![](https://blogger.googleusercontent.com/img/b/R29vZ2xl/AVvXsEiERYMRSjzNjGXeJHUR8GiXY4z6j7-0KdRCVnPYTx3RINAEDLf8jinXgseZ7eror4h3YeH-hzg-GgugBUi8DaESIAXpkXjmM6nZFy9ttU4H3IaHUw1cK-kg9qPHh0ctEgilbCMNsR9JMqZJ_MX9re5WtdNVA6Xxj6KOBs3iN9Ax7Abs1-nFJ-tOrPPjdi2U/s320-rw/img_1706443208570.png)
قصة بالحلال
البارت الرابع 4
بقلم ثناء معتز
بعد نقاش طويل .. اتوصلنا لي انو يدونا مهلة اسبوع نظبط فيها كل المواضيع دي ونحلها .. ونحن طالعين من القسم وانا بتكلم مع ماما وبنتناقش في الموضوع .. سمعت صوتو وهو بقول : ثناء
التفت ولقيتو جاي علي قلتا بإستغراب : عمار
قال لي : لي ما كلمتيني انو جايبنك هنا !! في شنو مالهم معاك !!
امي هتدوو وهي بتقول ليهو : روق ما حصل شيء الموضوع حينحل بس اتناقشنا وخلاص هسي انتو ارجعو بيتكم وكل شيء بيتحل يا ثناء تمام
قلتا ليها : اوكيي ماما ،، يلا باي
ودعتنا ومشت .. التفت على عمار لقيتو بعاين لي كدا .. قلتا ليهو : عرفت من وين اني جيت هنا !!
قال لي : لما اتصلت ليك دا اصلاً كنت ناوي اجيك ف الشركة ،، وياهو طلعت وجيت ولاقوني هناك صحباتك كلموني ..
عاينت ليهو مسافة وانا مدققة النظر في عيونو .. كمية القلق الشفتها في وشو مخلياني ما عارفة اقول شنو اصلاً .. متين !! متين كل دا بقا في !! معقولة الشهر دا بس عمل فيهو كدا !! كيف !! ايوة انا اتعلقت بيهو .. بس بحاول بقدر الامكان ما اندفع شديد لاني عارفة لو حصلت حاجة ما حقدر اتجاوزها بسهولة .. او يمكن ما اتجاوزها ابداً
ابتسمت وانا بقول ليهو : انا تماام ،، والله تمام ،، بس لازم ارجع الشركة حكاية ساعتين وبجي البيت تمام !!
قال لي : طيب ..
قلتا ليهو : راجع البيت انت !!
قال لي : لا ماشي ألاقي اصحابي وكدا بس ما بطول يمكن لما تصلي تلقيني جيت
قلتا ليهو : طيب تمام
قبل ما امشي التفت وانا بقول ليهو : عمار
عاين لي وهو بقول : نعم !!
مشيت وقفت قدامو .. فجأة ضحكت لي ما بعرف .. بعدها قلتا ليهو : لا ولا شيء
ما عارفة كان نفسي اقول شنو بالضبط .. بس كان في شي جواي نفسي اقولو وما فاهمة هو شنو
رفع حاجبو وهو بقول لي : بتضحكي لي !!
قلتا ليهو : ساي بس يلا انا اتأخرت
وعلى طول مشيت ركبت عربيتي واتحركت
" عمار "
لما مشت .. فضلت واقف في مكاني مسافة وانا بعاين بإتجاه الشارع المشت منو .. ثناء .. اسمها دا كفيل بي انو يقلب موازين تفكيري كلو .. دخلت حياتي بالظبط قبل شهر .. بس سوت الما سواهو اي زول قبلها ولو قعد خمسين سنة .. ابتسمت مسافة وانا بفكر انو بجد هي لي .. يعني حقتي .. يعني اليوم طال ولا قصر اخر الليل هي بتكون معاي انا .. انا وبس ..
ركبت عربيتي واتحركت
" ثناء "
اول ما وصلت ودخلت جوا .. طلعت مكتبي .. ما تمت دقيقتين الشلة كلها جات داخلة
هاني : ي بت الحصل شنو !!
محمد : الموضوع اتحل !!
عبدالله : يا اخوانا خلونا نفهم شيء
حكيت ليهم الحصل .. هند قالت لي : كيف كيف الكلام دا
قلتا ليها : انا زاتي ما بعرف والله
شريفة : يا ستي كدي لقعدي وراجعي الحسابات والورق دا تاني برواقة
قلتا ليها : اي عايزة اعمل كدا ،، بس انا متأكدة متأكدة تماماً انو الورق دا لأخر لحظة ما فيهو ولا غلطة
محمد : ي ستي بتتحل هسي نحن نطلع نخليكي تشوفي شغلك تمام !!
قلتا ليهو : طيب
طلعو كلهم .. الا شريفة فضلت واقفة مسافة بعد ما مرقو قفلت الباب وجات قعدت في المكتب فوق قصاد كرسيني ..
قالت لي : ثناء
رفعت عيوني وانا بقول ليها : ايوة !!
قالت لي : اسمعيني ،، ما تشيلي هم الموضوع ،، بعدين مش قلتي ادوكي مهلة اسبوع ،، معناها بتقدري تراجعي اي شيء برواقة وبدون قلق ،، لسا الوقت قدامك ،، ولو عايزة اي شيء انا قاعدة
ابتسمت وانا بمسك يدها وبقول ليها : عارفاكي جمبي والله ،، تسلمي لي
بعدها هي طلعت .. وانا طلعت كل الورق والمعاملات وعقود العمل الاشتغلناها في كل الشهر الفات دا .. وبديت أراجع فيهم .. ما انتبهت للوقت الا لما جات شريفة وقالت لي : ي بت ما مارقة انتي ؟
قلتا ليها : لي !! الساعة كم !!
قالت لي : ٧ ونص الا
قلتا ليها : اييك ألزمن جرا ،، تمام انا طالعة استنيني
شلتا شنطتي وكم فايل كدا ،، كانو كتار فجات شالتهم معاي ،، وشلتا شنطة اللابتوب وطلعت ..
تحت وقفت معاها حكاية ٥ دقايق .. قبل ما اتحرك قالت لي : ثناء ،، صح دقيقة
قلتا ليها : ايوة !!
قالت لي : كيف انتي وعمار !!
ابتسمت وانا بقول ليها : كويسين الحمدلله ،، عندي معاك كلام كتير بس خلينا نخلص من موضوع لخبطة الحسابات دا ونقعد برواق تمام !!
قالت لي : تمام ي ستي خلي بالك طيب !!
قلتا ليها : تمام وانتي كمان
ركبت عربيتي واتحركت على البيت .
" عمار "
- يلا يا فرد لي بكرا
- قداام يا عريس ،، يلا يلا على بيتك بعد دا
ضحكت وانا بقول ليهم : احمم عقبالكم
بعد ودعتهم اتحركت ومشيت على البيت .. اول ما دخلت سمعت صوت من المطبخ .. مشيت لقيتها ثناء ومديانا ضهرها وشغالة ..
قلتا : احمم
التفتت علي وهي بتقول : جيت
قلتا ليها : لا لسا
ضحكت وهي بتقول : احمد ربك انو ماف مخدة هنا
قلتا ليها : غايتو انتي ومخداتك دي كرهتينا اي حتة فاناني بيها
قالت لي : امشي استحمى سريع عشان نتعشى سوى يلا
قلتا ليها : طيب تمام ،، اول مرة اجرب أكلك ،، الله يجيب العواقب سليمة
التفتت وحمرت لي مسافة .. بالله ما زدت ولا كلمة طوالي مشيت من مكاني على الحمام
خلصت سريع سريع وجيت قعدت معاها وبدينا ناكل سوى..
قلتا ليها : اها فهميني بالضبط الحاصل شنو !!
حكت لي ..
فضلت ساكت مسافة قبل ما اقول ليها : وهَسي حتعملي شنو وو؟
قالت لي : والله جبت معاي ورق كتير كدا وشكلي الليلة حا اساهر لازم أراجع الحاجات دي
عاينت ليها مسافة وقلتا ليها : حتنحل بإذن الله روقي انتي تمام !!
قالت لي : ان شاء الله يا عمار
بعد كملنا اكل .. جابت لي كباية عصير وشالت الصينية .. لما خلصت الكباية وانا داخل المطبخ شفتها بتغسل في العدة .. مشيت جمبها وقلتا اغسلهم معاها .. بقيت بحاول اقابض كدا التفتت وقالت لي : ما هو يا اغسلها انا يا انت الاتنين ما بينفع يا محترم
ولا اتفاهمت زحيتها وقلتا ليها : برا من هنا يا مديرة عندك شغل
ضحكت وهي بتقول لي : طيب تمام
" ثناء "
وانا قاعدة في البلكونة .. كنت براجع في الورق .. شووية اقوم واقعد وافكر وافتح اللابتوب .. وفايل ورا فايل براجع فيهم .. فكيت شعري وبقيت بلفو وبفكو كل شوية وانا لسا براجع .. ما بعرف بالضبط مرت كم .. شوية واسمع صوت عمار بيقول لي : الشاي يا مديرة !!
التفت لقيتو شايل كبايتين شاي لبن وواقف ..
ضحكت وانا بقول ليهو : والله جا ف وقتو ياخ
جا وقعد جمبي .. شلتا كبايتي وبقيت بشرب فيها وبراجع .. وملاحظة ليهو بيعاين لي بس عاملة رايحة .. بعد شوية اتوترت شديد من نظراتو عاينت ليهو وانا بقول : في شنو !!
ابتسم وهو بقول لي : لا ولا شيء ،، كملي كملي
قلتا ليهو : لا بجد !!
قال لي : طيب ممكن من وقتك نص ساعة بس !!
قلتا ليهو : الوقت كلو ليك يا باشا انت بس قول
ضحك وهو بقول لي : حناكة خلاص
قلتا ليهو : دا كلامك !!
قفلت الابتوب ولميت الورق نظمتو كدا .. قعدت وقلتا ليهو : اها وريني الحاصل شنو
عدل قعدتو .. ونحن اصلاً كنّا قاعدين في كراسي قصاد بعض .. قال لي : ثناء شوفي
قلتا ليهو : اها !!
قال لي : نحن لينا شهر مع بعض صح !!
قلتا ليهو : ايوة
قال لي : طيب وقبل العرس اصلاً نحن ما كنّا بنعرف بعض الا إسم بس صح !!
قلتا ليهو : ايوة بالضبط
قال لي : بس في شيء غريب
قلتا ليهو : كيف !!
قال لي : يعني ايوة نحن متزوجين زواج تقليدي ،، وايوة انا كنت بحب واحدة وشلتا فكرة الحب دي من راسي بعدها خلاص ،، بس ما عارف اوصلها ليك كيف ،، انتي !!
وبعدها سكت
قلتا ليهو : انا مالي !!
قال لي : ما هو انا لو فاهم بتكلم حاسي اني جايط كدا
قلتا ليهو : طيب شوف انا كمان ح اوريك ،، نفس الحاصل معاك حاصل معاي ،، ومعاك في مفهوم انو لينا فترة قصيرة شديد مع بعض ،، بس اخدنا على بعض سريع ،، تتذكر قبيل لما وقفت قدامك وضحكت ،، لما كنّا قدام القسم
قال لي : اي صح كنتي عاوزة تقولي شنو ؟
قلتا ليهو : نفس العايز تقولو انت يا عمارر ،، انو ما فاهمة الحاصل شنو بس
فضلنا بنعاين لبعض مسافة بعدها هو ضحك وقال لي : طيب ان شاء الله نعرف الحاصل شنو سريع
ضحكت وانا بقول ليهو : ان شاء الله
اتونسنا شوية بعدها انا رجعت لشغلي .. وعمار فضل قاعد معاي لغاية ما قمت ولمملت الحاجات عشان انوم ..
صباح تاني يوم صحيت بدري شديييييد جهزت وجهزت الشاي لعمار .. وطلعت طوالي بدون ما اصحيهو لانو هو اصلاً بصحى بالمنبه حقو .. اول ما وصلت الشركة طلعت على مكتبي وطوالي بديت شغل .. في ارقام حسابات ملعوب فيها والورق دا في زول مغيرو .. او مبدلو عديل بورق تاني .. يا رب دي مصيبة شنو دي .. شوية والشركة اتملت وجو كل الموظفين .. فجأة محمد جا داخل .. صبح وسلم علي قبل ما يقول : حضرة المدير ابوي قال عايزك
قلتا ليهو : طيب تمام
طوالي طلعت ومشيت ليهو .. دقيت الباب قبل ما اسمعو وهو بقول : اتفضل
دخلت طوالي .. سلم علي وانا قعدت ..
قال لي : ثناء ممكن تفهميني بالظبط الحصل امس شنو
حكيت ليهو..
قال لي : طيب انتي ما شايفة انو دا استهتار
قلتا ليهو : انا كنت فاكرة اني ممكن اكون غلطانة في شيء بس طلع كل الورق ملعوب فيهو وأرقام الحسابات حتى متغيرة ،، يعني في زول عمل كدا ما انا الكنت غلطانة بعدين الحصل دا حصل في الشهر الانا كنت فيهو مسافرة ما هنا
قال لي : حتى ولو ،، شغلك دا حساس وما بيسمح ليك بأقل شيء لانو بيعمل هسائر وسمعة للشركة صعب او ممكن تكون مستحيل انها تتحل بسهولة
قلتا ليهو : طيب اديني فرصة بس اعرف الحاصل شنو واحل الموضوع
قال لي : ما اظن اقدر انتظر لما تحلي الموضوع ،، اسف يا بتي بعرف انك زول فاهمة وقارية بس الموضوع دا ما بيتلعب فيهو فا حا اتطر اني اجيب مدير لقسم المالية جديد
فصلت بعاين ليهو حكاية دقايق وانا بستوعب في كلامو .. بعدها قلتا ليهو : طيب عن اذنك
قال لي : اتفضلي
بدون ما أتفاهم مع زول دخلت مكتبي وقفلتو علي .. قعدت في الكنبة وانا مغطية وشي بيديني .. دموعي نزلت .. ما بعرف لي .. دا عشان كلام
المدير .. ولا عشان الحاجة الهي مضايقاني اصلاً .. وانا في الحالة دي سمعت تلفوني بضرب .. قمت شلتو لقيتو عمار .. كنت حاسة اني محتاجة اسمع صوتو شدييد .. رديت : الو
قال لي : ثنوويتي
قلتا ليهو : عمار
قال لي : كيفك !!
قلتا ليهو : تمام وانت
قال لي : في شنو !!
قلتا ليهو : شنو !!
قال لي : صوتك دا مالو !!
قلتا ليهو : لا ولا شيء ،، بس تعبانة شوية
سكت مسافة تاني قال لي : متأكدة !!
قلتا ليهو : ااي ،، المهم انت طلعت !!
قال لي : ااي
قلتا ليهو : وشربت شاييك قبل ما تطلع !!
قال لي : ااي ما تخافي
قلتا ليهو : تمام طيب
قال لي : ضربت اشوفك كيف سريع لانو شغال هسي ،، يلا لبعدين تمام !!
قلتا ليهو : طيب تمام ،، سلام
قفل الخط .. سمعت صوت الباب دق فتحتو .. لقيتهم شريفة وهند ..
جو قعدو معاي وحكيت ليهم بالحصل ..
شريفة : لا كيف يعني حتخلي الشركة معنى الكلام دا صح !!
قلتا ليها : ااي
هند : لالا كيف يعني الزول دا ما جادي كيف تخلي الشركة !!
قلتا ليها : هند الشركة شركتو وكلامو في انو الشغل دا ما بيستحمل حاجة صح ،، حاولت اتكلم معاهو بخصوص اني حا احل الموضوع بس كان باين انو ماخد قرارو وخلاص
فضلو يعاينو لي مسافة كدا .. قلتا ليهم : خلاص خلاص ما تعاينو لي كدا ياخي
جو داخلين هاني ومحمد وعبدالله قعدو معانا وهم كلهم بتكلمو معاي بخصوص موضوع الشغل .. وشوية كدا محمد طلع يتكلم مع ابوهو .. بس برضو جا وقال لي : اسف بس والله يا ثناء مصر على رأيو شديد ياخ
قلتا ليهو : عادي ياخي م مشكلة بعدين بتتسهل وانا اصلاً زولة متزوجة بعد دا شغل الشركة دا ما بقدر عليهو
وضحكت .. مع انو الموضوع كان واجعني بس ما حبيت. اكتر كلام فيهو لااني عادي ممكن افتح ليهم بيت بكا لحظتها .. كان نفسي في الوقت دا اشوف عمار شديييد .. قمت لملتت حاجاتي وودعت كل الموظفين وطلعت سريع لاني بجد ما عايزة ابكي
رجعت البيت .. لقيتو لسا ما جا .. استحميت وغيرت .. قبل ما اخش المطبخ وانا بفكر اسوي للغداء شنو .. شوية وبديت اجهز فيهو .. بعدها عملت لي تحلية .. وعصير .. وطلعت بقيت بنضف ف البيت مع انو اصلاً هو نضيف ما محتاج .. بس انا كدا .. لما اكون متضايق او زعلانة من حاجة بحب اشتغل بقدر الامكان عشان ما افكر .. بعد خلصت تاني استحميت وغيرت .. وسرحت شعري ضنب حصان لورا .. لبست هيدباند زي حق الشفع لونو ابيض منقط بالاسود .. وانا اصلاً لابسة بجامة ميكي لونها ابيض بي اسود .. بجد ما عارفة كنت مالي اللحظة دي .. سمعت صوت الباب فتح وقفل .. عرفتو دا عمار .. شوية وجا داخل الغرفة .. عاين لي مسافة .. بعدها ابتسم وهو بقول لي : انتي كويسة ي بت !!
مشيت وقفت قدامو .. وانا بعاين فيهو كدا لقيت عيوني دمعت وبديت ابكي .. بكييييت بكييييت كل الفيني كنت ماسكة نفسي من قبيل .. بس نحن البنات كدا .. بوفضل كاتمين لغاية ما نحس انو في زول بسأل مننا ونحن حاسين انو ماف غيرو حينسينا الحاصل
بقا بعاين لي بخلعة .. مسكني من وشي وهو بقول لي : في شنو ي بت لي لي بتبكي الحاصل شنو مالك !!
حكيت ليهو بالحصل .. هو زاتو ما عرف يقول لي شنو .. مسكني وقعدنا في السرير .. حسّيت روحي مصدعة شديد .. فضل يتكلم معاي شوية بعدها ضماني عليهو وهو بمشي يدو في شعري .. وبدون ما احس لقيت روحي نمت
" عمار "
لما حسيتها نامت .. رقدتها براحة وغطيتها .. قمت استحميت وغيرت .. لما مشيت المطبخ لقيتا مجهزة اكل كتير وفي التلاجة عاملة تحلية وعصير .. عرفت انها ما حتكون اكلت مشيت طوالي الغرفة وفضلت واقف وانا بعاين ليها وهي نايمة كدا .. مشيت رقدت جمبها وانا مركز في ملامحها شديد .. وانا في قعدتي دي تلفوني ضرب طوالي شلتو طلعت برا .. لقيتا داليا اختي .. رديت عليها واتونسنا مسافة بعدها قالت لي انها جاياني ف البيت .. واصلاً الوقت كان بدري يادوب ٧ ونص
جاتني ودخلنا البلكونة .. كبيت ليها عصير وقعدنا نتونس .. سألتني من ثناء وكلمتها انها نايمة..
عاينت لي وهي بتقول : عمار
قلتا ليها : نعم
قالت لي : مبسوطين سوى ان شاء الله !
ابتسمت وانا بقول ليها : هي بسطة ساي يا داليا !! بجد انا ما عارف اقول شنو
قالت لي بحماس : كدي احكي لي
قلتا ليها : داليا ،، البت دي لغاية ما انا خطبتها ولغاية ما جا يوم العرس كل شيء طبيعي ،، لحظتي الطلعت ليها ف الكوفير عشان انزلها معاي ونمشي الصالة ما فهمت الحصل شنو ،، وكل يوم انا بحس انو الجوطة الجواي دي بتزيد ،، داليا انتي متذكرة موضوعي مع شذى وكيف انا تعبت بعدو وبعدت عن الامور دي نهائي ،، لكن البت دي بجد ما فاهم انا مالي معاها
ضحكت وهي بتقولي : لا بجد انت ما فاهم روحك مالك
قلتا ليها : اقسم ليك بشنو ما فاهم شهر واحد عملت فيني كدا !!
قالت لي : لانك يا متخلف بتحبهااا بتحبها
فضلت ساعة بعاين ليها قبل ما اقول : معقول في شهر
قالت لي : عمار طيب شوف ،، القصة في الحب ما انك حبيت الزول في كم ،، القصة في ان الرول دا حبيتو كيف ولي ،، ثناء دي انا بعرفها من زمان دايماً كنت بمشي مع امي لما تجي ماشة ليهم ،، ايوة نحن ما صحبات شديييد بس هي بتتحب من اول ما تقعد معاها سيبك منك انت ال ليك شهر وهي في وشك اليوم كلو
فضلت ساكت مسافة قبل ما اقول ليها : ما بعرف ،، يمكن كلامك صح
قالت لي : انت قلتا ليها حاجة زي دي !!
قالتا لي : لا لسا
قالت لي : وااي منك ود انت طيرة !! ومنتظر شنو يعني!!
قلتا ليها : ما بعرف ،، انا كنت مفكر في الكلام دا بس كنت شايف انو لسا يعني ما بعرف
قالت لي وهي بتضحك : عاين اصلاً من ما تتلخبط كدا وتبدا تجوط بالشكل دا اعرف انك حبيتها ودي ما دايرة كلمتين ورا بعض
فضلت بعاين ليها مسافة قبل ما اعاين بعيد وانا بفكر .. بعد حماية ساعة من الونسة وكدا ودعتني ومشت .. بعد ما قفلت الباب التفت لقيت ثناء واقفة وبتحك في راسا وبتقول : الجا منو
ضحكت فيها قبل ما اقول : صح النوم يا كسلانة ،، دي داليا اختي
اتوسعت عيونا قبل ما تقول لي بصوت عالي : ولييي ما كلمتني انها جات
قلتا ليها : روقي روقي عشان كنتي تعبانة بس
قالت لي : امم ،، اي والله
مشت غسلت وشها ولما جات لقتني ختيت الأكل .. اكلنا سوى وبعدها حلينا ونحن بنتونس سوى ..
لاحظت ليها سرحت مسافة .. قلتا ليها : احكي لي في شنو
التفتت وعدلت قعدتها قبل ما تقول : شوف ي عمار
قلتا ليها : احكي لي
قالت لي : انا ما بحب اقعد ساي ،، وبما انو اصلاً من زمان في شيء ف بالي نفسي اعملو ف هسي انا فاضية ودايرة أبداهو
قلتا ليها : شنو !!
قالت لي : عايزة اعمل هدايا يعني قفغ فرح وبرطمان السعادة ومن الحاجات دي ظريفة وبتقضي وشت وشغلها كويس ومرغوبة شديد
ابتسمت لما شفتها متحمسة كدا .. قلت ليها : طيب وحلو شدييد منتظرة شنو من بكرا القريبة دي أبدي وانا معاكي ي ستي
وقضيناها ونسة ونحن بنضحك سوى .. حضرنا لينا فيلم كدا .. وانا اصلاً كنت تعبان نمت قبل ما يحصل نصو اصلاً .
" ثناء "
وانا بحضر في الفيلم ضحكت وانا بقول ليهو : ياخييي الزول دا ما جادي
لما لقيتو ساكت .. عاينت ليهو لقيتو نايم .. ابتسمت مسافة .. ختيت يدي على شعرو وانا بمشي فيها وبعاين ليهو .. نزلت راسو براحة وختيتو في رجلي .. بسرح شوية فيهو .. وأفكر شوية في موضوع شغلي الجديد القلتا عايزة اعملو دا .. وانا بالحالة دي لقيت روحي نمت .
" عمار "
فتحت عيوني .. واول حاجة شفتها ثناء .. كانت راقدة ومتكلة على ضهر الكنبة .. وانا خاتي راسي ف رجولها .. دقيقة بس انا لما نمت كان الفيلم شغال .. ابتسمت لما لقيتها خاتة يدها في شعري .. وعرفت انها هي الرقدتني كدا .. قبل ما اقوم .. بستها في راسا مشيت استحميت وجهزت سريع .. عملت لي كبايتين شاي وجيت صحيتها ..
اول ما فتحت عيونا قالت لي : انت متين صحيت !!
قلتا ليها : قبل شوية ،، قومي اتسوكي سريع عشان نشرب الشاي سوى
قامت وبعد ١٠ دقايق كدا جات وقَعَدت معاي . شربناهو سوى ونحن بنتونس .. قلتا ليها : اها الليلة حتعملي شنو !!
قالت لي : والله شريفة وهند جايني حنتونس شوية كدا ..
قلتا ليها : اهاا ،، طيب لو بقيتي طالعة ولا كدا اتصلي وريني اول !!
قالت لي : اكيد ،، معقولة اطلع بدون اذنك يا الباشا راجلي
ياخي لما قالت راجلي دا بقيت بعاين ليها كدا .. ضربتني بالمخدة ..
قلتا ليها : ينعل ابو الزول البعاين ليك زاتو ياخ
وقعدنا نضحك سوى .. بعدها انا طلعت ومشيت على العيادة .. وانا في العربية ابتسمت مسافة وانا بفكر في الحاجة العايز اعملها نهاية الاسبوع .
" ثناء "
قمت رتبت المكان اصلاً م كان جايط شديد .. دخلت استحميت وغيرت .. شوية والباب دق عرفتهم جو .. مشيت فتحتو ..
شريفة : ياا عروووس
هند : شنوو يا مزة
ضحكت وسلمت عليهم قبل ما اقول ليهم : نورتو ياخ
دخلو جوا .. ضيفتهم عصير وكان في تحلية كتيرة برضو ختيت منها .. جيت قعدت معاهم وبقينا بنتونس سوى ..
ونحن في ونستنا دي..تلفوني ضرب وكان في اوضتي .. دخلت اشيلو .. حسّيت للحظة اني اتوترت وصوت قلبي دا بقا مسموع في الدنيا كلها لما قريت الاسم .. قلتا بصوت واطي وهزيل : كريم .