![](https://blogger.googleusercontent.com/img/b/R29vZ2xl/AVvXsEiERYMRSjzNjGXeJHUR8GiXY4z6j7-0KdRCVnPYTx3RINAEDLf8jinXgseZ7eror4h3YeH-hzg-GgugBUi8DaESIAXpkXjmM6nZFy9ttU4H3IaHUw1cK-kg9qPHh0ctEgilbCMNsR9JMqZJ_MX9re5WtdNVA6Xxj6KOBs3iN9Ax7Abs1-nFJ-tOrPPjdi2U/s320-rw/img_1706443208570.png)
قصة بالحلال
البارت الثالث عشر 13
بقلم ثناء معتز
" عمار "
لقيت نفسي بقول بصوت هزيل وانا بعاين ليها ثناء
ابتسمت وهي بتمد لي يدها وبتقول لي : كيفك
لما مديت يدي وسلمت عليها .. ما حسّيت الا انو نفسي امسكها وما افكها تاني ..
الحب شيء .. والارتباط شيء .. بس انو زول يكون في يوم من الايام حلالك وملكك ويجي يوم تبقو قدام بعض زي الغرباء دا اصعب احساس قابلني في حياتي
سحبت يدها لما حست بي طولت وانا ماسكها مشت على امي سلمت عليها وعلى بقية القاعدين
وانا بعاين ليها كدا الدكتور جا مارق وقال لينا اتفضلو بتقدرو تشوفو المريض بعد دا وربنا يعافيهو
امي وداليا ومصعب دخلو طوالي وانا دخلت وراهم ..
كان التعب باين في وشو .. مشيت عليهو وانا بقول : ابوي معقولة لكن البتعملو فينا دا سلامات يا حاج شنو الحكاية
ضحك كدا وقال لي : قلتا اعمل ليكم حركات المسلسلات دي شوية يغمى علي وبتاع
ضحكنا كلنا .. الحاجة الحلوة في ابوي انو ما بيحب يعقد اي موضوع ولا بحب جو الزعل والتوتر .. ودي الحاجة الربانا عليها كلنا وشلناها منو ..
سمعنا صوت الباب بدق ..
امي قالت : اتفضل
جو داخلين خالتو ابتسام وثناء .. سلمو على ابوي وحمدو ليهو السلامة ..
ابوي كان بعاين لي ثناء قبل ما يقول : شنو ي بتي مشيتي كدا وما سألتي مننا تاني البركة في الحصل هسي دا وخلانا نشوفك
قالت ليهو : العفو ياخ يا عمو ابداً والله ما كدا بس يادوب جيت امس انا وما كلمت زول حتى ناس امي ،، وكفارة ليك وما على قلبك شر يا رب
ياخي انتو متخيلين معاي وانا شايفها قدامي وهي بتتكلم .. وانا سامع صوتها .
بعدها خالتو ابتسام قالت : نستأذنكم يا جماعة بنجي عليكم ف البيت وربنا يقومك بالسلامة يا الطيب
ودعونا ومرقو ..
ما قدرت في اللحظة دي اطلع من الغرفة وامشي اتكلم معاها .. بس ما كان نفسي تزح من قدامي ولا لحظة
" ثناء "
ونحن نازلين في السلم .. تلفوني ضرب عاينت لقيتا هند .. اول ما رديت جاني صوتها وهي بتقول : يااا بت الشنو اقول ليك تجي وما تورينا نعرف من الاستوري حقك يا رمة علي بالطلاق الم فيك الا اضبحك
قلتا ليها : شنو يا السفاحة روقي نتفاهم وبعدين عليك بالطلاق دي من متين كدي الراجل يا حليلو لسا ما عرسك
ضحكت وهي بتقول لي : حيوانة ،، وينك انتي هسي !!
قلتا ليها : والله برا البيت هسي راجعة
قالت لي : والله تحصلي البيت اقطع رجولك تجيني هسي
قلتا ليها : انتي م في الشركة يعني !!
قالت لي : لا ما مشيت الليلة المهم كدي تعالي لي
قلتا ليها : خلاص تمام مسافة السكة ..
بعد قفلت منها كلمت امي .. هي مشت على الشغل وانا قلتا اركب مواصلات بس اصلا البيت ما بعيد .. اول ما طلعت وقَعَدت كدا ركبت سماعاتي وفتحت لي غنية .. في جزء منها بيقول (( ساعة بعدو عني صعيبة همي الفوقي تب ما يضوقو ،، قاسية الفرقة ضقت لهيبا ما تلوموني اهدو وروقو ))
قفلتها طوالي وختيت التلفون جوا الشنطة .. دا شنو الحصل لي دا بعد ما شفتو !! لي !! لي حاسة اني عايزة انسى كل شيء وارجع ليهو .. انا حياتي بدونو ما حياة .. ايوة نجحت او اشتغلت ايوة اتجاوزت مرضي .. بس انا محتاجاهو .. في تفاصيل يومي .. عايزة احكي ليهو .. ابكي واضحك معاهو .. دايراهو يكون الزول البشاركني حياتي بالتفصيل .. لما وقف قدامي وسلمت عليهو .. كنت حاسة بشيء غريب .. للحظة الناس حوليني بقيت ما شايفاهم وما شايفة غيرو .. للدرجة دي !! للدرجة دي انا بحبو
لما وصلت نزلت .. واتمشيت برجولي مسافة لغاية ما وصلت البيت .. دقيت الجرس جاني اخوها الصغير فتح لي .. سلمت عليهو ودخلت ليها .. اول ما فتحت الغرفة قامت ناطة من السرير فيني وهي بتكورك وبتقول ليها في كلام انا زاتي ما فهمتو وانا بحاول اخد نفس
قلتا ليها : هند هو لو الشوق كدا اخير عدمو كدي زحي خلينا نتفاهم
ضربتني وحضنتني زيادة وهي بتقول : انطمي لمن اشبع منك كدي
بعد السلام والعوارة دي قعدنا نتونس سوى .. ضربنا لي شريفة وجاتنا هناك .. والسلام والكواريك والجوطة دي
شوية كدا جبنا إندومي وبيبسي .. وقعدنا للطقة ..
شريفة : والله لكن يا بتنا ماليزيا طلعت البت الجواك شوف بقيتي سمحة كيف
قلتا ليها : من يومي سمحة الله كمان
هند قالت لي : كانت سماحة سودانية بعد ما مشيتي اشتغل التحديث الجديد
ضحكنا ونحن بنتعاور كدا ..
شوية ومسكت تلفوني فتحت الاستوري بتاعي اشوف الناس الشافتو .. وانا بمرر كدا قريت اسمو .. (( حلالي ))
قلبي بقا بدق شديد .. قفلت التلفون وختيتو جمبي وانا بفكر مسافة ..
شريفة قالت لي : بت مالك ف شنو
قلتا ليها : لاقيت عمار
هي وهند بقو بعاينو لي كدا
شريفة : متين الكلام دا
هند : لمن قبل شوية قلتي لي برا البيت كنتي معاهو !! ثناء رجعتو لبعض
قلتا ليها : كدي روقي نتفاهم ،، وحكيت ليها الحصل
شريفة قالت لي : اها وبعد داك !! انتي مالك هسي !! مش على اساس نسيتي واتجاوزتي او
الموضوع بقا عادي !!
قلتا ليها : شريفة انا ما عارفة والله بس الزول دا غلبني عديل كدا يعني يوم الليلة دا حسيتو مسح الشهور الفاتت دي كلها ما زعلانة منو ولا اي شيء بس مشتاقة ليهو شديييد
شريفة : طيب هو قال ليك شيء
قلتا ليها : لا
هند قالت لي : عايني ي ثناء ،، الزول دا انتي لما سافرتي ما اديتيهو اي فرصة انو يصل ليك لانك غيرتي حساباتك ورقمك ،، حالياً اف انو رجع ليك !! حتصديهو تاني !! برضو حترفضي !!
سكت مسافة وانت بعاين ليها بس
شريفة قالت لي : طيب سيبك من دا ،، لو عرس انتي حتكوني تمام !! يعني الموضوع عادي !! لانو ي استاذة كدا كدا لو انتي ما رجعتي اكيد الا ما يكمل حياتو ويعرس ،، انتي عايزة الشيء دا
لما قالت كلامها دا حسّيت بطعنة في قلبي ومجرد التفكير بالموضوع خلاني خايفة .. قلتا ليها : لا ولا ممكن تحصل حاجة زي دي
هند قالت لي : خلاص اقعدي براك وفكري عايزة شنو وعلى دا قرري
عاينت ليهم كدا بدون ما اقول شيء وانا بفكر في الحيحصل .. معقولة نرجع تاني !! يعني هو لي هسي عايزني ولا لا
" عمار "
- تمام تسلم يا دكتور ،، طيب
كنت بتكلم معاهو في حالة ابوي .. وقال اننا ممكن نخرجو الليلة وبعد يومين نجي نكشف على حالتو تاني ولازم يخلي بالو من نفسو ..
بعد ما خرجناهو ورجعنا البيت .. دخلت على غرفتي قلتا اخد لي حمام .. شلتا تلفوني اختو في الشاحن وفتحتو ارد على الرسايل .. وانا بمرر في الاستوريات بسرعة .. وقفت لما قريت اسمها
دخلت على الشات وانا متردد ما بين ارسل ولا لا
في الاخر اتشجعت وكتبت ليها (( حمدلله على السلامة نورتي والله ))
ختيت التلفون وقمت اخد حمامي على كدا .. بعد طلعت صليت وأكلت لي حاجة .. لما رجعت مسكت تلفوني لقيتا لسا ما قرت الرسالة .. على كدا فضلت قاعد بس ومنتظر متين تفتحها وترد علي .
" ثناء "
قريب المغرب كدا طلعنا من هند .. وصلتني شريفة للبيت وبعدها مشت ..
لما دخلت لقيت امي وسحر قاعدين سوى وبتونسو .. مشيت وقَعَدت معاهم شوية قبل ما اطلع غرفتي ..
غيرت هدومي وصليت قبل ما اترمي في سريري بتعب .. كنت سرحانة مسافة وانا بفكر .. يا ربي معقولة نرجع !! وكل شيء يرجع زي ما كان والبينا يتصلح !!
شلتا تلفوني وفتحت الواتس بقيت برد على الرسايل .. كانت كتيرة شديد ..
وانا بمرر في القائمة وقفت ورجعت فوق شوية ..
قمت وقَعَدت تاني .. شلتا التلفون وختيتو تاني في محلو !! رسل لي !! عمار رسل لي !!
ربعت رجولي فوق السرير ورديت عليهو (( الله يسلمك ومنور بيك والله تسلم ))
ما تمت خمسة دقايق ورسل لي : كيفك !!
قلتا ليهو : تمام الحمدلله كيف انت !
قال لي : زي ما شايفة نحمدو بس
فكرت مسافة قبل ما اقول ليهو : مبروك لي داليا وربنا يسعدها ويتمم ليها على خير
قال لي : الله يبارك فيك تسلمي وعقبال ما نفرح بيكي كمان
لما قال كدا اتغظت شديييد وقفلت التلفون .. كيف يعني يفرحو بي !! قصدو اني اعرس الحيوان !! شوف دا عليك الله ..
بعد ربع ساعة كدا شلتا تلفوني ورسلت ليهو : امييين ياخ وليك برضو
وقفلت الداتا على كدا .. وقفت مسافة وطلعت على رسايل محادثة عمار معاي لفوق ! دا شنو دا !
ريكوردات كتيرة شدييييد مرسلها لي !! الريكوردات دي بتترسل ليها ١٠ شهور !!
وانا لسا طالعة وهي مابية تنتهي .. لغاية ما حصلت اول ريكورد كان مرسل تقريباً بعد يومين من ما انا سافرت وغيرت رقمي ..
!! كل الريكوردات دي هو كان برسلها !! حتى اخر ريكورد كان قبل اسبوع من ما انا اجي !!
جبت سماعتي ركبتها وبديت أسمعهم من اول واحد فتحتو وكان بيقول فيهو (( ثناء !! كيفك حبيبتي كويسة انتي !! اشتقت ليكي عارفة !! ما كنت عارف بموضوع سفرك ويوم عرفت جيت المطار عشان الحقك بس وصلت متأخر ولقيتك سافرتي !! على الاقل كان تخليني أودعك !! معقولة بس تمشي وتخليني كدا !! انتي عارفة كويس اني حا افقدك قدر شنو !! خلي بالك من نفسك ،، وخليكي متذكرة دايماً اني بحبك وحا افضل احبك ،، اشتقت ليكي من هسي بالمناسبة والله ،، ربنا يحفظك )) خلص الريكورد دا وانا عدتو كم مرة صوتو كان مبحوح وزي الزول الببكي
وبقيت بسمع في الريكوردات واحد ورا التاني .. كان بحكي لي كل البحصل معاهو في الريكوردات دي .. بوريني البحصل ليهو ف يومو قابل منو واتكلم مع منو .. اي حاجة عملها بيقولها وكأني معاهو !!
وانا لسا بس بسمع ومصدومة .. بعد حكاية ساعة وحاجة فتحت واحدة من الريكوردات كان بيقول فيها (( ثناء كيفك ،، انا عارف انو لما تسمعي الريكورد دا حا تتضايقي بس اتعودت احكي ليكي ،، انا قبل شوية جيت من بيت العزا ،، شذى ماتت يا ثناء ربنا يرحمها ،، كان عندها كانسر في الدم واتوفت ،، ادعي ليها بالرحمة ،، اها كيفك انتي وكيف حياتك وشغلك هناك ان شاء الله تمام ،، اشتقت ليكي ولو بتسمعي في كلامي دا ردي علي فاقدك شديد والله ))
وقفتو وقَعَدت ابكي مسافة .. قمت غسلت وشي وجيت رجعت تاني تميت سماع بقية الريكوردات انا للصباح ما نمت وبس بسمع فيهم كانو كتيرات شديد ..
فضل اخر واحد .. فتحتو وسمعتو وهو بقول (( ثناء ما نفسك تجي خلاص !! اشتقت ليكي انا !! والله الدنيا بدونك بايخة وباهتة شديييييد ،، المهم سيبك من الوجع دا قبيل وانا ماشي في الشارع لاقتني شافعة عاملة ضفيرتين اتذكرتك وضحكت ضحك ياخي ،، لكن بالمناسبة احلى فيكي انتي على العموم نفسي اغني ليك غنية كدا دقيقة بس ))
شوية وسمعت صوت الجيتار حقو وهو بيعزف وبيقول (( حقك علي ما كان قصدي اجرحك ،، يا ليت فيني الجرح والله ولا فيك ،، بدموع عيني جيتلك بصالحك ،، تفداك عين الدم لو هي بتبكيك ،، اسف انا اسف ،، قد حبي لك وقد ما جيت وما أجيلك انا ولهان ،، اسف وليت اسف لو تكفي لك او انها توصف احساسي وانا ندمانه )
وقف عزف وقال لي (( بجد انا اسف ،، اسف لاني كنت غبي لما ما قدرت النعمة الكانت بين يدي في وجودك ،، ثناء انا قدر ما حاولت افتشك في مليون واحدة غيرك ما لقيتك ،، انا اسف والله ندمان على كل العملتو دا وفاقدك شديد ،، أعفي لي لاني كنت واحد حيوان لما خسرتك ،، ولو ربنا رحمني كدا ورجعك لي ما حا أفرط فيكي ولا ثانية خليكي عارفة بس ،، بحبك والله العظيم بحبك ))
دا كان اخر ريكورد مرسل منو .. وانا بس ببكي وما قادرة اوقف .. سمعت صوت الباب فرفعت راسي لقيتها سحر .. اول ما شافتني كدا جات وقَعَدت جمبي وهي بتقول : يا بت مالك في شنو بِسْم الله !!
ختيت راسي في رجولها وحكيت ليها كل الحصل ..
سكتت مسافة قبل ما تقول لي : كدي قومي غسلي وشك وتعالي لي ثواني
فعلاً قمت كدا وجيتها ..
قعدت قصادي وقالت لي : ثناء اول شي جاوبيني ،، انتي بتحبيهو لي هسي ولا لا !!
قلتا ليها : ااي
قالت لي : طيب تمام ،، هو بحبك ولا لا
سكت مسافة وانا بعاين ليها
قالت لي : دي ما دايرة تفكير لانو كل البعملو دا عمايل زول بموت في التراب البتمشي عليهو مش بحبك وبس ،، بعض النظر عن كل الحصل ايوة كان حار شديد بس الفات فات ،، حتقعدو كدا لمتين !! ثناء انتي بتحبيهو وهو ميت عشان ترجعو لبعض ،، ما ح اقول ليكي ارجعي هسي طوالي بس لو جاك ما ترفضي واتفاهمي معاهو ادو البينكم فرصة ،، انا شايفة انو هو الفترة دي كلها اخد عقابو وبزيادة ،، وزي ما ظاهر هسي انو تاب ،، روقي كدا وفكري في كلامي كويس وفي الاخر القرار قرارك انتي ماف زول ح يجبرك على شيء ،، بس اختاري الشيء البخليكي مرتاحة !! حياتك بي عمار ولا بدونو !!
عاينت لي كدا مسافة بعدها قامت وطلعت من الغرفة ..
بعد مدة كدا قمت استحميت وغيرت قلتا ماف داعي انوم اجر اليوم بس وانوم بدري .. نزلت تحت لقيت امي مارقة ..
قلتا ليها : على وين !!
قالت لي : ماشة على ناس امل دي قالت الطيب خرجوهو بمشي بشوفو وبطلع على الشغل
قلتا ليها : خلاص تمام انا وسحر بنلحقك هسي عشان مرة واحدة ابارك لي داليا
قالت لي : طيب يلا
ومرقت على كدا .. طلعت وجهزت وشوية كدا مرقنا انا وسحر .. اول ما وصلنا ودقينا الباب فتحت داليا ..
سلمت علينا شديد ودخلتنا الصالون ..
انا بس بقيت قاعدة على أعصابي وما بعرف كنت منتظرة شنو !! اشوفو !!
شوية وجات خالتو امل سلمت علينا وقَعَدت جمبي وهي بتتونس معاي كتير ..
قالت لي : امك قبل شوية كانت معانا ومرقت
قلتا ليها : ااي لاقيتها وهي طالعة عليكم ،، انتي كيفك كويسة
قالت لي : تماام والله ي بتي بس فقدتك شديد مشيتي ولا سألتي من زول تاني
قلتا ليها : معليش حقك علي والله بس كنت مضغوطة مع الشغل وكدا
قالت لي : ولا يهمك ربنا يوفقك ويسعدك محل ما تقبلي
ابتسمت وانا بقول ليها : اميين تسلمي
شوية وسمعت صوت بيقول : اممممميييييي الشاااي خلص !!
قالت لي : دقيقة بس
وقامت ..
انا بس فضلت بعاين للباب ومنتظراهو يجي داخل .. لما سمعت صوتو غلبني القعاد عديل
شوية وسمعتو بقول : السلام عليكم
رفعت عيوني لقيتو جاي علينا وهو بيضحك .. سلم على سحر حتى جا يسلم علي .. قمت وسلمت عليهو بإبتسامة وانا بقول : وعليكم السلام ،، اخبارك
قال لي : تماام التمام انتي الحاصل عليكي شنو !!
قلتا ليهو : والله كلو تمام الحمدلله
بقا بتونس معانا شوية .. اول بمعنى أصح سحر هي الكانت بترد وانا بس بعاين ليهو وشوية انزل عيوني كلام ما قادرة اتكلم من التوتر الفيني
شوية وسحر قالت لي : نمشي بعد دا !!
قلتا ليها : طيب ارح
جينا نقوم عمار سألنا : ماشين بشنو انتو !!
قلتا ليهو : جينا بي ترحال وهَسي حنرجع بيهو
قال لي : ترحال شنو ي بت مجنونة انتي ارح قدامي بوصلكم
قلتا ليهو : لالا ماف داعي بنمشي عادي والله
سحر قالت ليهو : اقول ليك شيء يا عمار ارح ارح وديناعامل مكيف عربيتك السمح دا
قعد يضحك وقال ليها : بِسْم الله ماشااءالله عينك ما تطقو لي
بقيت بعاين ليهم الإتنين نظام وين بالصحوبية الفجأة دي
المهم لما ودعنا ناس بيتهم ومرقنا .. جينا نركب الاتنين ورا عمار قال : معقولة تخلوني زي سواقكم !! واحدة تجي قدام
عاينت لي سحر عايزة اتكلم قالت لي : اتفضلي اركبي قدام يلا
وطوالي ركبت ورا .. اتغظت منها كيف
ركبت قدام .. واتحركنا
شوية كدا قبل ما نحصل نص المسافة سحر قالت : عمار بعد اذنك نزلني هنا عندي صحبتي ماشة ليها انتو كملو
عاينت ليها مسافة نظام ياتو صحبة دي !! فهمت قصدها
قلتا ليها : ي بت صحبة شنو ياخي امشي ليها بعدين
لما عاينت لي عمار حسّيت بقلبي حيطلع من محلو لما لقيتو بعاين لي جوا عيوني .. قال : انا ما ح أخطفك بالمناسبة يعني !! تمام ي سحر وسلمي على صحبتك
قالت ليهو : الله يسلمك
وغمزت لي ونزلت التافهة
دور العربية ومشا .. اي زول فينا كان ساكت شوية وغير الشارع ..
قلتا ليهو : عمار نسيت بيتنا !!
قال لي : انا اخر من ينسى بيتكم يا استاذة خليكي ساكتة وبتفهمي لسا ما خليتي شفقتك دي
عملت ليهو بوشي حركة وانا بقول : نننينننييي سخيف
عاين لي وبقا بيضحك وهو بقول : ي حيوانة اسكتي عشان ما نعمل حادث هسي بسبب عوارتك دي شافعة
قلتا ليهو : براك ،، سوق من سكات
قال لي : حااضر ،، بس كدا
بعد مسافة وقفنا في شارع النيل .. نزل جاب كبايتين شاي وجاني .. عاينت ليهو نظام استعجل اتكلم وريني في شنو
قال لي : طيب ي ستي عشان ما أطول عليك عايزك تسمعيني وما تقاطعيني نهائي وبعدها لو ما عايزة ما تردي اخدي وقتك وفكري بعد داك تعالي ووريني قلتي شنو تمام
قلتا ليهو : طيب احكي
قال لي : انا عارف انو الحصل دا كلو ما كان مفروض يحصل ،، وانا غلطان يا ستي ،، بس يا ثناء دي ١٠ شهور !! لو انتي ما كان بتفرقي معاي او انا ناوي اكمل بدونك كان فعلاً كملت بس انا باقي عليكي ،، وطيلة الفترة دي انا ما قنعت من حكاية اننا حنرجع ،، وكنت متأكد انك الا ما تجي راجعة عشان اهلك ،، ايوة قفلتي كل الأبواب في وشيء بس شوفي هسي انتي وين !! قدامي ،، يعني كل العملتيهو دا لا منعني احبك ولا شالك من بالي انا اسف على كل الحصل ودي اول غلطة اغلطها وربنا يجعلها اخر غلطة ان شاء الله ،، بس انتي اديني فرصة عشان كل شيء يتصلح انا ما عندي اي استعداد اخسرك تاني وانتي تبقي بعيدة مني ،، والله كفاية ما عندي قوة اكتر من كدا ،، دا الانا عايز اقولو ي ستي فكري براكي برواقة وبعد داك ابقي وريني قلتي شنو تمام !!
عاينت ليهو مسافة .. شال الكبابي رجعها لست الشاي ودفع .. قبل ما يجي راجع يدور العربية وصلني البيت .. ودعتو ومشا ..
لما طلعت غرفتي كنت حاسة بإني نعسانة شديد .. ففضلت افكر في كلامو شوية وتاني ما حسّيت بنفسي وانا نايمة..
قريب المغرب كدا صحتني سحر ..
اول ما شفتها قدامي قمت حكيت عيني وصريت ليها وشي مسافة وانا بحمر ليها
قعدت تضحك وهي بتقول : اها احكي لي الحصل
قلتا ليها : سخيفة انتي ع فكرة
ابتسمت وهي بتقول لي : عيني في عينك كدا دايرة تقنعيني حركتي بإني اخليكم براكم ما عجبتك
بقيت بعاين ليها وانا بضحك بس
المهم حكيت ليها .. قالت لي : وانتي رأيك شنو !!
قلتا ليها : عايزاهو
قالت لي : وأها !!
قلتا ليها : وأها شنو ي سحر !! قومي اطلعي من اوضتي بس عايزة اكمل نومتي
قالت لي : حمارة خلاص هسي جيت اوريكي خبرية عجيبة
قلتا ليها : اها وريني
قالت لي : احمم بكرا هاني وأهلو جايين يتقدمو
قلتا ليها : لمنو
حمرت لي وهي بتقول : لي امي ،، حيكون لي منو يعني !!
ضحكت وانا بقول ليها : ياخي ربنا يسعدكم ويتمم كل شيء على خير خلاص طيري خليني انوم عشان بكرا يكون فيني حيل للشغل والمعطة الجايانا دي ي عروس
قالت لي : سمح اتخمدي ،، تصبحي على عرسي
ضحكت وانا بقول ليها : والله البايرة لمن يعرسوها دي مشكلة خلاص
فنتني بالمخدة ومرقت ..
ابتسمت وانا بعاين بإتجاه الباب وبقول : ربنا يسعدك بجد لانك بتستاهلي ياخي
قمت غيرت هدومي الكنت لابساها وصليت الفاتني .. جيت مسكت تلفوني وفتحت الواتس .. ما كان مرسل لي شيء
ولما فتحت الاستوري لقيتو كاتب (( اللهم اني خبئتها بين زحام دعواي فاكتبها لي ))
ابتسمت وانا بقرا فيها .. ختيت التلفون تميت نومتي وانا حاسة بإني مبسوطة شديد
صباح تاني يوم كان الجمعة قمت في الشغل والكلام دا .. لغاية ما جا المساء وجو هاني وأهلو ..
طبعاً هاني من دخل انا احمر ليهو ساي وهو بضحك .. وجو ناس عزمتهم امي منهم خالتو امل واولادها .. قدر ما عاينت بإتجاه الباب عمار ما جا .. زعلت والله
شوية وجاتني داليا قالت لي : ثناء في زول برا بسأل منك !!
عاينت ليها بإستغراب وانا بقول : منو !!
قالت لي : بري اول مرة اشوفو
قلتا ليها : دقيقة طيب
طلعت برا قدر ما عاينت ماف زول مشيت بورا على النجيلة كان في زول قاعد ومديني ضهرو بس الواطة ضلام وما كان ف شيء باين كويس
مشيت عليهو وانا بقول : عفواً ،، لو سمحت
لغاية ما وقفت وراهو .. قام والتفت علي عاينت ليهو شديد .. اتوسعت عيوني لما ركزت فيهو وانا بقول : عمار
مسكني من يدي وهو بقول لي : عيونو.