قصة بعدك قاتلى
البارت الحادي عشر11
بقلم اسماء محمد
♡♡ حاسة نفسي طايرة من الفرحة ، عمار لو بعد مني بموت المرة دي ، عمار شال حتة صغيرة من الحول و عمل لي مطبخ صغير متواضع ،، اتصلت علي رايا و قالت لي حابة امشي معاها السوق عاوزة تجيب فستان ( طلبتني لانو زوقي حلو و راقي☺️) مشينا السوق و جبنا احلى فستان ما فطرنا النهار كلو كنا لافين و الشمس سخنة في الرجعة قبل ما نحصل الموقف دوختا و اغمى علي رايا خافت علي شديد رفعو دخلوني المستشفى طلعتا حامل رايا اتصلت ل عمار و حكت ليهو الحاصل جا جاري و فرحتو ما تتوصف ،، قالي تاني ممنوع تمشي السوق ولا تدخلي المطبخ و ..... و ... رصا لي قوانين كتيرة ،، رجعنا البيت و عمتي كانت مبسوطة الخبر عدل نفسياتها شديد اتصلت لأمي جات قيلت معاي و دلعتني شديد ،، علاقتي اتحسنت مع ناهد بسبب عيالا و شهد للآن بتتكلم معاي بطرف لسانا و ما بتقعد بوجودي .........
♡♡ مرت تلاتة شهور على الحمل و عمار كان عايز يسافر لكن ما قادر يقولي .... صليت العشا حاضر و قريت قرآن و دعيت كتير ،، حسيت نفسي مضايقة استحميت لمن جيت طالعة من الحمام قالي اقيفي ، اتخلعتا في شنو؟ قالي السرير بعيد من الحمام انتظري اجي اوصلك ، شالني (ضربتو على كتفو ) هسي دا مشوار بعيد ،، حصلنا السرير قالي انت مالك ما قعدة تتوحمي زي باقي النسوان ، قلت ليو اكتر من كدا قالي ما بتطلبي كتير ،، ( مسكتا ليو انفو و قلت ليو قعدة اتوحم بيك) انت ما حاسي بقيت ادمااني قالي دابي فهمتا عشان كدا لاصقة فيني 😃 ضحكنا بطريقة هستيرية و نمنا في امان الله .
اليوم جمعة يوم مميز نزلتا مطبخي المتواضع و عملتا قراريص رهيفة بمزاج و عملتا تقلية ، رسلت لعمتي صحن ،، انا و عمار فطرنا سوا ،، كنت عارفة المدة انتهت و عمار ح يسافر لكن خاتة امل في قلبي انو يزيد الفترة او يخلي السفر نهائي ،، عمار قالي تعالي جنبي مشيت قعدتا جنبو و ختيت راسي في صدرو و قلت اهاا ، قالي هيومتي انا مسافر بعد اسبوع لكن بوعدك بجي بحضر الولادة و نرجع السعودية سوا كاحلى أسرة ،، المرة دي كنت متسهلة قلت ليو حاضر (لمن استغرب مني ) قالي خلي بالك على نفسك و على البيبي ما تنزلي المطبخ كتير تمام انا اتكلمتا مع امي و بكرة ح تجيب ليك شغالة تنضف و تطبخ ليك ، قلت حاضر ........ الاسبوع انتهى سريع بكرة عمار مسافر ،، اخر ليلة لي مع عمار ما نمتا نهائي ما شلتا عيوني منو لمن اصبحت كنت مراقباه و سارحة في ملامحو و كانو عارفة نفسي دي آخرة ملاقا لينا و كانو دي آخرة مرة اشوفو فيهاا .....
● و فعلآ عمار سافر ، البت الجابتا لي عمتي كويسة خالص و بتعاملني زي اختها ،، ناهد و شهد ما نسو مكايدم و رجعو يضايقوني و يطعنوني بالكلام و ناهد بعدت عيالا مني الله اعلم قالت ليم شنو لمن امشي عليم قاعدين يشردو مني و بقو ما بيتكلمو معاي و حتى عمتي معاملتها الكويسة ما من قلبا خوفآ من ولدا ...
اتصلت ل رايا و لنا قلت ليم تعالوني نفرق شوية و حكيت ل رايا عن معاملة ناهد و شهد معاي قالت لي ،، رايا = يا سجمانة انا زعلانة منك اكتر لانك ما قعدة تاخدي حقك .... ،، طيب اعمل شنو ؟ انا ما بحب المشاكل ،، رايا = منو قاليك تعملي مشاكل ،، لكن شيلي حقك لو طعنوك بكلمة انت اضربيم بكلام و ما تقصري سممي ليم بدنهم ،، كلام رايا صاح انا لازم ابقى قوية عشان ولدي كفاية غلب .