليها منو يحن عليها؟!! عثمان مرق غضبان مشى حكا لابوي و لاخواني ياسر قال ما تجبروها لانو الزواج ما ح ينجح عثمان رد ليو نحنا ما رجال كلمتنا تمشي ولا كلمتا، و احمد قال انا ما شفت عيب في محمد ياسمين مالك مع محمد؟؟ اساء ليك سوا ليك شنو؟ ما رديت قلت لامي ما عاوزة زول فوق راسي مرقيم برا،، مهند طلب من امي و اخواني كلهم يطلعو برا، فضلنا انا و هو، قالي ياسمين تذكري لمن كنت بزكك كنت بتدسي ورا محمد حتى لمن اضربك بتنادي ل محمد و لمن ابوي يجيب حاجة بتدسي لمحمد، انت و محمد متفقين و حلوين هسي مالك؟ شنو سبب رفضك ليو؟ قلت مهند قالي نعم،، ما تزعل مني تمام، انا بحب جار ياسر ال جا من الخرطوم و حضر مناسبة صلااح اسمو مؤيد خريج لمن امورو تظبط ح يطلبني من ابوي........، مهند = يا الله، انت ما ياسمين اختي، قعدة تربطي مع الاولاد من وراي، بعد الكلام دا ما ح اقيف معاك صحي كلام عثمان انت مدلعنك اكتر من اللازم، لازم نضبطك عشان ما تنحرفي،،، مهند محسسني زي العاملة جريمة انا بس حبيت، على اساس انت ما بتحب ندى و لا بتتقابلو بالسر و.........(قطع فيني كف قوي عيوني بقت تشوف طشاش طشاش) مهند كان املي انو يقيف معاي حتى هو خسرتو 😔..... جاتني امي و حاولت تقنعني ابيت ليها و كنت منتظرة جية ابوي(ابوي حنون و بحبني و اكيد ح يقيف معاي) ابوي جا و كان عارف الحاصل عثمان كلمو بالموضوع، حكيت لابوي قصتي مع مؤيد بدت كيف و انو ما عاوزة غيرو قالي ياسمين بتقدري تتحملي تكوني مسؤولة من شتات الاسرة؟؟ سكتا مسافة لانو كلام ابوي لمسني من جوة، اسرتنا مترابطة و متفهمين بعض و بنحب بعض ما عاوزة حاجة تخرب العلاقة دي، ابوي ضربني بكلام كتيير و ما قدرتا ارد عليو لانو كلامو صح تقريبآ😁 و قالي اوع زول يسمع الموضوع دا ندفنو هنااا.....
__ طولتا ما فتحت الشبكة و ما بحضر تلفزيون كتير، كنت راقدة في غرفتي كدا سمعتا الاصوات برا عالية، لمن نزلتا لقيت خالتو وصال قعدة تتكلم بالتلفون و تبكي في اللحظة دي عرفتا انو في ضرب في الخرطوم في مشكلة حاصلة بين حمتي وبرهان.... (مؤيد🥹) قلبي ان شاء الله ما يمسك سؤ 🥹... مسكتا تلفوني فتحت الشبكة لقيت منزلين صور و مقاطع(حاجة مؤلمة شديد ، حاجة اقرب للخيال) معقولة عاصمتنا الجميلةة؟!! اتصلت لمؤيد، رد قالي الضرب بدا من امبارح، الوضع ما يطمن قررنا نمشي بيت جدي في عطبرة قلت الحمد لله سلم لماما و خلي بالك على نفسك.......( حمد لله كدا اطمنتا على مؤيد ) اتمنيت لو كنتا في الخرطوم كان رصصوني زمان و ارتحتا،، ناس البيت صرفو النظر عني و انشغلو بوضع السودان،، مرت تلاتة شهور و الحرب متواصلة و مؤيد سافر مصر لانو ناوي يطلع برا السودان.......
تلفوني ضرب لقيتو مؤيد قالي انا هسي في مصر انا و اصحابي قررنا نسافر اوربا، الشي المطمني انو ماشين بطريقة رسمية، مؤيد قعد في مصر تلاتة شهور للاسف ماا اتوفق في السفر لانو الورق حقو ناقص..... كان زعلان شديد و على طول مكتئب، لكن لمن يتكلم معاي بيضحك و يرتاح🥰
•••في يوم من الايام اتصل علي مؤيد فيديو كول و قالي ياسمين انا بحبك و للابد، انا مسافر بالتهريب يمكن ما ارجع سامحيني، ما تقاطعيني.... انا ما اقدر اعيش كدا عاوز احقق احلامي، قلت ليو انا ما موجودة في احلامك؟؟ قالي انت عمري، لكن بوعدك ح ارجع نكمل حبنا و انت اوعديني انك ح تنتظريني، وعد ح انتظرك عمري كلو 🥹 (زي ما قلتا ليكم الحب اوهامو كتيرة😂 ما علينا ) بعد فصلتا من مؤيد جاتني خالتو امل(امل ام ندى و محمد) قالت لي بكرة ماشين السوق نجيب الدهب و قريبات نبدا نشتري الشيلةةة،، اتجمدتا في مكاني و آخ يا ياسمين ح نرجع لنفس السيناريو.............