قصة انا لست جاريتك
البارت السادس والخمسون 56
بقلم اسماء محمد
راجح\نعم يا باتي وش مسهرك الى الحين؟؟
الشغالة\ماما رشا موووت يابابا...فيه ثلاثة رجال اقتل ماما مسدس..
ماما فيه مووت فيه مووووت .
وقف مفجوع\انتي وش تقولين .
باتي فهميني بدون صراخ وش فيها رشا تكلمي؟؟
باتي تبكي\ماما رشا مووت دم كتير حرامي ادخل بيت اقتل ماما...
أرتجفت يده وزاغت عيونه بحدة...
تملكته الصدمة ..
رشا..دم...ثلاثة رجال..مسدس..جريمة
وعى على طالب اللي يهزه بقوووة ويساله وش صاير برشا..
بعده عنه بقووة
وفتح جواله ..
اتصل باحد الأرقام..
راجح برجاء\أبو عادل تكفى هلي يا أبو عادل..
الحق على هلي زوجتي وولدي لحالهم وعيال الحرام دخلوا بيتي..
افزع لهلي افزع لأخوك تكفى..
ابوعادل قام يركض وبفزعة\أفا يالعلم ابشر بعزك وأنا اخوك..
خرج من جناحه يركض وسلاحه بيده..
ضرب على جناح ولده الكبير وقاله يجيب سلاحه ويلحقه لبيت جارهم راجح..
ونادى ولده الثاني وسحبه معه بسرعة...
ولده الكبير طلع وراهـ واتصل على الشرطة يطلب دعمهم..
قفل جواله وحرك السيارة بسرررعة وطالب معه..
اتصل على الشرطة ودلهم على البيت ..
شتم ولعن وهو يضرب السيارة بقهر..
لو حكم عقله قبل يطلع من الرياض ونزلها عند ام غازي مثل مايسوي دائماً..
مايقدر يتحكم بعقله وصورة وحدة مسيطرة عليه..
رشا ماتت وغرقانة بدمها..
غازي حاله مثل حالها..
دنيا من غير رشا ..
حياة تشبه الموت مايختلفون الا بالهواء..
لعن ابليس وذكر ربه وصار يدعي لها بقلب صادق مؤمن بالقضاء والمكتوب..
سمع طالب يتصل بعيال عمه ويطلب فزعتهم لبنت عمهم ..
وقال لهم انه جاي بالطريق مع زوجها من الشرقية..
دخل أبوعادل البيت وعياله الثنين معه..
شغل كل أنوار البيت ..
دار بالطابق الأرضي معهم ماكان فيه أثر لأحد..
طلعوا الدرج ركض..
ونادى ابوعادل بصوت عالي..
ابوعادل\ياهل البيــــت..حن هلك يا ام غازي..
طلعت الشغالة من جناح راجح وشايلة غازي بيده وتبكي..
باتي\ماما موت مافيه قووم..دم كتير يا بابا..
ابوعادل\لاحول ولا قوة الا بالله ..عادل خذ الولد منها ..
دخل ابوعادل جناح راجح وراح مكان ما اشرت له الشغالة..
صلى على النبي لما شاف الدم والمسدس ..
ورشا طايحة قريبة من الدم وكانها ميته وهذا دمها..
جلس على ركبه وحط أصابعه على رقبتها..
فرح لما جس النبض وتاكد من انها حية..
سدحها على ظهرها استغرب من وين تنزف ماشاف فيها إصابة..
طلعها من الغرفة ومن الجناح كامل..
سدحها بأحد الغرف الجانبية ورجع عند عياله بأعلى الدرج..
تلفتوا بذعر لما سمعوا طلق نار قريب منهم..
نزلوا عياله يركضون وأبوعادل أخذ غازي والشغالة ودخلهم عند رشا وقفل الباب عليهم..
ووقف برا قدام الباب وسلاحه بيده..
وقف السيارة عند الباب الخلفي ونزل بسرعة يشيل صديقه المجروح مع خويه..
حاولوا فيه يصحى ويمشي معهم بس هو كان غايب عن الوعي..
شالوه بالغصب وركبوه السيارة..
وين الكيس.
ماهو بوقته الحين حرك بسرعة هل البيت وصلوا.نتظرني باروح اجيبه واجي..
نزل من السيارة وتجاهل صوت صاحبه اللي يناديه..
شال الكيس وشاف خمسة يدخلون من البوابة الرئيسية..
وهذولاء كانوا عيال عم طالب..
ولما شافهم يركضون باتجاهه..
هرب منهم بسرعة وطلع من الباب الخلفي على السيارة..
سمع صوت الرصاص ورمى بروحه على الارض يحتمي منهم..
صاحبه حرك السيارة وهرب من المكان وتركه وراهـ..
وقف بسرعة وركض بالشارع والعيال وراهـ..
ماقدر يهرب منهم لأنهم حاصروهـ ..
مسكوهـ وضربوه من دون رحمة..
سالوهـ عن اخوياه وين يلقونهم قبل لا تجي الشرطة..
لانهم يعرفون الشرطة مابتسمح لهم يتصرفون براحتهم..
ماقدر يرد عليهم من ضربهم له وصراخهم عليه..
وصل لهم عادل وأخوهـ ومعهم الشرطة..
خذوه الشرطة من بين أيديهم بالقوة ..
وسحبوه القسم..
ومادروا عن السلاح المخبى بملابس عيال عم طالب..
وصلت الاسعاف وشالوا رشا وراح معها أكبر عيال عمها..
بعد مانزل ولدها عند امه وأخذ زوجته معهم المستشفى..
حاوطوا المكان أخذوا مسدس الجريمة..
وشالوا البصمات اللي بالغرفة وباقي البيت..
طلعوا الناس من بيوتهم لصلاة الفجر..
وتجمعوا على بيت راجح لما شافوا الشرطة والأمن..
وقبل شروق الشمس وقف سيارته بقوة وطلعت على الرصيف..
نزل مع طالب يركضون لداخل البيت..
مسكوه الأمن يمنعونه من الدخول..
صرخ فيهم وقال لهم انه راعي البيت واللي داخل هله..
طلع يركض وهو يشوف المباحث متوزعين في بيته..
دخل غرفة النوم وهو متأكد مابقى لها وجود لا في بيته ولا في حياته..
أرتجفت أرجوله وحس انها ماتقدر تشيله..
خانته حواسه ونطقه وسمعه..
يشوف دمها على الأرض ..
ولا يفهم كلام ابوعادل له..
ولا يسجيب لندا طالب..
تخيلت لعيونه غرقانة بدمها..
مخنوقة أنفاسها...بارد جسدها..وخاوي من روحها..
ابوعادل يهزهـ\الحمدلله على سلامة هلك ياأبوحمد..
انا اشهد انها كفوو وتنحط على يمناك..
طالب بامتنان\الله يرزقك الجنة على فزعتك يا الطيب..
ويحفظك من كل شر..
ألتفت عليهم وهو يشوف شيء غريب بعيونهم..
فرح..فخر..راحة..ورضا..
ابوعادل\يابن الحلال احمد ربك المهم انهم بخير وكل شيء بيتعوض..
راجح بهمس\بخير..؟؟
ابوعادل\ايه هم بخير ولا صار عليهم شيء..
راجح يأشر بيده\هذا الدم ماهو بدم هلي ...؟؟
ابوعادل بفخر\أكرم عليهم هلك..هذا دم واحد من عيال الحرام ...
ثورت فيه زوجتك وعساه ميت الحين..
مايدري وش يحس فيه..
يفرح إنها بخير وماعليها شر..
ولا يتطمن انه بيلقي عيال الحرام..
أو يخاف عليها من بعد هاالليلة والي صار فيها..
طلع من البيت من دون مايرد على الشرطة ..
اللي كانوا ينتظرون وصوله من ساعات..
انجبر طالب يظل معهم بالبيت..
وراجح راح لرشا..
دخل المستشفى بخطوات سريعة..
شد شماغه على وجهه أكثر ..
طول الطريق من الشرقية لـ الرياض وهو متلطم بشماغه..
دلوه على غرفتها ولما قرب منها شاف ولد عمها واقف قريب من الغرفة..
سلم عليها وكان بيدخل..
بس ولد عمها استئذنه ياخذ هله من عندها..
وطمنه ان ولدهم غازي عند هله وبخير..
بعد ما ابتعد ولد عمها مع زوجته دخل غرفتها..
وسكر الباب بهدوء..
قرب منها كانت نايمة على جنبها اليسار..
نزل الفراش من عليها لأنها متغطية بالكامل..
فتحت عيونها بتعب وناظرت فيه..
أرتجفت أصابعه لما شاف الخوف والرعب بوجها..
ملامحها كبرت كثير ولا كانها زوجته اللي تركها من يومين بس..
نظراتها التايهة بوجهه اربكته وكانها ماتعرفه..
سحب يده عنها ومالمسها..
حست بطعنة بروحها من حركته..
غمضت عيونها وصدت عنه..
راجح بحنية\رشا ياروحي...
شهقت بصوت مكتوم ورفعت نفسها بسرعة..
وقفت على ركبها وحضنته بخوف..
لمها بين يدينه بقوووة..
باسها على كتفها وراسها وهو يسمعها تشتكي له وتبكي..
رشا بصوت باكي ضعيف\قتلته ياراجح..قتلت انسان..
انا مجرمة قتلت آدمي..
راجح بحنية\لا ياقلب راجح..أنتي قتلتي كلب..
مايستاهل يعيش..تعدى على حرمة المؤمنين وهذا جزاته..
لاتندمين ياقلبي ..اللي سويتيه ماهو بذنب..
رشا\انا قتلت ذبحت نفس.. دمه بين يدين شووفه شوووفه ..
ثبت وجها على وجهه وهو يأكد لها..
راجح بثقة\يدينك طاهرة وبيضاء..مابه ما ينجسها..
رشا بصراخ\شوووف الدم بيديني..مو راضي ينغسل..
ريحته مافارقتني..شووفه ساكن بعيوني طايح بدمه..
ماقدر يهديها ويخفف احساسها بالخوف والندم..
اضطر يفقدها وعيها بحركة بسيطة بيده..
غفت بين يدينه بلحظات..
نزلها على فراشها وغطاها بهدوء..
قبلها على جبينها..
طلع من الغرفة يتصل بطالب يطلب منه يجيب ام غازي عند رشا..
وبعدها اتصل بصديق في الأمن الخاص..
وطلبه يتولى القضية رغم انها مو من اختصاص الأمن الخاص..
تكفل صاحبه بالقضية ووعده يكونون المجرمين مقبوض عليهم بغضون 12 ساعة وأقل..
وطمنه أكثر لما عرف ان فيه واحد من المشتبهين ممسوك بالقسم.
رفعت راسها بعصبية لما شافته جلس معها على نفس الطاولة...
ياسمين بعصبية\نعم..أنت بأي حق تجلس من دون استئذان..
سلمان بهدوء\بحق النسب ....
انحبس الهواء بداخلها..من صدمتها بكلمته..
حق النسب...؟؟
ركزت عيونها بعيونه وبشفايف ترتجف سألته..
ياسمين\أنت سلمان..؟؟
سلمان بتأكيد\نعم يا حرمي المصون أنا سلمان..
رمشت بصدمة\.
سلمان\نسيتيني يا ياسمين..؟؟!
ياسمين تناظره بصمت ولا ترد عليه...
سلمان\مثل ماتوقعتيني ولا خيبت ظنونك..؟؟
نزلت راسها بضيق..
هذا هو سلمان..زوجها الغريب عنها..
أول وآخر مرة شافته كان صاد عنها وطالع الطيارة راجع السعودية..
انقطعت اخباره عنها فترة طويلة..
لا رسائل ولا مكالمات...
مع انه ولا مرة خصها برسالة او مكالمة..
كانت علاقته باخوها ورسائله لاخوها مو لها..
يمكن بآخر الرسالة يذكرها بسلام بارد كرفع عتب..
شهقت بخوف لما حست بأصابعه على وجهها..
تراجعت على ورى وركزت نظراتها عليه..
سلمان\وين رحتي عني..؟؟
ياسمين بهدوء\عن اذنك عندي شغل..
سلمان ببرود\مع الايطالية؟؟
شغلك معها مو عاجبني وابيك تتركينه وماتترددي على دار الأزياء..
وقفت وردت عليه بكل ثقة..
ياسمين بسخرية\انت فقدت حق الأمر والنهي علي من أول ماوقعت ورقة زواجنا..
ورجوعك بعد سنين عشان تمثل دور الزوج مايناسبك..
مشت بسرعة وتوجهت لدار الأزياء المقابل للمقهى..
وهي لاحظت عيونه اللي تراقبها..
وأعلنت تحديها له بدخولها وهي تسلم على صوفي وتسولف معها..
ابتسمت بخبث على ملامح صوفي المستغربة من مسالمتها اليوم لها..
لانهم كل ما التقوا يتهاوشون وهديل توقف بينهم..
أنفتح الباب وألتقت نظراته بنظرات غازي الجامدة...
لحظات صمت...
ناظرهـ غازي بحنين لها..
وناظره هادي بحقد عليها...
هادي بقهر\وين هديل..
أنا أدري إنها عندك...وعندي الدليل اللي يثبت صحة كلامي..
هديل وينها..
غازي ببرود قاتل\البقاء براسك....
هادي بقهر\يومك قبل يومها...
دفه بقوة ودخل الشقة وصرخ باسمها...
وقف في الصالة وناداها بصوت عالي..
وغازي واقف ومستند على الباب بعد ماقفله..
هادي بحدة\ويــــنها..
غازي يناظره بأسى..
ملاحظ عيونه تلمع بالدموع مثل عيونها المدفونة..
يشوفها بعيونه..برجفة يدينه..
بشهقاته المكتومة..بحزنه السادي..
غازي بحسرة\تأخرت كثير ياهادي..لو جيت قبل سنة وشهور كان لقيتها..
بس اليوم مابقى لها وجود..مالها عوض بالدنيا..
هادي بغيض\خذيتها عشان تعتق رقبتي.
لا بركة فيك ولا في اخوك بقبرهـ..