قصة بالحلال
البارت الثالث 3
بقلم ثناء معتز
"عمار"
اول ما وصلنا ونزلنا ركبت شريحتي .. واتصلت على مصعب ( اخوي ) : الوو ،، ااي ااي وصلنا ،، وين !! ايواا خلاص تمام هسي طالعين عليك
وقفلت منو .. التفت وقلتا لي ثناء : يلا هو جا برا
جرينا الشنط وطلعنا .. اول ما شافني جا وسلم علي شديد وهو بقول : والله ياخي كبرت وبقيت عريس سبحان مغير الاحوال
ثناء ضحكت .. التفت وسلم عليها .. وشوية كدا جانا جاري همام ( ولد مصعب اخوي ،، عمرو ٥ سنين ) .. شلتو فوق وانا بقول ليهو : هوووبااا حبيب عمو البطل اخبارك ي فردة
وبقيت ببوس فيهو وبضحك معاهو..بعدها سلم على ثناء وهو بضحك .. جرينا الشنط ورفعناهم في العربية وطلعنا .. والشارع كلو قضيناهو ونسة لغاية ما وصلنا شقتنا .. التفت على ثناء وانا بقول ليها : يلا انزلي
نزلنا وانا ومحمد شلتا الشنط وطلعناها الطابق التاني .. محمد قال لينا : يلا ي عرسان بعد دا اخليكم ترتاحو تصبحو على خير
ثناء قالت ليهو : لا ياخ اتفضل شوية
مصعب : الجايات اكتر انتو زاتكم جيتو تعبانين تاخدو راحتكم وكدا
ابتسمت وهي بتقول ليهو : تسلم عذبناك معانا
التفت عليها وانا بقول : عذبتينا ساي
قعد يضحك وودعنا ومشا .. التفتت علي وقرصتني في يدي وهي بتقول : عذبتك انا صح حسابك معاي جوا
دخلنا وقفلنا الباب .. مشيت على الضو فتحتو والتفت اشوف ردة فعلها على الشقة .
"ثناء"
لما ضوا المكان .. بقيت بعاين ليهو بتفاجئ .. احساس انو كل الديكور دا نفسو الاخترناهو انا وعمار على اساس شقة صحبو .. عاينت ليهو مسافة ورجعت عاينت للمكان وتاني عاينت ليهو قبل ما اقول : دقيقة يعني !!
وسكت .. ضحك وهو بقول لي : بالظبط ي حلوة كنت عايز أعملها ليك مفاجأة بس بذوقك
فضلت اعاين ليهو ف عيونو مسافة وانا احاسيسي كلها ملخبطة .. ابتسمت قبل ما اقول ليهو بهدوء : بجد ما عارفة اقول ليك شنو
مسك يدي وقال لي : عايني ي ستي ما تقولي اي شي المهم انك انبسطتي ،، صح !!
هزيت راسي وقلتا ليهو : ااي
لا شعورياً دموعي نزلت .. عاين لي بخلعة وخت يدينو على خدودي وهو بسمح فيهم وبقول : ي بت مالك في شنو بتبكي !!
هزيت راسي وانا بقول ليهو : لا ولا شيء بس احساس المفاجأة حلوة وكدا
كان بعاين لي جوا عيوني وكأنو ما مصدق .. قال لي : متأكدة !!
هزيت راسي وقلتا ليهو : والله ،، يلا خلينا نخش غرفتنا عشان نرتب الحاجات دي وننون طوالي
وانا ماشة على الغرفة التفت عليهو كان لسا واقف مكانو .. وهو شبه سرحان .. مشيت وقفت قدامو وانا بقول ليهو : هييي اهلاً ممكن نتعرف انا ثناء واقفة قدامك
قال لي بغمزة : معليش ماف طريقة ي مزة انا بي مرتي
ضحكت وجريتو وانا بقول ليهو : يلا بلا حركات معاك..
رتبنا حاجاتنا ف الدواليب وعلى طوول من التعب نمنا ..
صحيت بصوت تلفوني وهو بضرب .. عاينت لقيت عمار نايم مشيت شلتو واتفاجأة لما بقيتو متصل
رديت بصوت مهزوز : الو
جاني صوتو وهو بقول : تعرسي !! تعرس ي ثناء وتخليني كيف !! كيف بعد الحب الحبيناهو لبعض دا كلو تمشي وتعملي فيني كدا
للحظة بقيت برجف كلي من التوتر وانا بقول ليعو : بس ،، بس انا ما خليتك انت ،، انت الكنت سبب في نهاية علاقتنا بعدين مش خلاص على اساس نسيتني ،، ضارب لي تاني ليه وريني !؟
قال لي : ثناء ،، انا بحبك لي هسي والله بحبك خلينا نرجع لبعض
قلتا ليهو : انت مجنون !! انا متزوجة وبي راجلي وما عايزاك
قال لي : متاكدة !!
فضلت ساكتة مسافة
تاني قال لي : ثناء بتكلم معاك ،، انتي قدر كلامك دا !!
لقيت دموعي نزلت وانا بقول ليهو : ك ،، كريم انا
وسكتا .. قال لي : انتي شنو !!
فضلت ساكتة وصوت شهقاتي من البكا بيعلى
قال لي : ثناء حبيبتي اسمعي كلامي وأنهي علاقتك بي راجلك دا واتطلقي وانا ح اجي وأتقدم ليك .. خلاص ؟
اتوترت وبعد تضارب تفكير كتير قلتا ليهو : كريم بجد !!
قال لي : بس خليكي واثقة فيني
دموعي نزلت وانا بقول ليهو : بحبك ،، بحبك يا كريم
شوية وحسيت بحركة التفت لقيتو عمار .. كان بعاين لي بكسرة كدا .. من الخلعة تلفوني وقع من يدي .. جا علي وهو بقول لي : ثناء !!
صحيت من النوم مخلوعة وعاينت يميني لقيت عمار نايم .. تاني عاينت شمالي لقيت التلفون قاعد شلتو اتفقدو ما كان في شيء وانتبهت انو الساعة ٢ صباحاً .. مسحت على وشي بيديني وانا بستغفر لما اتأكدت انو دا كان حلم .. قمت دخلت الحمام اتوضيت وطلعت فرشت المصلاية وما عارفة روحي صليت كم ركعة وانا في كل سجدة بدعي كتير وببكي .. ما عارفة ببكي لي بس كل شيء جواي متضارب ما فاهمة انا مالي او الحاصل علي شنو .. بعد حكاية ساعة كدا رفعت المصلاية وبي توبي زاتو مشيت شربت موية وقَعَدت في الصالون .. شلتا تلفوني وبدون ما احس فتحت المحادثة البيني وبينو .. بقيت اقرا كل حرف واتذكر في كل حاجة ودموعي نازلة .. وفتحت الاستديو وانا بتفرج على صور طلعاتنا وكل شي .. ختيت التلفون جمبي وضميت رجولي علي وانا ببكي بحرررقة .. ببكي
كل شيء جواي ببكي ال ٥ سنين الانتهو في لحظة وكأنو ما كنّا في يوم سوى .. بكيت اهتمامي بيهو ووقفتي معاهو وحبي ليهو حتى برغم كل القسوة الكان بتعامل بيها معاي وانا في بكيتي دي رجعت بذاكرتي لحاجات كتيرة حصلت زمان
فلاش باك
- كريم هو شنو الما كلمتك لي !! قلتا ليك اتصلت عليك مليون مرة بس انت ما رديت بعدين وين المشكلة اذا طلعت مع شلتي واتفسحنا دا موضوع يستاهل الشكل دا كلو هسي ؟
- ااي يستاهل ي ثناء .. يستاهل .. واقول ليك شي !! انا زاتي فترت من اهمالك وعدم مراعاتك لي علاقتنا وزعلي
- شنوو !! دقيقة ي كريم بالعداوة !! انا الما مراعية !! طيب هسي دا موضوع نكبرو يعني ما اي زول بطلع حتى انت بتطلع مع اصحابك
- ايواا عايزة تقلبي الموضوع انا وانت ونتشاكل صح
- كريم ما
- بدون ما ولا غيرو واسمعيني ي ستي م تكتري كتير من الاخر كدا شكلو العلاقة دي وصلت طريق مسدود وماف منو رجعة
ك ،، كريم قصدك شنو
قصدي واضح ،، انو ما ينفع نكمل سوى ي ثناء ،، من هسي انتي في طريق وانا في طريق
وقفل الخط .. صفارة الخط لما قفل حسيتها وقعت على مسمعي زي الحاجة البعييدة .. كريم !! كريم خلاني !! علاقتنا انتهت .. ط ،، طيب لي كدا !! سويت شنو انا بس عشان طلعت مع شلتي !!
كانت اصعب فترة في حياتي الفترة الكنت بتجارو فيها كريم دي .. عملت اي شيء ممكن يطّلع في يدي دخلت معاهد اجتهدت اتعرفت على ناس جدد .. وفي نص كل دا كنت كل ما احاول ارجع خطوة لورا وأعاين على علاقتنا واخت امل في انها ترجع هو كان بيطفي الأمل دا جواي بكل قسوة .. بعد ما اقتنعت تماماً انو دي حاجة انتهت بحق وحقيقة .. رجعت اشوف حياتي .. شوية شوية بديت اتجاوز .. وما حاولت نهائي اخش في علاقة حب او حتى فكرت .. ما بسبب الخوف .. بس مرات الكسرة بتكون سبب في اننا نكون واعيين اكتر في اختياراتنا وتجربتنا الجديدة بس حتى انا ما اخدت فكرة تجربة جديدة .. لما جا موضوع عرسنا انا وعمار .. كل العملتو شي واحد .. اني من قبل الخطوبة ولغاية قبل يوم من العريس بليل انا كل مرة بستخير .. لغاية ما تم كل شيء .. ما بكذب اني انبسطت شدييد فترة الشهر العدا دا .. بس كل ما احاول اخد منحى أمن شديد واقول كل شيء تمام .. برجع خطوة وبركز .. ما خوف بس في حاجة اسمها اتمهل .. عمرك ما تندفع شديد في حاجة جديدة في حياتك حتى ولو ما جديدة اي نوع من انواع علاقاتنا لازم نخلي فيها توازن .. يعني لا تشد شديد ولا ترخي شديد لانو في الحالتين ديل انت خسران ..
كتبت الكلام دا في دفتري .. وقبل ما اقفل الصفحة لاحظت انو دموعي نزلت في جزء من الورقة .. مسحتو براحة وقفلت الدفتر وعاينت للساعة لقيتها ماشة ل ٤ ونص واصلاً خلاص الصبح جا .. قمت صليت وقلتا اقوم اصحي عمار .. ما بعرف حصل شنو بس اظني في صلاتي وبعد خلصت رقدت ونمت في مكاني
عمار
فتحت عيوني براحة وعاينت لقيت ثناء ما جمبي .. قلتا معناها صحت .. قمت وانا ماشي الحمام عاينت لقيتها راقدة في المصلاية في الارض .. عاينت ليها بإستغراب ومشيت قعدت جمبها في الارض وقلتا ليها : ثناء
وانا بهز فيها براحة
فتحت عيونا بتعب .. ما بعرف بس حسيتا ما طبيعية حتى ملامح وشها وعيونا كانت تعبانة .. سألتها بقلق : مالك نايمة هنا ،، وبعدين لي شكلك تعبان كدا انتي كويسة !!
قامت وهي بتقول لي : انا كويسة كويسة م تخاف بس نمت وانا بصلي ف الصبح
فضلت بعاين ليها ف عيونا مسافة .. على قدر الضحك البتضحكو ووشها الدايماً مبتسم دا .. بس اعتقد انو اقل زعل بيبان لو طلعتو بي بكا او كدا .. وخاصة بيظهر في عيونا .. ما حبيت اضغط عليها شديد .. قلتا ليها : طيب انا خاشي الحمام ممكن ي مدام ي ظريفة انتي نشرب شاي من تحت ايديك !؟
ضحكت وهي بتقول لي : انت تأمر
سبحان الله .. حتى وفي كل التعب الانا لاحظتو في ملامحها دا .. بتضحك وبتحاول تكون عادية .. قمت دخلت الحمام استحميت وكدا .. وطلعت قلتا اصلي مسافة هي تكون خلصت الشاي .
"ثناء"
قمت دخلت حمام الغرفة التانية .. غسلت وشي وكدا .. طلعت عملت الشاي سريع وندهت على عمار كم مرة ما رد .. دخلت الغرفة قلتا اشوفو .. قلتا بصوت باين : عمار
سمعت صوت باب الحمام فتح .. جا طالع وهو لافي البشكير في نصو .. عاينت ليهو ولما شفتو كدا قلتا ليهو : ال ،، الشاي جاهز تعال
وجيت اطلع قال لي : ثناء
كنت واقفة ومدياهو ضهري .. مسكت بيدي اليمين طرف بلوزة البجامة شديد وانا بحاول اتمالك نفسي من التوتر .. التفت عليهو براحة وانا مبتسمة وبتقول : ايوة !!
جا علي وكل ما يقرب انا بحس صوت ضربات قلبي بيعلى زيادة وكل الكون سامعو .. مفروض اكون اتعودت خلاص على اننا سوى بس لسا .. لسا كل ما يقرب او كدا بحس وكأنو اول مرة يكون جمبي ..
وقف عاين لي مسافة في عيوني ومشا يدو في خدي وهو بقول لي : وريني مالك
اتوسعت عيوني بإستغراب وانا بقول ليهو : مالي
قال لي : ما كويسة ،، كنتي بتبكي انتي صح
قلتا
ليهو : ااا ابكي لا ابداً بس يمكن عشان بليل ما نمت كويس وو..
خت اصبعو في شفايفي وهو بقول لي براحة : هشش طيب هشش روقي
فضل يعاين لي جوا عيوني مسافة .. وبعدها حضني شديد وهو بقول : خليكي عارفة انا هنا ولسا باقي على كلامي وحا افضل دايماً اقولو ليكي ثناء اعتبريني صحبك واخوك وكل شيء قبل راجلك وبتقدري تحكي وتقولي اي شيء وانا دايماً ح اسمعك تمام
وفي لحظة زي دي .. ما لقيت نفسي غير مسكت فيهو وما قدرت امسك روحي اكتر من كدا .. بقيت ببكي بصوت لما بشهق .. كنت تعبانة .. من شنو ما عارفة يس حاسة انو في شيء لسا جواي غلط ما مفهوم انا مالي !!
لما لاحظ لي ببكي كدا هو زاتو قلق .. عاين لي في وشي ومسك يدي وقعدنا سوى .. قال لي ثناء عليك الله م تقلقيني في شنو
وبقا بسأل ويهدي فيني
بعد شوية هديت ومسحت دموعي .. قمت غسلت وشي وجيت قلتا ليهو : ماف شيء
جا وقف قدامي وقال لي : ثناء كيف ماف شيء وانتي الليل كلو شكلك كنتي بتبكي وهَسي قلتا ليكي كلمتين دموعك ما وقفت وبكيتي بكية زول متضايق من حاجة شديد في شنو مالك !! زعلتك في حاجة انا او غلطت عليك !!
هزيت راسي وقلتا ليهو : لا ابداً والله ماف شيء زي دا ،، واصلاً وا عملت شيء يزعلني منك بالعكس ،، بس يمكن مشتاقة لي ناس بيتنا شوية
لما حس بي بحاول اقفل وأغير الموضوع ما ضغط علي وقال لي : طيب راحتك يا بابا
باسني في راسي مسافة وقال لي : بس البس واجيك نشرب الشاي تمام
قلتا ليهو : طيب
طلعت وهو دقيقتين وجا وراي .. قعدنا في الصالون وشربنا الشاي وهو بحاول يتونس ويفتح مواضيع معاي .. شوية كدا تلفونو ضرب وكان جوا الغرفة .. مشا وشوية كدا جا وهو بتكلم وبقول ااي ااي جمبي ي خالتي هاك ليها
مد لي التلفون وهو بقول لي دي امك
شلتا التلفون وقلتا بيها : ماما كووويسة كويسة انا الحمدلله كيف انتو الحمدلله اكلمو اا كلمتيهو خلاص تمام للمساء تمام اوكي باي
قفلت منها وعاينت ليهو .. قال لي : خليكي جاهزة بعدين تمام !
قلتا ليهو بإبتسامة : طيب
جا وقعد جمبي وقال لي : طيب مدام بعدين نحن طالعين تعالي احكي ليك دا
وبدون مقدمات جراني عليهو وقعدني في حضنو .. بقا بيلعب لي في شعري وهو بيحكي
قال لي : طبعاً لما كنت صغير .. اول ما يغسلو الهدوم ويكووها .. انا بجي بنزلها من الدواليب كلها بفضيهو تماماً وبنوم جواهو
ضحكت وقلتا ليهو : يعني جواط بالواضح كدا
قال لي : هي ما جوطة لكن شنو مزاج النوم كان هناك
بقيت بضحك فيهو .. شوية وقال لي : بس الخوف بعدين ولدنا يجي زيي كدا
طبعا لما قال كدا رفعت عيني عاينت ليهو .. وهو بقا بعاين لي مسافة .. ابتسم ابتسامة خفيفة وهو بخت يدو على خدي وبقول لي : كل شيء حيكون تمام ،، ما تزعلي وتشيلي هم
مسكت يدو وقلتا ليهو : ان شاء الله ي عمار ،، ان شاء الله
وما حسيت بنفسي وانا نايمة في قعدتنا دي كدا .. صحيت لقيتو هو صاحي وبعاين لي ولسا نحن في شكل قعدتنا زاتا .. قلتا ليهو بصوت تعبان : انا ،، انا نايمة من متين
قال لي: ليك حكاية ساعتين ونص كدا
اتوسعت عيوني وانا بقول ليهو : ودا كلو ما صحيتني وفضلت قاعد كدا ؟!
قال لي : عارفك امس م نمتي كويس م حبيت اصحيك وبعدين انتي زعلانة ماك اهو انتي كسبتي و نمتي وانا كسبت..
وسكت
فضلت بعاين ليهو وقلتا ليهو : انت كسبان شنو !!
ضحك وهو بقول لي : شوفتك ي مجنونة
وجراني من شعرتي .. قلتا ليهو : اخخ براحة
ضحك وهو بقول لي : يلا كفاية الليلة دلع زيادة عن اللزوم قومي اجهزي خلينا نمشي لي اهلك زمن الغداء جا
قلتا ليهو : تمام نص ساعة وبكون جاهزة
جهزنا الاتنين وطلعنا .. اصلاً كانو جابو عربية عمار ووقفوها ليهو قدام البيت .. فأول ما نزلنا ركبنا واتحركنا طوالي..
ياخي لما وصلنا انا ما صدقت جيت جارية من العربية ودقيت الباب واول ما فتح لقيت اني في وشي ياخي نطيت فيها وهي بقت تكورك وتضحك : يا بت انزلي مني راجلك قاعد
بستها في راسها كتير وسألتها من سحر ورتني انها فوق في غرفتها .. خليتها في وقفتها ديك مع عمار وطلعت .. عايزة ادق الباب واعمل محترمة احساس اني بقيت ما من ناس البيت بس قبل ما ادقو كدا هي جات طالعة .. كانت عيونا مورمة كدا ومحمرة .. بدل ما اسلم عليها سألتها بخلعة : سحر مالك !!
اترمت في حضني وهي بتبكي لما بتشهق بصوت .. دخلتها جوا الغرفة وانا بقفل الباب وراي .. قعدنا في السرير وسألتها كتير ما ردت بقيت بحاول اهدي فيها .. لما راقت عاينت ليهاا ف عيونا شديد قبل ما اقول ليها : حا تحكي لي ولا يفتح الله !!
اخدت نفس مسافة قبل ما تقول : اتشاكلنا تاني
عاينت ليها مسافة قبل ما أمسك يدها واقول : عايني ي سحر ،، اسمعي كلامي الحا اقولو ليكي حبيبتي دا كويس ،، العلاقة او الحب براهم ما بينفعو اننا ناخد قرار اننا ننمسك بالزول ،، لانو اي علاقة بتستهلكك وبتخليىي دايماً في حالة بكا وتعب وزعل دي علاقة احسن انها تنتهي قبل ما تصل لنقطة ماف منها رجعة زي العرس والأولاد لانو وقتها انتي حتكوني مقيدة وبتحسبي حساب مية شي
اما انتي حالياً زي ما بقولو لسا في بر الأمان يعني خطوبة ساي ما حصلت ،، فضلت ليكي سنة وتتخرجي او هي اقل من سنة ،، اجتهدي فيها وشدي حيلك وجيبي نتيجة تمام لي وقتها بتكوني انبسطتي وانجزتي ،، حاولي الفترة دي اكتبي اقري اطلعي كتير غيري ألوان لبسك ،، المهم عيشي في جو بتاع انشغال الحاجات دي حتساعدك تتجاوزي ،، الكلام دا ما بقولو ليكي من فراغ وانتي عارفة كدا كويس وعارفة انا واحدة من الناس تعبت قدر شنو ،. فالحقي نفسك وفكري في كلامي كويس تمام
هزت راسا وهي بتقول لي : حاضر
ابتسمت وانا بقول ليها : يلا قومي غسلي وشك كويس وروقي عشان ننزل نقعد مع ماما وعمار
فعلاً شوية ونزلنا.. سلمت عليهو وقعدنا نتونس كلنا .. اتغدينا وقضينا وقت ظريف .. ونحن راجعين سحر قالت لعمار : ما تخليها معانا الليلة ما ممكن !
التفت وانا بضحك وبهظر وبقول ليها : والله شوف الدنيا مفروض احنس عشان ابيت مع اهلي
كلهم بقو بضحكو .. وعمار قال ليها : يا ريت ياخ لكن تقولي شنو بقت مراة راجل ماف طريقة
ضحكت وهي بتقول ليهو : اي والله ،، بس جيبا لينا كتير
عمار : بس كدا !! انتي تأمري
امي : يا ثناء
عاينت ليها وانا بقول : ايوة !
قالت لي : عربيتك غسلوها ليكي امس هاك دا المفتاح
شلتو وانا بقول ليها : شكراً شكراً كنت ح أنساها والله
ودعناهم وطلعنا .. وكلمت عمار اني حا ارجع بعربيتي عشان برضو اوقفها قدام البيت
اي زول فينا ركب عربيتو واتحركنا على البيت لما وصلنا ونزلنا طلعنا فوق اول ما دخلت غرفتنا لقيت السرير ملااان شوكولاتات بطريقة بتاعت هبل .. شيبس ولبان وفي ميك اب .. كمية بتاعت حاجات .. التفت لقيت عمار متكل على الباب وهو مبتسم ..
مشيت وقفت قدامو وانا بحك في راسي وما عارفة بالضبط اقول شنو
"عمار"
لما وقفت قدامي كدا .. لقيت نفسي بجرها علي وانا بضحك وبقول ليها : ماف داعي تتوتري كدا عارفك عايزة تقولي شكراً ومن الكلام دا.. بس اعظم شكر لي انك تكوني جمبي دايماً ي ثنو
ضحكت وهي بتقول لي : اول مرة تقول ثنو
قلتا ليها وانا بقرصها على خدها : ايوا ثنو ،، وثنويتي براي كمان
ضحكت بخجل وهي بتقول : امم براك
هزيت راسي وانا بقول ليها : ايوة ،، عندك اعتراض لا سمح الله
زمن شفايفها بإستهبال وهي بتقول لي : يمكن يعني ما..
ختيت اصعبي على شفايفها وانا بقول ليها : خلي في علمك انو انتي ملكي ،، ملكي براي ولي ،، واكبر دليل انو في كل جوطة الدنيا والحاصل ومهما لفيتي وطلعتي وانا دورت ومشيت هنا وهناك وجيت ،، اخرنا غرفة ونحن سوى ،، يعني لما اقول انتي لي براي ،، يعني لي براي ،، وطول العمر
لقيتا بتعاين لي بنظرات انا زاتي ما فهمتها هي شنو .. للحظة حسّيت اني يمكن قلتا شيء غلط .. حاولت تداري الشيء الجواها وهي بتضحك وبتقول لي : طلعت بتقول كلام حلو يا محترم
ضحكت ليها وانا بقول : عندك أدنى شك في كدا
قالت لي : لا ابدا
وانا بعاين ليها ف عيونا مسافة .. حسيتا زي الاتوترت كدا قالت لي : اا ،، امم ،، انا عايزة امشي اغير هدومي
قلتا ليها : طيب امشي
وانا لسا ماسكها .. ضحكت وهي بتقول لي : طيب فكني
فكيتها وانا لسا واقف
عاينت لي وهي بتقول : طيب اطلع
فضلت لسا واقف وانا يضحك ..
بعدها ضحكت وهي بترميني بالمخدة وبتقول برا قلنا
قلتا ليها : امراً وطاعة يا سلطانة
ومرقت .
"ثناء"
اول ما طلع من الغرفة .. وقفت مسافة وانا بعاين على الحاجات الفي السرير .. قعدت وانا بفكر .. عمار دا معقول يكون حباني بس في الفترة دي !! يعني ايوة هو بيتهم بي شدييد وبيطلعها بطريقة حلوة .. بس هل دي بداية ولا هو مالو .. لانو لي هسي بين كل كلامو الحلو دا ما حصل قال لي بحبك .. ولا انا حتى قلتا ليهو كدا .. للان ما قادرة احدد علاقتنا وصلت اي مرحلة .. هي بسيطة وحلوة وما فيها زعل كدا .. او زي ما قلتا يمكن دي بداية .. بس ان شاء الله ما تكون كدا بس
بعد غيرت طلعت وقلتا ليهو ٥ دقايق بس خليك في البلكونة هسي بجيك .. مشيت شلتا شوكولاتة سوحتها وسخنت لبن خلطتهم وكان طعمو خرافي .. كبيتو في كبايتين كبار وشلتهم وطلعت .. لقيتو قاعد قعدت حمبو وانا بمد ليهو واحدة من الكبابي وبقول ليهو : اتفضل
سألني : دا شنو
قلتا ليهو : ضوقو بس
بعد ما شربو فضل بعاين لي مسافة قال لي : شربوت راقي
ياخي ضحكني ضحك ..قلتا ليهو : اهبل
وقضينا ليلنا دا ونسة وضحك .. ما طولنا في السهرة لانو صباح بكرا نحن الاتنين شغاالين وكدا .. فنمنا بدري بدري
"عمار"
صحيت الصباح بصوت المنبه حق تلفوني .. قفلتو بسرعة والتفت على ثناء لقيتها نايمة .. قمت بسرعة استحميت وكدا طلعت لقيتا طلعت لي هدوم وجهزتها ..
- صباح الخير
ابتسمت وانا بقول ليها : صباح النوور
- جهزت ليك هدومك ،، والشاي برا جاهز ،، انا كمان داخلة اجهز
- طيب
لبست بسرعة وشربت الشاي .. دخلت الاوضة عشان اقول ليها اني مارق لقيتا بتجهز او هي ج
هزت وواقفة قدام المراية وبتمرر الروج على شفايفها .. فصلت بعاين ليها مسافة ومشيت وقفت وراها
التفتت علي وهي بتقول : خير في شيء
ابتسمت وانا بقول : اتحصني بس وخلي بالك من نفسك ،، تمام
ضحكت وهي بتجضمني وبتقول لي : وحلاتي البخاف
انا
ضحكتني ضحك .. قلتا ليها : يلا يلا ..
ولما جيت طالع رجعت ولقيتا لسا واثقة في مكانا وبتعاين للباب وكأنها عارفة اني ح ارجع قلتا ليها بصرخة : حا نشتاااااق
رمتني بالمخدة وهي بتقول لي : كتييير بس اتخارج يلا
ضحكت ومرقت .
"ثناء"
مجنون
قلتها بعد ما طلع من الغرفة .. التفت على المراية واتأكدت من شكلي قبل ما اشيل شنطة الكمبيوتر وكم فايل واطلع اركب عربيتي واتحرك على الشركة .. جاني اتصال وكنت موصلة التلفون مع العربية ..
رديت : شوووووشوووو
جاني صوتها هي بتقول : اقسم بالله لو عارفة العرس بخليكي تفتري كدا يا عفنة ما كان خليتك تعرسي
ضحكت وانا بقول ليها : افترى شنو ي بت ما كدا والله اخر من يفتري عليك انا
قالت لي : جاية الشغل متين !!
قلتا ليها : م معرروف لسا لسا عروس جديدة
قالت لي : ثنااااء ياخي النبي تعالي
قلتا ليها : كوويس طلباتك أوامر ي شريفة بعدين نشوف الموضوع دا هسي اقفلي سريع دايرة اجهز الفطور للراجل دا
ضحكت وهي بتقول لي : يلا تمام لبعدين
قفلت منها وانا بضحك
اول ما وصلت الشركة من الغفير و الموظفين لأي زول بيسلم علي شديد .. علاقتي حلوة بكل الموجودين .. شوية وطلعت مكتب شريفة او ما دخلت رفعت عينا عاينت لي ونزلتها تاني رفعتها وهي بتعاين لي بتفاجئ : ثناء
قامت وانا جريت عليها وانا بقول ليها : مووو شششش تتتاااقيييننننن
بقت بتضحك وسلمت عليها شديد .. قالت لي ي عفنة ما قلتي ما جاية
قلتا ليها : الزول ما يعمل ليكي مفاجأة
قالت لي : سجم المفاجئات كان كدا
ضحكت وانا بسألها : وين هند
قالت لي : فوق ف الكافتريا مع محمد
قلتا ليها : امم اتشاكلو تاني ولا شنو
قالت لي : لا م اعتقد
قلتا ليها : اهاا طيب بس تنزل بلاقيها ،، ووين بقية الشباب
قالت لي : ما عارفة والله كانو قاعدين وطلعو بس بجو بعد شوية
قلتا ليها : تمام
قالت لي : خلاص ي مديرة على شغلك بعد دا
ضحكت وانا بقول ليها : حاااضرااات كتيرة يلا لوقت البريك
ومشيت على مكتبي في الطابق الفوق مكتب بقية الموظفين .. ومن هنا احب اقول ليكم اني ماسكة إدارة قسم المالية في الشغل .. وزي ما عرفتو انو ك قسمنا دا كنا ف الجامعة شلة و زي جاتنا ضربة حظ كدا ووقعنا سوى صحبتي شريفة وهند .. اما الاولاد عرفتو منهم محمد .. والاتنين التانيين هاني وعبدالله
قعدت وعلى طول فتحت الكمبيوتر حقي وختيت الفايلات والدفاتر قدامي وبديت شغل
شوية كدا وسمعت صوت الباب دق عاينت لقيتا هند
ياخي سلمت عليها سلام وكنت مشتاقاها شديد .. قعدنا سوى ونحن بنتونس ..
سألتها : اخبارك انتي ومحمد شنو
قالت لي بزعل : تمام
قلتا ليها : طيب مالك
ردت لي : لا ولا شيء بس هو مسافر
(( طبعاً محمد دا ابوهو مدير الشركة وهو الشغلنا سوى ))
قلتا ليها : كيف كيف يعني
قالت لي : عديل ،، ابوهو قال ليهو يمشي يمسك إدارة الفرع التاني حق الشركة الفي قطر
قلتا ليها : امم طيب اذا كدا ما كويس يعني
قالت لي : هو اي كويس بس حماية انو خلاص يمشي دي واجعاني والله
قلتا ليها : روقي حبيبتي اصلاً ما فضل ليكم شيء وبعدين كلها شوية وتبقو ف بيت واحد ولا كيف !؟
قالت لي : ما دا المحيرني يا ثناء لي هسي ما فتح لي سيرة انو يجي يتقدم ولا كدا
سكت مسافة قبل ما اقول ليها : روقي كلنا عارفين انو بحبك وانو هو زول كويس ومحترم لأي درجة اصبري شوية وكل شيء حيحصل ولو حسيتي انو هو عدا وقت طويل ما عمل خطوة بعد داك فاتحينو بس ما تدخلي شكوك في راسك لانك اكتر واحدة شفتي بنفسك المواقف الاثبتت ليكي انو هو عايزك ،، صح ولا لا
هزت لي راسها وهي بتقول : فعلاً
ابتسمت وانا بقول ليها : ربنا يسهل ان شاء الله
شوية وسمعت صوت زول بقول : استاذة ثناء
التفت لقيتو الغفير ..
قلتا ليهو بإبتسامة : ايوا عمو ادم !!
قال لي : الشرطة تحت ،، بسألو منك
قلتا ليهو بإستغراب : انا !! يا رب في شنو
هند عاينت لي وهي بتقول : يلا خلينا ننزل نشوف الحاصل
لما نزلت تحت لقيت في حكاية ٤ شرطيين كدا والشركة كلها متلمية تحت حتى هاني وعبدالله كانو جو ..
واحد من الشرطة قال لي : انتي ثناء !!
قلتا ليهو : ايوا انا ،، اتفضل خير ان شاء الله في مشكلة ؟
قال لي : والله ي استاذة في شكوة اترفعت في شركتكم على مدير قسم المالية وعرفنا انو دي انتي ،، فلازم تتفضلي معانا القسم عشان تعرفي الحصل
كل الناس بقو بتلفتو وبتهامسو .. وانا بعاين ليهو بإستغراب .. قلتا ليهو : طيب دقيقتين بس
طلعت فوق شلتا شنطتي وانا نازلة لقيت شريفة وهند واقفين لي جمب السلم وهم مقلقين ..
مسكتني شريفة وهي تقول : ثناء في شنو
هند : ي بت ماشة معاهم لي
قلتا ليها : انا كمان م عارفة بس خير ان شاء الله امشي هناك وبفهم ال
حاصل شنو
طمنتهم كدا سريع وطلعت معاهم .. كان في عربية قدامي وعربية وراي وانا سايقة عربيتي في نصهم .. اتصلت على امي ما ردت في المكالمة الاولى .. بعدها ردت في التانية ..
- الوو ماما
- ايوة ي ثنوية ،. كيفك ي بتي
- انا تماام كيف حالك انتي
- بخيير والله الحمدلله بس ياهو الشغل
- ماما انتي مشغولة هسي
- لا ما عندي شيء الا بعد ٣ ساعات كدا في واحدة لازم اقابلها عشان قضية وكدا ،، خير في حاجة ؟!
- خير خير ي ماما ماف شي بس عايراك تجي قسم الرياض هسي بتقدري
- خير ي بت حاصل شنو
- اطمني روقي ي امي ماف شيء بس جو وقالو في شكوة مرفوعة على مدير المالية وانا هسي ماشة وهم معاي عايزة اشوف الحاصل شنو الحقيني هناك عشان لو في شيء نتصرف
- تمام تمام اقفلي ربع ساعة وبكون معاك
- تمام
بعد ما قربنا نصل كدا .. عاينت لتلفوني لقيت عمار ضارب .. رديت : الو
- هلا هلا بالمديرة
- اهليين كيفك
- الحمدلله كيف انتي
- انا تماام الحمدلله ،، عمار بس معليش عندي شغلة بسيطة كدا اخلصها وبرجع ليك تمام
- تمام ،، بس كأنك ما في الشركة !! في صوت شارع وعربات !؟
- ااي انا طلعت زي ما قلتا ليك شغلة بسيطة برجع ليك وبحكي ليك وبنتفاهم طيب !!
تمام خلي بالك
اوكي ،، باي
سلام
قفلت منو ولحظتها كنّا وصلنا .. ودخلت القسم على طول ودّوني جوا مكتب كدا شووية جا واحد من الضباط وقال لي : السلام عليكم
قمت وقلتا ليهو : وعليكم السلام
قعد في مكتبو قبل ما يقول لي : انتي مديرة قسم المالية لشركة ( .... ) صح
قلتا ليهو : ايوا انا ،، خير ان شاء الله الحاصل شنو
قال لي : مرفوعة شكاوي من شركات كتيرة انو العقود الإنتو بتعملوها معاهم ما تميتو دفعها للاخر دا غير انو في البنك مطلوب منكم قروش ما اندفعت لي هسي والحسابات كلها بتكون ناقصة
عاينت ليهو مسافة بإستغراب وانا بسألو : كيف كيف ،، بس كل الأوراق والحسابات انا راجعتهم لغاية اخر لحظة قبل عرسي وسافرت وجيت قبل يومين وفي فترة سفري ما حصل تعاقد جديد مع شركة اصلاً وكل الأشغال والعقود العندنا فيها دفع تمت بالظبط قبل اسبوع من عرسي
قال لي : عرسك كان متين
قلتا ليهو : قبل شهر ودي الفترة القلتا ليك فيها انو ما كان في اي شغل او عقد جديد فيهو دفع
سكت مسافة قبل ما يقول لي : طيب دقايق
مشا جاب اوراق وجا .. قريتهم وانا لسا ملخبطة الحسابات كلها ناقصة وماف شيء تامي واوراق داخلة في بعض .. شوية وجات امي داخلة سلمت علينا وحكيت ليها كل شيء شالت الأوراق وقرتهم قبل ما تعاين لي وتقول ثناء بجد الحسابات دي كلها ملخبطة وماف شيء اندفع كامل وفي شغل لسا واقف بسبب عدم اكتمالية الدفع
نقلت نظري بينها وبين الضابط القاعد مسافة وانا بحاول افهم شنو الحصل بالظبط واللخبطة دي كلها جات من وين لاني واثقة اني ما سبت ولا شيء ناقص وراي.