قصة بالحلال
البارت الاول 1
بقلم ثناء معتز
ناايمة في أمان الله .. بس ما احس ليك الا بي زول بكورك في اضاني : ثناااااء
قمت بكورك مخلوعة : وووووب علي المات منو
لقيتا سحر اختي .. بقيت بعاين ليها مسااافة وهي بتضحك .. بالله قريب النص ساعة ساكاها ف البيت .. جاتنا امي تنقنق : انتي ي بت عروس ولا شيء تاني ناوية تمشي حفلة عرسك ببجامتك ولا كيف ي ثناء
قلتا ليها : والله ي امي لو بتسمحي لي ما عندي اااي مشكلةومعاها الشحااطة
فنتني بالشبشب وهي بتكورك : يشحط عمركامشي اجهزي خلينا نطلع سريع يلا
فعلا مشيت استحميت وجهزت .. وبعد داك طلعنا على الكوفير .. اول ما وصلنا لاحظت لي محل طعمية جنبوولااا اتفاهمت طوالي مشيت اشتريت وجيتهم
لقيت امي منتظراني وبتعاين لي كدا
قلتا ليها : شنوو ي حلوة تبقا علي عرسة وعدم طقة ارح ارح
المهم دخلنا وبدو يستلموني من شعر لميك ااب لتلبيس زفاف..
في المسافة دي خليني احكي ليكم عني شوية
اسمي ثناء .. عمري ٢٢ سنة وقريت إدارة اعمال وحالياً اتخرجت لي سنتين وشغالة .. ابوي اتوفى من وانا صغيرة .. وامي محامية كبيرة ومعروفة وشغلها ماشي وما محوجانا لشيء .. اما سحر اختي دي اصغر مني ولسا م اتخرجت .. قبل فترة بسيطة اتقدمو لي وزي ما شايفين الليلة العرس .. طبعاً انا العريس دا بعرف انو هو ود صحبة امي وعمرو ٢٥ سنة واسمو عمار .. هو طبيب أسنان وشغلو ماشي تمام حتى عندو عيادتو ملكو .. وشفتو يوم الخطوبة .. غير كدا ما بعرف ااي شيء
شويات كدا بعد ما جهزوني .. قلتا ليهم نفسي في قهوة
الكوفيرة قالت لي : ماشاءالله عليكي تنشافي صغيرة ما متوترة انتي ؟
قلتا ليها وانا باكل من الكيك القدامي : اتوتر لي ماشة حرب انا
غايتو قضيتا ونسة مع ناس الكوفير وكدا ..
وشوية كدا نسمع البوري .. الكوفير كلو بقا بتجارا اما انا شربت اخر حاجة فضلت في كباية القهوة
شوية كدا وكلهم طلعو .. وانا باكل في الكيك وما مركزة سمعت صوت الباب دق قلتا : اتفضلي
على اساس قايلاها واحدة من الكوفيرات .. لقيت دا عمار .. دخل وقال : السلام عليكم
عاينت ليهو وانا شايلة الكيك بي يد وماسكة الفستان بي يد ومنظري زبالة
قال لي وهو مبتسم ابتسامة خفيفة كدا : مبروك علينا
رديت ليهو : الله يبارك فيك وعقبالك ياخ
بقا بعاين لي .. وانا بعاين ليهو بعد شوية استوعبت القلتو وهو ميت ضحك
قلتا ليهو : تجرب الكيك دا
قال لي : طقييت طقييت انا ملاان
قلتا ليهو : انت عريس ممتاز والله بالله بعد الحفلة خلينا نمشي ناكل لينا شيء ظابط كدا
قال لي : كويس هسي يلا
عملنا حركات العرسان ديك المسكة ونازلين سوى .. المهم ركبنا العربية وإتحركنا على الصالة
لما وصلنا وكانت الزفة وكدا .. لغاية ما وقفنا في نص الصالة وبدينا نرقص سلوو ..
كنت برقص وانا ساكتة وبعاين بعيد .. ااي هبلة واي شيء لكن لا مجال مع الخجل يخوانا .. قال لي في اضاني : ثناء
رفعت عيوني وعاينت ليهو .. فضل يعاين لي مسافة في عيوني قبل ما يقول : مبسوطة انتي ؟
ابتسمت قبل ما اقول ليهو : الحمدلله
عاين لي مسافة قبل ما يقول : بعرف انو عرسنا جا فجأة حتى نحن م بنعرف بعض كويس بس مع الايام كل شيء حيبقا تمام اخر النهاية بقينا راجل ومرتو ولا كيف !!
ضحكت قبل ما اقول ليهو : صح كلامك واكيد ان شاء الله كل شيء حيكون تمام
شوية كدا والربة بدت .. انا بالله فجأة في نص الصالة شلت نضارة ود خالي الشمسية .. ويااا طاسو جاك زول .. رقصصصت رقيص .. الناس دي ما فهمت اي شيء بس العالم كلو بنطط بي العروس الي هي بِسْم الله ماشااءالله انا
بعد خلصت الحفلة .. مشينا انا وعمار على فندق لانو مسافرين تاني يوم.. اول ما دخلنا الغرفة كدا .. انا مشيت وقَعَدت في الكنبة .. جاني وقال لي : انتي مش قلتي نطلع بعد الحفلة
قلتا ليهو : يبب
قال لي قومي سريع سريع غيري وانا زاتي حغير ونطلع
قمت جرري اقرب بنطلون جينز وبلوزة لبستهم حتى الطرح دي ما عندي معاها شيء كتير .. ونحن طالعين وقف وقال لي : حتمشي كدا ؟؟
قلتا ليهو : ااي مالا اللبسة شينة
ضحك وقال لي : ابداً حلوة بس يعني البلوزة قصيرة شوية والطرحة ماف وانتي مرة راجل هسي ولا كيف
عاينت ليهو مسافة تاني مشيت لبست واحدة من طرحي النوعية الطوووويلة ديك حتى ما احتجت اغير البلوزة .. وعلى طول ركبنا العربية ومشينا شارع النيل
جاب من كافتيريا كاتي علبة لقمة القاضي ديييك بالشوكولاتةوقعدنا جنب النيل وطلبنا شاي لبن ..
ونحن بنتونس سوى .. سألت عمار : الاقترح عليك فكرة العرس منو !
قال لي : والله ي ثناء امي الفتحت الموضوع وانا اصلاً ما كنت مركز مع الحاجات دي بس لما سألت منك حبيت اجرب
قلتا ليهو : سألت مني !! حبيت تجرب !! كيف كيف
قال لي : عديييل اي زول كان بقول لي دي محنونة يا زول وحتجيبا راجعة في يوما ودي شافعة لسافقلتا اسرقك اربيكي عسى ولعل أخفف على امك شوية وأكسب اجر
قعدت اضحك وقلتا ليهو : انت حتشوف كتييير لسا اصبر
بس
بعد ما شربنا شايينا وكملنا ونسنتنا رجعنا الفندق .. كانت الساعة قريب ٢ صباحاً .. دخلت استحميت وغيرت وجيت فرشت المصلاية .. قبل ما اصلي كدا التفت على عمار وقلتا ليهو : قوم نصلي العشاء سوى
قال لي : انتي بتصلي !
بقيت بعاين ليهو كدا : لالا ي اخوي من بقية كفار قريش دا شنو السوال دا
قعد يضحك وجا وقف قدامي وصلا بينا ..
بعد خلصنا كدا قعد مساافة وهو بدعي .. انا بعد ما خلصت دعاء رفعت عيني عاينت ليهو وهو كان لسا بدعي .. فضلت اعاين ليهو مسافة ..
زي اليوم دا وبالذات في حالتي دي كونو انو ماف علاقة بتجمعني بيهو مسبقاً كان .. فمفروض اكون في حالة قلق وتوتر .. بس من شفتو كنت مرتاحة شديد والسبب شنو م عارفة يمكن لانو بجد الحلال دا شيء مختلف
مع انو طول عمري كنت بتمنى اعرس زول بحبو .. بس حتى الانسان الحبيتو ما اتوفقنا سوى .. وسبحان الله جيت عرست زول حتى علاقة صحبة عادية ما بتجمعنا .. وبقينا راجل ومرتو زي ما قال ..
وانا سرحانة كدا .. ما انتبهت الا وهو بقول : ي بت سرحانة وييين انتي
ابتسمت بهدوء وقلتا ليهو : ولا شيء
عاين لي مسافة قبل ما يقول : اا طيب ،، ننوم بعد دا ؟
قلتا ليهو : يلا
وفعلاً اول ما قمنا ورقدنا من التعب نمنا طوالي .. صباح تاني يوم فتحت عيوني وهو كان نايم لسا .. بقيت بعاين ليهو مدة .. م قادرة احدد في شنو الحاجة الوحيدة المستوعباها حالياً انو دا راجلي ..
ابتسمت كدا .. قبل ما اقوم اصحصح وارجع اصحيهو .. اول ما فتح عيونو قال لي : صباح الخير
قلتا ليهو : صباح النور ،، قوم قوم يلا علشان م نتأخر على المطار
قال لي : طيب
وقام بسرعة مشا دخل الحمام .. بعد طلع جا لقاني قاعدة وبسرح في شعري .. جاني وقعد في الارض جمبي قبل ما يقول : ثناء
عاينت ليهو وقلتا : ايوة !
قال لي : انا عايز سفرتنا دي نرجع منها ونحن عارفين بعض كويس ،، ما تختي في بالك اني راجلك وتعملي حواجز البنات والخجل والخوف دي ،، اعتبريني صحبك واتعاملي على الاساس دا لغاية ما تاخدي علي ،، وانا ما مستعجل على شيء لي علاقتنا شوية شوية
بقيت بعاين ليهو مسافة ويمكن بديت استوعب لي من وقت ما جينا سوى وصلينا انا حاسة اني مرتاحة .. باين انو في حاجات حلوة كتيرة منتظراني معاهو ..
قلتا ليهو : حاضر
قام وباسني في راسي قبل ما يقول لي : بعد تخلصي خلينا نفطر ونطلع طوالي ..
ما عارفة حصل لي شنو لحظتها من الحركة دي بس انبسطت منو شديد..
مشينا فطرنا وإتحركنا على المطار .. كنّا ماشين كدا وانا بعاين عشان اشوف حنقيف وين .. شوية كدا وحسيت بحركة يدو جمب يدي وبعدها مسكها .. التفت عليهو وعاينت ف عيونو مسافة .. استغربت من حركتو بس م سألتو .. شوية كدا واعلنو عن رحلة ماليزياكانت على طيارتين .. من السودان والطيارة بتنزل في دبي.. بعد داك من هناك بنطلع طيارة على ماليزيا .. وَيَا سلاام من ماليزيا وكوالا لامبور
اول ما ركبنا كان محلو على الشباك وانا في النص .. التفت عليهو بحركة عفوية وقلتا ليهو ممكن اقعد جمب الشباك !
م بعرف الضحكو شنو لحظتها بس قال لي حاضر .. اتبدلنا المقاعد .. وربطنا احزمتنا وفضلنا ناخد وندي في الكلام مع بعض .. شوية واعلنو عن إقلاع الطيارة .. وانا بحب لحظة قبل ما تقلع لما تكون ماشة سريع شديد دي .. التفت لقيت عمار مغمض عيونو شديد
ضحكت وانا بقول ليهو : قول لي بتخاف النبي
ما رد علي وفضل لسا مغمض عيونو لغاية ما ثبتنا في السماء حتى فتح ..
قلتا ليهو : صباح الخير
حمر لي مسافة قبل ما يقول : ظريفة طبعاً
ضحكت وانا بقول ليهو : بتخاف من الطيارة
رد علي : لا بس لحظة الإقلاع والهبوط ديل م بحبهم
قلتا ليهو : اهاا
قال لي : بالمناسبة اها م وريتيني خطتك للشهر دا شنو
قلتا ليهو : والله انا عندي فكرة عمومية كدا بس عن ماليزيا بس م بعرف الأماكن فيها كويس ووين الحتات السمحة وكدا ،، بس انت عارف صح !
عمار : لا ماشي الفلف ساي
ضحكت قبل ما اقول ليهو : مش انت ! بتكون
بقينا بنتونس كتير .. وشوية حسّيت روحي غفيت .. ما صحيت الا على صوت عمار وهو بقول لي : ثناء جابو الاكل ،، اكلي ليك حاجة لانو قبيل م اكلتي كويس
فتحت عيوني وانا بقول ليهو : كويس
اكلت وشربت لي عصير .. بعدها م جاني نوم بقيت بتلفت ساي ولسا كان فاضل قريب النص ساعة عشان نصل .. التفت يميني لقيت عمار نام .. رجعت عاينت بجهة الشباك وانا بفكر .. شنو الحيحصل .. ولقدام كيف حنكون انا وعمار .. م بعرف اذا كانت موافقتي على العرس كلو صح ولا لا نظراً لشكل علاقتنا الاصلاً ما بدت الا بعد العرس .. بس بتمنى شديد انو انبسط في حياتي الجديدة دي ..
" تسريع الاحداث "
بعد وصلنا ماليزيا .. كان الوقت ليل .. اتحركنا على الفندق .. وبصراحة كان اقل ما يقال عنه خرافي .. طلعو لينا الشنط على الغرفة ونحن كمان طلعنا .. انا اول ما دخلت اتحركت على الحمام اتوضيت وانتظرت عمار يتوضى .. صلينا سوى .. بعدها من التعب نمنا طوالي ..
"صباح تاني يوم"
صحيت الصباح بحركة عمار .. لما عاي
نت لقيتو برص في اكل جاهز في الطربيزة وحوليها كرسيين .. التفت عليهو ولما حس بي صحيت ابتسم وقال لي : صباح الخير ي كسلانة قومي كفاك نوم
سألتو بفتور : صباح النور ،، الساعة كم !!
قال لي : ١١ ص
قمت دخلت الحمام اتسوكت وغسلت وشي .. طلعت صليت قبل ما اجي اقعد واكل معاهو م اكلت كتير بس شربت لي عصير وقعدنا نتونس سوى ..
بعد شوية سألتو من اذا كان في واي فاي وكدا .. وراني واي فاي الفندق والباسويرد حقو ..
شلتا تلفوني ختيتو في الشاحن مسافة مشيت استحميت وغيرت .. سرحت شعري ضنب حصان لورا قبل ما امسك تلفوني وافتحو .. وصلت الواي فاي .. ولقيت اشعارات ف الفيس كتيرة استغربت الحاصل شنو .. دخلت لقيت عمار منزل مناسبة متزوج من ثناءابتسمت قبل ما اعمل لايك واكتب كومنت اقول فيهو (( ربنا يهنينا سوى )) فلقيتو عمل لايك لكومنتي وكتب اميين
رفعت عيوني لقيتو قاعد في الكنبة بعيد وبعاين لي ومبتسم .. ضحك مسافة قبل ما يقول لي : هسي عليك الله انتي قصيرونة كدا مرتي !!
رميت فيهو المخدة وانا بقول ليهو : ما تتفلهم قصر بس الفرق بينا ٣ سنين ي شيخ
قال لي وهو بزح المخدة من شوو : كدي تعالي تعالي هنا
جيت وقَعَدت معاهو في الكنبة ..
قال لي : رأيك شنو نلعب صراحة
قلتا ليهو وانا بعمل حركة سريعة برأسي : طوااالي لعبتي المفضلةبس اول سؤال عليك
قال لي : طيب ي ستي ،، اممم ،، اكتر حاجات بتحبيها شنو !!
رديت عليهو : الرياضة ،، والكتابة ،، الطلعات الأغاني الرقيص بكل انواعو بحب الشغل والتغيير دايماً يعني م بحب اثبت على روتين معين
عاين لي مسافة قبل ما يقول : بس لا سمح الله ما اكون انا ضمن تغييرك دا بكرا ألقاك طفشتي
ضحكت وانا بقول ليهو : ما تستبعد كلو وارد
حسيتو عاين لي بنظرة غريبة كدا .. ف سؤالي قلتا ليهو : السؤال علي ،، شنو اكتر حاجة بتكرها
قال لي : اني أتعلق بحاجة او اخت امل في حاجة وتروح ..
قال كلامو دا بنبرة حزينة كدا .. م عارفة فكرت في شنو لحظتها بس عاينت ليهو ف عيونو مسافة قبل ما اسالو : مالك !!
سكت مسافة قبل ما يقول لي : طيب ي ستي انا ح احكي ليكي ،، كنت بحب واحدة لينا ٤ سنين ،، وعلى اساس انو اول ما اموري تطبط ح اتقدم ليها ،، اختفت فترة طويلة زي حكاية شهرين وانا بفتش فيها ،، بعدها عرفت انها عرست ،، والغريبة اني لما قابلتها كانت مبسوطة ،، وحتى سلمت علي ببرود كدا ،، والله ي ثناء انا للحظة دي م فاهم هي سوت كدا ليه
زعلت على الحصل وقلتا ليهو : كلو لخير ،، بس ممكن أسألك سؤال
قال لي : اتفضل
قلتا ليهو بتوتر : انت بتحبها لسا
اعتقد انو هو لاحظ لتوتري دا .. ضغط علي يدي شديد قبل ما يبتسم ويقول لي : انا لو حاسي ولو احساس بسيط انو ممكن تكون ف حاجة ف قلبي لواحدة تانية م كان عرست لانو ببساطة كدا انا ح اكون ظلمتك معاي انا لما دخلت في العلاقة دي معاك ،، او الحياة الكاملة دي معاك كنت عارف تماماً اني عايز ابدأ من الصفر ولو حبيت تاني الحب دا كلو يكون من حقك ،، م تستغربي من كلامي دا بس الاهتمام اولويات وحالياً وبكرا وكل الحياة الجاية انتي اولى بالحاجة دي
ابتسمت مسافة وعيوني دمعت من كلامو .. ضحك وهو بقول لي : م تقولي لي بس انتي زولة درامية والحركات ديك
قرصتو شديد وانا بقول ليهو : غياااظ
ضحك وهو بقول لي : معليش معليش خلاص فكيني طلعتي جلدي في ضفورك ي بتنا
فكيتو وانا بضحك .. شوية كدا فتحنا فيلم وحضرناهو سوى .. او بمعنى أصح حضرتو انا لانو لما خلص الفلم بدون ما انتبه لقيت عمار نام .. بس كنّا قاعدين ف الكنبة .. اترددت اصحيهو ولا لا .. بعد شوية صحيتو خليتو يرقد ف السرير وتقريباً كان تعبان شديد ف قام ورقد ف السرير بدون م يقول شيء .. مشيت غطيتو وانا بعاين لملامحو مسافة .. م عارفة فضلت وقت قدر شنو بعاين ليهو .. بعد شوية انتبهت على نفسي وزحيت .. شلتا دفتري .. وفتحتو وانا بعاين لعمار مسافة .. شووية كدا نقلت نظري اتجاه الدفتر .. وانا قاعدة ف الكنبة بديت اكتب :
حياة جديدة .. وزول جديد .. وعلاقة جديدة في لحظة كل شيء اتغير .. انا المن بعد علاقتي الاولى والاخيرة والوحيدة .. والحب الحبيتو للزول داك .. م كنت قادرة أخش ف اي علاقة تاني او حتى احب .. بس علاقتي حالياً م عمار غير .. لانو دي م علاقة عادية .. نحن حالياً لامينا حلال وبيت واحد .. وما عارفة احساسي شنو بالظبط اتجاه الموضوع دا .. بس مبسوطة من البداية البديناها سوى دي .. وأتمنى يكون كل الجاي حلو زي البداية دي واحلى كمان .